بسم الله الرحمن الرحيم

برنامج عيادة على الهواء

موضوع الحلقة :  المشاكل الصحية المرتبطة بالاذن والانف والحنجرة – بثت 26 - 4 - 2012م

مقدم البرنامج :

اسراء زين العابدين

الضيف :

دكتور /  شرفى عبد القادر عمر استشارى الاذن والانف والحنجرة

مقدم البرنامج :

هذه دعوة تجدد مرحباً بكم وهذه عيادة على الهواء ، تحية الصحة والعافية لكل مستمعينا الاعزاء ونقول ربنا يحفظ هذا البلد واهله امنا وسالما ويعافى كل المرضى مرحباً بكم وهذه تحايا الفريق الذى يصحبنى عبر هذا اللقاء ، ايها الاصدقاء نسعد كثيراً بمتابعتكم ونسعد اكثر بمشاركتكم اسئلتكم واتصالكم استفساراتكم دائما تثرى هذا البرنامج نذكركم فقط بارقام هواتفنا 87553151 و 87559314 ، مرحبا اهلا بكم ايها الاصدقاء ودائما عند تغير الفصول وانتقالها من الشتاء الى الصيف ومن الصيف الى الخريف هذه التغيرات دائما تحدث فيها  الكثير من المشكلات الصحية وبخاصة فى بعض المشاكل التى نعانى منها التهابات الحلق المتكررة والجيوب الانفية وايضا ربما بعض المشكلات التى تتعلق بهذا التخصص ، يشرف البرنامج كثير جدا ويسعدنا ان يكون معنا اليوم دكتور / شرفى عبد القادر عمر استشارى الاذن والانف والحنجرة دكتور مرحباً بك وحبابك عشرة وسعيدين بتلبتك لدعوة البرنامج 

د/ شرفى عبد القادر :

بسم الله الرحمن الرحيم الحمد لله والصلاة والسلام على رسول الله الامين ، نشكر اسرة البرنامج ونشكر الاخت اسراء كما نشكر الاخوة مستمعى البرنامج ونتمنى ان نقدم لهم النصائح المفيدة انشاء الله

مقدم البرنامج :

نحن سعيدين بانك تتواصل معنا عبر عيادة على الهواء وتكون ضمن هذه المجموعة من اصدقاء البرنامج السادة الاطباء ونتمنى ان تكون دى فاتحة خير للقاءات اكثر ثراء انشاء الله ، اذاً ايها الاصدقاء فى هذه الحلقة سنتحدث عن الشخير هل هو مرض فى حد ذاته يمكن علاجه ام متلازمة او عارض لمشكلة صحية ، ما هى حقيقة اللوزة الثالثة وهل لها علاقة بالتهاب اللوزتين المتكرر ، وفى هذه الحلقة سنتحدث عن بعض العادات المجتمعية الضارة وتأثيرها على صحتنا وبخاصة صحة الانف والاذن والحنجرة ، الاورام غير الحميدة ما هى اعراضها وكيف يمكن اكتشافها مبكراً والتعرف عليها  ، اهلا مرحبا بكم ايها الاصدقاء واهلا عبر عيادة على الهواء دعنا نبدا فى البداية دكتور شرفى التهاب اللوزتين المتكرر وهل له علاقة باللوزة الثالثة نتعرف عليه كل واحد على حدا مرحبا

د/ شرفى عبد القادر :

مرحباً بكم حقيقة التهاب اللوزتين واللوزة الثالثة هو مرض من الامراض الشائعة عند الاطفال بالاخص وعند الناس الكبار التهاب اللوزة الثالثة دائما هو من الالتهابات الفيروسية التى تصيب الحلق وهو دائما من الالتهابات المتكررة خاصة فى فترة تغير الفصول ويزداد فى فترة الصيف بيكثر جدا التهاب اللوزتين فى البداية بيكون فيروس بعداك يبقى التهاب بكتيرى وهو يصيب الاغشية الداخلية للوز وايضاً يؤثر علي اجزاء اخري من جسم الانسان اذا تكرر الالتهاب واصبح في اطار الالتهابات المتكررة وعندو اثار جانبية مثل التهابات المفاصل واثار جانبية علي الاغشية الدموية بعض الشىء في حالات الالتهابات المتكررة

مقدم البرنامج :

دكتور امكن التهاب اللوزتين معروف انو يكون عند الاطفال بصورة كبيرة وفي اغلب الاحوال بعض الاطباء ينصحوا بعدم اجراء العملية لانو قد تتغير هذه المشكلة او علي الاقل تقل روشتتها او يقل تكرار الالتهاب ولكن نلحظ في احايين يشكو منها ناس كبار يعني زول كبير يقول والله انا عندي التهاب لوزتين اختفت فى مرحلة وظهرت في مرحلة تانية امكن نحن عايزين نتعرف علي هذه النسبة وكيف تبقي هي مشكلة تلازم الشخص لما يكبر

د/ شرفى عبد القادر :

