بسم الله الرحمن الرحيم

برنامج عيادة على الهواء

موضوع الحلقة : استخدام التقنية فى التوعية والتثقيف الصحى – بثت 24 - 5 – 2012م

مقدم البرنامج :

اسراء زين العابدين

الضيوف :

دكتور / طارق فتح الرحمن عامر  استشارى الباطنية رئيس قسم الباطنية والجهاز الهضمى بمستشفى الخرطوم التعليمى ، ودكتور / حاتم سيد احمد اختصاصى طب المجتمع الاستاذ بكلية الطب جامعة الخرطوم ومدير عام مركز التطوير المهنى والتدريب المستمر بوزارة الصحة الاتحادية     

مقدم البرنامج :

 ايها الاصدقاء اهلاً مرحباً بكم نسعد بكم كثيراً ونتابع معكم هذا اللقاء عبرعيادة علي الهواء ، بدءاً هاكم تحايا الفريق الذى يصحبنى عبر هذا اللقاء ، مستمعى الاعزاء نرحب بكم نسعد بمتابعتكم ونسعد اكثر باتصالكم بنا اسئلتكم واستفساراتكم واستشاراتكم هى هدفنا فى هذا البرنامج نذكركم بارقام هواتف البرنامج 87553151 و 87553152 ، اهلا مرحبا بكم ايها الاصدقاء الكثير من المؤسسات الصحية تعمل فى مجال التثقيف الصحى ونشر الوعى وايضا لابد من ان نسلط الضو على هذه المؤسسات التى تعنى بادخال وادماج التقنية فى التواصل عبر تقديم هذه الخدمات للمستمعين ، اذاً ايها الاصدقاء هذه حلقة نخصصها للحديث حول استخدام التقنية فى التوعية والتثقيف الصحى والمزيد من المعلومات فى هذا المجال ، لو تسألنا الان لعلنا فى هذه اللحظة نجد العديد من المستمعين يتعاملونا مع اجهزة الهاتف النقال ومع اجهزة الحواسيب الرقمية وايضا اللابتوب وكثير من هذه الاجهزة فى العديد من الانشطة منها المجتمعية ومنها التواصل الاجتماعى وايضا استخدام الدخول لشبكة الانترنت فى مختلف الوظائف ، فى هذه الحلقة ايها الاصدقاء سنفتح الحوار والحديث حول كيف يمكن ان نستخدم هذه التقنية فى نشر الوعى الصحى فى تلقى المزيد من المعلومات فى المعرفة الصحية والطبية وذلك بالنسبة للمواطن العادى وبالنسبة ايضا للذين يعملون فى الكادر الصحى من الاطباء ومن الكوادر الطبية الصحية المساعدة ، اذاً هذه حلقة هامة اعتقد فى رائى ولابد ان نتابعها ولابد ان نتواصل معاً لمعرفة العديد من مزايا هذه التقنية التى خصصتها العديد من المؤسسات الصحية وايضا ممثلة فى وزارة الصحة الاتحادية ، مرحباً اهلاً بكم ايها الاصدقاء دعونى ارحب كثير جداً بضيوفنا فى هذا اللقاء دكتور / طارق فتح الرحمن عامر استشارى الباطنية رئيس قسم الباطنية والجهاز الهضمى بمستشفى الخرطوم دكتور حبابك عشرة اهلا بك سعيدين بهذا التواصل معك

د/ طارق فتح الرحمن عامر :

مرحباَ بك استاذة اسراء

مقدم البرنامج :

 ايضا ايها الاصدقاء نرحب به معنا دكتور/ حاتم سيد احمد اختصاصى طب المجتمع كلية الطب جامعة الخرطوم ومدير عام مركز التطوير المهنى والتدريب المستمر بوزارة الصحة الاتحادية مرحب بك دكتور

د/ حاتم سيد احمد :

 مرحب بك والتحية عبرك لكل المستمعين انشاء الله

مقدم البرنامج :

