بسم الله الرحمن الرحيم

برنامج عيادة على الهواء

موضوع الحلقة : التغذية السليمة بالنسبة للاطفال – بثت 12 - 7 – 2012م

مقدم البرنامج :

اسراء زين العابدين

الضيف :

دكتور / على عربى استشارى طب الاطفال الاستاذ المشارك بكلية الطب جامعة الخرطوم    

مقدم البرنامج :

اهلا مرحباً بكل الذين يتابعوننا ونرحب كثير بالذين انضموا لنا الان عبر اثير الاذاعة السودانية فى ام درمان ، عيادة على الهواء لقاء جديد نرحب فيه بضيفنا دكتور/ على عربى استشارى طب الاطفال الاستاذ المشارك بكلية الطب جامعة الخرطوم ، دكتور على حبابك عشرة

د/ على عربى :

اهلا مرحب بكل المستمعين

مقدم البرنامج :

بنحييك عبر العيادة فى هذا المساء وبنرحب بكل المستمعين الذين يتابعوننا بدءاً هاكم تحايا الفريق الذى يصحبنى عبر هذا اللقاء ، اذاً اهلا مرحباً بكم ايها الاصدقاء واذكركم فقط بارقام هواتف البرنامج 87553151 و 87553152 ، لا تنسوا اسئلتكم واستفساراتكم ومداخلاتكم تثرى هذا اللقاء ، اذاً نبدا دكتور على وامكن هذه الايام كلنا يشفق على الاطفال كثير يعنى من تغير الفصول وكثير من المشاكل الصحية الصيف والخريف وكل ذلك يتزامن مع بداية العام الدراسى ايضا هناك بعض الالتهابات الفيروسية والبكتيرية نود ان نتوقف عند اهمية الوقاية من كل هذه المشاكل كيف يمكن ان نتجنب كثير من الامراض فى هذه الفترة وكيف اننا يمكن ان نقى الاطفال او على الاقل نقوى مناعتهم

د/ على عربى :

طبعا مشاكل الجهاز التنفسى فى الاطفال مشاكل شائعة وتقريباً اى طفل بتحصل زى خمسة او عشرة نوبات بتاعة التهاب الجهاز التنفسى فى السنة منها التهابات الجهاز التنفسى العليا سواء كان التهاب اللوزتين او التهاب الاذن او الحلق او التهابات الشعب الهوائية وطبعا تقريباً من كل خمسة اطفال فى طفل او طفلين مصابين بالربو يعنى بتحصل لهم الالتهابات دى وكل الالتهابات معروفة وهى بتجى عن طريق التنفس وتجى عن طريق الاختلاط وتجى عن طريق انو بتجد بيئة صالحة جدا اذا كان الطفل او الاطفال المعنيين لم يجدوا التهوية المناسبة وما وجدوا التغذية المناسبة يعنى اذا لم يجدوا الحاجات التى ممكن يتفادوها من ناحية نظافة غسيل الايدى يعنى التوعية من البيت من المدرسة وما وجدوا ايضا مياه صالحة لانو المياه قد تكون مصدر لالتهابات كثيرة جدا فى المدرسة عشان كدا نحن بنوصى كل الناس العندهم اطفال فى الاول يتأكدوا انو الاطفال ديل قبل ما يدخلوا المدرسة هم ناس محصنين يعنى التحصين مكتمل عندهم والحمد لله عندنا برنامج تحصين قوى جداً اذا فى اى طفل ما مطعم خاصة الايام دى فى امراض الحصبة وامراض اخرى لازم يتاكدوا انو التطعيم مكتمل وانو يراجعوا ناس التحصين فى الموضوع دا الحاجة الثانية والشىء المهم وهو النظافة الشخصية مهمة جداً خاصة غسل اليدين لانو الاطفال تعودوا اذا مسكوا اى لهبات او لعبوا فى اى مكان يعرفوا انو اول حاجة يعملوخا غسل اليدين ولازم يكون بالصابون ويجففوا اليدين ومفروض نحن الناس الكبار نكون قدوة للاطفال الصغار فى غسل ايدينا وهى حاجة مهمة جداً الحاجة الثانية ايضا تهوية غرف الاطفال وتهوية الفصول يعنى ما يكون الناس كلهم متكدسن وغافلين فى نفسهم فى مكان واحد يتنفسوا فى بعض خاصة اذا كان فى طفل عندو عدوى واذا اى طفل عندو عدوى مفروض من البيت ما يطلع لانو كثير جدا نجد مدارس جايبة امراض كثيرة خاصة التهابات الجهاز التنفسى والتهابات معينة نتيجة انو فى طفل عارفين اهلوا انو عيان او بدات له امراض او اصيب بالحمى بتالى بيكون هو عرضة الى ان يعادى اطفال كثيرة بداية العام الدراسى ولازم الناس تشجع على التغذية والجوانب الاخرى

مقدم البرنامج :

امكن حنرجع دكتور على لاهمية التغذية بالنسبة للاعمار المختلفة للاطفال وخاصة تتناسب والجو المعين صيف شتاء ولكن فى نقطة ذكرتها مهمة جداً نحن عايزين نتوقف عندها عشان تصبح فيها رسالة واضحة وهامة انو دائما بداية العام الدراسى نهتم بى اننا نجيب الاوراق والكراسات والاقلام لكن فى مسألة مهمة جداً وهى مسألة زى ما انت ذكرت تكون الموية فى اماكن حفظها فى المدارس او فى الرياض ثقافة استخدام المناديل بالنسبة للاطفال يعنى هذا النوع من التربية كيف ممكن نحن نعود اطفالنا عليه ودى طبعا بتصبح مسألة تكاملية

د/ على عربى :