 حقيقة التهاب اللوزتين واللوزة الثالثة هو فى الاخص قلنا مرض يصيب الاطفال وممكن يصيب الكبار ايضا بنفس النسبة والنسبة الاكبر هى التهابات الاطفال اكثر تعرضاَ لهذا الجانب لانو يشربوا الماء البارد احتكاكهم بالاطفال الاخرين تجد طفل تلقاهو احتك بطفل اخر يشربوا من بعض تجد الواحد فى الشارع شايل الكباية او الكوز ذى ديل بينقلوا بعض المرض كثير نلاحظ اكثر حاجة الالتهابات دى شائعة فى وقت المدارس تجد الاطفال مختلطين مع بعض يشربوا مع بعض يشربوا مع بعض يقفوا جنب بعض تجدى الالتهاب متكرر جدا فى الفترة دى  زى دى تجدى المدارس مؤجزة في الصيف لكن تجديه كثير جداً وايضاً تجديه شائع وكثير يؤثر علي الطفل فى مأكله تجده من بعيد هزيل او شكله ضعيف ويؤثر عليه في تفكيره انو مثلا تجديه عندو الوزة الثالثه بيكون تعبان طوالي ويكون نعسان ونومه خفيف فدا معنى كلمة لوزتين    

مقدم البرنامج :

طيب اللوزة الثالثة انت زى ما ذكرت وفرقت بينهم في امل يعني اللوزة الثالثة هى زى العيب الخلقي يتولد به بعض الاطفال يعني امكن التهاب اللوزتين يكون تضخم يقل او يحصل التهاب لكن اللوزة الثالثة يعني عشان نوصفا للناس ونعرف هل هي بيتولد بها الطفل زي العيب الخلقي ممكن تزيد او تنقص اومشكة ممكن تظهر بعد كدا ومتين يصبح قرار انها تزال او تترك 

د/ شرفي عبد القادر :

حقيقة التهاب اللوز الثالثة هو من انواع الالتهابات الشائعة في الاطفال ولحدي هي مثلاً نقول 12 سنة او 13 سنة بتجى وبعداك تختفى هي عبارة عن عضو من الاعضاء اللمفاوية العادية فى سقف الحلق عند الناس طبيعية ممكن يتولد بها اى زول ذي اللوزتين وذى الانف عضو عادي يعني بتكون كدفاع  مناعي لمفاوى فى سقف الحلق فوق بتكون فى العظام فى الفك وداخل الفم تجدى خمسة معهم فوق فى سقف الحلق دى اللوزة الثالثة فهى دائما مرض شائع فى الاطفال يعنى ممكن يبدا من ثلاثة شهور وستة شهور الى تسعة شهور الى 14 سنة الطفل يكون عندو اللوزة الثالثة حكمة الله تقتضى انها بعد 14 سنة الجهاز المناعى يكون ما عندو اثر كبير ويختفى لحدى ما ينتهى خالص لوحده متين يشخص انو دا التهاب اللوزة الثالثة دائما نشخص التهاب اللوزة الثالثة اذا كان الطفل بدا يشخر بالليل بصورة مزعجة صوته واضح ذى الزول الكبير ثانى حاجة تجدى الطفل دائما فاتح فمه ونائم يتنفس بفمه لانو الانف طبعا لما تكلمنا عن وضعها التشريحى قلنا بتكون خلف الانف خلف الفتحة الانفية فى سقف الحلق هى لما تتضخم بتمشى بالفتحات والانسان عشان يتنفس لازم يمشى يجد له مجرى بتاع نفس اخر عشان يشيل بها كميه الهواء المحتاج لها لجسمه اسهل طريقة انها فتح الفم فمه طوالى فاتح وممكن الانسان يشخر وهو نائم دى لو كانت كبيرة شديد والطفل لو قاعد جنبك تحسى به انو بيشخر ودى من علامات التضخم الكبير حقيقة تضخم اللوزة الثالثة او التهاباتها عندها اقسام قسم بسيط وهو انو تجد الطفل يشخر فقط دون ان يكون فاتح فمه وفى الوسطى بصورة كبيرة يبين فتحة الانف تجدى الطفل فاتح فمه ويشخر وذى دا بيدى التغييرحاجات تانية يعنى تجدى اذنه بدات تتأثر طوالى تجديه عندو وجع اذن واذنه تتقل شوية النوع الشديد النوع بتاع الاختناق الليلى تكاد تكون كبيرة جدا ومعها ايضا اللوزتين متضخمات يعنى الطفل يشخر طول الوقت دا اسمه النوع الثالث وهو نوع الاختناق الليلى وبيحصل دائما فى الاطفال بسبب اللوزة الثالثة او اللوزتين اما عند الناس  الكبار بيختلف اللوزة الثالثة تسبب الشخير للاطفال ، الناس الكبار فى فرق كبير بينهم

مقدم البرنامج :

نحن بنحييك دكتور شرفى وامكن نرجع عشان نتكلم انو كثير من الناس يعنى قرار ازالة اللوزتين او اللوزة الثالثة بيبقى عندكم تردد فيه يعنى كثير من الاسر مثلا يقول لك اخوه الكبير كان عندو اللوزتين لكن راحوا فنحن ما فى داعى نستعجل لعملية اللوز رغم من انو نحن نتكلم عن كل هذه الاعراض التى انت تحدثت عنها وممكن تكون ارشادية متى يصبح قرار اجراء العملية او ازالة اللوزة الثالثة او اللوزتين وفى اى مرحلة عمرية بتكون هذه العملية حنرجع لهذا الحديث فقط نستقبل مكالمات المستمعين اولى المكالمات الو السلام عليكم

مشاركة عبر الهاتف :

