بسم الله الرحمن الرحيم

برنامج عيادة على الهواء

موضوع الحلقة : أنواع البشرة وكيفية العناية بها  – بثت 21- 6 – 2012م

مقدم البرنامج :

اسراء زين العابدين

الضيف :

دكتور / عمر كمبلى استشارى الامراض الجلدية والتناسلية والذكورة     

مقدم البرنامج :

مرحبا اهلا بكم ايها الاصدقاء ، بدءاً هاكم تحايا الفريق الذى يصحبنى عبر هذا اللقاء ، اهلا بكم نذكركم بارقام هواتف البرنامج 87553151 و 87553152 ، مستمعى الاعزاء عيادة على الهواء هذا البرنامج الذى نهدف من خلاله الى نشر الوعى الصحى ، فى هذه الحلقة يسعدنى كثير جدا ويشرف البرنامج ان يكون معنا دكتور/ عمر كمبلى استشارى الامراض الجلدية والتناسلية والذكورة مرحبا بك دكتور حبابك عشرة

د/ عمر كمبلى :

اهلا وسهلا ، بسم الله الرحمن الرحيم والصلاة والسلام على رسول الله يسعدنى كثير جدا ان اكون ضيفاً على هذا البرنامج ويسعدنى كثيرا ان اتواصل مع اهلنا الطيبين فى داخل السودان وفى خارج السودان واشكرك استاذة اسراء واشكر الفريق العامل معك واتمنى الصحة والعافية للاستاذ يس عبد الله

مقدم البرنامج :

مرحب بك دكتور كمبلى ، بنذكر المستمعين انو فى هذه الحلقة انشاء الله سنتحدث عن انواع البشرة وكيفية العناية بالبشرة مع دخول فصل الصيف وايضا كيفية التغلب على مشاكل تهيج الجلد واحمرار البشرة التى تصاحبها ، وايضا نتوقف عند مشاكل البشرة الدهنية ومرحلة الشباب وعلاقتها بحب الشباب ، ايضا نخصص بعض الحديث عن الاكزيما كواحدة من المشكلات الصحية اسبابا انواعا وكيفية الوقاية وتقليل هذه المشاكل وخاصة عند الاطفال وحديثى الولادة ، نحاول ايضا ان نفرد اكبر حيز فى هذا اللقاء للحديث عن كريمات تفتيح لون البشرة بانواعها وخطورة التعامل مع هذه الانواع منها وكيفية تلافى المشاكل التى تنتج عنها ، اذاً اهلا مرحباً بكم دعنا نبدا ودخلنا فصل الصيف وارتفاع درجات الحرارة وكيفية تلافى المشاكل فى هذه الفترة

د/ عمر كمبلى :

بسم الله الرحمن الرحيم ، كما يعلم الجميع الجلد هو اكبر عضو فى جسم الانسان وبتالى هو عضو مهم جدا وعندنا امراض كثيرة جدا فى الجلد وصحة الجلد مهمة جدا وهى عنوان صحة الانسان وامراض الجلد تزيد على 3500 مرض يعنى امراض متعددة كثيرة جدا والانسان يتأثر بها كثير جدا وفى امراض جلدية بحته وفى امراض لها علاقة باعضاء اخرى فى الجلد والجلد مكوناته كثيرة كل مكون عندو الامراض بتاعته وبيتاثر فعلا لانو هو العضو المباشر  مباشر مع الطبيعة ومع الخارج بالنسبة للانسان وبيكون يتأثر بفصول السنة طبعا فصول السنة عندنا كلها حارة بدرجات ومتفاوتة لكن الصيف حار جداً وبتالى عندو امراضه الخاصة والحمد لله نحن الجلد بتاعنا بيتوافق مع الحرارة الشديدة دى يعنى اذا جانا انسان بمرض من المناطق الباردة بيتاثر كثير جدا يعنى ما زينا نحن يعنى لو جاهم الحر بتاعنا لناس المناطق الباردة حيتعبوا كثير جدا هم يشكوا من حر نحن بالنسبة لنا جو جميل بتالى نحن عندنا مشاكلنا فى الحر لكن هى اخف وطأةً نسبة لخلقة ربنا لنا للجلد بتاعنا انو يقاوم التغيرات بالجو بتاعنا هنا وبتالى اى محاولات لتغيير جلدنا الى جلد اخر فدى بتبوء بفشل وامراض اخرى حنتكلم عنها لاحقاً فى الصيف طبعا عندنا حمو النيل والناس عارفة حمو النيل كثير جدا فى فصل الصيف العرق الكثير الحر الشديد فبيجى للناس حمو النيل فى مناطق تانية لو جاء الحر بيجيهوا ضربات الشمس دى نحن ما قاعدين نشوفا لكن بتجينا بدايات نسميه الاجهاد الحرارى يعنى الواحد لما الحر يزيد عليه تجده فتران وتعبان لكن ضربات الشمس التى نشوفا حتى فى ايام الحج الحجاج بيجوا من مناطق مختلفة اقل الحجاج الذين يتعرضوا لضربات الشمس دى مهما كانت الحر شديد هم الحجاج السودانيين حتى اذا رقدوا بيرقدوا بالحاجات البدائية دى ( الاجهاد الحرارى ) عندنا فطريات كثيرة جدا تزيد فى فصل الصيف الحرارة الشديدة بالذات ما نسميه النخالية المبرقشة او النخالية الملونة والتى الناس يسموها البهق عندنا وليس البهاق فدى بنجدها اولا كثيرة عندنا كل 80% من الناس عندهم البهق دا وبيزيد فى الصيف