فعلا هى مسألة تكاملية عيب الاطفال بيقلدوا الناس الكبار اذا نحن الكبار قدوة يعنى اذا ما شعرنا انو نغسل بعد الحمام وقبل الاكل اذا لمسنا اى حاجة لازم نغسل كل الاشياء دى متوفرة يعنى مرات كثير جداً تجد فى مدارس ما فيها احواض غسيل ولا يوفروا صابون سائل للاطفال ومكان فى انو يقدروا يجففوا الايدى فى البيت لازم يتعودوا خاصة استعمال ما عون واحد لكل الاطفال زى الكوز الاطفال كلهم يشربوا منه وفى امراض كثيرة حايمة مثل اليرقان امراض كثيرة جدا تنتشر عن طريق الاختلاط فى حاجات زى دى فعلا هى تبدا بالبيت لكن المدرسة لابد انو تهيىء المكان لحاجات زى دى

مقدم البرنامج :

يعنى انا اذكر زمان كان بيجوا يفتشوا الكباية الصغيرة والمنديل يعنى منديل القماش الصغير فى الطابور كل زول يكون عندو كباية ومنديل دى كانت حاجة ملازمة لشنطة المدرسة الان اختفت لا فى بيوتنا بنحرص انو نطلع اولادنا بحاجة زى دى ولا فى المدرسة بيسألوا منها

د/ على عربى :

دى ترجع لحاجات اساسية يعنى النظافة تكون حاجة اساسية الناس لازم تتأكد انو فى نظام نظافة والنظافة تشمل النظافة الشخصية نظافة الاظافر نظافة الملابس غير كدا البيئة بتاعة المدرسة والبيت لابد تكون نظيفةلانو الايام دى الجواء اصبح غالى واى طفل اذا مرض بيكلف الاسرة تكلفة غالية جدا من ناحية ان يشترك فى الميزانية بتاعة الاسرة فى علاجه فبتالى الوقاية حاجات بسيطة جداً ممكن تغير امراض كثيرة جدا

مقدم البرنامج :

حنرجع فى هذا اللقاء ونتحدث عن النزلات المعوية ما هى اسباب الاصابة بها ايضا نتحدث عن التهاب السحايا اعراضه وعلامات الخطورة فى الاعراض وهذه المشاكل ونفرد حيز فى هذه الحلقة للحديث حول التغذية السليمة بالنسبة للاطفال وخاصة نحن مقبلين على شهر رمضان لابد انو يكون فى برنامج فيه بعض التغذية للاطفال فى هذه الفترة ، اذاً اهلا مرحباً بكم ايها الاصدقاء ، مرحباَ بكل الذين يتابعوننا عبر عيادة على الهواء معنا اول اتصال فى هذه الحلقة الو السلام عليكم

مشاركة عبر الهاتف :

وعليكم السلام معاك محمد زين – ولاية شمال كردفان انا بسال دكتور على عندى طفل عمره تسعة شهور قابلت به كثير من الدكاترة هو عندو اسهال كثير خلاص 

د/ على عربى :

له كم الاسهال دا

مشاركة عبر الهاتف :

يعنى مرات بياخد اسبوع بيقيف

د/ على عربى :

يعنى لا يستمر اكثر من اسبوعين ثلاثة اسابيع بيقيف او ثلاثة اسابيع مع بعض

مشاركة عبر الهاتف :

يعنى بيعمل اسبوعين الاسبوع الثالث بيقيف او ثلاثة اسابيع والاسبوع الرابع بيقيف

د/ على عربى :

هو بدا يدخل حاجات فى فمه بتاعة تسنين

مشاركة عبر الهاتف :

ايوا اى حاجة يجدها امامه بيدخلا

مقدم البرنامج :

عمره قلت تسعة شهور

مشاركة عبر الهاتف :

ايوا

مقدم البرنامج :

بيمشى بالسرير ويمسك فيه 

مشاركة عبر الهاتف :

بدون سرير بيمشى ، والسؤال الثانى يا دكتور طبعا الدنيا خريف والذباب كثير ونوم الاطفال سمعت الدكتور ذكر النوم فالاطفال مرات بيرقدوهم فى سرير واحد انا عايز الدكتور يوضح لنا هل الاصابة بتنتقل من طفل الى طفل

مقدم البرنامج :

شكرا محمد زين ، دكتور اذا عندك استفسار وايضا نحن نحييه على المسألة انو حيساهم معنا عشان نوضح للناس انو يعملوا شنو فى المرحلة دى

د/ على عربى :

الاسهال كم مرة فى اليوم تقريباً

مقدم البرنامج :

للاسف انقطع الخط

د/ على عربى :

هو طبعا معظم الحبوبات تقول لك والله لرسهال هو سببه التسنين

مقدم البرنامج :

امكن نحن يا دكتور سنستصحب اسئلة اخونا محمد زين فقط معنا اتصال اخر الو السلام عليكم

مشاركة عبر الهاتف :

وعليكم السلام معاك بابكر حسان عبد الله – الخرطوم سؤالى لدكتور على بالنسبة لجانب التغذية بالنسبة للاطفال يعنى بعض الامهات لا يحبوا جانب التطعيم والكشف الدورى بالنسبة للاطفال ونوع التغذية التى يجب ان يتناولها الطفل خاصة انو هو بعد ما يتخطى الخمسة سنين والطفل بيكون ناشف واحياناً فى فصل الخريف امكن فى اشياء كثيرة جدا تلوث المياه وبعض الامهات حقيقة لا يهتموا بالاطفال الطفل بيكون صغير بيحبى يخلوا زى ما عايز والدليل على ذلك انا قبل فترة لاحظت عندنا كان حادث مؤسف انو فى بعض الاطفال واحد بيحبى حتى انو وقع فى البلاعة وتوفى

مقدم البرنامج :

شكرا اخونا بابكر كتر خيرك حقيقة رسالة مهمة نود التوقف عندها تفضل دكتور

د/ على عربى :