وعليكم السلام معاك احمد الحافظ سليمان تأمل – الثورة الحارة 76 السؤال الاول هل يؤدى الكلام لفترات طويلة اذا انت تتكلم بصوت مرتفع الى الاصابة ببحة فى الصوت زوجتى تعمل معلمة بمرحلة الاساس منذ عشرين عاماً تنتابها بحة فى الصوت بين الحين والاخر وخاصة فى الايام الباردة هل هناك من طرائق يمكن اتباعها لحل هذه المشكلة السؤال الثانى ما يحصل الان من تركيب المحطات على اسطح الابنية واطراف يعطى امكانيات خطر الاشعاع وتأثير على الاذن والدماغ تم فى انجلترا تكوين لجنة لاطباء الاذن والانف والحنجرة وباحثين كيميائين وخبراء هل هذه الانتنات تسبب مضار للدماغ مزيد من تسليط الضو دكتور شرفى يعنى فى سؤال اخير ما هى المؤشرات التى تدل على وجود استئصال اللوزتين لانهم خط دفاع مهم جدا لانك لما تستئصالهم بتخلى العدو يدخل   

مقدم البرنامج :

شكرا اخ تأمل نجيب على الاسئلة بحتة الصوت فى احيان بنجد انو بعض الناس بتكون عندهم حاجة عادية صوتهم مبحوح اصلا او بحة بدرجات متفاوته وفى ناس يصابوا بهذه البحة زى ما قال بكثرة الكلام او بعض المهن يعنى نحن بنحيى المعلمين والمجهودات التى يقوموا بها واستخدام الصوت فى هذه المهنة

د/ شرفى عبد القادر :

نحن نحيى المعلمين الذين يعملوا ويساهموا فى تعليم الاجيال ، بحة الصوت ممكن نقسمها الى ثلاثة انواع بحة الصوت عند الاطفال وبحة الصوت عند المدخنين وبحة الصوت عند مستعملى الصوت وهم نسميهم مديرى استعمال الصوت ديل بيستعملوا الصوت كثير فديل بيدخلوا فيهم الفنانين بالنسبة للمعلم او المعلمين عموما يصابوا بحاجة اسمها حبيبات المغنيين دى دائما تصيب الناس وهى الشريحة الاخيرة الذين يستعملوا الصوت بصورة مدمنة وبعداك هم كلهم قارئ القرآن الاساتذة الفنانين وحتى المرأة التى تتكلم مع اطفالها طوالى ديل بتحصل لهم البحة دا دليل انو مرض عادى وما فيه اى حاجة دا ما عندو ادوية بيعطوها له ولا عملية انما يعطوا الزول نصائح وارشادات تقول اذا كان الصوت شديد عليك ارخى الصوت شوية عموما الذى يتكلم كثير حيتغير صوتك وذا كان طوالى موجود معه نحن عندنا اخصائى بتاع صوتيات فى المستشفى ممكن يجى يقابله يعطيه ارشادات اكثر على اساس يحاول يتجنب الحكاية دى

مقدم البرنامج :

بعض الحاجات البلدية التى نستعملها زمان يقولوا لك والله نمص الملح لما كنا فى المدارس انو تتطرق صوتك او الان نسمع نصائح الجنزبيل او حتى غرغرات معينة ممكن تساعد فى المسألة دى ام ما عندها علاقة بالصوت  

د/ شرفى عبد القادر :

هى والله طبعا الصوت بيطلع من الحبال الصوتية اساساً هى تصاب بالمرض وهو مرض البحة اما الحاجات التى تغرغرذى الكركدى الحار او الليمون دى كلها حاجات تهدى من افراز الطبقة المخاطية وبتالى عندها اثر ايجابى هذه المسألة

مقدم البرنامج :

نحن حنرجى معنا السؤالين لاخونا تأمل فقط عندنا اتصال الان الو السلام عليكم

مشاركة عبر الهاتف :

وعليكم السلام معاك فيروز عبد الله سعيد – المناقل كركوج انا بعانى شوية من اللوز يعنى فترات كدا بتضايق وصوتى بيكون فيه اكولة واحمرار واحيانا بعطس واشعر بنفسى مقفول ما قادرة اتنفس نهائى يعنى عايزة اعرف العلاج شنو وعايزة اعرف هل اللوز خط دفاع للجسم وبعداك الانسان بيكون عرضة لى اى حاجة والمسألة بعداك فى سخانة واتتضايق ووجع الحلق عايزة اعرف الكلام دا  

مقدم البرنامج :

شكرا يا فيروز معنا اتصال اخر الو السلام عليكم

مشاركة عبر الهاتف :

وعليكم السلام معاك محمد الفاتح بالنسبة للانف عندى انفى بتعمل جروح وتتقفل واشعر بانسداد وبعد مرات  تطلع دم

مقدم البرنامج :

شكرا يا محمد الفاتح ، نرجع امكن سؤال اختنا فيروز تكلمت عن اللوزتين وامكن حيجيب علي واحد اسئلة اخونا تامل وامكن سؤالنا نحن المستبقى عن التهاب اللوزتين وازالتهم ومتين يصبح انو لو تمت ازالتهم افضل من انهم يخلوهم يا دكتور انت قلت انهم خط دفاع

د/ شرفي عبد القادر :

