حقيقة سؤال جميل اخ عبد الرحيم المصران العصبى والله المصران العصبى دا بصراحة اغلبية الناس بيجوا يقولوا عندهم مصران عصبى امكن الناس ماسكة كلمة عصبى دى وواضعاها على انو اضطراب نفسى الزهج والعصبية والتوتر دى اضطرابات نفسية يصاحبها احياناً آلام فى البطن وانتفاخ بعض الاطباء ما مختصين فى المجال دا عشان يريحوا المريض يقولوا له مصران عصبى انا بصراحة دى انتهزها فرصة اى زول عاش زمن طويل يفتكر عندو مصران عصبى يستخدم المهدئات للمصران العصبى ارجو انو يلجأ للطبيب النفسى عشان يحل له المشكلة دى بصورة جزرية لانو عادة بيكونوا ياخدوا فى المهدئات ويرجع لنفس الزمن بصراحة وكلهم ما فى زول متحسن السافر مصر والسافر الاردن وجانا راجع اخد له حبة فى اليوم ويعداك بقى كويس فالمصران العصبى يا اخوانا هو اساساً عبارة عن آلام فى البطن وانتفاخ واحياناً اسهال واحيانا امساك على اساس انو شنو المصران عصبى يبقى الاعراض من قلق وتوتر وعدم نوم وعصبية دى ما حاجة اسمها مصران عصبى دى علامات اضطرابات نفسية وعندها العلاج بإذن الله

مقدم البرنامج :

امكن دكتورة امل كلام اخونا عبد الرحيم يرجعنا الى انو هل هناك اعراض عضوية يحس بها الشخص اذا كان عندو مشكلة

د/ امل التجانى محمد :

دى فعلا نقطة هامة جدا يعنى انا ذى ما ذكرت قبيل انا عملت البحث بتاعى فى الاضطرابات النفسية وقصة المترددين على المراكز الصحية الاولية يعنى الزول يمشى المركز الصحى يقول فتران عندى وجع رأس عندى طمام وكشفت عليهم وجدت 60% من الناس الجايين بحكاية عضوية دى حقيقة نوع من انواع الاضطرابات النفسية وهى ما واحد هى انواع متعددة و13% منهم كانوا مصابين بالاكتئاب و6% كانوا مصابين بالاضطرابات النفسية مره هوس ومره اكتئاب والبقية تتراوح ما بين عدم المقدرة على التأقلم مع الظروف الحياتية الصعبة والقلق وتشخيصات اخرى ففعلا الاضطرابات النفسية ممكن تحصل فى شكل آلام عضوية تجدى الشخص حايم من طبيب باطنى الى جراح يمشى وعندو كيس كبير بتاع ادوية وتحاليل وصور ملونة ومناظير وفى الاخر بيطلع اضطراب

مقدم البرنامج :

طيب عايزين نتوقف شوية عند مشكلة الاكتئاب عند مرحلة الشباب مرحلة المراهقة والشباب وهى تتقدم الى ما بعد ال45 سنة مقاربة للخمسين مرحلة امكن تكثر فيها هذه المشكلة يعترى الانسان احساس بى انو عندو مشكلة فى عدم رغبة فى العمل او عدم رغبة فى العطاء او تصل الى حد احياناً بكاء ناس كثيرة يربطوها بمشاكل ثانية يقول لك والله الشخص دا عندو عين او حاصلة له حاجة فيبتدوا الاتجاة الى اشياء اخرى الحل شنو نحن عايزين

د/ امل التجانى محمد :

 اهم حاجة التثقيف والتوعية لانو لما يحس انو ما عندو رغبة فى الحياة غير مستمتع حقيقة بالحياة يعنى يقول لك انا بأكل لكن الاكل دا ما ضايق لها طعم الدنيا دى مسيخة فالتفكير بتاع الثقافة بتاعته صحياً لا تمثل انو دى تكون واحدة من علامات الاضطرابات النفسية فيقوم يبحث على تغيرات شنو يا ربى السبب ويلجأ دائما الى مسألة الاشياء التانية ذى العين وانا ارجع واكرر تانى حتى انو الانسان لو عندو عين او السحر فى الاخر عملت اعراض وعملت اضطراب يعنى عايز معالجة يعنى ما ذكرت لك زمان انو الولد دا عندو عين او سحروا او يدوا انكسرت ما يمشى للشيخ عشان يداوى له اول شىء يمشى للدكتور يجبص له يدو افرض انو انا ما عايز اقول انو دا السبب او ما السبب انا بالنسبة لى دا ما السبب لكن انت حتى لو كنت مقتنع انو حصلت لك كآبة او عدم رغبة لانو مسحور او معيون عادة الشىء الحصل دا يعرضوا على الطبيب النفسى