مقدم البرنامج :

امكن فى الشتاء ومع برودة الجو الى حد ما او بتقل مساحتها

د/ عمر كمبلى :

ايوا بتقل لكن بتزيد فى الصيف كثير جدا دى امكن الامراض المهمة لكن فى فطريات تانية ايضا بتزيد فى فصل الصيف بالذات الفطريات التى تصيب القدمين وبتصيب باقى الجسم بتكون اكثر شىء فى فصل الصيف

مقدم البرنامج :

يا دكتور كيف نعتنى بالبشرة وخاصة الناس الاصلا بيعانوا من بعض المشاكل يعنى زى ما تفضلت وذكرت جزء منها مرتبط بضعف الجهاز المناعى عند الناس او بعضها مرتبط بانواع من الحساسيات التى تظهر فى الصيف

د/ عمر كمبلى :

اول شىء فى الصيف الحر شديد والناس تتفادى انها تتعرض للشمس لانو اشعة الشمس نحن عندنا ضارة هى نفسها فى حد ذاتا غير الحرارة الزائدة الاشعة اصلا ضارة بالجلد صحيح انو جلدنا الاسمر دا بيقاوم امراض كثيرة جدا بتحصل للناس بالذات السرطانات فى اوربا فى سرطانات كثيرة جدا وكلما تمشى للمناطق الشمالية فى اوربا بتجد سرطانات كثيرة واللون الابيض فى استراليا فيه سرطانات كثيرة لانو استراليا حارة نسبياً لذلك الناس تتفادى الشمس نحن بنشوف ناس كثير بتقيف فى الشمس فى ظروف ما فى داعى يكونوا واقفين فى الشمس يتعرضوا لدرجات حرارة عالية فى وقت هم ممكن يتفادوا درجة الحرارة العالية تلطيف الجو وتبريد الجو مهم جدا بالنسبة للوقاية لكثير من الامراض ياريت لو الناس يلبسوا البرنيطة بتغطى الرأس بالذات البنات عندنا لانو بيهتموا جدا لانو لونهم ما يبقى فيه سمار زائد او يشيلوا معهم مظلات يعنى الثقافة دى لو انتشرت بتكون والله جميلة جدا لكن الناس امكن الان بيشوفوها حاجة غريبة او بيقولوا ناس بتاعين حركات لكن هى مفيدة جدا لو اصبحت ثقافة عامة بتكون جميلة جدا افتكر لانو نحن حتى مساحة الظل عندنا الاشجار والظلال عندنا ما كثيرة الناس لو بتشيل مظلات وتلبس البرنيطة بيتفادوا كثير من اشعة الشمس الضارة بالنسبة لهم

مقدم البرنامج :

خاصة امكن نحن ماشين على مدارس وبداية العام الدراسى اصبحت هى واحدة من الثقافة فى انو الناس التى تنتظر المواصلات وتتحرك من البيوت تستعمل هذه المظلات

د/ عمر كمبلى :

نحن اسى مع الانفتاح جاتنا بالذات الفلبيين انا بشوفهم دائما حاملين مظلات اتمنى انو نحن لو نقتدى بهم فى الحته دى  

مقدم البرنامج :

دكتور عمر بنرحب بك ونحن حننتقل ونتكلم عن انواع البشرة سواء دهنية جافة حساسة وكيفية العناية بها وفى بعض الناس يقول لك والله امسحها بكريمات مرطبة اشعر بها اصبحت دهنية وامكن تكون مركبة عموماً حنرجع لهذا الحديث فقط معنا اتصال الو السلام عليكم

مشاركة عبر الهاتف :

وعليكم السلام معاك جدوا عثمان – ولاية القضارف عندى بنتى عندها حبوب فى وجهها يعنى الحساسية لو قامت عليها نمشى للدكتور يعطينا حبوب فالبنت دى وامها لما تستعمل الحبوب وتنهى الحبوب تانى الحساسية بترجع لها ايضا عندى زوجتى بتقوم عليها الحبوب فى الوجه

مقدم البرنامج :

البنت عمرها كم

مشاركة عبر الهاتف :

