قسطرة بتاعة قلب فبنقوم نوجههم انو يعملوا الحكاية دي فإذا كان فعلا وجد انو في ضيق في الشرايين طوالى نوجهه انو يعمل القسطرة بتاعة القلب وهى قسطرة إما علاجية وإما تشخيصية على أساس انو تحدد نوعية العلاج الذي هو يأخذه هل هو علاج جراحي أم علاج بتاع تركيب دعامات للشرايين أم هو ياخد العلاج الطبي لفترة طويلة جدا

مقدم البرنامج :

معنا اتصال الآن الو السلام عليكم

مشاركة عبر الهاتف :

وعليكم السلام معاك الفاضل محمد ادم – الجزيرة أبا  لدى سؤال يكاد يكون مشابه لسؤال الأخ أبو تسابيح أنا يدي اليمين بعاني في الرقدة ومرات ضربات القلب بتكون زائدة ومجرد اشرب القهوة أيضا الضربات بتكون زائدا وقت ارقد على يدي ما بقدر ارقد عليها فترة طويلة بتنمل طوالى مع ضربات القلب بتكون زائدة هل الشيء دا مربوط بضغط الدم وهل لها تأثير

د/ عادل البوشى :

بالنسبة لضربات القلب مع القهوة طبعا القهوة من المنبهات التي تؤثر على ضربات القلب ودائما اى إنسان يرقد على صفحته اليمين يعنى يرقد مسافات طويلة بيكون عندها تأثير في التنميل يعنى اليد بتنمل لأنو بيكون في ضغط للأوعية الدموية وبيكون في ضغط للعصب الماشي على اليد دي ناحية طبيعية عشان كدا نحن دائما نفضل انو الناس ما يرقدوا على أطرافهم لفترات طويلة لأنها ممكن تسبب هذه الأعراض ودي ممكن تكون حاجة طبيعية ما فيها اى مشكلة وإذا كان استمرت لفترة أطول أو أصبحت متكررة  وأصبحت مزعجة بالنسبة للشخص فلابد من معاينة الطبيب على أساس انو يحدد نوع المرض والسبب الاساسى الذي أدى الى الحكاية دي إنها تكون متكررة   

مقدم البرنامج :

شكرا أخ الفاضل نتمنى انو تكون استمعت لنصيحة دكتور عادل وإنشاء الله تعمل شوية فحوصات عشان تتأكد كتر خيرك كثير ، أيها الأصدقاء ما زلنا نتابع معكم عيادة على الهواء ، معنا اتصال ناخد الاتصال ونرجع عشان بعد كدا نتحدث في بعض الموضوعات الو السلام عليكم

مشاركة عبر الهاتف : 

وعليكم السلام معاك الطيب شنكيت – الصوفي شمال الدويم أنا عندي سؤالين للدكتور يا دكتور عايزك تحدثنا عن علاقة ممارسة الرياضة بشكل منتظم والحد من أمراض القلب التي أصبحت من الملاحظ إنها تشكل هاجس في الفترة الأخيرة نحن في السودان زمان ما كان عندنا أمراض القلب بالشكل المخيف الموجود الآن عايزنك توضح لنا علاقة ممارسة الرياضة بشكل منتظم والفترات التي ممكن تساعد القلب في انو يكون في حالة صحية جيدة أما الجانب الثاني من سؤالي أنا بلاحظ كثير من الناس في السودان هنا عندهم أمراض قلب يتجاهلوا تعليمات الطبيب يعنى بيضعوها جانب وتجدهم بيجاملوا أهلهم أو بعض الناس الواحد تجده يمارس أعمال شاقة أو بيعمل أعمال تدخله في مخاطر صحية بتالي هذه المخاطر قد تنعكس سلباً على أسرته من ناحية نفسية عايزنك توجه لنا رشتات مجانية في هذه النقاط عبر برنامج عيادة على الهواء ولك جزيل الشكر

مقدم البرنامج :

شكرا يا الطيب كتر خيرك ، معنا اتصال آخر ناخد الاتصال ونجيب على الأسئلة مع بعض دكتور الو السلام عليكم

