مقدم البرنامج : هل لها علاقة بالاكل هل عندها علاقة بالوراثة يعنى هل ممكن يكون الشخص اكثر عرضة اذا كان عندو امه او خاله  

د/ مواهب بن ادريس الادريسى :

هى تجمع فى العوائل من اكثر انو تكون وراثية حقيقة لكن يقول لك الجين قد يكون له دور لكن لحدى الان هى تجمع عائلى يقول لك انها تحب بعض العوائل لكن هل هى لها علاقة بالجينات ام لا لحدى الان ما تم اثباتها بدليل انوفى تيمان يكون واحد عندو روماتويد والتانى لا وهم عندم نفس الجين

مقدم البرنامج :

طيب امكن بديتى بنقطة مهمة جدا علاقة الروماتيزم بالاغذية او السلوك الغذائى لكن قبل كدا معنا اتصال نستقبل الاتصال ونرجع نتكلم عن علاقة الروماتيزم والاغذية هل هناك اغذية تزيد من مشاكل الروماتيزم او تقلل منها اذا كان الناس ممكن تعملا عموماً معنا اتصال الان الو السلام عليكم

مشاركة عبر الهاتف :

وعليكم السلام معاك عبيد محمد – القرية 24 ريفى حلفا الجديدة انا عندى مرض فى الكلى والتهاب مفاصل وحقيقة التهاب المفاصل مع الكلى لا اتحمل وقابلت دكتور وادانى علاج وما نفع ماذا افعل

مقدم البرنامج : يعنى تكسير فى الجسم يا عبيد

مشاركة عبر الهاتف : نعم تكسير فى الجسم

د/ مواهب بن ادريس الادريسى : فى ألم فى المفاصل أو تورم   

مشاركة عبر الهاتف : والله ابداً ما فى

مقدم البرنامج : شكراً يا عبيد ربنا يديك الصحة والعافية ، معنا اتصال آخر الو السلام عليكم

مشاركة عبر الهاتف :

وعليكم السلام معاك آدم عبد الله محمد – مدينة الفولة انا الان عمرى حوالى 25 عام متزوج ولى طفل انا عندى وجع رأس من صغير ولحدى الان ما خلانى وكلما افحص لا تطلع لى اى حاجة تطلع الفحوصات نظيفة ويعنى الصداع كل اسبوع او 15 يجينى صداع يعنى يتم معى يومين

مقدم البرنامج :

خليك معنا يا آدم لحظة الدكتورة توجه لك بعض الاسئلة قبل ما نفقد الخط تفضلى دكتورة

د/ مواهب بن ادريس الادريسى : آدم مرحب بك عندك فقط صداع ما معه حاجات تانية

مشاركة عبر الهاتف :

معه وجع فى الرقبة وفى الانف والوجه المهم جسمى كله من الرقبة حتى الرأس وبكون تعبان وبكون ما عايز كلام الناس رقبتى ورأسى فقط بيوجعونى  

د/ مواهب بن ادريس الادريسى : ما عندك اى آلام فى المفاصل

مشاركة عبر الهاتف : ما عندى اى آلام فى المفاصل

د/ مواهب بن ادريس الادريسى : عندك اى جيوب انفية يا آدم

مشاركة عبر الهاتف : بعض الشىء احياناً عندى جيوب انفية من غير نزلة  

د/ مواهب بن ادريس الادريسى :

انت عارف يا آدم انو الجيوب الانفية من اكثر الاسباب بتجعل الواحد يكون عندو صداع مستمر مفروض تتابع مع اخصائى انف واذن وحنجرة  ويشوفوا هل الصداع دا له علاقة بالجيوب الانفية ام لا

مقدم البرنامج :

آدم نتمنى لك الصحة والعافية وذى ما قالت الدكتورة لازم تعرف سبب الصداع لانو هو فى حد ذاته ما مرض عموماً نحن نتمنى انك تتابع مع اخصائى عشان تصل الى التشخيص السليم ولو احتجت لمتابعة ممكن تتصل بنا عبر البرنامج انشاء الله ، دكتورة سؤال اخونا عبيد هو كان بيتكلم عن الحركة الصباح