عمرها زى عشرين سنة تقريباً ومتزوجة

د/ عمر كمبلى :

وزجتك تقريباً عمرها كم

مشاركة عبر الهاتف :

تقريباً زى 35 سنة        

د/ عمر كمبلى :

 فى اى حساسية فى الصدر فى العائلة بتاعتكم يعنى زول عندو حساسية فى الصدر يعنى عندو ربو

مشاركة عبر الهاتف :

لا

د/ عمر كمبلى :

حساسية الانف فى

مشاركة عبر الهاتف :

لا لكن لما تقوم عليهم الواحدة لما تحك بالسكين او بى اى حاجة

د/ عمر كمبلى :

الذى تعانى منه بنت جدو دى حساسية نسميها الحساسية الاتوبية او الاكزيما الاتوبية ودى كثيرة جدا شائعة يعنى بالنسبة للاطفال بتكون حوالى 20 – 25% من الاطفال عندهم النوع دا من الحساسية الاتوبية فى اوربا النسبة اعلى من عندنا هنا لكن الحياة بتاعتهم فيها تلوث اكثر مما عندنا فدى عامل وراثى فيها عامل بيئى فيها عامل مناعى لكن العامل الوراثى مهم فبيكون فيها حكة شديدة جدا زى ما هو ذكر فى العادة تبدا فى عمر شهرين تستمر كلما الاطفال يكبروا شوية كلما خفت الحساسية او الاكزيما الاتوبية ديا بتخف لكن لا تنتهى بنتوا عمرها عشرين سنة واستمرت معها لانو معالجتها مهمة جدا زى ما نحن حنتكلم عن الجلد النوع دا من الجلد جاف يعنى دا النوع من الجلد بيكون جاف جدا ومرات الواحد يحك ويطالب الناس الاخرين يحكوا معه طول الوقت تجديه يحك فى الجلد بتاعوا وبتكون فى مناطق محددة اكثر من الاخرى مثلا فى الثنايا بتاعة الجلد الثنايا بتاعة اليدين والثنايا بتاعة الرجلين بتكون اكثر وفى الرقبة بالذات ومرات تكون فى الرجلين ايضا عامة المهم هى حكة شديدة الجلد جاف مرات تكون مصحوبة بحساسية فى الانف زى ما سالته قال مافى مرات تكون مصحوبة بحساسية فى الصدر ومرات بتكون حساسية فى العيون هى بنشوفا كثير جدا الاكزيما الاتوبية غالباً حتى زوجته هى بتعانى من الاكزيما الاتوبية ودى فى الوقت الحالى تعالج اول باول لانو تاثيرها النفسى صعب جدا على الانسان لانها بتشوه الجلد لقدام يعنى غير التاثير النفسى بتعمل تشوهات مزعجة للمريض وللاسرة فدا نوع من الاكزيما الاتوبية

مقدم البرنامج :

جدو يا ريت تكون استمعت لنا ولو احتجت لى اى متابعة ممكن تتصل بنا عبر البرنامج انشاء الله ، معنا اتصال اخر الو السلام عليكم

مشاركة عبر الهاتف :

وعليكم السلام معاك بشير محمد عوض الله – شمال كردفان – النهود طبعا بالنسبة للبشرة فى فترة الصيف والشتاء بسأل دكتور عمر ففى فترة الشتاء بيكون لون البشرة مايل الى ناعم وفى فترة الصيف بالذات نحن شغالين مع الاعمال الزراعية الالوان بتتغير عايزين نعرف التغيرات التى تحصل هل هى تغيرات عادية من اثر الشمس

مقدم البرنامج :

اذاً دكتور نحن حنستصحب معنا سؤال اخونا بشير ومعنا اتصال اخر الو السلام عليكم

مشاركة عبر الهاتف :

وعليكم السلام معاك صديق حاج جمعة – كردفان والله عندنا اطفال فيهم قوب ام بهق الله اعلم قوب فى الرأس يعنى ازال الشعر وتساقط

مقدم البرنامج :

اعمارهم كم يا صديق

مشاركة عبر الهاتف :

والله بين خمسة واربعة سنة

د/ عمر كمبلى :