مشاركة عبر الهاتف :

وعليكم السلام معاك  بشير محمد عوض الله – ريفي النهود لدى سؤالين أو ثلاثة للدكتور

مقدم البرنامج :

ناخد سؤالين يا بشير سريعين لأنو الزمن نحن بدأنا الحلقة متأخر شوية تفضل

مشاركة عبر الهاتف :

عندنا أستاذ في المدرسة قال لما يمشى أماكن عالية أو مثلا يطلع مكان عالي يشعر بإرهاق وتعب شديد عايز يعرف الشيء من شنو وتانى قال مثلا في الأحلام لما يكون نائم يحلم ولما يصحى بيشعر بتعب شديد وقلق الشيء دا علاقتة بالقلب شنو وشكرا  

مقدم البرنامج :

شكرا أخ بشير كتر خيرك كثير تفضل دكتور

د/ عادل البوشى :

بالنسبة لسؤال الطيب ممارسة الرياضة فالرياضة هي الصحة بالنسبة للإنسان يعنى نحن نعتبر انو العلاج الطبيعي المفروض يعمله الإنسان وياخدو طيلة حياته هي ممارسة الرياضة فالرياضة بتعمل شنو الرياضة بتقوى القلب وتقوى الرئتين على أساس انو شغل القلب والرئتين بممارسة الرياضة انو يشتغلوا كويس ويوجهوا الأوكسجين وكمية الأوكسجين الموجه الى جميع أعضاء الجسم بسهولة من غير اى تعب ومن غير اى مشكلة الجزء الثاني والمهم جدا في الرياضة فالرياضة هي بتوسع الشرايين وتوقى عضلات الجسم وتساعد على نمو الشرايين الصغيرة في العضلات ودا يساعد انو الإنسان يقدر يقوى عضلاته وانو كمية الدم المفروض تمشى الى الجسم تكون كبيرة وعلى أساس انو المجهود الذي يبذله يكون عنده له مقدرة إذا كان الإنسان لا يمارس الرياضة أول ما يبدأ اى نوع من الرياضة بتزيد ضربات القلب بتاعته وتزيد سرعة التنفس لأنو شنو عشان يغطى كمية الأوكسجين التي يحتاجا الجسم في القيام بهذه الرياضة دا بالتعود والرياضة المنتظمة دا كله بيروح وهذا يؤدى الى انو يمنع ترسيب الدهون في الشرايين ودا يساعد انو يجعل الشرايين فاتحة والعضلة تكون قوية وانو قوة العضلة حتى لما يبذل مجهود لأول مره تكون سرعة الضربات عالية ومع انتظام الرياضة سرعة الضربات دي تقل وبأقل مجهود عضلي ممكن يقوم بي اى عمل هو عايزو دا بالنسبة للرياضة عشان كدا نحن أول نصيحة ننصحها لي اى فرد عشان يتجنب جميع أمراض القلب هي الرياضة ولا زلنا نذكر الرياضة دي طوالى بالذات رياضة المشي بالنسبة لنا نحن تجاهل تعليمات الطبيب دي لأنو عندنا مشكلة بيرة جدا انو نحن مجتمعنا لسه ما عندو الثقافة الطبية المتكاملة مثلا واحد يكون مريض بالقلب يقول لك دا مريض بالقلب ما يتحرك من السرير ما يقوم ما يمشى ما يعمل ودا كله يسبب مشاكل زيادة نحن دائما لما نعطى العلاج للمريض ننصحه بتعليمات معينة نوجهه انو يمشى بمقدار كدا يشتغل شغل مقدرته فيهو كدا يعنى بيكون توجيهنا كامل وأنا أتمنى انو الناس دائما إذا كان عندهم علم يتكلموا إذا كان ما عندهم علم بالشيء ما يسكتوا يفتوا في الموضوع لأنو دا موضوع يؤثر مستقبلا على المريض وكلما الإنسان يكون متحرك يعمل ويشتغل ويشغل نفسو بالشغل ويشغل نفسو بالحركة وبيعمل رياضة بسيطة بالنسبة له حتى لو كان مريض بتاع قلب  ونحن نعتبر انو هذه الحكاية تساعد مساعدة كبيرة جدا في تجاوز المريض لمرضه