د/ مواهب بن ادريس الادريسى :

هو تكلم عن آلام فى المفاصل عامة وشكلوا مصاب بمرض الكلى هو عموماً لو كان عنده مشكلة  أو قصور فى الكلى من اسباب آلام الجسم وآلام العضلات والمفاصل انو فى ارتفاع فى البولينة فى الجسم يعنى دى ايضا واحدة من السموم التى تؤثر فى الجسم وتعمل للواحد آلام المفاصل التى سميناها قبيل المفصل التفاعلى انو المفاصل تتفاعل مع اعراض وامراض موجودة فى الجسم تماماً ذى امراض الروماتيزم نتمنى انو سيد عبيد لو حاول يشوف بالظبط المشكلة وين فى الكلى هل هو قصور كلوي او مشكلة في الكلي مختلفة تماماً عن القصور حتي بعداك الواحد ممكن يعرف آلام المفاصل بتاعته سبابا شنو بعدين ايضا الزول لما يكون عندو مشاكل الكلي بيكون في ارتفاع فيما يعرف بالقاوت ايضاً انصحه انو يحتاج حقيقة انو يقابل اخصائي يعرف بالظبط الحاصل شنو والمشكلة وين عشان الناس تقدر ترد عليها  

مقدم البرنامج : الحقيقة نحن حنرجع دكتورة مواهب لحديثنا حول الروماتيزم وعلاقتها بالاغذيه

 د/ مواهب بن ادريس الادريسى :

فى علاقة لكن الحاجة انا عايزة انوه لها انو كثير من المرضى الذين يكون عندهم امراض روماتيزم بيسعوا يمتنعوا من بعض الاغذية ودى الى نوعٍ ما حاجة خطرة لكن انا عايزة اوعى الناس انو الواحد عندو مرض روماتويد أو زئبة حمراء يحتاج الى اغذية تقوى الجهاز المناعى يعنى طوالى لما يقولوا له عندك روماتيزم  ما تأكل لحمة ودا خطأ يعنى مرتين او ثلاث مرات فى الاسبوع لازم الواحد يتناول لحمة ولازم يتعودوا على اكل الخضار والفواكهة يعنى يزيدوا طبخ الاشياء بحيث انها لا تفقد القيمة الغذائية دى من الحاجات المهمة شديد فى حاجة تانية انو الناس يا حبذا تنتبه لى انو يأكلوا الخضروات لانو فيها قيمة غذائية عالية فيها فوائد جمة للجهاز المناعى يعنى عملوا ابحاث كثيرة جدا عن علاقة الغذاء بالروماتيزم وجدوا انو المرضى الذين يتجهوا فى غذائهم للخضار وتناول الاكل الطازة ويستبدلوا زيت زهرة الشمس بزيت جوز الهند او زيت الصويا وجدوا انو الجهاز المناعى تحصل له تغيرات واضحة جدا تساعد على تحسين وضع المريض الحاجة الثانية عايزة احبذ انو مرضى الروماتيزم يقعدوا مع اخصائى أو الزول الذى شخص لهم المرض يقعدوا يوضحوا الحاجات التى يحبوها والتى لا يحبوها لانو فى كثير من الاحيان مريض النقرس نقول له انت ممكن تمتنع عن اللحوم الحمراء تمتنع عن بعض الاشياء نوضح له لكن ما اى زول عندو مرض روماتيزم او روماتويد يبدا يمتنع من اللحوم ودا حاجة خطأ وشائعة كثير

مقدم البرنامج :

طيب امكن نحن حنرجع دكتورة ونتكلم عن الروماتيزم وعلاقته امكن فى احيان كثيرة بفقر الدم احيانا تتشابه اعراضه الروماتيزم بالانيميا هل هناك علاقة بينهم ام هى فقط علاقة تغذوية مرتبطة بى امكن نقص بعض مركبات الدم لكن عموماً نحن حنرجع ونتحدث عن هذا الموضوع ايضا نتحدث عن الروماتيزم والحمل بالنسبة للسيدات نرحب بكل المستمعين الذين يتابعوننا ومعنا اتصال الو السلام عليكم