طيب نحن نرجع لسؤال جدو لانو نحن شرحنا له الحالة ما وضحنا له يعمل شنو فالحالة دى لازم تتعالج بواسطة طبيب لازم  يراجع طبيب لكن لو بيقدر يجد مرطبات للجلد لازم يستعمل مرطبات الناس ديل يستعملوا مرطبات طوالى ومع الحمام لا يستعملوا الليفة زى ما الناس بيستعملوا عندنا كثير فى السودان بيستعملوها حتى الصابون بتاعهم يكون خاص ما الصابون الذى يجفف الجلد لانو جلدهم هم جاف لكن الافضل يعرضوا على اخصائى جلدية لانو فى علاجات بيعطيها اخصائى الجلدية ، بالنسبة لسؤال اخونا بشير وبشير بيقول البشرة بتتأثر زى ما ذكرنا نحن قبل شوية تتأثر فى الصيف وفى الشتاء ونحن عندنا الحر شديد والشمس الشديدة بتاثر فعلا على البشرة وبتسمرها اكثر فى الصيف بتكون اقل سماراً لانو الشمس بتكون عمودية فى الصيف بتكون اقل تاثيراً على الانسان فجسم الانسان عموماً عندو درجة حرارة يسموها الدرجة المريحة وهى 25 درجة نحن هنا ما زالت درجتنا 45 و25 دى فى الشتاء بنحصلها مرات مرات فالشمس فعلا بتأثر على البشرة فصل الشتاء عندنا هو فصل جميل فى كل النواحى فصل مؤيح جدا الانسان بيشعر بنشاط بيشتغل كثير فيه يعنى فصل جميل ومريح بالنسبة لنا وعندنا امراض فى الصيف غير التى ذكرناها الامراض الفيروسية ايضا بتزيد فى الصيف نلاحظ الايام دى فى الجدرى المائى كثير جداً دا بخصوص اخونا بشير ، بالنسبة لاخونا صديق من كردفان الحبيبة الامراض التى تصيب الاطفال فى الرأس هو قال عليها القوب نحن فى السودان عارفين القوب لكن فى اللغة العربية غير كدا القباء حاجة تانية نحن نسميها سعفة الرأس دا مرض فطرى فطريات بتجى عند الاطفال اكثر بكثير مما تجى عند الناس الكبار نادراً مما نشوفا عند الناس الكبار بتجى للاطفال الذكور اكثر مما انها تجى للبنات ما لم يكون شعرهم خفيف وقصير لكن بنشوفا عند الاولاد اكثر دى من الامراض المعدية بتجى للاطفال فى المدارس الاطفال فى الروضة الاطفال الذين يلعبون مع بعض يعنى ما بتجدى طفل واحد عندو بتجدى عدة اطفال عندهم فعلا هى حكة فروة الرأس فيها قشرة والشعر يعنى ما رايح 100% تجد جذور الشعر موجودة لكن الشعر انحت زى ما قال هو لانو دى بتختلف من حاجة اسمها ثعلبة فالثعلبة ما فيها اى حاجة يكتشفوا فجأة انو فى حته مدورة زى دى مدورة ما فيها شعر لكن جلد فروة الرأس تجده املس قليل نظيف جدا ما فيه ولا حاجة والواحد لا يشعر بحاجة لكن دى فيها الحكة وفيها القشور والشعر بقاياه موجودة بتكون مرات واحدة ومرات فى عدة مناطق فى الرأس تجدى فيها الحالات دى ومرات لما تهمل بتحصل فيها التهابات شديدة جدا نحن فى العادى القوب العادى زى ما ذكر هو نحن نسميها سعفة الرأس لو تعالجت مظبوط الجلد بيرجع زى ما كان والرأس بيكون كأنوا ما فيه حاجة لو اهملت وحصل فيها التهابات وبصيلات الشعر التهبت وتدمرت بعداك بتسبب لنا صلع دائم فبتالى علاجا اول بأول مهم كل الاطفال العندهم يتعالجوا اول بأول لانو الطفل بيعدى غيره من الاطفال فانت لازم تعالج كل الاطفال عشان تمنع المسألة دى تنتشر بين الاطفال اذا اصابت طفل فى المدرسة لازم كل الاكفال تصيبهم

مقدم البرنامج :

تنتقل بالملامسة

د/ عمر كمبلى :

 نعم بالملامسة هى فطريات وكثيرة عندنا ونشوفا كثير جدا يعنى فى بعض الدول الاوربية لا نشوف حاجة زى دى يعنى بعض الدول قالوا ما شافوها الا بعد اتو المهاجرين الافارقة

مقدم البرنامج :

شكرا اخونا صديق ، دكتور كمبلى عايزين نرجع امكن فى اسئلة كثيرة تدور حول العنايى بالبشرة وحسب نوع البشرة وبعداك تبتدى الاجتهادات والمشاكل المرتبطة بالبشرة حسب نشاط الشخص او طبيعة عمله او طبيعة الجسم نفسه

د/ عمر كمبلى :