مقدم البرنامج :

هل من الممكن انو الشخص فقط يمشى للطبيب النفسى نحن عايزين نفهم المشكلة فى علاقة المريض اذا كان هو شخص عادى يمشى الى طبيب نفسى ويبتدى يتكلم او يفضفض عن هذه القناعة

د/ امل التجانى محمد :

يعنى اهم شىء انوانا ملاحظة فى تزايد فى الوعى فى الناحية دى يعنى فى ناس كثير بتجى وما يحسوا بالخجل او كدا لماذا لانو نحن حاسين انو الاتجاه حتى المستشفيات النفسية او الطبيب موجود حتى داخل المستشفيات العامة لاجراء هذه الحاجة حتى العيادات الخاصة بتجدى اخصائى نفسية فالوعى له دور كبير جدا خاصة فى المواضيع دى بصورة كويسة وتمشى لقدام  

مقدم البرنامج :

ايضا نحن عشان نقرب الصورة اكثر كثير من المستمعين بتقول انو اذا الشخص شعر بى انو ما راضى فى العمل بتاعوا او لا يقوم بالعمل الذى هو يستحقه او ما قادر يحصل على وظيفة بعض البنات امكن الواحدة تشعر انها اقل من الاخريات فى اى وضع كيف من الممكن انو دى تؤثر على مشاكل الامراض النفسية وكيف انو المشكلة ما تستفحل من النواحى الصحية يا دكتورة

د/ امل التجانى محمد :

يعنى دى من ضمن المؤثرات اذا جينا ناخد التركيز مثلا فى عوامل جينية ذى العوامل تصاحبه عوامل الحياتية او الحياتية دى من البيئة بتاعة العمل اذا كان فيها ضغط متكرر دى تسمى من عوامل الخطورة من عوامل الخطورة انو الشخص يكون شغال فى بيئة عمل ناضبة ما فيها تعاون وما فيها شىء امكن عدم الاحساس بالرغبة دى حقيقة تؤدى الى الاضطرابات النفسية ومسألة الاكتئاب

مقدم البرنامج :

هل هناك بعض الحلول فى انو تساعد الشخص فى انو يتوازن على الاقل فى مسألة التأقلم مع الوضع الانت فيهو امكن واحدة من الحلول انك تغير الى الافضل لانو الناس مرات بتزهج انو زول ما شغال يبدا يقوم يكتئب واحدة مثلا ما قادرة تحصل على وظيفة او رضا فى البيت او فى اسرتها تكون عندها هذه المشكلة

د/ امل التجانى محمد :

مفروض يكون فى عوامل بتاعة حماية لكن الشىء الامثل وحل للمشكلة ممكن نقول فى عوامل حماية يعنى الاصدقاء وترابط الاسرة العوامل الجينية ايضا شىء مهم جدا لى انو تحصل له مشكلة او فرد او كدا الاحساس بالرضا

مقدم البرنامج :

نحن بنحييك دكتورة امل ونرحب بكل المستمعين الذين يتابعوننا وعيادة على الهواء ، مرحباً اهلا بكم ايها الاصدقاء دكتورة امل عايزين ايضا نمشى فى هذه المشكلة عشان نتكلم عن العلاج كبار السن فى اعمار بعد الستين او الشباب يصابوا ببعض هذه المشكلات وخاصة النساء مع التغيرات الهرمونية  

د/ امل التجانى محمد :

هو مفروض نتكلم عن الفئات الاكثر عرضة طبعا النساء بيتعرضوا للاكتئاب مرتين بخلاف الرجال يعنى 20% تقريباً من النساء يصابوا بالاكتئاب وايضا فى عوامل هرمونية وايضا امكن فى عوامل بيئية وفى فترة الحمل ممكن شوية تقدر تتحكم وتعمل كنترول

مقدم البرنامج :

لسه ما زال هناك كلام عن هذه المشكلة الصحية وكيف انو نوقى نفوسنا والاخرين من هذه المشكلة وندخل فى وحالات اكتئاب مرضى ، نرجع دكتورة لكبار السن كيفية التعامل الذى يمكن ان يقدم لهذه الفئة العمرية وهذه المشاكل وبالذات لو كان الشخص مثلا يعانى من مشاكل امراض مزمنة ذى السكرى لعدد اربعين او ثلاثين سنة او الغدة او الضغط الدموى هل هناك علاجات

د/ امل التجانى محمد :