مقدم البرنامج :

سؤال أخونا بشير امكن السؤالين كانوا بيتكلموا عن المجهود الزائد بالنسبة لصعود السلم أو صعود مكان عالي

د/ عادل البوشى :

بالنسبة لسؤال بشير انو الإنسان لما يطلع مكان عالي أو سلم ويشعر بالتعب دي بتكون ناحيتين يا إما ناحية مرضية يا إما ناحية بتاعة انو الإنسان غير رياضي أول ما يبذل مجهود ودي نحن بنقول عليه انو الإنسان دا لا يبذل اى مجهود وأول يبذل مجهود فوق طاقته التي يعملا طوالى بيشعر لازم الجسم يعوض أو يزيد كمية الأوكسجين بتاعته في المناطق العضلية ودي بتحدث نتيجة للتسارع بتاع التنفس والزيادة في ضربات القلب ودا يؤدى الى شعور سيئ بالنسبة للشخص بي انو ما قادر يطلع السلم النوع الثاني انو إذا كان إنسان عادى وما عندو اى مشكلة وفجأة شعر بي انو طلوع السلم لا يقدر يطلعه أو يسبب له ضربات سريعة أو يسبب له ضيق في التنفس  ودا لازم يقابل طبيب عشان يحدد انو إذا كان في مشكلة في الرئتين أو مشكلة في القلب على أساس إننا نقدر نعرف السبب شنو  ونعطى العلاج اللازم بالنسبة للأحلام والتعب دي طبعا يشتغل فيها المخ أكثر حاجة ولها تأثيرات جانبية في كل الجسم ودي بتعتمد اعتماد كلى على الشخص  ووضعيته هل هو كان مرتاح لما نام أم كان هو تعبان لما نام أو يشعر بقلق شديد جدا ودي كلها لها تأثير ناتج عن الانفعالات العصبية والنفسية بالنسبة للشخص

مقدم البرنامج : 

الحقيقة امكن في بعض الأسئلة التي وردت الى البرنامج عبر البريد سؤال حول استخدامات الموبايل بالنسبة للناس العاملين ذي الأجهزة بتاعة تنظيم الضربات أو الأجهزة الصناعة أو الدعامات  هل يؤثر وضعها أو استخدام هذه الأجهزة التي فيها بعض الذبذبات    

د/ عادل البوشى :

بالنسبة للدعامات التي نركبها في الشرايين بتاعة القلب ما عندها علاقة بالموبايل نهائياً لكن العلاقة الأساسية الكبيرة هي بالنسبة للناظمات القلبية فالناظمات القلبية لها تأثير كبير جدا بي اى مجال كهرومغنطيسى يعنى مثلا التلفونات والموبايلات كلها تشتغل بي الكهروماغنتك فيلد فهي الحاجة الوحيدة الأساسية نحن دائما بنقول يا إما نستعمل سماعات وفى الجهة الأخرى من التركيب نحن دائما بنركبه في الجهة الشمال يعنى يتكلم بالجهة اليمين لازم الحته دي تقريباً تبعد 30 سنتمتر من الجهاز

مقدم البرنامج :

يعنى في بعض الناس يضعوا في الجيب   

د/ عادل البوشى : 

إذا كان بيوضع في الجيب  لا يقرب من الجزء الشمال أو يكون بعيد منه بمقدار 30 سنتمتر

مقدم البرنامج :

حقيقة نحن ما تبقى لنا كثير خمس دقائق فقط تفصلنا عن نهاية هذا اللقاء أيها الأصدقاء ما زلنا نتابع عيادة على الهواء ، دكتور البوشى امكن في سؤال مهم يرد الى البرنامج كثير جدا الذبحات الصدرية ما هو الأعراض وما هي الأشياء المفروض يعملا الشخص إذا عرف انو أو شعر بي انو في اى عرض لذبحة صدرية أو الناس الحوله يعملوا شنو