الحقيقة السؤال عن الاسهال بتاع اخونا محمد زين كان سأل عن الاسهال والتسنين والطفل عمره تسعه شهور طبعا زى ما ذكرنا انو ما فى علاقة بين الاسهال والتسنين العلاقة الوحيدة انو الطفل بدا يمشى عمره تسعة شهور وبدا يدخل حاجات كثيرة فى فمه نتيجة انو فى اكولة فى اللثة دا بيجى بعده انو الدا الحاجات التى دخلها دى تؤثر عليه امكن فى ميكروب دخل حاجة غريبة دخلت فى الجسم  بدا الاسهال زى ما هو قال انو بيجيهوا اسبوع ويتوقف اسبوع طبعا دى مشكلة ومشكلة فى انو الطفل العندو اسهال دا اهم حاجة انو يتأكدوا من الحاجات انو تكون نظيفة يعنى دا اهم شىء وما يدخل مثلا حاجة فيها تلوث حاجات واقعة فى الارض ويدخلها فى فمه فبقدر الامكان يضعوه فى مكان نظيف يعنى حتى لو امكن يفرشوا له ملاية او مربع يتحرك ويلعب فيه لكن ما يتركوا حايم ياخد الحاجات دى ، متين تعرف انو الاسهال دا عندو خطورة على الطفل اذا كان الطفل بدا يكسل والاسهال اصبح كثير بدا شرابه يقل بدا عندو نقص فى السوائل بدا يؤثر فى صحته ووزنه لا يزيد يعنى زى الاسهال دا يمشى اسبوع ويجى اسبوع معناها لازم امشى اقابل طبيب واشوف الحاصل شنو فدا واحد من الاسباب انو ما نخلى اطفالنا هم فى بداية بتاعة تسعة شهور وبدوا يتحركوا انو لازم يكون المكان الحولهم نظيف يعنى بقدر الامكان نضع حاجة حيز ومكان وملعب لهم مخصوص ما يكون حول الملعب دا اى حاجة ممكن يضعها فى فمه تأثر عليه عشان ما يحصل له اسهال

مقدم البرنامج :

دكتور امكن اسئلة اخونا بابكر وسؤال محمد زين مهم جدا عايزين نربطه ببداية التغذية امكن الامهات كلهم او الاسر بتبتدى عندها مسألة بتاعة قلق امكن انا اتصور انو هذا الطفل وقفت منه او على الاقل قلت الرضاعة الطبيعية من الام وامكن كان محمى الى حدٍ ما بدا يشرب موية يشرب عصائر خارجية نوع الوجبات التى يأكلها التجارب التى تتعمل عشان نحن نأكل الاطفال عايزين نضع زى خريطة نوضح للناس انو بعد يبتدى الشهر الخامس او السادس وانت بتنصح بعد كدا يبتدى مسألة التغذية ندخل التغذية كيف بالنسبة للطفل

د/ على عربى :

دائما الرضاعة الطبيعية لحدى ستة شهور معظم الاطفال ما بيكون عندهم مشاكل اول ما يبدوا ياكلوا ويشربوا ونعطيهم باقى الحاجات تبدا المشاكل منها الاسهال ومنها مشاكل تانية بتاعة سوء التغذية منها الطفل ما زايد فى مشاكل كثيرة جدا فى تغذية الرضع وعندنا مواصفات خاطئة كثيرة جدا اولا الطفل لما يكمل الستة شهور ويدخل فى السابع انو لابد يجربوا له الاكل والاكل دا لابد انو يبدا بحاجة شبه سائلة ما بنقول للزول اكل حاجة معينة لانو الاكل فى السودان والسودان بلد واسع اى زول عندو حاجاته فى البيت والحاجات الموجودة فى البيت ما بتقدر تعممها على كل الناس لكن نقول لهم ابدوا بحاجة فيها ارز لانو الارز غالباً ومعظم الاطفال لا تحصل لهم حساسية من الارز لانو لو بدانا بالقمح فى ناس عندهم حساسية من القمح بالقمح يحصل لهم الاسهال وتحصل لهم مشاكل تانية البيض واللبن اتكلم لك عن الحاجات الطازجة اول الطفل بدا يرضع الام تحاول تجيب له لبن تانى يا اما لبن بقر او لبن غنم ودا خطأ مفروض انو اذا كان الطفل بيرضع رضاعة طبيعية لا تدخل اى لبن بقر ولا غنم فى السنة الاولى من عمره لماذا لا ندخل لبن بقر او غنم لانو الالبان دى املاحها كثيرة وبروتيناتها عالية ممكن تعمل لنا نقص حديد والحديد يؤثر فى التعلم يؤثر فى الاكل يؤثر فى التغذية يؤثر فى النمو يعنى الاكل فيه تأثير كبير جدا حاجة غير مدعمة وفى النهاية تعمل له مشاكل القصة دى اذا كان الطفل بيرضع رضاعة طبيعية ممكن يغذو تغذية تكميلية او تغذية الفطام تبدا من الشهر السابع دى وجبه واحدة فالوجبة الواحدة اذا الطفل تعود عليها عايز له اسبوع اسبوعين عشان يتعود عليها يعنى يبدا الزول يلحس فيه وبعد شوية يرفض وتانى يجربوا له لحدى ان يتعود

مقدم البرنامج :

ما نأكله الأكل القدامنا عندنا طبيخ نأكله منه عندنا فول نأكله منه من نفس الصينية التى يأكل منها الناس الكبار

د/ على عربي :

طبعا في حاجات نحن نسميها الممنوعات نتكلم عنها دى حاجات خاطئة لا ندخل ألبان بقر لا ندخل ألبان غنم لا ندخل له البهارات لانو البهارات تأوزى معدة الطفل لا نعطيه شاى فى بعض الناس طوالى بيعطوا الشاى فى عمر زى دا او يعطوا مياه غازية او عصائر مصنعة وسكريات فكل العصائر المصنعة والسكريات والبهارات واللبن والشاى دى كلها تؤثر تأثير سلبى على تغذية الطفل

مقدم البرنامج :

حنرجع دكتور على لمسألة انو كيف نركز الوجبة الواحدة لاسبوع او ثمانية يوم زى ما انت ذكرت وبعدها نبتدى التجاؤب او التغيير من نوع لنوع حنرجع للنقطة دى لانها مهمة جدا فقط عندنا اتصال الان الو السلام عليكم

مشاركة عبر الهاتف :