الحقيقة لو جينا تكلمنا كلام عام بالنسبة لالتهاب اللوزتين كالتهاب متكررعندو قواعد اثنين مهمتين القاعدة الاولي انو دائما تعالج بالعلاج العادي الانسان يعملوا معه متابعة ويجي كل مرة ويشوفو طبعا البلد عيبا انو الانسان لا يحضر للمتابعة الدورية عشان تقدر تقيمو تقييم صحيح المجموعة الثانية مجموعة انو العملية الخيار في العملية انو اللوزتين ديل تزال المهم فى اللوزتين قواعد القاعدة الاولي انو التهاب اللوزتين يكون متكرر اقل حاجة خمس مرات يعني خمس او ستة مرات تزال بهم اللوزاتين طوالى دا اذا كان فى سنة واحدة اذا كان التهاب اللوزتين عند الشخص تقريبا بيجي فى السنة ثلاثة مرات اذا كان بصورة حادة اذا كان بيزيد في سنة مرتين او ثلاثة مرات متتالية تزال اللوزتين دى قواعد التكرار العام تانى حاجة ممكن بها ان تزال اللوزتين مثلا اللوزتين التى تسبب  في شهية الانسان يعني هزيل ومابياكل وضعيف وعندها اثار جانبية عليه يقيب كثير من المدرسة اسبوع اسبوعين تاني في سبب اخر نسمية من الاسباب العادية يعني ما اسباب خاضعة لازالة اللوزتين وهى اثرها على الاعضاء اذا كان اللوزتين مرتبطات بامراض اخرى تبقي مشكلة في الصمامات عندو في مشاكل في الرطوبة رجلي يتورمو طوالي اذا كان التهاب اللوزتين ياتي بالخراج حتي ولو جاء مرة واحدة تزال اللوزتين طوالي يعني خراج داخل اللوزة دي كلها انت بتقولي اللوزتين عشان ما يحصل لهم مضاعفات اخرى من التهاب اللوزتين المتكرر لانو البكتيريا لما تكون مضادات واجسام فوق اللسان طوالي اثارها على القلب والكلي والمفاصل ومن شروط علاجا عملية جراحية فى النهاية لازم تزال بها اللوزتين الانسان لما تحصل له الخنقة الليلية نتيجة للتضخم في التهاب اللوزتين دا سبب حقيقى لازالة اللوزتين السبب الثاني اللوزة التى فيها اورام غير حميدة ديلك اسباب ممكن تاخر بها العملية يعنى اذا اكتشفت عندو ورم بتشيل له الورم طوالي والشخص البتحصل له متكررة ما بنقول له امشي وتعال اذا فى مدرسة او شفال شغل مابيقدر ياجز ويجى يعني المشكلة توفيق اوضاع يعني ما تصر انك تزيلا له بالنسبة للوزتين المرتبطات بالجهاز المناعي دائما الحاجة الحديثة بتجد انو اللوزتين اثرهم المناعي بيبدا يقل بصورة كبيرة جداً بعد العام الثالث اي طفل مر من ثلاثة سنة جهازة المناعي له اثر عظيم يعني ما اثر كبير يعنى ما الاثر الذي يتركو به اللوز تبدا تتكرر على الانسان دا بالنسبة للاخت فيروز اما انو بيعمل حساسيات وبعداك يقلل المناعة دا كلام طبعاً ماصحيح اذا مثلا الانسان ما عندو لوزتين وعندو انيميا فى الدم ما بيكون عندو دم كثير وبيكون معرض للالتهابات اكثر 

مقدم البرنامج :

يعني شكوت فيروز دي ممكن تكون من مشكلة اخري

د/ شرفي عبد القادر :

ممكن تكون حساسية في الانف عشان كدا عندها احتقان في الانف واكولة في الحلق واكولة الحلق دائماً من اسبابا التهابات الجيوب الانفية دي كلها مجمل الاعراض بتاعة حساسية  الانف والجيوب الانفية

مقدم البرنامج :

نحن حنبقي معنا بعض الاسئلة وخاصة اسئلة اخونا محمد الفاتح فقط نستقبل مكالمة الان الو السلام عليكم

مشاركة عبر الهاتف :

وعليكم السلام معاك محمد الضو محمد عبدالله – جنوب كردفان عندي وجع حلق شديد

د/ شرفي عبد القادر :

عندك مشاكل ولى حرقان

مشاركة عبر الهاتف :

لا والله ما عندى مشاكل

مقدم البرنامج :

شكرا محمد ، نرجع دكتور اخونا محمد الفاتح تحدث عن جروح عندو فى الانف وقال انو بتطلع دم فى بعض الاحيان

د/ شرفى عبد القادر :

طبعا امراض الانف دى امراض اصبحت كثيرة وشائعة منها الامراض البكتيرية وهى من الامراض الشائعة في السودان مثلا زى حساسيات الانف والجيوب الانفية في الغالب الحساسيات مع الجفاف بتاع الجيب الحساسية دايماً بتعمل جروح في الانف الشي الثاني العادات السئية نحن نتكم عن العادات السئية حنتكلم عن عادة ادخال الناس اصبعهم في انفهم وادخال اشياء اخري فى اذنهم او يحكها بي اي حاجة يدخلها فيها مثل البينسة دي كلها من العادات مفروض الناس يتجنبوها الجروح هى من الاسباب الجروح الحادة بتعمل التهابات في الانف داخل التجويف الانفى الدورة المخاطية او التهابات مزمنة والالتهابات المزمنة دائماً بتعمل جيوب في الانف هى الامراض زي السل الرئوي بتعمل جروح كثيرة جدا لبعض الناس الامراض الفطرية في الانف بتعمل جيوب في الانف بعداك في القرح المزمنة ايضا تعمل جروح في الانف طبعاً الاخ محمد الفاتح ممكن يمشي لاخصائيين يشوفوا او ممكن يجينا في مستشفي الدوحة نشوفو انشاء الله

مقدم البرنامج :

محمد الفاتح ياريت تكون متابع معنا وتكون استمعت لنصيحة دكتور شرفي زي ماقال ليك المسألة تحتاج الي تشخيص لانها ممكن تكون مشكلة فيروسية بسيطة او ممكن تكون مشكلة تحتاج الي متابعة سريعة ربنا يديك الصحة والعافية او اذا قريب منكم اي اختصاصي ممكن تتصل به او اذا احتجت لي اي متابعة ممكن تتصل بنا عبر البرنامج ومشكور اخونا الدكتور شرفي فى مستشفى الدوحة ممكن يستقبلوك انشاء الله ، دكتور نحن نرجع لسؤال اخونا محمد الضو فقط وجع حلق يجى مره فى السنة  