اذاً اهلا بكم ايها الاصدقاء هذه حلقة سنتحدث فيها عن المركز السودانى للاستشارات والاتصالات الطبية ، ماذا نعنى بهذا المركز وما هى الخدمات التى يقدمها وما هى المشاكل التى يمكن حلها عن طريق هذا المركز واستخدامات التقنية الحديثة فى مختلف هذه المجالات ، اهلا بكم ايها الاصدقاء نبدا دكتور طارق عايزين نعرف المركز شنو المعنى بالمركز السودانى للاستشارات والاتصالات الطبية هل هو مركز زى بتاع دكتور ناس حاتم ديل حول التطوير والتدريب المهنى ومركز يعنى بى انو الناس تحضر لكم وكشف  وحاجات زى دى ام الحكاية شنو

د/ طارق فتح الرحمن عامر :

بسم الله الرحمن الرحيم ، المركز السودانى للاستشارات والاتصالات الطبية حقيقة بيعمل بنظام الرقم الموحد يستخدم جهاز الهاتف السيار الموبايل عبر الاتصال بالرقم 3434 على كل شبكات الهاتف السيار وهذه الخدمة تقدم فى الوقت الحالى من السادسة صباحا الى الساعة 12 مساءاً وانشاء الله ستكون تغطى الاربع والعشرين ساعة فى القريب العاجل الحقيقة المركز تم انشاءه فى شهر 8 من العام قبل الماضى تحت مسمى المركز الطبى والهيئة القومية للاتصالات وتم الاتصال بشركات الهاتف السيار وتم الحصول على الرقم الموحد 3434 يعنى من اى موبايل انت ممكن تتصل بهذا الرقم وتتم الاستجابة للمكالمة ويمكن ان تتحدث الى طبيب الاسرة ويمكن ان تتحدث عن طريق الاستقبال اذا كنت مثلا تقصد الدليل الطبى لو عايز تعرف الطبيب عيادته وين المراكز وين نوع الخدمات المتوفرة

مقدم البرنامج :

يعنى عدد من الخدمات يعنى انا ممكن اتصل بهذا الرقم 3434 نحن سنحاول بعد شوية فى جزء من الحلقة دى اننا نتصل على الرقم دا انشاء الله ونوفق بعد ان ندخل على الرقم ونسأل ويجينا الرد يعنى انا مثلا لو عايزة عيادة بتاعة طبيب او اعرف مواعيد العيادة وتعمل او تخصصات مختلفة شنو اعمل

د/ طارق فتح الرحمن عامر :

 بمجرب ما دخلت على الرقم 3434 عبر الاتصال الصوتى يعنى بتجيك رسالة تقول لك مرحباَ بك فى المركز السودانى للاستشارات والاتصالات الطبية لو عايزة الدليل الطبى تدوسى رقم واحد فى موظف او موظفة فى الاستقبال

مقدم البرنامج :

 لو عندى شكوى يعنى مثلا عندى طفل حصلت له حاجة بلع حاجة او شرب حاجة خطأ حصل او استخدم له جرعة غلط بتاعة دواء

د/ طارق فتح الرحمن عامر :

دا لطبيب الاسرة عبر التفاعل الصوتى  تدوس بالموبايل على الرقم  2 وحتتوصل طوالى الى طبيب الاسرة وطبيب الاسرة اساساً موجود للاجابة على استفساراتك او استشاراتك الطبية يعنى اليوم مثلا واحد اتصل قال انو والله حصل له نزيف من الانف طوالى تمت الاستجابة له واعطوا النصيحة انو يعمل حشوة بفازلين فى الانف وكيف يقعد وكيف يتصرف  فى الحالات الطارئة دى بالنسبة للحالات الطارئة مثلا واحدة زى ما ذكرتى انو طفلها تحرق الواحد يعمل شنو مع الطفل اذا بلع حبة فى امثلة كثيرة جدا لاشياء ممكن تتحل ويتم حل الاشكال بالهاتف وكل المطلوب هو عبارة عن نصيحة طبية تلقاء الطريقة الحاسة بها

مقدم البرنامج :