وعليكم السلام معاك حسن ابراهيم يحيى – ولاية القضارف انا عندى طفلة عمرها زى تسعة سنة يعنى من عمر ثلاثة سنة اذنها فيها صديد طوالى ما وقف وقدر ما تكررت على الدكاترة يصرفوا لها دواء يهدن شوية لكن تانى ترجع تكب فى الصديد ذهبت لاخصائى فى مدنى مرتين قابلته صرف لى علاج قطرة واثناء القطرة دى تنتهى تانى بيرجع الصديد والان اصبحت اذنها لا تسمع كويس ننادى لها وما بتسمع كويس نجى نشوف الصديد كثير فى الاذن لما نطلعوا بتسمع شوية 

د/ على عربى :

هل فحصوا لك الصديد اى ميكروب عملوا 

مشاركة عبر الهاتف :

والله فحوصات كدا ما حصل عملوها لكن عمل لها منظار وبينظفها ويعطيها قطرة اثناء استعمال القطرة لمدة سبعة او عشرة يوم الصديد بيقيف وينظف لكن اثناء تنهتى القطرة تانى الصديد بيرجع يَكُب

د/ على عربى :

نحن عندنا اى التهاب مزمن وفيه صديد احتمال معظم الادوية التى تاخدها هى قد يكون الميكروب اخد منها مقاومة فبتالى لازم تزرع المادة ( الصديد ) عشان يعرف للميكروب اى علاج لانو دى احسن طريقة واحسن انت تمشى للدكتور تقول له انا عايز اعرف الصديد شكله من وين واى ميكروب فهو ممكن يتجاوب معك ويعمل زراعة ويعطيك العلاج الناجع وبعدين القطرات والحاجات دى افضل التنشيف لانو اذا كان فى وساخة فى الاذن نحن لا نتركها فى الاذن لازم ننشف الطلبة المثقوبة دى ممكن تبرا طوالى لكن لما نتركها ونضع فيها قطرات وزيت ونضع فيها موية ونتركها فترة طويلة ممكن الصديد دا يوسع ويعمل مشكلة فى السمع فانت عندك حاجتين اهم حاجة التنشيف المستمر للاذن لا تدخل فيها موية ولا قطرة ولا زيت دى بتساعد على الشفاء السريع الحاجة الثانية اذا الصديد استمر لازم يزرع الصديد دا ويتعرف اى ميكروب واى علاج له

مشاركة عبر الهاتف :

يعنى اخر قطرة نشفه لكن بقى يعمل لها حساسية وهى لوحدها بتشيل عود وتقرقر فى الاذن

د/ على عربى :

نحن لا نتكلم عن القطرات عن انو هى تنشف ولو فى صديد تانى يتزرع

مقدم البرنامج :

بعدين خطر جدا مسألة العود تدخلوا فى الاذن

د/ على عربى :

او انو تدخل حاجة فهى لازم ترجع تانى الدكتور احتمال يكون فى حساسية من الدواء نفسو او القطرة فلازم تعالج القصة دى ولا تخلى القصة دى وتهملها لانها تؤثر على الاذن

مقدم البرنامج :

شكرا يا حسن نحن بنحييك ونتمنى تكون سمعت نصيحة دكتور على وايضا لو احتجت لى اى متابعة ممكن تتصل بنا عبر البرنامج انشاء الله مهم انو هى تقابل بها اخصائى اذن وانف وحنجرة ، معنا اتصال اخر الو السلام عليكم

مشاركة عبر الهاتف :

وعليكم السلام معاك استاذة امنة محمد عندى طفلة عمرها سبعة سنوات عندها تفاف طوالى حتى عندما تتكلم فى اى لحظة تتف طوالى عملت لها فحوصات للتيفويد وعملت لها فحوصات الملاريا والتهاب الدم الابيض والقارضيا الفحوصات طلعت نظيفة ما فى حاجة ما عرفت التفاف دا من شنو

د/ على عربى :

التفاف دا له كم تقريباً

مشاركة عبر الهاتف :

زى شهرين

د/ على عربى :

يعنى التفاف دا ماشى اكعب ام فى حالتها ام ماشى احسن

مشاركة عبر الهاتف :

والله لما تجى تتكلم بيكون فمها مليان وتتف فى الارض قدام الناس يعنى حاجة مقرفة

د/ على عربى :

دى لازم تتشاف لانو مرات التفاف دا قد يكون مشكلة فى اللثة والتهاب فى اللثة ممكن يعمل لعاب كثير يعنى قد يكون عندها مشكلة فى البكتيريا غير القارضيا يعنى التيفويد والملاريا لا تخلى الزول يتف كثير فلازم تتشاف حاجات تانية اذا الحكاية دى مزمنة لابد انو يشوفوا الفم كله والتهاب اللثة والتهيج بتاع اللثة بيعمل القصة دى يعنى فى اسباب كثيرة موضعية بتجعل انو الطفل يتف كثير فلازم تتشاف عشان يتعرف الحاصل شنو

مقدم البرنامج :

يا استاذة شكلك ما عرضتيها على طبيب وعملتى الفحوصات فقط فى المعمل 

مشاركة عبر الهاتف :

عرضتها على طبيب وقلت له الطفلة دى بتتف طوالى وعايزة اشوف الحكاية دى كتب لها الفحص للملاريا والدم والتيفويد عملت لها الفحوصات دى فى مستوصف خاص

مقدم البرنامج :

انت من اى منطقة من الخرطوم هنا 

مشاركة عبر الهاتف :

انا فى ام روابة

د/ على عربى :

هى احسن تقابل اخصائى اطفال اذا كان هناك قريب لها بيقدر يساعدها يعمل لها كشف عام للفم ويشوف بطنها ويشوف اذا كان فى اسباب تانية يعنى هى اسباب كثيرة

مقدم البرنامج :