تكلمنا عن البشرة الجافة وقلنا معظم الناس العندهم بشرة جافة ديل هولاء الناس العندهم النوع من الحساسية الاتوبية او الاكزيما الاتوبية بدرجات متفاوتة يعنى الاكزيما الاتوبية بتكون ما هى بدرجة الشراسة العند بعض الناس مرات بتكون خفيفة جدا لكن عموماً جلدهم جاف بتاعين الحساسية الاتوبية هولاء الناس بيحتاجوا انهم يستعملوا مرطبات فالمرطبات دى مهمة جدا يستعملوا مرطبات وحتى نوع الصابون الذى يستعملوا يكون صابون لا يجفف الجلد وما يكثروا من الحمام كثير وما يستعملوا الليفة زى ما ذكرنا والموية تكون عادية نحن هنا ما عندنا موية باردة شديد ولا حارة شديد مويتنا عادية فى الحمام وما ياخدوا وقت طويل فى الحمام وما يكثروا من الحمام ، نجى للبشرة الدهنية ودى ايضا مربوطة بنوع تانى من الحساسية اسمها الاكزيما الدهنية اكزيما الجلد المسحى دا الاسم العربى هولاء الناس بيكون جلدهم مدهن طوالى يعنى يشكوا لك انو جلدهم بينز دهن بيطلع دهن كثير جدا دا ايضا نوع من الجلد عكس داك تماماً فدا الغدد الدهنية بتفرز دهون كثيرة جدا نحن الغدد الدهنية موزعة فى كل جسمنا بدرجات متفاوتة فى اماكن فيها الغدد الدهنية اكثر من الاخرى لكن بالذات فى ناس فى الوجه بتاعهم يقول لك نحن طوالى وجهنا دا مزيت هولاء الناس نحن ما نصحنا ديلك ننصحهم بانهم يقللوا من الحمام والغسل اما هولاء اصحاب البشرة الدهنية ننصحهم بانهم يكثروا من الحمام والغسل يستعملوا صابون غير الصابون داك الصابون الذى يجفف الجلد وحتى لو استعملوا اى حاجة تانية معه يعنى يكثروا من الحمام وغسل الجلد ويكثروا من نوع الصابون الذى يجفف الجلد واذا المسألة ارتبطت بمرض يعنى ممكن تكون حساسية ممكن يكون فيها احمرار فى الجلد ممكن يكون فيها قشور وممكن يكون فيها حكة وممكن يلتهب الجلد فدى بتحتاج الى معالجات طبية لكن مجرد انو الجلد دهنى بالفسيل الكثير واستعمال صابون معين يقوم الجلد يجف

مقدم البرنامج :

دكتور امكن بترد دائما للبرنامج عدد من الاسئلة ودائما بنقول انو دا واحد من الهموم مشكلة الكريمات كريمات التفتيح بتبدا المسألة باستخدام انواع من الصابون كريمات تركيب اذا كانت فيها تركيبات من بعض الصيدليات بعض الخلطات التى تتعمل عند الناس مرات عشبيين وغير عشبيين ومرات يستخدموا فيها انواع الكريمات او التركيبات الصيدلانية وغير انو الحاجات بتجى اصلا بتجى فى شكل كريمات تجميل وخلافه لكن هى اصلا هى كريمات تفتيح عايزين نتوقف عند الجزئية دى كواحدة من المشاكل فى وقت كبير كانت هى قاصرة على الشباب من البنات الان بدات تظهر مع كثير من الظروف والعوامل حتى فى جزء من الشباب يستخدموها كحل لمشاكل الاسمرار او القضاء على مشاكل الحبوب او النتوءات

د/ عمر كمبلى :