 الحقيقة الحته دى فيها تداخل يعنى انت مثلا ذكرتى كون الواحد يعانى من السكرى او اى مشكلة دى ممكن تكون مسببة للاكتئاب وتؤثر على الدورة الدموية بتاعة المخ دى واحدة من الاسباب الشىء الثانى فى بعض العلاجات وفى بعض الانواع بتاعة علاجات الدم ممكن تكون كرد فعل فى الاكتئاب العواقب بتاعة الاكتئاب والامراض العضوية عند الناس الكبار بالذات كبار السن امكن هى علاقة ودية يعنى مؤكد انو الاضطرابات العضوية تسبب اكتئاب والاكتئاب ممكن يجعل المريض يهمل العلاج يعنى تجدى الشخص لما يكتئب نشاطه يقل واحيانا يومين ثلاثة ما اخد علاج فالنشاط قل والمضاعفات دخل فى صدمة سكرى دخل فى جلطة  وممكن انسان يكون مغترب لفترة

مقدم البرنامج :

احيانا يا دكتورة قد يتعرض الشخص اذا كانت المرأة او الرجل الرقاد فى المستشفى لفترة طويلة المرأة ممكن فى بعض الحالات ذى الولادة الصعبة او كانت الولادة تعباها او انسان تعرض لمشكلة صحية هل هى حالات طارئة قد تكون يعنى يصاحبها اكتئاب ولكن ما يكون مستمر مع الشخص  

د/ امل التجانى محمد :

مفروض نفرق بين يعنى انت ذكرتى بين الاضطرابات النفسية واضطراب ما بعد الولادة دى ممكن تحصل حتى لو كانت الولادة طبيعية ومشت بصورة عادية جدا دى اضطرابات ما بعد الولادة ومنها اكتئاب ما بعد الولادة وامكن فيها خطورة على الجنين وعلى الام الشىء الثانى الاضطرابات التى تحصل لو الشخص مشى رقد مستشفى وشخص بمرض خطير فجأة ممكن يدخل فى اكتئاب وممكن يدخل فى عدم مقدرة على التأقلم مع الوضع الجديد ومعه اعراض اكتئابية انو التشخيص فى داخله اعراض اكتئابية

مقدم البرنامج : كيف الحل بتاعا اذا كانت

د/ امل التجانى محمد :

الحل فى اضطرابات ما بعد الولادة امكن شوية عايزة اهتمام كبير لكن اضطرابات ما بعد الولادة عايزة تدخل سريع لانو ممكن يكون فى خطورة على الام وممكن تنتشر وممكن تضر طفلها وتكون مصاحبة عادة بافكار مهددة  للطفل او على نفسها بالتالى ممكن تؤدى الى ائذاء الطفل او نفسها

مقدم البرنامج : نحن معنا اتصال الو السلام عليكم

مشاركة عبر الهاتف :

وعليكم السلام معاك محمد يوسف شرفى فى الحقيقة انا عندى احساس بعدم القدرة على العمل والاعراض كانت عادية

د/ امل التجانى محمد : يعنى فتور فى الجسم

مشاركة عبر الهاتف :

يعنى آلام غير مبررة وغير واضحة قابلت اخصائى باطنية كثير وفى النهاية الدكتور نصحنى بى انو اقابل اخصائى دكتور عيادة على الهواء فى انو امشى اقابله  

د/ امل التجانى محمد : معه شنو الألم والفتور دا معه احساس بالكآبة والحزن

مشاركة عبر الهاتف : ايوا فى احساس والله

د/ امل التجانى محمد : فى تغيير فى الشهية

مشاركة عبر الهاتف : ايوا فى تغيير فى الشهية ومرات بكون عادى قابلت دكتور  

مقدم البرنامج :

للاسف انقطع الخط عموماً نحن نتمنى انك تحاول الاتصال بنا مره تانية او على الاقل بعد نهاية الحلقة تخلى رقم تلفونك فى الكنترول لو ما تمكنت اسمع  الحلقة عشان نتابع معك هذه الحالة ، معنا اتصال آخر الو السلام عليكم  

مشاركة عبر الهاتف :