انشاء الله ربنا يديها العافية لكن المسألة زى ما ذكر دكتور على تحتاج انك لازم تقابلى اخصائى تشرحى له ما تكتفى فقط بى انو عملتى الفحوصات دى لازم تقابلى اخصائى اطفال ولازم فحوصات ادق ، ايها الاصدقاء ما زلنا بنتواصل معكم عبر عيادة على الهواء ، اهلا مرحبا دكتور على وامكن حنرجع للحديث حول التغذية لانو امكن كثير من الشكاوى بتحصل عند الاطفال فى المرحلة العمرية من بداية السابع او التاسع زى ما انت تفضلت وذكرت وهى تبدا فيها مشاكل التسنين وتغيير التغذية اسهالات متكررة نقص فى الوزن احيانا تصحبها حمى وخلافه

د/ على عربى :

هو طبعا الاكل لما يتجرب لاسبوع او اسبوعين لحاله وما يدخلوا معه حاجة بتعرف انو هل الطفل استجاب للاكل هل حصل حساسية ضد الاكل المعين هل حصل معه تغيير دا بيساعد اذا كان الحاجات دى كلها ما فى ممكن نثبت الوجبة المعينة ونشوف وجبة تانية واول طبعا بنبدا بحاجة فيها ارز مثلا او حاجة فيها قمح وبعد شوية ممكن ندخل زبادى خفيف يعنى كل مره نجرب يعنى ممكن فى ستة شهور الى سبعة شهور ندخل وجبتين بعداك من السابع للثامن ممكن ندخل الوجبة الثالثة والرابعة لكن نستمر فى الرضاعة الطبيعية يعنى كل مره نحل بوجبة من الرضاعة الطبيعية ومن الثامن للتاسع ايضا نضيف وجبتين يعنى ممكن نعطى الطفل من خمسة الى ستة وجبات لازم نراعى فى الوجبات دى كلها انو لالطفل ياخد عناصر التغذية كلها معروف عناصر التغذية هى مثلا النشويات زى الكسرة والعصيدة والبروتينات زى الفول العدس الفاصوليا البيض والفراخ دى كلها بروتينات وهى بتعطيك مواد بناء ولازم نعطيه مواد مناعة وهى الفواكه والخضروات يعنى كل انواع الفواكه لازم الطفل ياخدا ولازم نجرب انو فى فاكهة معينة ما تنفع الطفل او الخضروات المعينة الخضروات والفواكه لازم نهرسها ما نصفيها لانو هى باليافها العالية دى قد تؤثر فى الطفل يعنى الطفل نعطى شوية زيت فى الاكل يعنى دهون يعنى الطفل لازم ياخد النشويات الموجودة فى البيت فكل البيوت فيها كسرى وفيها عصيدة بروتينات كل البيوت فيها فول وعدس فى لحمة وفى دجاج

مقدم البرنامج :

يعنى بكميات قليلة يعنى عشان الناس ما تقول والله كل يوم حنجيب دجاجة

د/ على عربى :

ايوا بكميات قليلة بعداك فى اى خضار موجود فى البيت واى انواع من الفاكهة الزيت موجود فى البيت اى بيت فيه زيت الخمسة عناصر الاساسية دى اى عنصر من هذه عندو شغل معين فى الجسم يعنى شغل بتاع طاقة ممكن الطفل يجرى ويتحرك وشغل بتاع مواد بناء ممكن تجعل الطفل يكبر وفى شغل بتاع حماية من امراض والجلد يكون كويس من الفواكهة والخضروات فى زيوت بسيطة ممكن تعطى الطاقة اذا كان نحن النشويات دى طبعا مضرة ومفيدة لكن الدهون ممكن تتحرق لقدام كل المعادلات دى مفروض الطفل ياخد من خمسة الى ستة وجبات فى اليوم بنهاية العام الاول او بداية التاسع او العاشر زى الطفلة دى بالاضافة الى الرضاعة الطبيعية نحن ما ذكرنا اللبن كغذاء صحى ولا ذكرنا انو يعطوا مثلا مياه غازية ولا ذكرنا يعطوا شاى يعنى الحاجات التى تؤثر فى الطفل الاطفال عموماً نحن ندرج لهم الوجبات نعطى وجبة نتأكد انو الوجبة دى ما عملت مشكلة ونحترم رغبة الطفل اذا كان الطفل رفض اى وجبة مرة مرتين ثلاثة مرات لا نجبره بل نغير الى وجبة اخرى يعنى ما نضع فى بالنا انو لازم الطفل يأكل حاجة معينة نحن بنشوف بعض الامهات بيجونا تقول الطفل لا يشرب لبن وتكون هى بترضع كويس تقول لك لا يشرب لبن وتقول لا يشرب عصير يعنى اشياء يعنى بيعاملوا الطفل زى الزول الكبير فالاطفال لازم نحن نوازن بينهم فى تغذيتهم نوازن انو نحترم رغباتهم نجعل وقت الاكل دا وقت بتاع تواصل يعنى ما نعطى الطفل الاكل ونخلى ونمشى منه او فى بعض الامهات بيستعملوا اسلوب القوة فالطفل فى النهاية انسان بيشعر واى شىء واى حاجة تعطيها له بالقوة تجد الطفل يرفضها فالاطفال اكثر الناس عناداً وانا بعرف اطفال صغار جدا تجدهم يقودوا الاسرة كلها والحاجة العايزنها يمشوها على الاسرة كلها ناس

مقدم البرنامج :

نحن دكتور على سعيدين بالنصائح دى وفعلا ومرات بنجد يقول لك الطفل دا والله بيحب الشبس المحمر تجد الام يومى بتعمل هذه المسألة او تحس بى انو هو بيأكل بسكويت يومى لازم يأكل بسكويت او على عدد متكرر فى اليوم زى ما انت تفضلت وذكرت ودى امكن فى الاخر بتحس بى انو الطفل سمين لكن بتحصل مشاكل بعد كدا

د/ على عربى :