مشاركة عبر الهاتف :

وعليكم السلام معاك محمد العطا – ربك ، انا عايز استفسر عندى والدى عندو رطوبة اصلا هو ورم فى الجسم وفى تعب فى المفاصل شديد وذهبنا لكم دكتور وبيقولوا رطوبة

مقدم البرنامج : يعنى بتحلل وتجد ترسيب عالى بتاع رطوبة

مشاركة عبر الهاتف : لا اعطوا حبوب يبلعا نظام مسكن لما يبلعا توقف له الألم شوية لكن الورم موجود

مقدم البرنامج :عمره كم الوالد ربنا يديوا العافية

مشاركة عبر الهاتف : عمره 47 سنة

مقدم البرنامج : خليك معنا محمد العطا قال والده عمره 47 سنة عندو رطوبة

د/ مواهب بن ادريس الادريسى :

طبعا الرطوبة اسى اى زول يمشى يعمل الفحص ويجد انو الترسيب عالى يقولوا عندو رطوبة او الفهم العام هنا عندنا انو اى زول يلاقى زول عندو ترسيب عالى يقول عندو رطوبة

مقدم البرنامج : الترسيب هو قال ما عملوا لكن اعطوا مسكنات

د/ مواهب بن ادريس الادريسى :

المسكنات على اساس انو عندو التهاب فى المفاصل طبعا يا اسراء الاجابة صعبة انك تفصلى الحاجة من غير تلاقيه عموماً آلام المفاصل بالنسبة للناس تختلف يعنى قد تكون لها علاقة بالتهاب فى المفاصل او خشونة فى المفاصل او التهاب الروماتويد نحن تكلمنا عنه قلنا انو عندو آلام مع الصباح ومفاصله بتوجعه زائد بعض الامراض فى المفاصل فدى كلها عندا سبب من الاسباب هو بالظبط عندو نوع منهم نحن لا نقدر نفسرها لانو فى كمية من الاسئلة بعدين لازم نعرف آلام المفاصل العندو دى طولت ام حاجة عرضية يعنى حصلت له آلام مفاصل نتيجة لحاجة تانية  

مقدم البرنامج :

دكتورة مواهب سؤال اخونا محمد العطا دا يرجعنا الى نقطة مهمة هى استخدام المسكنات بصورة مستمرة يعنى امكن الناس يمشوا للدكتور ويوصف لك فى فترة قصيرة قال لك مثلاً لفترة اسبوع او بالكثير عشرة او 15 يوم  نحن فى النهاية نجدها ساهلة ونستخدمها على طول

د/ مواهب بن ادريس الادريسى :

خطرة انو الواحد يستخدم مسكنات لفترات طويلة لانها تؤثر على الكلى وتؤثر على المعدة يعنى المسكنات دى من اكثر الحاجات لانها بتعمل تقرحات فى المعدة زائد انها تستخدم  كثير وتعمل مشاكل فى الكلى بالذات الجو بتاعنا فى السودان وقلة شراب الموية والعرق الناس ممكن تتعرض لمشاكل قصور كلوى

مقدم البرنامج :

طيب نحن نرجع تانى ونتكلم عن الروماتيزم وعلاقته ببعض الامراض التى تؤدى الى الاصابة بالروماتيزم

د/ مواهب بن ادريس الادريسى : قبيل ذكرت الدم يا اسراء وما يتعلق بالانيميا والروماتيزم

مقدم البرنامج : ايوا هل فى تشابه فى العرض بينها

د/ مواهب بن ادريس الادريسى :