د/ شرفي عبدالقادر :

حقيقة وجع الحلق حقيقة دا سؤال كبير لانو التهابات الحلق بالنسبة للناس الكبار دائما يعني في الغالب بتحصل لسببين وعندها سبب اخر غير شائع السببين الشائعيين انو الانسان يكون عندو التهاب في المعدة مزمن على فكرة التهابات المعدة والحموضة الزائدة والحرقانات من الاسباب الشائعة لاوجاع الحلق المزمنة بتجى طوالى الزول لو عندو معدة بيحصل له وجع حلق اضافة عليه التهابات الحلق السبب الثاني الشائع في الكبار التهابات الانف والجيوب الانفية لانو الانسان بيطلع بلغمه دائما التهابات الانف فى الجيوب الخلفية يعنى سبب طبيعى عندو افراز يومى فى الانف والتجاويف الانفية الافراز دا بيطلع عبر الحلق من وراء  الفم يبلعه ويدخل المعدة وينتهي علي كدا اذا الانسان عندو التهابات مزمنة في الانف والجيوب الانفية دائما بتجد الافراز عبارة عن تهيج للمخاط تخين وهو دائما من الاسباب التي تعمل التهابات في الحلق ايضاً العلاج بشعيرات الانف زى العلاج بتاع السبب الاول عبر المعدة ثانيا من الاسباب التي تعمل التهابات الحلق المزمنة هي التهابات اللوزتين دي واحد من الاسباب التي ممكن تؤدي الي انتشار الالتهابات في الحلق او اللوز والانسداد واعراض بتاعة ثقب فى القلب وحمى ويحصل له ألم مره مره يعنى زي ديل لو بيجيهم التهاب فيروسى مره فى السنة انصحه بى انو يستعمل الحاجات البلدية وممكن تستعمل العقاقير يعنى ممكن حاجات دافئة او يمشى ياخد له علاجات بسيطة وبعده يروح منه تانى ممكن يجيه فى السنة مره اذا ما عندو مشكلة

مقدم البرنامج :

اذاً بنحييكم ايها الاصدقاء ونتواصل معكم هذه الحلقة نخصصها للحديث حول المشكلات الصحية التى تتعلق بالاذن والانف والحنجرة ، دكتور شرفى يعنى ما زال هناك سؤال لاخونا تأمل تكلم عن محطات الاتصال والامراض وعلاقتها بمشاكل الاذن وامكن حنبقى هذا السؤال الى ان يصل حديثنا عن جزء المتعلق بالاذن ، الشخير يا دكتور واحدة من المشاكل الصحية وهى ما صحية فقط لكن احيانا تصبح مشكلة مجتمعية ومشكلة لها علاقة بالمجتمع لانو كثير من الناس الطلبة فى الداخليات الازواج يعنى المسألة فيها بعض الحساسية

د/ شرفى عبد القادر :

 الحقيقة الشخير طبعا ما هو مرض الشخير بالنسبة لعموم المجتمع ياتى لسببين الشخير عند الاطفال والكبار دائما الشخير فى الاطفال السبب الرئيسى له هو تضخم اللوزة الثالثة واللوزتين ايضا الى حد ما اللوزة الثالثة السبب الرئيسى للشخير الشخير البسيط او المتوسط او الشديد عشان كدا سببه فى الاطفال دائما سببه تضخم اللوزة الثالثة سبب رئيسى ومعه بجانبه اللوزتين عند الناس الكبار الشخير دائما سببه اول حاجة الوزن الزائد يعنى 50% من الناس الذين يشخروا بتجدى وزنهم الشىء الثانى مشاكل فى الحلق يعنى ترهل سقف الحلق والناس العندهم ريشه طويلة يعنى يقول لك الريشه بتاعتهم طويلة يعنى الزول يفتح حلقه تشوفيها طويلة لحدى ما تصل حركة اللسان بتاعه ايضا من السبب الشائع عند الناس الكبار الشخير عند الاطفال لما يكون مصحوب بتهيج اللوزة الثالثة تجد طوالى اللوزة الثالثة بتلتهب كثير وبعدين زى دا معالجته تتم بطريقتين الطريقة الاولى وهى العلاج العادى على فكرة اذا جينا لمعالجة اللوزة الثالثة فى نقطة عايز اتكلم عنها شوية يعنى 80% من التهابات اللوزة الثالثة يأتونا بيشخروا ويفتح فمه وهو نائم يعنى زى ديل المجموعة الاولى البيشخروا ديل زى اعراض جانبية فى الاذن ولا ضيق نفس دى ممكن يعطوا علاجات واذا كان الزول خلاص رقد وتضايق بالليل زى دى علاجه بالجراحة دى ممكن تكون فيه ملاحظات الملاحظة الاولى انو التبول الليلى غالباً عند الاطفال فى الغالب واحد من اسبابه هو اللوزة الثالثة والشىء الثانى انو مشاكل المدرسة عند الاطفال سبابا اللوزة الثالثة يعنى اول حاجة يمشى المدرسة نعسان لانو الليل كله يكون ما نام نومة كويسة يشخر ويصحى او يرقد ويقوم فيمشى فى الفصل الصباح ينوم   

مقدم البرنامج :