ايوا وبعدين لازم الاكل نلونه يعنى مرات الاكل ما بنهتم بشكله يكون بارد ما طازج يعنى فى اشياء كثيرة عندنا عدم احترام للاطفال فى اشياء كثيرة لا نضع فيها الاعتبار لكن التواصل الكلام يعنى دائما الطفل نقول له فى عينوا لام تجدها متباعدة وفى مكان تانى يعنى ما فى العين على الاطفال بالمناسبة العين لما تعاين للطفل فى عينوا معناها بتهتم به جدا لكن لما تكون عينك بعيدة منه وانت عايز تعطى حاجة وعايز تخاطبه لا يكون هو سعيد بالقصة دى لكن بيكون سعيد جدا اذا الناس بتتواصل معه وتقعد معه وتتكلم معه وتشرح له انو الاكل دا شنو وعلمته يأكل كيف واحسن شىء انو الطفل تعلموا الاكل ولا تأكلوا دى القاعدة الذهبية فى تغذية الاطفال

مقدم البرنامج :

معنا اتصال الان الو السلام عليكم

مشاركة عبر الهاتف :

وعليكم السلام معاك الصادق احمد – ولاية  شمال كردفان سؤالى لماذا لا يوجد اخصائى اطفال وخاصة فى فصل الشتاء نحن طبعا فى الولايات لا نجد اخصائى اطفال ننتظر فترة طويلة جدا

مقدم البرنامج :

يعنى اسعاف فى الحوادث

مشاركة عبر الهاتف :

نعم

مقدم البرنامج :

انت من وين يا الصادق قلت

مشاركة عبر الهاتف :

ولاية شمال كردفان

مقدم البرنامج :

فى اتصال اخر الو السلام عليكم

مشاركة عبر الهاتف :

وعليكم السلام معاك الوسيلة ابراهيم التوم – ولاية سنار قرية ابوقرع

مقدم البرنامج :

للاسف انقطع الخط مع الوسيلة ، يبدوا انو الصادق سأل من الحوادث انو ما فى الحوادث اخصائى اطفال

د/ على عربى :

هو طبعا المجال الصحى ما بقول لك انو اخصائى الاطفال ما بيكون قاعد 24 ساعة فى الحوادث يعنى الاخصائى فى النهاية هو الذى يعالج لك الاشياء التى فيها مشاكل زى الاطفال الذين يحتاجوا الى عناية خاصة لكن الاطفال العندهم التهابات عادية ما كان فى اخصائى بتاع اطفال قاعد بل كان فى مساعد طبى بيعالج الناس ويعالجهم بالامراض الشائعة فالامراض الشائعة دى حتى فى ناس بيعالجوها لوحدهم فالاخصائى بيكون موجود عند الطلب اذا كان الناس محتاجة له فى الاطفال او العيادات المحولة مافى اخصائى اطفال بالكثرة فى حوادث الاطفال فى السودان عشان يعالجوا الناس لكن بيعالجوا الحالات التى تستدعى

مقدم البرنامج :

اخ الصادق يا ريت تكون تابعت الاجابة فعلا الحوادث زى ما ذكر الدكتور فيها اخصايين ونواب اخصايين او فيها اطباء عموميين والنواب بيكونوا حسب ورديات معينة لكن اخصائى الاطفال دا انت بتكون محول له لما تكون فى مشكلة انشاء الله ربنا يحوجكم واطفالنا كلهم يكونوا بخير انشاء ، نرجع دكتور على للحديث عن  نقطة قبيل انت بدات لنا فيها وهى كثرة الالتهابات الفيروسية والبكتيرية فى هذه الفترة هذه الايام تلوث الموية دخل الخريف انتشار الذباب بداية العام الدراسى التىبتكون مسألة طرق العدوى وانتقالها اذا كانت التهابات تنفسية نزلات معوية او بعض الفيروسات زى السحائى وغيره

د/ على عربى :

نحن طبعا عايزين نركز فى حته واحدة ما الطفل بقى عيان طوالى الناس تمشى الصيدلية عشان تشترى الدواء بتاع المضاد الحيوى او دواء الكحة يعنى 70% من امراض الاطفال ممكن تنتهى بحاجات بسيطة والحاجات البسيطة هى التغذية الجيدة والسوائل الكثيرة والنظافة ونهيىء الراحة للطفل يعنى معظم الاطفال الامراض بحاجات بسيطة ممكن تنتهى لا نستعجل الى العلاج لكن اذا شعرنا انو الطفل بقى كسلان رفض الاكل وفى استفراغ مستمر او اسهال مستمر نحن لازم نمشى لاقرب وحدة صحية نشوف الحاصل شنو لانو علامات الخطورة واضحة اذا كان الطفل بدا يفقد وبدا كسلان شديد وما فى درجة وعى وما كويس او حصلت له تشنجات طوالى الناس تمشى لاقرب مركز صحى عشان تشوف العلاج شنو معظم الاطفال اذا كان نحن اهتمينا بتغذيتهم قلنا لازم تغذيتهم تكون منوعة يعنى الطفل زى ما ذكرتى بيأكل وجبة واحدة كل اليوم بنفس الحاجات يعنى عايز شبس اليوم كله او حلاوة اليوم كله وعندنا مشاكل كثيرة جدا مع الاطفال تجدهم بيحبوا الحاجات الحلوة جدا وتجد الامهات والاباء معهم يعنى يشتروا اليوم كله حلاوة يشتروا له اليوم كله عصير تجد الطفل ضعيف جدا اسنانه منتهية يعنى تجديه ما قادر يستحمل اى مرض واذا راجعت التغذية بتاعته تجد عندو مشكلة فى التغذية

مقدم البرنامج :

قبيل فى واحد اشار الى نقطة مهمة دكتور على تكلم عن الراحة فى النوم او ممكن تكون وسيلة الى انتقال العدوى اذا كانوا بينوموا فى فراش واحد او مكدسين مع بعض او فى عدم تهوية سليمة فى الغرف

د/ على عربى :