هو طبعا الروماتيزم قد يؤدى الى الانيميا نتيجة عدم تغذية جيدة او نتيجة عدم تناول الدواء يعنى الواحد لو بدا عندو امراض روماتيزمية لفترة طويلة ذى الروماتويد أو الزئبة الحمراء او التهاب العضلات لفترات وما حصل علاج الواحد يتعرض انو يحصل له انيميا او نقص فى الدم نتيجة انو الاجسام المضادة بدات تهاجم لكن فى كثير من الاحيان المرضى المصابين بالروماتويد تحصل لهم انيميا نتيجة عدم الغذاء الجيد او عدم التثقيف الصحى المناسب بى انو يستفسروا عن بعض الاشياء المفيدة جداً مريض الروماتويد قد يصاب بالانيميا نتيجة انو هو بيستعمل كمية من المسكنات التى تعمل له تقرحات فى المعدة ويبدا يحصل له نزيف فى المعدة ويبدا يفقد كمية من دمه غير الاسباب التانية مريض الروماتويد قد تكون عنده اجسام مضادة تهاجم الكريات الدموية نفسها دى من اسباب الانيميا لمريض الروماتويد من الحاجات المبشرة جداً انو امراض الروماتويد بالذات الانيميا فيها قليلة  

مقدم البرنامج :

 طيب دكتورة امكن فى نقطة مهمة انت لو ركزتى عليها حديث الزئبة الحمراء هو الان امكن لحدى وقت طويل الناس كانت بتتكلم عن والله روماتيزم ومرات انيميا ومرات تتكلم عن الرطوبة الان ظهر مرض الزئبة الحمراء بصورة كبيرة امكن دائما نجده عند النساء أو ظهوره اكثر فى النوع هل هناك علاقة ببعض المشاكل المرتبطة بالمرأة فى مسائل الدم او مسائل جينية ولى شنو بالظبط

د/ مواهب بن ادريس الادريسى :

هو اسى فعلا فى النساء وله علاقة بالحاجة التى فيها المرآة وعادة بيظهر فى سن معين وهو السن الذى تكون فيه المرأة تعرضت للحمل بولادات متكررة والضغوط الاسرية له علاقة مباشرة انو تبدا تظهر الحاجة دى او النساء اللائى تعرضن فى فترة الى المرض الشديد هذه تعرض النساء انو يظهر عادة هو بيظهر فى صورة آلام فى المفاصل ونقص فى الدم تساقط فى الشعر بصورة واضحة قد تصاب ببعض الآلام فى الكلى يبدا يحصل لها زلال الكلى هو من الامراض الان بدات التوعية عنها عشان كدا بدا يظهر والفحوصات تكثر عندنا هنا عشان كدا بدأ الناس يعرفوه هو موجود من زمان هو ما نوع من الامراض الخطيرة ذى السرطان لكن النساء بيخافوا من الزئبة الحمراء مزعورين شديد الحقيقة ظهرت كثير من الامراض التى تهاجم الجسم لكن اذا اكتشفت وبدأ لها العلاج دى ممكن السيطرة عليها

مقدم البرنامج : وممكن الشفاء منها بالسيطرة عليها بالنسبة للتحاليل او  زيادة او نقصان بى انو تكون فى متابعة

د/ مواهب بن ادريس  الادريسى :

ايوا ممكن السيطرة عليها اذا كان المريضة واعية للحاجة الحاصلة والدكتور متابعها معها بالسيطرة عليها سيطرة تامة وتعيش حياتها بصورة مريحة جدا

مقدم البرنامج :

طيب امكن نحن دكتورة مواهب ما تبقى لنا كثير اربعة دقائق فقط فى سؤال مهم جدا وهو مشاكل الحمل أو الحمل هو كحالة تتطلب مجهود تتطلب نوع من الصحة والجسم لازم يكون مهيأ الروماتيزم والحمل هل هناك اشكالات بالنسبة للمرأة اذا كانت هى مصابة بالروماتيزم اياً كان نوع من انواعه العلاقة بينه وبين الحمل هل من الممكن انو السيطرة عليه او تستطيع انو تقضى فترة الحمل وهى تعانى من بعض مشاكل الروماتيزم  

د/ مواهب بن ادريس الادريسى :