يعنى عدم التركيز ايضا دى واحدة من الملاحظات التى يلاحظوها المعلمين

د/ شرفى عبد القادر :

ايوا بالظبط كدا لانو بالليل لا ينوم ينوموا بالنهار وتجديه نائم وهو يشخر

مقدم البرنامج :

دكتور امكن نحن حنرجع لمسألة الشخير عند الكبار لانو عندنا مجموعة من الاسئلة التى وردت للبرنامج يعنى هل تكون مشكلة لها علاقة بالوراثة ايضا فى سؤال ورد ايضا للبرنامج يتحدث عن انو واحد زوجته كانت بتشخر لكن هى فى فترة الحمل بدات عندها هذه المشكلة هل هذه المشكلة عرضية او ممكن تصبح متلازمة عموماً معنا اتصال الان قبل ما نرجع ونتابع اجابة هذه الاسئلة الو السلام عليكم

مشاركة عبر الهاتف :

وعليكم السلام معاك محمد زين – ولاية شمال كردفان انا عندى وجع حلق يعنى فى الاسبوع يجينى مرتين

مقدم البرنامج :

 محمد زين هل بتدخن

مشاركة عبر الهاتف :

لا ادخن والله  

د/ شرفى عبد القادر :

البلع هل بتبلع كويس ام فيه صعوبة شوية

مشاركة عبر الهاتف :

البلع ما فيه مشكلة لكن وجع الحلق عندى سؤال تانى لكن خارج موضوع الحلقة عندى وجع ركب

مقدم البرنامج :

شكرا محمد زين كتر خيرك ، معنا اتصال اخر الو السلام عليكم

مشاركة عبر الهاتف :

وعليكم السلام معاك بشير محمد عوض الله – شمال كردفان عندى سؤالين بالنسبة للوزتين  الشهير انو اكثر شىء بتصيب الاطفال عايزين نعرف هل عندها مدى معين مع الاطفال ولى الى ان الطفل يكبر والسؤال الثانى هل هى مرض وراثى ام امراض بتجى فى بعض الحالات

مقدم البرنامج :

شكرا لك يا بشير يبدو انك ما تابعت معنا الجزء الاول لانو الدكتور تكلم باستفاضة عن انها هى بتصيب الطفل لحدى عمر كم عموماً نحن حنجيب على اسئلتك سريع تفضل دكتور

د/ شرفى عبد القادر :

حقيقة بالنسبة للاخ بشير التهاب اللوزتين ما عندو عمر معين ممكن من العمر بداية الحياة لكن دائما معالجتها فى الغالب بالعقاقير وبالجراحة قلنا بعد ثلاثة سنة لانو الفائدة بتاعتا فى جهاز المناعة بتقل بنسبة كبيرة جدا بعد عمر ثلاثة سنة الانسان ممكن يزيلوا له اللوزة الثالثة الى عمر خمسين سنة اللوزتين اما اللوزة الثالثة بتحدد فى عمر 12 و13 و18 سنة بالكثير يعنى فترة المراهقة بتختفى اختفاء طبيعى الناس بيزيلوها قلنا فى اسباب منها حميدة وغير حميدة اما اللوزة الثالثة عندها اسباب بيزيلوها بها ايضا اذا كان الشخير شديد اذا كان اثر على الاذن ممكن يزيلوها اذا كان اثرت على السمع بالذات ممكن يزيلوها اذا كان اثرت على تقدمه بالدراسة فى المدرسة اذا تعبان وعندو شخير ممكن يزيلوها العمليات عموماً بسيطة غير معقدة ما عندها مضاعفات شديدة  

مقدم البرنامج :

هل لها علاقة بالوراثة يعنى هل ممكن زيها وزى الحساسيات ممكن تنتقل بالوراثة

د/ شرفى عبد القادر :

والله التهاب اللوزتين ما عندو علاقة بالوراثة خالص لكن التهاب الحلق دا سؤال اخونا محمد زين التهاب الحلق عندو علاقة بالركب طبعا وبالعضلات عموماً وتكسير المفاصل والعظام عموماً والتهاب الحلق اذا جاء للشخص فى الاسبوع مرتين يؤثر على الانسان فى مفاصله الفترة الاولى يحتاج الى معالجة واطب منه يشوف اخصائى فى كردفان

مقدم البرنامج :

محمد زين زى ما سمعت نصيحة الدكتور لازم تتصل باخصائى وايضا لو احتجت لمتابعة ممكن تتصل بنا عبر البرنامج انشاء الله ، مرحبا اهلا بكم ايها الاصدقاء نرحب بكم عبر عيادة على الهواء ، دكتور شرفى نرجع انو فى دراسات تحدثت عن انو مسألة الشخير عندو علاقة بالمسألة التشخيصية بالنسبة للانسان وسؤال يعنى واحد من المستمعين تحدث عن الحمل

د/ شرفى عبد القادر :

فى الحقيقة مسألة الشخير عند الناس الكبار طبعا الاطفال قلنا اللوزة الثالثة لكن الكبار دائما ترجع الى انو عندهم مشكلة فى الطبقة المخاطية بتاعة الحلق طبعا فيه ثوابت زى اللسان ومؤخرة اللسان عندك اللهاه المدلدة وفى جنباتها فى جزء من سقف الحلق عند الناس الكبار دائماً ممكن السمنة قلنا واحدة من الاسباب الرئيسية الزول لو وزنه كثير او قل وزنه من 50 او اكثر من 50% الشخير طوالى يؤثر فى الدماغ الشىء الثانى تضخم اللهاة وسقف الحلق وترهله يعنى سقف الحلق اذا بقى شادى تجديه مترهل لما الزول ينوم يقوم يقفل له الفتحة الخلفية بتاعة الانف ويشيل نفسو شديد بانفه عشان يكون الهواء يقوم سقف الحلق يتحرك وفى التحرك يعمل الصوت دا  