 نحن دكتور طارق امكن حنرجع عشان نتكلم عن هذه الخدمات بالتفصيل ايضا الناس مرات بيكون عندها اشكالات يعنى انا مشيت متابعة مع طبيب عندى مشكلة امكن واحدة من هذه او جزء من هذه الخدمات التى تقدم عبر الوسائل برامج التثقيف فى الاجهزة الاعلامية وايضا هذه المؤسسات لانو انا لو عندى شكوى معينة والله انا متابعة مع طبيب عندى مشكلة ما شاعرة بى انو فى تحسن اى هذه المشاكل نحن حنرجع عشان نشوف كيف يمكن نقاشا يعنى التخصصات والمختصين الذين يقابلوا الناس ويقدموا هذه الحلول او هذه الردود ومسألة الرقابة على هذه الاسئلة والاستفسارات مجتمعة امكن نذكر الناس برقم المركز السودانى للاتصالات والاستشارات الطبية 3434 من كل الشبكات وايضا انا منتظرة اسئلتكم واستفساراتكم عشان نتعرف اكثر على هذا المركز والخدمات والمعلومات التى ممكن الناس يستفيدوا منها انشاء الله ، اهلا مرحباً بكم وهذه عيادة على الهواء ، ايضا معنا دكتور حاتم سيد احمد استشارى طب المجتمع بكلية الطب جامعة الخرطوم دكتور حاتم زى ما انا ذكرت فى بداية هذه الحلقة ودكتور طارق انو هى واحدة  من اهداف المؤسسة الصحية كاملة لنشر مزيد من الخدمة ونشر مزيد من الوعى الصحى بالنسبة للمواطنين كيفية الاستفادة من هذه التقنيات بالنسبة لنشرها وتدريب العاملين فى هذا المجال والاستفادة من التقنيات الحديثة عموماً مثلا عندنا نموذج جميل جدا منها هذا المركز بتاع الاتصالات

د/ حاتم سيد احمد :

 انا افتكر انو التقنية لها دور كبير جدا ليس فى مجال الصحة بل فى مجالات كثيرة جدا فى السودان فى اربعة مليون مشترك وفى اكثر من عشرة مليون شخص عندهم تلفونات واصبحت وسيلة فاعلة جدا وانا افتكر دى فرصة كبيرة جدا خاصة نحن فى وزارة الصحة الاتحادية وادارة التدريب المهنى المستمر لنقل الخدمة الى الريف وزى ما عارفة يا استاذة وكل المستمعين عارفين انو نسبة كبيرة جدا من التخصصات موجودة فى الخرطوم وكثير من الولايات بتنعدم فيها التخصصات لكن فى نفس الوقت الان الموبايل عند اى شخص ومعظم الناس عندهم الموبايل ومعظم الناس عندهم الانترنت ممكن يفتحوا الموبايل كيف نحن نستقل التقنية دى عشان نقل الخدمة عشان ننقل التدريب وعشان ننقل المهارات وننقل التكنولوجيا الان العالم تكلم عن الصحة المتوازنة لانو فى دراسات كثيرة جدا اتعملت فى كثير من الدول الافريقية ممكن الموبايلات تستخدم فى التثقيف الصحى وممكن الموبايلات تستخدم فى نقل المعلومة الصحية لاتخاذ القرار وممكن الموبايلات تستخدم فى الاستشارات الطبية التى هى جزء من التدريب وممكن تستخدم التقنية فى نقل التدريب يعنى نحن اسى مثلا فى ادارة التدريب المستمر فى زى ستة ولايات مربوطة بخدمة التعليم المتلفز عن بعد ودى مثلا فى السنتين الفائتة فى زى الفين نفر بدل الواحد يركب المواصلات ويجى بالطرق السريعة ويخسر قروش فى انو يجى الخرطوم هو قاعد فى مكانه يتلقى التدريب والتقنية دى وفرت لنا قريب 300 مليون جنية نحن افتكر ايضا رسائل من الساهل جدا للمركز دا والتعاون معه يعنى اتخيل انو والله قابلة قاعدة فى قرية بعيدة عندها موبايل تجيها رسالة تقول والله بصورة بسيطة جدا انو المرأة لو عندها نزيف حوليها لانو لو ما حولتيها بيحصل كذا رسالة بسيطة زى دى لا تكلف كثير لكن اثرها اكبر انو تنقذ حياة ام وكثير من الامثلة فى هذا المجال