هو طبعا مفروض تكون فى العالم كله حاجة اسمها غرف اطفال حاجة زى دى قد تكون ما متوفرة فى كل الاسر لكن لازم يكون فى سرير لكل طفل يعنى حكاية انو الاطفال يردفوهم فى حته معينة وفى مكان واحد او المكان يكون ما فيه تهوية جيدة طبعا دى ممكن تكون سبب العدوى وسبب العدوى الثانى وجود الاشياء التانية فى البيوت مثل القطط والحيوانات والحاجة دى ايضا ملامستها للاطفال قد تكون مصدر عدوى نعرف امراض كثيرة جدا بتجى للام الحامل بتكون نتيجة للقطط والاطفال فيهم مشاكل فيهم تشوية وحاجات زى دى فالطفل لما نقول ينوم نحن بنعنى انو الاطفال مثلا الصغار ينوموا زى 12 ساعة يعنى الطفل اقل شىء مفروض ينوم ثمانية ساعات لكن الاطفال عادة ينوموا زى 12 ساعة فى اليوم والسهر للاطفال دائما ما كويس يعنى اسى القصة اصبحت مقلوبة انو الاطفال هم يساهروا لحدى الساعة واحدة والساعة اتنين وثلاثة بالليل طبعا بقت فى وسائط بتاعة تلفزيون ودش وافلام الاطفال وفى قنوات مخصصة للاطفال شغالة 24 ساعة اهم حاجة فى تربية الاطفال الوقت يعنى الوقت لدرجة انو متين وقت النوم متين وقت اللعب ومتين وقت الاكل ومتين وقت المذاكرة ومتين وقت الراحة دى نحن اذا ما وزعناها الطفل طول حياته بيكون غير منظم حتى بتؤثر فى دراسته وفى استعابه وفى اكله هى منظومة والمنظومة دى اذا فى اى خلل فيها فى النوم او خلل فى اى حاجة منها تؤثر فيهم فلازم نعلم الاطفال من بدرى دى مثلا ساعة نومك ودى ساعة اكلك دى ساعة رياضتك ودى ساعة راحتك وكيف ينظم نفسو وكيف يفرش سريروا وكيف يفتح الغرف وكيف يغسل اليدين دى الاشياء الاساسية التى ممكن نتعامل بها مع اطفالنا قبل ما يدخلوا المدراس

مقدم البرنامج :

معنا اتصال الان الو السلام عليكم

مشاركة عبر الهاتف :

وعليكم السلام معاك حواء احمد – ريفى ام روابة بسأل الدكتور عن اسباب السحائى يعنى الحاجات التى تجعل السحائى متواجد بين الاطفال هل هو عندو فيروس بينتقل من طفل لاخر وفى اطفال بيلعبوا فى الموية المتواجدة فى الشوارع بيلعبوا لما يكونوا راجعين من المدارس مثلا من قرية لقرية بيجدوا موية متواجدة ويستحموا فيها فالموية اكيد بيكون فيها بعض الاضرار للاطفال

د/ على عربى :

طبعا السحائى فى الاطفال بيختلف عن الناس الكبار يعنى فى اطفال رضع بيجيهم سحائى وعادة بيجى عن طريق الناس الكبار يعنى الزول بيكون حامل ميكروب خاصة الاطفال غير المطعمين نحن فى برنامج التحصين الموسع انو دخل واحدة من لقاحات الخماسى فيه حاجة اسمها الانفلونزا المستديمة هى التى تسبب السحائى للاطفال هى موجودة فى الصومال الناس او حاجة تعرف انو الطفل دا اخد التطعيم وهو اول خط دفاع بالنسبة للطفل الحاجة الثانية بالنسبة للرضع نحن بالنسبة اذا كان الطفل نافوخوا جاء زايد مرات الامهات بيجوا يقولوا انو الطفل دا نافوخوا زايد فى ناس بيقولوا انو والله ما فى مشكلة لا فى مشكلة اذا  كان فى نافوخ زايد معناها فى ضغط على الرأس وهى اول اعراض السحائى الحاجة الثانية اعراض السحائى فى الاطفال التشنجات اى طفل بيتشنج اقل من عمر سنتين لازم يتفحص انو عندو سحائى ام لا لانو معظم الاطفال التى تحصل لهم تشنجات يقول لك دى حمى عادية وتشنجات حرارية ويجهلوهم مرات يصابوا بى انو يتعالجوا علاج غير كامل للسحائى ويطلع انو التهاب الامراض بتاع الشلل الدماغى يفضل طفل مُعاق طول حياته يعنى نحن نتأكد من الاطفال انو اى طفل يتشنج ومرات بيجونا فى الحوادث اطفال متشنجين واقل من سنتين نقول لهم نعمل لهم نشيل موية من ظهرهم يقول لك لا انا يتخيل لى انو الناس تقبل لانو حقنة الموية فى الظهر دى ما فيها اى مشكلة وتتفحص وتتعرف انو فى سحائى احسن مما انو الطفل يصاب بعاهة مستديمة او تحصل له اى مشاكل تانية ودى ما عندها اى مشاكل الناس بتخاف انو فى الظهر وشلل لكن بالعكس وجود السحائى هو الذى يعمل مشاكل الحاجة الثالثة هى مثل الرقبة المتصلبة يعنى تجد الطفل انو الرقبة متعسمة وما قادر يقبل على حته معينة خاصة مع الحمى اذا كان فى حمى وصداع شديد وتعسم فى الرقبة دى اعراض سحائى والاطفال مرات بيجيهم سحائى بيكونوا مثلا فى غياب للوعى لفترة معينة وفى رفض خالص للرضاعة دى كلها اسباب لكن حسب الاسباب الكبيرة هى واضحة انو انتفاخ النافوخ والتشنجات عدم الرضاعة الصداع الشديد تعسم الرقبة ومثلا تجد انو الطفل بيخاف من الضو لانو بيؤثر فيه الاستفراغ دى اعراض السحائى دى اذا حصلت لى اى طفل لازم امه تتاكد انو دا ساحائى ام لا بشيل الموية من ظهره بيتعرف انو الموية دى فيها التهاب ام لا لانو العلاج بتاع السحائى عشرة ايام بالوريد فى المستشفى ما فى اى حته تانية ما ممكن يتعالج فى البيت لانو الاطفال غير الناس الكبار عندهم الجرعة بالوزن لساعات معينة وادوية معينة ودى كلها بتعتمد على انو العلاج يكون ناجع يعنى التهاب السحائى بيتعالج 100% لكن تاجيلها وخوفنا وما نعالجها بالطريقة الصحيحة تؤثر فى الطفل تأثير كبير جدا وتعمل مشاكل للاطفال كثيرة جدا