وعليكم السلام معاك محمد الحافظ سليمان تأمل السؤال الاول لم تعد علاقة الاب مع ابناءه وفية الصلة الى  ما كانت عليه قبل عقود او قبل قرن على اقصى تقدير وفى عصرنا الحديث الذى بات فيه الاب اغلب الوقت فى مكتبه نضبت العلاقة بينه وبين ابناءه باصول تدريجية وهى انو الاب يسعى لتوريث ابناءه مهنته ومهنة اجداده التى توارثها عبر الاجيال هل هذا يسبب اكتئاب للاطفال السؤال الثانى يعتبر العرق وظيفة طبيعية تساعد فى تخليص الجسم من الاملاح الزائدة الى انو تجاوز افراز محدد هل يشير الى حالة مرضية ممكن  تؤدى الى الاكتئاب السؤال الثالث من المعروف ان الخيانة الزوجية صفة مزمومة سواء ارتكبت من جانب الزوج او الزوجة ولكن الخيانة قد تدفع الزوج الى ذكر الخيانة الزوجية كعدم اهتمام زوجته بنفسها واهمالها لمظهرها بالاضافة الى مشاعر الملل والرتابة التى تعترى الحياة الزوجية فى بعض الاحيان احصائية واضحة للخيانة الزوجية فى مجتمعنا العربى وذلك بسبب اثارة الزوجات للصمت خوفا من الفضيحة  دكتورة امل سلطى لنا الضو هل الخيانة الزوجية نتيجة الى اكتئاب ام نتيجة ضغط نفسى ام ماذا

مقدم البرنامج :

اخ تامل نحن لم يتبقى لنا زمن تسع دقائق شكرا جزيلا كتر خيرك كثير اخ تأمل نحن بنحييك الحقيقة امكن نحن فى اخر التسع دقائق عايزين نجيب على بعض الاسئلة التى وردت للبرنامج والتى قلت انها اسئلة متفرقة حنجمل فيها هذه الاسئلة فقط نجيب على سأله عن العرق والتعرق هل هو واحدة من المشاكل

د/ امل التجانى محمد :

نتيجة حادثة طارئة العرق فى ناس كثيرة بتعرق لكن اذا كان فى زيادة فدى قد تكون دليل على انه اضطراب هرمونى فى الغدة او اضطراب ايضا فى بعض الاضطرابات للامراض العضوية ذى مثلا الحمى المالطية والسل الرئوى دى ممكن تسبب اكتئاب اذا كان فى زيادة فى العرق طارئة ومعه احساس بالكآبة او اكتئاب مرضى قد يكون فى واحد من الامراض العضوية وهو متسبب فيها

مقدم البرنامج :

لكن ايضا فى سؤال مهم انت تكلمتى عن بيئة الشخص قد تكون الظروف المحيطة به او البيئة توتر العلاقة بين الاسرة او غياب احد اذا كانت الام او الاب او الابناء وفقدانهم لهذه العلاقة

د/ امل التجانى محمد :

فقدان الام فى سن مبكرة وهو من عوامل الخطورة فقدان تماماً اذا بالوفاة او الطلاق لكن قبيل قلنا فى عوامل بتاعة حماية عوامل الحماية اهمها الترابط الاسرى عندو تأثير

مقدم البرنامج :

امكن دكتورة قبل ما نمشى من هذه الجزئية ونحن نتكلم عن الاكتئاب فى هذه الحلقة هل هناك اى علاجات وقائية يعنى اذا كان الشخص ظهرت عليه هذه العوامل كبير فى السن او انت قبيل تكلمتى يمر بهذه المرحلة او الشخص كبير وواعى لكن هو حاسى بهذه المشكلة هل هناك بعض العلاجات 

د/ امل التجانى محمد :

والله جزء وقائى فكبار السن ديل دائما نعمل لهم خطوط عريضة كثير بنجد امكن يكون التهاب فى البول كثير وممكن يدخل فى الدهون تشوش كبار السن شوية هشين  

مقدم البرنامج : يدخل فى هذه المرحلة هو عادى لكن احيانا

د/ امل التجانى محمد :

ما نحسسوا انو هو خلاص كبر وما عندو قيمة مع انو الواحد بيحس انو قيمته اقل من الشباب الواحد لو شعر بالكآبة يحاول يغير من الاحساس بالكآبة يمارس النشاط الرياضى الخفيف يحاول يخرج واذا كان اكتئاب بسيط فالتغيير البسيط ممكن يعطى نتيجة لكن اذا بقى اكتئاب مرضى ومؤثر لابد انو تلجأ الى الطبيب النفسى  

مقدم البرنامج :

اذاً ايها الاصدقاء ما تبقى لنا كثير اقل من خمس او ستة دقائق فقط تفصلنا عن نهاية هذا اللقاء ، نرحب بكل المستمعين الذين يتابعوننا فقرة اخيره هى اسئلة متفرقة من المستمعين ، امكن عندنا مشكلة دكتورة امل هى واحدة من المشاكل التى تطرح كثير للبرنامج التبول الليلى عند الاطفال دا يعتبر مشكلة فى اى عمر

د/ امل التجانى محمد :