د/ عادل البوشى : 

بالنسبة للذبحة الصدرية هي طبعا بتظهر بألم في الصدر الألم في الصدر بيكون مساحته كبيرة ولا تكون مساحته صغيرة

مقدم البرنامج :

يعنى ما طعنة

د/ عادل البوشى :

ما طعنة ولا شكة بتاعة إبرة أو حاجة بالشكل دا فهي المدة بتاعته لها تأثير مثلا من الجزء الأول يقول لك لازم ثلاثة دقائق عشرة دقائق لكن اى ألم للحظات ما ناتج عن ذبحة صدرية الذبحات الصدرية بيكون دائما نوعين يا أثناء المجهود يا في الراحة يا إما تكون جلطة انسداد كامل للشريان ودي بتكون فترته أطول من ثلث ساعة الى نصف ساعة ودي يصاحبها ألم في الصدر يتركز على وسط الصدر في شكل بتاع ضغط وممكن الألم دا يعطى إحساس بألم في اليد أو الحلق السفلى بالنسبة للمريض أو يكون الألم يظهر في الخلف في الظهر ودا بيكون مصاحب له عرق شديد  جدا وممكن يكون مصاحب له استفراغ أو طُمام شديد وممكن يسبب بعض الأعراض الأخرى مثلا زيادة في ضربات القلب أو فقدان للوعي للحظات نتيجة لأنو مرات كثيرة جدا بيحصل انو ضربات القلب بتقل وبيحصل تسارع في التنفس نتيجة انو الشخص يبحث عن أوكسجين وممكن يكون في احتقان في الرئتين نتيجة الى الامتداد أو الطول بتاع الذبحة ودا بيؤدى الى قصور في عضلة القلب ودا يؤدى الى انو يكون في احتقان في الرئتين بالسوائل لذلك اى واحد يكون عندو ألم في الصدر يمتدد الى أكثر من ثلاثة دقائق عليه مراجعة الطبيب فوراً

مقدم البرنامج :

يعنى مرات الطعنات دي نربطا نقول غازات الناس تتحرك تتمشى شوية يعنى دائما بتكون في أشياء ذي دي الناس لوحدها بتاخدا نصائح ذي ما انت ذكرت مرات الناس تتطوع لوحدها وتعطى نصائح

د/ عادل البوشى :

دي مشكلة الآن معظم الناس بيحضروا متأخرين ودي واحدة من المشاكل الأساسية التي نواجهها لأنو العلاج بيعتمد اعتماد كلى على الزمن

مقدم البرنامج :

دكتور عادل نحن الحقيقة لأنو نعتمد على الزمن والزمن يداهمنا وكنا نتمنى انو نتواصل لأنو ما زال هناك عدد كبير من الأسئلة والموضوعات نشكرك كثير نتمنى انو نلتقي بك إنشاء الله في حوارات أخرى حسب ما يسمح زمنك إنشاء الله  شكرا جزيلا وكتر خيرك

د/ عادل البوشى :

شكرا جزيلا والنصيحة الأخيرة أنا انصح بها كل السودانيين انو يحاولوا يحافظوا على قلوبهم بي اى صوره لأنو مشاكله كثيرة

مقدم البرنامج : 

شكرا جزيلا دكتور/ عادل البوشى استشاري  القلب والأوعية الدموية مدير المركز القومي للقلب والصدر شكرا لكل الذين تابعونا عبر هذا اللقاء وعفواً للذين لم نستطع أن ندخلهم عبر الهاتف لكثرة الهواتف وضيق الزمن تحايانا  لكم  عبر عيادة على الهواء طه عبد الرحمن طه ، تحياتي عبر المايكروفون إسراء زين العابدين ، الإخراج طاهرة محمد احمد حتى نلتقي الأسبوع القادم بمشيئة الله عبر عيادة على الهواء في أمان الله .