مقدم البرنامج :

دكتور طارق امكن يعنى هذه المسألة او النقطة الاخيرة التى اشار اليها دكتور حاتم فى حديثه يعنى كيفية استخدام التقنية الحديثة فى مسألة تعزيز الصحة الطبية او تقديم خدمة او صحة اولية نحن نتحدث الان عن تقديم الصحة الاولية بالنسبة للشخص اذا كانت حاجة انقاذ اذا كانت حاجة وفرت مستوى المعلومات لدى الناس كل هذه الاشياء يعنى كيف يمكن استخدام مثل هذه التقنية عبر هذا المركز لارسال هذه الرسائل التثقيفية والتوعوية لكل الناس الذين يتواصلوا معكم

د/ طارق فتح الرحمن عامر :

هى الرسائل التى تكلم عنها دكتور حاتم حقيقة حتبدا فى القريب العاجل حيعان عنها فى الصحف وكيفية استقبال هذه الرسائل  حقيقة عندنا سبعة مجموعات من الرسائل فيها الصحة العامة صحة الامومة والطفولة فيها التناسلية والعقم وفيها الباطنية فيها الجراحة بانواعها المختلفة وفيها الصحة النفسية وحقيقة هذه الرسائل فيها كمية كبيرة جدا وافية من المعلومات وانا افتكر انو الاشتراك فى هذه الرسائل بيكون ذا فائدة عظيمة من ناحية صحية تثقيفية عالية للمواطن  

مقدم البرنامج :

نحن حنرجع امكن انت ذكرت مسألة بعض الامراض المزمنة نحن حنتوقف عند هذه النقطة لانها واحدة من المشاكل المهمة جدا عندنا وتحتاج الى مسألة بتاعة تواصل كبيرة جدا بين مقدم الخدمة او بين الاستشارات فى هذه المسألة حنرجع للنقطة دى عشان نتعرف على ما يقدمة المركز السودانى للاستشارات والاتصالات الطبية لهولاء المرضى قبل كدا معنا اتصال هو اول اتصال فى هذه الحلقة الو السلام عليكم

مشاركة عبر الهاتف :

وعليكم السلام معاك عبد الكريم – ريفى بارا انا سؤالى اذا كان عندى مرض ما مثلا عايز اسأل على الرقم 3434 هل بيجيب للزول على المرض وعلى اعراض المرض

مقدم البرنامج :

يعنى اذا انت حاسى بعرض معين

مشاركة عبر الهاتف :

انا مثلا عندى اعراض عايز استفسر من الدكتور من 3434

د/ طارق فتح الرحمن عامر :

بيجيبك على سؤالك وحتى طبيب الاسرة الموجود على الرقم دا اذا ما كان عارف الاجابة بيحولك الى الاخصائى المختص فدا يجاوبك على سؤالك نحن عندنا اخصايين فى المركز ممكن يجاوب على الاسئلة بالاجابة عليها عن طريق الطبيب المختص فكل واحد فى تخصصه اذا قدر يجاوبك على سؤالك فبها واذا ما قدر يحولك الى اخصائى فى المجال بتاع المرض الذى تسأل عنه

مقدم البرنامج :

طيب دكتور امكن هذا السؤال بيرجعنا الى نقطة مهمة انو فى بعض الحالات عشان الناس  ما تفتكر انو والله بعد دا انا ممكن اى حاجة اشعر بها اضرب هذه الارقام وطوالى انا يقولوا امشى ابلع كبسولة كدا او حبه يعنى مسألة التحاليل ومسألة التشخيص الثانى عبر المعاينة عبر الكشف السريرى وهذه الاشياء كيف يمكن التفريق بينها لانو دى مسألة مهمة جدا يعنى شنو الفرق امكن انا اسى عندى مشكلة صحية بستخدم لها دواء معين او شعرت بعرض جديد وما الى ذلك مسألة التشخيص وتحديد المشكلة الصحية

د/ طارق فتح الرحمن عامر :