دى مشكلة كبيرة جدا واصبحنا نعانى منها المشكلة دى ما كانت زمان موجودة زمان الناس فى السودان مقتنعين بلونهم الاسمر دا ياما غنوا عليه اغانى جميلة جدا كلام كان جميل جدا وفعلا اللون الاسمر انا افتكر انو اجمل لون لكن حصلت تغيرات وحصل انقلاب ثقافى زى ما بيقولوا بعض الناس واصبح الناس يفكروا فى تبييض الجلد نسمع الان فى الاجهزة الاعلامية كثيراً تفتيح البشرة فى خمسة ايام تفتيح البشرة فى يومين يعنى مسألة مزعجة بشكل ما عادى اى تغيير فى لونك الى لون اخر افتكر انو انت بوظتا الموضوع لانو دا لونك الطبيعى خلقه ربنا وزى ما قلنا انو اللون دا هو لون المنطقة دى ربنا خلقه للمنطقة دى الانسان لو لاحظ كلما يمشى من الشمال الى الجنوب الناس بيصبحوا اكثر سماراً ودى لحكمة ربانية ووقاية للجلد بتحصل فيه اذا الانسان حاول انو يعمل تفتيح للبشرة اولا لا ينجح يعنى التفتيح المتناسق لا يحصل مع المواد المستعملة والمواد المستعملة كلها المستعملة لتفتيح البشرة عموماً ضارة وهى اللون الطبيعى نحن بنقول يفتحوا غير انو لما يكون فى مرض ادى لسواد الجلد دى مسألة مختلفة دا بيحتاج الى علاج لكن الانسان لونه طبيعى جدا مؤكد هى عند البنات يحاولوا يمشوا يعملوا كريمات فالكريمات دى فيها مواد ضارة ونحن بنشوف يعنى لدرجة القرف للاسف الشديد استعمل الكلمة دى يعنى نحن بتتضايق كثير جدا لما تشوف ناس بيستعملوا الكريمات دى ولما خربت وجههم خالص لانو هى اولا بتبقع الجلد لا تجعله ابيض ولا كل اماكن الجلد كلها بتكون بلون واحد سواء كان الوجه واليدين والرجلين غير انها بتؤدى الى ضمور الجلد فالجلد دا عندو سمك معين هو الذى يحفظ الجلد اذا حصل ضمور فى الجلد دا فالجلد معرض خلاص تانى يتشوه ويمرض وشكله يبقى ما طبيعى يعنى دى بتؤدى الى ضمور فى الجلد وتؤدى الى زيادة شعيرات دموية يعنى انت لو نظرت للوجه بتجد فيه شعيرات دموية زائدة عن المعدل الطبيعى فالشىء الطبيعى انو نحن بالذات فى جلدنا الشعيرات الدموية دى ما بتبين لكن لما يستعملوا تجد الشعيرات الدموية موجودة وبتجد فى شعر زائد وتجد فى تصدعات الجلد التى يسموها شجريب ودا نشوفوا كثير جدا ونشوفوا اكثر فى الارداف وفى اليدين وفى الصدر لما يكونوا عايزين يبيضوا الجلد طبعا هو عندو اسباب اخرى لكن الكريمات من السبب الاساسى بالذات الحاجات التى فيها كوروتزون ومن مواد الكوروتزون الهايدروكونون وايضا فى مواد اخرى فدى كلها غير ضررها فى الجلد يعنى بتعمل لنا بثور وحبوب فى الجلد مرات الجلد ما فيه اى حبوب نظيف جدا واحدة عايزة تبيضه استعملت الكريمات مع المبيض فى خمسة يوم الجلد قام وبقى ملىء بالحبوب والوجه احمر فهى بتشوه ولا تعطينا اللون الذى نريد وانما بتشوه الجلد زى ما ذكرنا وما فى احلى من اللون الطبيعى

مقدم البرنامج :

دكتور كمبلى فعلا الجزئية دى مهمة يعنى بتبدا مشاكل مع تغيرات فى الفصول مع تغيرات فى النشاط مع تغيرت تعرض للشمس وتبدا انها الواحدة عايزة تحافظ على انها ترجع جزء من الاسمرار الذى يحصل او اذا حصلت مثلا مشاكل بتاعة دهون ومشاكل بتاعة انو ما فى نضارة فبتدى هذه انا بقول عليها الصباغ تعمل انواع وانواع والحكاية تكون ماشه كيف انو الناس تحافظ على هذه المعادلة فى بعض الناس بيقعوا فى هذا الفخ غير ما هم يكونوا قاصدين التبييض وتغير اللون الفعلا بيحدث تغيير يعنى بيشيل طبقات من الجلد او بيعمل على تقشير طبقات فى الاول

د/ عمر كمبلى :

الحقيقة نضارة الجلد مهمة جدا ومطلوبة لكن نضارة الجلد لا تحدث عن طريق تفتيح البشرة نضارة الجلد يعنى اطباء الجلد هم قادرين يعطوا الواحدة لو فى اى امراض فى الجلد تشيلا وهى ما مربوطة بالتفتيح اطلاقاً ما مربوطة باللون الابيض الجلد النضر سواء كان اسمر شديد او درجات متفاوتة من السمار او البياض النضارة الموجودة فى الجلد غير تفتيح اللون نحن بنشوف ناس لونهم فاتح وعايزين يعملوا تفتيح ودى ايضا عندها اضرارها فنضارة الجلد ولو الجلد فيه اى امراض حاجة بيعالجها طبيب الجلدية وليس اى انسان اخر

مقدم البرنامج :

يعنى حتى المحافظة يعنى حتى كريمات الحماية من الشمس التغيرات التى تحدث عند المرأة فى الحمل وفى الوضوع لازم تحصل تغيرات فى اللون

د/ عمر كمبلى :

صحيح فى اثناء الحمل فى تغيرات هرمونية مرات تؤدى الى سواد ومرات تؤدى كلف والتعرض للشمس كثير يؤدى الى كلف والى اسمرار فى اللون اول حاجة تفادى الشمس بقدر ما يمكن واستعمال واقيات بقدر ما يمكن فى حاجات لما يحصل حمل او تحصل اى ظروف غير طبيعية تغير لون الجلد اخصائى الجلدية هو القادر على العلاج اما شراء مستحضرات موجودة خلطات ما يسموه خلطات دا خطا كبير جدا اى خلطة مفروض تكون مبينة ومكوناتها واضحة جدا وما فى زول يعمل خلطة الا بامر طبيب الجلدية هو الذى يعطى مكونات الخلطة والروشتة تكون مع المريضة نفسها فى يدها تمشى تعطيها للصيدلى والصيدلى يحضر لها التركيبة وورقتها بتاعة التركيبة تكون معها اما خلطة يبعوها موجودة خُدك دى خلطة دا خطا كبير جدا هى ما عارفة مكوناتها وما عارفة انو فيها عيب فالشغل دا هو شغل الطبيب فالطبيب هو الذى يكتب للصيدلى الذى يعمل التركيبة والصيدلى هو المسئول عن التركيبة زى ما كتبها الطبيب لكن اى خلطة ما مكتوبة فيها دى ممارسة خاطئة فى الطب