مقدم البرنامج :

امكن اختنا حواء سألت عن اللعب فى الموية لكن قبل كدا معنا اتصال حيكون اخر اتصال لانو ما تبقى لنا كثير اربعة دقائق او اقل من كدا تفصلنا عن نهاية هذا اللقاء الو السلام عليكم

مشاركة عبر الهاتف :

وعليكم السلام معاك قسم الله عبد الجليل الامين – ولاية النيل الازرق قرية ود الماحى عندنا طفلة عمرها تسعة شهور الطفلة دى بتستفرغ طوالى قابلنا الدكتور قال انو عندها ملاريا بعد شوية صرفنا علاجات الملاريا وما زال الاستفراغ تانى رجعنا للدكتور قال عندها التهاب تانى صرفنا علاج الالتهاب والى اليوم الاسهال ماشى فيها وما عرفنا الحاصل شنو

د/ على عربى :

هل الاسهال فيه مخاط او دم

مشاركة عبر الهاتف :

ايوا فيه مخاط    

د/ على عربى :

هل فحصتوا الفسحة

مشاركة عبر الهاتف :

ايوا رجعنا للدكتور وقال لنا انو البنت عايزة تسنن وانت تصبروا عليها

د/ على عربى :

وزنها ماشى كويس هل بتفقد سوائل وحاجات زى دى

مقدم البرنامج :

بتضعف وتفقد وتكون فترانة

مشاركة عبر الهاتف :

ايوا بتفتر هى صحتها كويسة

د/ على عربى :

دى طبعا عايزة فحص اذا كان الفسحة فيها مُخاط يتأكدوا السبب شنو وبعدين فى ادوية للاسهالات فى العمر دا

مشاركة عبر الهاتف :

هو ما فى دكتور اخصائى عشان يفحص عليها لكن هو زول ممرض فقط فى القرى

د/ على عربى :

انت شوف اذا الاسهال اثر فى صحتها وفى وزنها لازم تعرضها على طبيب يعرف السبب شنو لانو الاسهال ممكن يكون من الحاجات التى تدخل الطفل فى سوء تغذية وتدخلوا فى عدم وزن وعدم شهية وتؤثر فى وزنها كثير جدا فلازم تمشى لاقرب وحدة صحية او مكان اقرب مستشفى عشان يتعرف سبب الاسهال شنو لانو الاسهال اذا استمر لفترة طويلة ممكن يؤثر فى التغذية وفى وزنها لقدام

مقدم البرنامج :

شكرا قسم الله ياريت تكون سمعت نصيحة دكتور على لا تكتفوا فقط بالقرية لازم تمشوا اقرب مدينة وتقابلوا اخصائى اطفال وايضا نحن بنرحب بك اذا احتجت لى اى متابعة اتصل بنا عبر البرنامج وانشاء الله ربنا يديها الصحة والعافية ، دكتور اخر دقائق نصيحة امكن الخريف بدا كثير جدا فى ولاياتنا شوية فى الخرطوم لسه لكن مقبلين على الموية امكن تكلمت هى على انو الاطفال من قرية لقرية او من حلة الى حلة اللعب فى الموية

د/ على عربى :

للاسف انو اى موية راكضة طبعا موية البحار والانهار كويسة ما موية راكضة اذا كان فى اى حفير وفى موية غير دى تكون لمسافات طويلة تكون عرضة لامراض كثيرة جدا يعنى لو ما جابت اسهال ممكن تجيب اليرقان ممكن تجيب البلهارسيا يعنى ممكن تجيب مشاكل ما عندها حصر فالناس بقدر الامكان تبعد من المياه الراكضة اخونا قبيل كان تكلم عن الذباب والذباب طبعا ناقل جيد جدا لكل الامراض بتاعة الاطفال من يرقان الى اسهالات الى تيفويد لى اى شىء ممكن الذباب ينقل حتى البكتريا والقارضيا فالناس بقدر الامكان يعنى الذباب دا تحاول تكافحه فالذباب لا ينتشر الا اذا انت فى وساخة موجودة او فى حته ممكن يعيش فيها بالطريقة دى فالناس يحاولوا بقدر الامكان اذا كان فى اى اكل فى اى حاجة تغطيها وتحارب الذباب وتحارب المياه الراكضة دى نقطة مهمة جدا للناس انو المصادر الغير معروفة الاطفال ما يمشوا فيها فالاطفال هم مستقبلنا للسودان ونحن فى السودان وهم الذين يستلموا السودان بعدنا لازم نتاكد فى القرن العشرين انهم بيتلقوا رعاية كويسة وتطعيم كويس وتغذية كويسة ومستقبل واعد بالنسبة لهم انشاء الله

مقدم البرنامج :

حقيقة بنحييك دكتور على وبنقول للاهل والامهات بصورة اخص ياريت شوية نولى الاطفال عناية كتر خيرك تعلمنا معاك النصيحة الذهبية ورسمنا خارطة طريق لتغذية اطفالنا بنحييك دكتور على عربى ربنا يديك الصحة والعافية وانشاء نلتقيك فى حوارات اخرى اكثر ثراء

د/ على عربى :

انشاء الله وربنا يديكم الصحة والعافية

مقدم البرنامج :

شكرا دكتور على عربى استشارى طب الاطفال الاستاذ المشارك بكلية الطب جامعة الخرطوم ، شكرا لكل الذين تابعونا عبر عيادة على الهواء تحايانا طه عبد الرحمن طه ، تحياتى اسراء زين العابدين ، الاسبوع القادم لقاء جديد عيادة على الهواء الاخراج منى صالح                         

.