نحن عندنا بروتوكولات يعنى لكل نوع من الامراض عندنا لها بروتوكول يعنى اذا المريضراتصل وقال عندو  الشكوى المعينة انت بتسأله السؤال المعين يعنى اعطيك مثال مثلا الواحد عندو كحة يوم يومينبالنسبة لى دا انا ممكن ياخد مضاد حيوى اذا شعرت انو محتاج الى مضاد حيوى ممكن يكون مثلا فيروس اما اذا الواحد قال لى عندى كحة لها شهر وانا كطبيب بعرف اقيم انو والله العندو كحة شهر دا محتاج الى صورة اشعة امكن الواحد عندو كحة شهر اقول له والله اخد مضاد حيوى لا انا حابب انت كون تعطى الواحد او الانسان النصيحة انو الاستشارة الصحيحة انت كدا بتكون افدته كثير يعنى ما بالضرورة انا اكتب له دواء لكن اوضح له يعمل شنو بالظبط  

 مقدم البرنامج:

معنا اتصال اخر الو السلام عليكم

مشاركة عبر الهاتف :

وعليكم السلام معاك محمد زين – ولاية شمال كردفان والله ياريت الدكتور يوضح لنا الارقام يا استاذة

د/ طارق فتح الرحمن عامر :

فقط تتصل على الرقم 3434     

مقدم البرنامج :

هو رقم مختصر 3434 من اى موبايل وانا اتمنى انو الان تجربوها وترجعوا لنا فى الحلقة دى عشان نحن نشوف اذا كانت فى مشاكل او شكاوى او الناس ديل ما قاعدين يردوا او الحاصل شنو يعنى انا ياريت ايضا اتمنى انو كل المستمعين الذين يتابعونا يتصلوا بهذا الرقم 3434 عشان نحن تكون عندنا تجربة عملية امامنا ونشوف ما هى الخدمات التى يمكن ان يقدموها والمشاكل التى ممكن تتعرضوا لها من خلال تعاملهم مع هذا المركز لانو معنا الجماعة ديل عشان نشوف الحاصل شنو ، معنا اتصال اخر الو السلام عليكم

مشاركة عبر الهاتف :

وعليكم السلام معاك محمد ابراهيم جمعة – ولاية جنوب كردفان استفسارى 3434 هى مثلا ارقام بتشمل كل الاخصائيين حتى الواحد لو عايز يستفسر وحتى الواحد لو دخل فى الرقم دا مباشرة الخط بيكون فاتح ويستفسر كل الاستفسارات ويحكى اعراضة او فى اخصائى معين

د/ طارق فتح الرحمن عامر :

فى الاول بتتكلم 3434 لما تدوس الرقم 2 بيجيك طبيب الاسرة فطبيب الاسرة بيستمع الى الشكوى بتاعتك اذا حس انو محتاج انو يحولك الى اخصائى وانت على الخط طوالى يحول المكالمة الى اخصائى عشان تتحدث معه يعنى زى ما انت عارف كثير جدا من الامراض بتتحل عن طريق طبيب الاسرة والامراض المعقدة هى بتحتاج الى تحويل الى اخصائي هو بيجاوبك فى اى تخصص انت تطلبه

مقدم البرنامج :

شكرا محمد ابراهيم ، بنرحب بكم ايها الاصدقاء ونرجع مره تانية دكتور حاتم نحن لما نتكلم عن الاستخدام لمثل هذه التقنيات وكيفية الاستفادة منها واهمية التعامل معها حتى مع الكادر الصحى يعنى كيف يمكن ايضا الاستفادة من مثل هذه الخدمات بالنسبة للكادر الصحى زى ما ذكر امكن قبيل دكتور طارق فى انو ممكن يتم تحويلك الى اخصائى معين تتعرض لبعض المشاكل فى مناطق امكن انت تكون ما زورتها حتى فى داخل السودان الى اى مدى يمكن الاستفادة من مثل هذه الخدمات وبالتحديد فى كثير من المشاكل المرتبطة مثلا بمسألة تهتم بالوعى يعنى فى امراض هى مرتبطة بالوعى ورفع الوعى لدى المواطن 

د/ حاتم سيد احمد :