مقدم البرنامج :

مرحباً اهلا بكم مستمعينا وثمانى دقائق تفصلنا عن نهاية هذا اللقاء ، نبدا هذا الجزء بمكالمة الو السلام عليكم

مشاركة عبر الهاتف :

وعليكم السلام معاك احمد الحافظ سليمان تامل – الثورة الحارة 76 عندى سؤالين السؤال الاول ينشأ تساقط الشعر نتيجة خمول فى افراز الغدد الدهنية او تعرض الشعر بشكل مفرط للريحة  والملح او المياه التى تحتوى على نسبة عالية من الكلور او الحرارة وتعتبر الحرارة السبب الاكثر شيوعاً للاضرار بالشعر سواء من الشمس او من استعمال المجفف للشعر بشكل مفرط لماذا بعد الولادة يفقد الشعر مرونته الطبيعية ويصبح قابل للتكسر والتساقط بسهولة ولكى تتمتع حواء بشعر صحى وبراق ورائع بماذا تنصح دكتور عمر ، السؤال الثانى يعتبر العرق وظيفة طبيعية تساهم فى تخليص الجلد من الاملاح الزائدة والسموم الضارة الا ان تجاوز افرازه حد معين هل دى حالة مرضية دكتور عمر سلط لنا الضو

مقدم البرنامج :

شكرا اخ تامل كتر خيرك كثير فعلا موضوعين مهمين الشعر نحن ما تعرضنا له امكن كان موضوع البشرة مع ضيق الزمن اخد المساحة

د/ عمر كمبلى :

شكرا استاذ احمد ، تساقط الشعر طبعاً موضوع طويل وكبير جدا يعنى الدقائق الباقية دى لا تسعه امكن ساعة كاملة لانو التساقط انواع كثيرة جدا من الشعر فالشعر اول شىء بيمر بمرحلة نمو زى الانسان بينمو بيمر بثلاثة مراحل رئيسية وممكن مرحلة رابعة مضافة الى الثلاثة مراحل يعنى بيمر بمرحلة بتاعة نمو ياخد مرحلة بيتوقف فيها وبعدين يبدا يتساقط دا الشعر الطبيعى نقفذ شوية الى حكاية الولادة فى اثناء الحمل الستات بيلاحظوا انو شعرهم لا ينزل ابداً بيكون فى مرحلة الكُمون اول ما خلاص وضعوا وبدوا يرضعوا حوالى الثلاثة اربعة شهور دى يبدا الشعر ينزل لكن الشعر الكان بينزل دا هو الذى كان فى مرحلة كُمون الذى كان كامن نتيجة الى تغيرات هرمونية اثناء الحمل دا بيتعوض يعنى الشعرة التى تسقط بتقوم شعرة مكانها يعنى ما تساقط دائم السيدة اكيد بتنزعج جدا شعرها كان تمام 100% وبدا ينزل بعد الولادة فدى ما مشكلة دى مسألة فيزيولوجية كثير فى تساقط الشعر عندنا ظروف فيزيولوجية يتساقط فيها الشعر لكن زى ما قلنا الموضوع كبير جدا فى تساقط شعر عادى طبيعى والشعر بيرجع وفى تساقط شعر الشعر زى ما ذكرنا قبيل انو الشعر بينصلع يعنى فى امراض معينة تؤدى الى صلع دائم بعدين نحن عندنا الصلع معروف هو الصلع الوراثى الانروجينى دا بنشوفوا عند الرجال اكثر يكون فى مقدمة الرأس غالباً وايضا النساء عندهم النوع دا من تساقط  الشعر حقيقة زى ما قلنا تساقط الشعر موضوع طويل انا اتمنى لو اجد حلقة عشان نتكلم عنه

مقدم البرنامج :

انشاء الله نحن نعد المستمعين دكتور وحسب ما تخصص لنا زمن نتكلم لانو فعلا كثير من الاسئلة بترد للبرنامج حول استخدام الشامبوهات والخلطات التى نعملا فى البيوت واستخدام المواد الطبيعية ونوع التغذية

د/ عمر كمبلى :

وحتى كريمات الفرد زى ما قلنا الموضوع شائك وطويل

مقدم البرنامج :