التبول الليلى يعتبر مشكلة اذا كان بعد سن الخامسة وعلى الاقل مرتين فى الاسبوع لمدة لا تقل عن ثلاثة شهور

مقدم البرنامج : ما هى اسبابه وكيفية العلاج هل هو دائما الاسباب مشكلة نفسية

د/ امل التجانى محمد :

لا نعتبرها مشكلة نفسية الا اذا بقى شىء طارئ ومعه اضطرابات تانية يعنى ممكن الطفل اصلا ما كان  يتبول لكن بعد كبر شوية خمسة او ستة سنين يبتدى فجأة يتبول يصحى بالليل مخلوع دى قد تكون بوادر لاشكالية تانية لكن التبول الليلى المعروف دا الاسباب بتاعته اول شىء لازم نصحى انو ما يكون فى سبب عضوى يعنى قد يكون فى اسباب عضوية السكرى بتاع الاطفال كمية من الهرمون معين بتاع ادرار البول ممكن يكون فيه اشكالية اى شىء فى الجهاز البولى بتاعوا وفى حاجة فتحة فى السلسلة الفقرية دى بتكون ظاهرة ودى بتكون من الاسباب بعد نتأكد انو ما فى سبب موضعى يبقى السبب الثانى وهو التبول الليلى المعروف يجب معالجته ومتابعته

مقدم البرنامج :

ايضا من الاسئلة التى وردت للبرنامج امكن واحد من المستمعين بيسأل عن الانيميا هل هى مشكلة ممكن تكون عندها مشكلة صحية او عضوية يكون عندها ترتيبات  

د/ امل التجانى محمد :

والله الانيميا هى موضوع كبير ما حاجة واحدة لكن قل كمية معينة لكن وجودها مهم جدا وهو بيحمل الاوكسجين لكل اعضاء الجسم وطبعا نحن العضو الذى يتأثر عندنا من الاضطرابات النفسية هو المخ اذا كان عموما حاد شديد لدرجة انو الاوكسجين ما واصل الى الدماغ وما بالصورة الكافية ممكن يؤدى الى الاضطرابات النفسية من ضمنها التوتر ومن ضمنها الهزيان دا اذا كانت انيميا متكاملة تتسبب فى الاعراض النفسية

مقدم البرنامج :

طيب النسيان اذا كان الشخص هو ما كبير فى السن وما مسألة بتاعة فقدان ذاكرة لكن يعنى يشك فى نفسو انو اصبح ينسى كثير ينسى اشخاص ينسى اسماء ينسى حاجات كثيرة حتى مرتبطة فى تعامله العادى

د/ امل التجانى محمد :

والله اذا وصلت لدرجة انو بقى ينسى الناس الذين يعرفهم نحن ذى ما ذكرنا قبيل الاخ قلنا له التركيز مهم  اى شىء يقللوا التركيز بيقلل الذاكرة لانو التركيز هو الخطوة الاولى فى انك تتذكر الحاجة لكن لو بقى النسيان لدرجة انو تنسى الاسماء او اسماء الشوارع او الاماكن فدى عايزة فحص وعايزة اشعة للمخ وعايزة تحاليل لكن فى اضطرابات نفسية من ضمنها الاكتئاب مع القلق وهى بتقلل التركيز وبتالى تقلل حدة الذاكرة

مقدم البرنامج :

نحن بنحييك كثير جدا دكتورة امل التجانى امكن فى بعض الاسئلة التى كان نتمنى انو كان نتواصل فيها لكن يبدوا انو محظوظين بهذا الزمن ونرحب بك دائما فى عيادة على الهواء ونتمنى نتواصل معك فى لقاءات

د/ امل التجانى محمد : انشاء الله

مقدم البرنامج : نصيحة اخيرة عايزة تقولى للناس شنو عشان تتحل مشكلة الاكتئاب دى تماماً   

د/ امل التجانى محمد :

والله اتمنى لهم الصحة والعافية واقول لهم ما تترددوا ونظموا وقتكم وحياتكم فى الاكتئاب اقرب  من السحر فى الطبيب النفسى

مقدم البرنامج :

شكرا دكتورة امل التجانى محمد سالم اختصاصى الطب النفسى كتر خيرك كثير شكرا لكم مستمعينا الاعزاء شكرا لكل الذين تابعونا عبر عيادة على الهواء هذا المساء كنا معكم طه عبد الرحمن طه ربطنا بكم عبر اجهزة الصوت الرقمية تحياتى دوماً عبر المايكروفون اسراء زين العابدين ، الاسبوع القادم لقاء جديد عيادة على الهواء الاخراج منى صالح