مقدم البرنامج :

يعنى المشكلة دى ممكن تتعالج جراحياً

د/ شرفى عبد القادر :

يعنى ممكن تتعالج بالجراحة وغير جراحة

مقدم البرنامج :

يعنى اللوز لو اصبحت هى مشكلة عندها بعض المتعلقات الاجتماعية الاخرى

د/ شرفى عبد القادر :

والله صراحة يعنى الزول لو جاء يعوم كثيرهى عملياً ما فيها مشكلة لكن اول حاجة يمشى يقلل وزنه  بالنسبة للمرأة الحامل الطبقة المخاطية بتاعة سقف الحلق والطبقة المخاطية بتاعة الانف تجويف الانف بالالتصاقات الهرمونية بتكون زى شايلة كمية من السوائل انتفاخها فى سقف الحلق مع تجويف الانف بيبين مداخل الهواء ويحدث الصوت وبالنسبة للشخير عندو حاجتين اساستين سقف الحلق واللسان

مقدم البرنامج :

يعنى هذه المشكلة ممكن تختفى

د/ شرفى عبد القادر :

زى التضخم بتاع الرجلين النساء السودانيات لا يحافظوا على وزنهم بعد الولادة بالنسبة للشخير تانى عندو اشياء اخرى غير سقف الحلق انو الانف جزء رئيسى اصبح فى الدراسات الحديثة انها هى واحدة من اسباب الشخير ايضا يعنى الانسان العندو احتقان طوالى فى انفه عندو تضخم فى الانف وعندو انسداد طوالى مزمن دا بيقوم يشخر يعنى الانسان يعالج الانف اضافة الى ترهل فى سقف الحلق واللسان

مقدم البرنامج :

دى زى قبيل قلنا انو دى فترة يكثر فيها الناس العندهم التهابات الجيوب الانفية وفترات الفواصل ودخول الصيف

د/ شرفى عبد القادر :

ايضا من الحاجات التى لها علاقة بالشخير اللسان على فكرة اللسان من قدام رقيق ومن وراء واسع يعنى  العيايين تجد اللسان من وراء متضخم شوية اللهاة طبعا كبيرة والريشة كبيرة واللسان متضخم فالحتة تكون زى الخراج يعنى طوالى تكون الانف محتقنة بعض الناس شخيرهم شديد يحصل لهم نفس الحاجة التى تحصل عند الاطفال انو الشخير يطول شديد يعنى الاختناق الليلى الذى يحصل للناس تجديه كبير وعندو ضغط وشخيرشديد ديل كلهم يحصل لهم الاختناق

مقدم البرنامج :

نحييك دكتور شرفى وامكن نحن لم يتبقى لنا كثير عندنا اتصال امكن يكون الاخير لانو ما زال عندنا موضوع مهم جدا عن بعض العادات المجتمعية الضارة وتأثيرها وامكن كنا عايزين نفرد جزء كبير من هذه الحلقة عن الاورام غير الحميدة واعراضا وكيف الناس ممكن تتعرف عليها فقط نستقبل مكالمة وربما تكون هى الاخيرة الو السلام عليكم

مشاركة عبر الهاتف :

وعليكم السلام معاك حسنة حسن الطيب – القلابات الشرقية عندى طفلة عمرو ستة سنة عندو رعاف فالرعاف دا نحنبنقوم نعمل لها اسعافات اولية ونوديها المستشفى وبيدوها حقنة فالحقنة دى لو استمرت متواصلة هل فيها ضرر ولابد انو نعرضها على طبيب جراحة  

د/ شرفى عبد القادر :قلتى عمرها ستة سنة

مشاركة عبر الهاتف :كان عمرها ستة سنة لكن الان الحمد لله عمرها 12 سنة لكن ما زال مستمر معها الرعاف دا

د/ شرفى عبد القادر : يعنى من عمر ستة سنة ومستمر معها لحدى الان

مشاركة عبر الهاتف :ايوا مستمر معها

د/ شرفى عبد القادر :يعنى ما عرضتوها على اخصائى

مشاركة عبر الهاتف :

على اخصائى ما عرضناها لكن نوديها هنا للدكتور العمومى ويعملوا لها اسعافات اولية ويعطوها حقنة رعاف فقط

د/ شرفى عبد القادر :بيطعنوها الحقنة ام يكبوها لها فى الانف

مقدم البرنامج : للاسف انقطع الخط يا ريت يا حسنة لو استمر

د/ شرفى عبد القادر :

الحقيقة الرعاف عندو اسباب كثيرة وشائعة  والرعاف اما يكون الانسان عندو سبب عام فى الجسم يعنى مرض عام فى جسم الانسان او يكون مرض موضعى داخل الانف وافتكر انو مرضها دا داخل الانف اذا كان عام نسميها مضاعفات اخرى بتاعة الدم وتحصل له مشاكل تانية انا افتكر انو الخدمة الصحية للناس ديل الخدمة الصحية المتميزة المتخصصة اذا ستة سنة او سبعة سنة او عشرة سنة عشان يشوفوا المشكلة ويحلوها اتمنى انو هى تجى ونقدم لها مساعدة كاملة لهذه المشكلة بى انو نشوفا لها بالمنظار الضوئى ونشوف الانف ونشوف اذا عندها لحمية المفروض فالحقنة ما ما اعرف هى شنو ما اقدر اوضح الضرر لكن مفروض تتعالج المشكلة علاج كامل عشان ما تحتاج انها تاخد دواء بصورة مدمنة وهى ما عارفة الاثار الجانبية له