امكن اخونا تامل سأل سؤال اخر مهم جدا التعرق انا امكن اضيف لها تغير رائحة العرق يعنى بعض الناس بيعانوا من هذه المشكلة نحن ما تبقى لنا كثير ثلاثة دقائق فقط    

د/ عمر كمبلى :

بسرعة انو اى انسان بيعرق الانسان الذى لا يعرق انسان غير طبيعى يعنى فى ناس بتحصل لهم امراض لا يعرقوا دى ما شىء طبيعى فى ناس بيعرقوا كثير جدا دى حالة مرضية والعرق ما فى الجسم كله بدرجات متفاوتة الوجه مثلا والثنايا بتعرق اكثر من الاجزاء الاخرى ناس عرقهم كثير ناس عرقهم خفيف ناس عرقهم فيه رائحة بعدين رائحة العرق كل شعب عندو ريحة وكل منطقة عندها ريحة لوحدها يعنى الناس الذين يذهبوا اوربا مثلا يحكوا لك الناس هناك كيف والذين يمشوا حتى بعض الدول العربية عرقهم كيف يعنى ريحة العرق موجودة فى الناس بدرجات متفاوتة جدا فى الدنيا ناس عندهم العرق رائحته نفاذة جدا فى ناس اقل فى امراض بتجعل شديدة وفى انواع من المأكولات فى شعوب معينة بتأكل اكل معين عرقها بيكون فيه حاجة معينة وفى ناس بيستعملوا انواع معينة من الكريمات وانواع معينة فى شعرهم بتجعل العرق يمتزج بالمواد دى ويعطى رائحة غير الرائحة الطبيعية ما مسألة خاصة بشعب معين ولا جهة معينة العرق وايضا فى ناس بتجدى نصفهم بيعرق والنصف الثانى لا يعرق تجدى فى مناطق معينة وامراض معينة تؤدى الى فقدان العرق فى اماكن معينة زى مثلا الجزام عند بعض الناس فى مناطق اصلها لا تعرق

مقدم البرنامج :

ايضا دكتور سريع ايضا فى ناس بيعانوا من الرائحة يعنى زول يقول لك انا بستحم واستعمل معطرات لكن عندى مشلة انو رائحة العرق ما جميلة او رائحة كريهة هل هى مرتبطة بهذه المسألة ام هناك حلول ومشاكل اخرى

د/ عمر كمبلى :

فى ناس الحقيقة ودى كثيرة جدا فى ناس زى ما ذكرنا انو العرق صحيح عندو رائحة فى كثير من الناس تختلف رائحتهم زى حتى العطور دى لما يضعوها ناس معينين العطر لا يعطى ريحة العطر زى ما بيعملوا انسان اخر لكن فى ناس بيكون العرق بتاعهم ما فيه رائحة لكن يجوا ويشكوا انت لا تشم رائحة فيهم ففى خوف زائد  بعض الناس مرض وسواس انو عندهم ريحة شديدة جدا لا انت تشمها ولا الناس حولهم يشموها فعلا فى ناس زى ما ذكرنا عندهم اسباب مرضية تؤدى الى ريحة فى العرق لازم يقابلوا الطبيب بتاع الجلدية يشوف السبب شنو بتاع ريحة العرق الزائدة اذا كان ريحة غير طبيعية

مقدم البرنامج :

حتى تعرق الايدى بعض الناس بتعانى منه

د/ عمر كمبلى :

فى ناس عندهم عرق فى راحة اليدين وراحة الرجلين ودى مسألة فيزيولوجية فى ناس بيعرقوا كثير جدا ينقطوا لما يجوا بالذات فى الامتحانات والظروف التى فيها ضغط نفسى تجد الواحد يدى يبلوا الورق واشياء زى دى لكن فى علاجات لها

مقدم البرنامج :

نحن سعيدين بهذا الحوار دكتور عمر كمبلى استشارى الامراض الجلدية والتناسلية والذكورة الحقيقة زى ما انت ذكرت فى كثير من الموضوعات الناس تستطيع انها تتعرض لها خاصة موضوع مهم جدا انت تعرضت لجزء موضوع الشعر وتساقط الشعر وما يعرف بزراعة الشعر واعادة نموه واستخدام كثير من المستحضرات والتركيبات فى هذا المجال اذاً بنحييك كثير ونتمنى انو نلتقيك لقاءات اخرى انشاء الله

د/ عمر كمبلى :

شكرا استاذة اسراء

مقدم البرنامج :

 شكراً لكل الذين تابعونا عبر عيادة على الهواء ، لكم تحايانا طه عبد الرحمن طه ربطنا بكم عبر اجهزة الصوت الرقمية ، تحياتى عبر المايكرفون اسراء زين العابدين الاسبوع القادم لقاء جديد عيادة على الهواء الاخراج منى صالح