العلاقة بين الحمل والروماتيزم يعنى الحمد لله انوالروماتيزم لا يمنع انو الواحدة تحمل دى اول حاجة دائما وابدا ممكن مريضة الزئبة أو مريضة الروماتويد تحمل بسهولة فقط يكون الطبيب عارف عشان فى بعض الادوية لا نقدر نعطيها اثناء الحمل من رحمة ربنا انو دائماً المرضي في فترة الحمل بيحصل لهم تحسن كبير في الامراض الروماتيزمية دى افتكر نتيجة للهرمونات الكثيرة في الجسم امكن تظهر لنا الاعراض بعد الولادة لكن سبحان الله فى امراض الروماتيزم  والزئبة الحمراء بيمروا في فترة الحمل بسهولة لو كانت المريضة واعية للحكاية دى الحاجة الثانية عايزة انبه لها اي زول عندو مرض من امراض الروماتيزم بنحبذ انو يكون علي اتصال مع الطبيب بحيث انو هو قبل الحمل او أول ما يحصل الحمل انو الطبيب في بعض الادوية يوقفها منهم في الشهور الاولي عشان ما تأثر فى الجنين وبعض الادوية نوقفها منهم في الشهور الاخيرة عشان ما تأثر في الولادة وفى الرضاعة بعداك

مقدم البرنامج :

طيب امكن السؤال دا يقودنا الى تسأول اخر يعنى مرضى الروماتيزم والحركة ووزن الجسم امكن نحن عندنا دقيقة ونصف تقريباً  

د/ مواهب بن ادريس الادريسى :  

انا مرضى الروماتيزم انصحهم انو لازم يتحركوا ولازم يكون فى رياضة لازم يتريضوا ويتحركوا بمجرد ما بدا المرض عشان تبقى المفاصل غير ملتهبة بعداك انا افتكر احسن حاجة انهم يمارسوا الرياضات التى يحبوها فى منتهى الراحة يعنى ما فى مشكلة واحبذ انهم يتعرضوا لشمس الصباح الشمس الباردة عشان مهمة جدا ولها علاقة بتحسن مريض الروماتويد بعدين بحبذ انو مريض الروماتويد يحاول يحضروا بدرى ايضا من الحاجات التى عايزة انبه لها انو نحن عموماً فى السودان فى حته نتعرض فيها للشمس كثير الا انو كثير من مرضى الروماتيزم عندهم مشاكل بالذات فى نقص فيتامين ( د ) دائما وابدا الناس يتعرضوا للشمس الباردة فى الصباح ويتناولوا الاغذية التى فيها فيتامين ( د ) وبحبذ انو مرضى الروماتيزم دائما تطلب من طبيبها انو يعمل لها فحص اذا كانت الادوية ممتازة لانو بتساعد كثير جدا فى العلاج بتساعد كثير جدا انو مريض الروماتويد يكون حاسى انو طبيعى لانو لها علاقة كبيرة جدا مع الروماتويد مع آلام المفاصل والغضاريف وعموماً انو الواحد يكون يحافظ على صحته من ضغط الدم والسكرى  

مقدم البرنامج :

عموما نحن نتمنى انو كل الناس تحافظ على صحتها ، دكتورة / مواهب سعدنا كثير جدا بهذا الحديث الطيب وهذه النصائح نتمنى انو نلتقيك انشاء الله فى حوارات اخرى اكثر ثراء حسب ما يسمح زمنك

د/ مواهب بن ادريس الادريسى :

شكرا جزيلاً يا اسراء ولو سمحتى لى من هذا المنبر عايزة انوه السادة الواقفين على القرارات انو يوفروا كثير من الادوية لانو نتحتاج لها وهيئة الصيدلة تدعمنا فى انو نحن نوصلها لمرضى الروماتيزم

مقدم البرنامج :

نحييك كثير جدا د/ مواهب بن ادريس الادريسى اختصاصى الباطنية والروماتيزم الاستاذ المساعد بجامعة الرباط الوطنى كلية الطب سعدنا بكم ايها الاصدقاء شكرا لكم تحايانا طه عبد الرحمن طه ربطنا بكم عبر اجهزة الصوت الرقمية ، تحياتى عبر المايكروفون اسراء زين العابدين الاسبوع القادم لقاء جديد عيادة على الهواء الاخراج منى صالح