مقدم البرنامج :

حسنة يا ريت تكونى تابعتى كلام الدكتور عموما نتمنى انك تحاولى الاتصال بنا وتتركى رقمك فى غرفة الكنترول عموماً نحن حنعمل على اساس نساعدك ، دكتور يعنى الحديث عن الرعاف حقيقة موضوع مهم جدا لانو يتكرر عند الاطفال فى مراحل عمرية مختلفة انا اتمنى انو نخصص له حلقة قادمة حسب ما يسمح زمنك للحديث حول مشاكل الانف والرعاف بالتحديد او نزيف الانف والعلاجات التى ممكن ان تتعمل والاسعافات الاولية ، انا بشكر كل المستمعين الذين اتصلوا بنا وامكن نحن لم يتبقى لنا كثير اربعة دقائق فقط ، دكتور نتكلم عن العادات المجتمعية الضارة والممارسات السلبية فى تعاملنا وتأثيرها على صحة الانف والاذن والحنجرة

د/ شرفى عبد القادر :

نحن نعملا مؤشرات للناس انو الانسان قدر الامكان يتجنب بعض العادات الضارة يعنى التى قد تسبب حاجات صعبة جدا يعنى من الامور الشائعة جدا هى تسمم بصيلات الشعر عند النساء السودانيات دى من العادات الضارة جدا والعادات السيئة واتمنى انو الناس يحاولوا يتجنبوها لانو معالجتها صعبة بصراحة يعنى دائما الزول البيجى شارب الصبغة دى تجديه يعنى ما يطلع من ثلاثة حاجات اساسيات انو يفتحوا له فتحة فى الحنجرة فتحة قبيحة جدا او انو يصاب بالفشل الكلوى المستديم او الوفاة بسبب الاختناق فالسبب الرئيسى للوفاة هو الاختناق التنفسى والاسباب الاخرى انها تؤثر على القلب يعنى الزول يجى ما عندو اختناق لكن عندو مشكلة فى القلب سريعة حادة دى بتكون سبب الوفاة الشىء الثانى لتعاطى الصبغات السامة  بتاعة الحجرايضا تؤثر على المخ والاعصاب يعنى تجدى الانسان كليته كويسه ممكن تحصل له تشنجات يعنى تجديه فى حالات تشنج طيلة الساعات الاولى الى ان يتوفى فانا افتكر دى من اسوأ الاشياء فى المجتمع اتمنى انو الجهات المسئولة توقفها وما تدخل واتمنى انو الناس يحاولوا لو الزول بيتعامل بها فى بيته يحاولوا يبعدوها منه بالمناسبة فى العموم الناس على مستويات النساء او البنات الشابات هم الناس الذين يتعاطوها عن قصد الانتحار نساء يستعملوها لاغراض اخرى ديل يشربوها اطفالهم بالصدفة يجد الكباية او الكوز وشرب تجديه طوالى حصلت له المشاكل دى والنوع الثالث والاخير بيستعملوها لغرض التسمم والانتحار انا اتمنى انو العادة دى تروح العادة الثانية هى عادة ادخال الحاجات فى الانف الناس الذين ينظفوا اذنهم بقطنة او يدخلوا المفتاح دى ايضا من العادات السيئة التى تؤثر على الاذن يعنى الحاجة دى بتشوفا بسيطة لكن ممكن تثقب الاذن وتعمل لك مشكلة صحية دائمة وتلجأ الى كثير من الاخصايين وتسمع استشارات مختلفة دى حقيقة حاجات الانسان بيغيب عنها

مقدم البرنامج : وامكن الحاجة دى عند الاطفال

د/ شرفى عبد القادر :

ايوا  ايضا الحاجات الصغيرة زى السكسك الاشياء دى ايضا الاطفال يدخلوها فى انفهم وفى اذنهم ويتشرقوا بها فى الرئة يعنى من ناحية دى ايضا من العادات اتمنى انو الناس يتنازلوا عنها ايضا التدخين من العادات الضارة السيئة واتمنى يقللوا منها كثير  

مقدم البرنامج :

دكتور شرفى حقيقة فى موضوع مهم جدا موضوع الاورام غير الحميدة وكيف الناس ممكن تتعرف على اعراضا وكيف يمكن اكتشاف المشكلة فى مرحلة مبكرة وبالذات امكن التهابات واورام الحنجرة تكثر عموما نحن انشاء الله حنتكلم عنها يعنى حسب ما يسمح زمنك نلتقيك فى حوارات اخرى ولقاء اخر عبر عيادة على الهواء

د/ شرفى عبد القادر :

انشاء الله وانا كنت اتمنى انو الحلقة تمتد واتكلم عن الجيوب الانفية ونتكلم عن السمع والاذن

مقدم البرنامج :

انشاء الله اذاً ناخد وعد منك ونعد مستمعينا الاعزاء انو نلتقيك فى لقاء اخر عبر عيادة على الهواء ، شكرا دكتور/ شرفى عبد القادر عمر استشارى الاذن والانف والحنجرة شكرا لكم ايها الاصدقاء كنا معكم عبر عيادة على الهواء طه عبد الرحكم طه ربطنا بكم عبر اجهزة الصوت الرقمية ، تحياتى عبر المايكرفون اسراء زين العابدين ، الاسبوع القادم لقاء جديد عيادة على الهواء سامية عبد القادر حماد              

.