انا افتكر انها واحدة من الفرص الكبيرة جدا الان مثلا ولاية الجزيرة عندها تجربة رائدة جدا فى مجال طب الاسرة وعندهم اكثر من 150 طبيب يتدربوا فى طب الاسرة وعن طريق استخدام تقنية الانترنت بالموبايل بدل الزول مثلا يجى من ريفى المناقل وريفى رفاعة هو فقط من مكانه ممكن يتكلم مع الاخصائى يقول له والله فى مريض بيكون شايف الحالة امامه والمريض عندو كذا وكذا والاخصائى طوالى يقول له اعمل له كذا وكذا الان التجربة دى تجربة رائدة ووفرت كثير جدا من الجهد وحتى قللت كثير جدا من المرضى والوفيات نحن ايضا بشراكة مع ولاية الجزيرة عملنا نفس البرنامج فى ادارة التطوير المهنى المستمر وايضا البرنامج دا بيتيح لكل الكوادر الصحية والمهن الطبية الصحية المساعدة انو هو موجود داخل عيادته فى الريف يدخل على الانتلانت او الموبايل ويقدر يستشير استشارة طبية انا افتكر انو الليلة يكون فى مساعد طبى موجود فى حته او طبيب اخصائى اشكلت عليه حالة هو بيتصل على الرقم المحدد دا يقول والله قدامى الحالة دى اعمل لها شنو هو كطبيب بيقوم الطبيب هنا الموجود او الاخصائى بتحليل الحالة التى فيها نوع من التدريب له المرة القادمة لو جاتوا نفس الحالة ممكن لا يتصل لانو بعد دا خلاص اصبح له تدريب انا افتكر انو دا تدريب مستمر بين الاطر الصحية زى ما انت تفضلتى فى مجال الرعاية الصحية الاساسية لانو الرعاية الصحية الاساسية هى المدخل و80% من المؤسسات الصحية فى الريف هى بتقدم واسى الان الناس المتصلين كلهم من مناطق ريفية وبتالى تصبح الرعاية الصحية الاساسية دى هى الحاجز الرئيسى التى تخلى الزول ما يجى لناس دكتور طارق بعدين فى شكل بتاع مشاكل مركبة سواء كلى او سكرى او ضغط زى ما قال دكتور طارق امكن المعلومة الصحية دى اذا الشخص ضرب قال انا عندى حمى وصداع يا ربى اخد لى دواء ملاريا ام لا نقول له ما تاخد اول امشى افحص وشوف الفحص ولو طلعت النتيجة خد العلاج الزول دا اذا اخد العلاج بدون فحص وما كانت ملاريا المسألة ممكن تتطور وتصبح فشل كلوى وتبدا مشاكل يقوم يطر وياخد العلاج فلاحظى المعلومة الصحية معلومة بسيطة كلام كلمتين ثلاثة اكيد هى اثرها كبير جدا على الشخص وعلى النظام الصحى

مقدم البرنامج :

معنا اتصال اخر الو السلام عليكم

مشاركة عبر الهاتف :

وعليكم السلام معاك عبد الهادى – النهود طبعا نحن فى الريف والعلاج عندنا صعب والمواصلات صعبة لكن اسى ما شاء الله العلاج بالتلفون نحن طبعا فى القرى متدربين اسعافات اولية واخدنا الرعاية الصحية لكن اسى كدا بتريحونا انا عايز اسأل الدكتور من الرقم 3434 هل نعمل معه مفتاح ام درمان ام مفتاح الخرطوم  

د/ طارق فتح الرحمن عامر :

ما تعمل مفتاح اى مكان من اى مكان فى السودان فقط تضرب الرقم 3434 بدون اى مفتاح  

مقدم البرنامج :

نحن بنحييك كتر خيرك ، معنا اتصال اخر الو السلام عليكم

مشاركة عبر الهاتف :

وعليكم السلام معاك فتحى ابراهيم انا احييكم على هذا الجهد الكبير انا عندى سؤال يعنى لو الزول دخل على الخدمة بيحول لشخص تانى انا عايز اعرف هل الخط بيكون فيه بعض الانتظار او التحويل مباشرة

د/ طارق فتح الرحمن عامر :

الانتظار اللحظة بتاعة التحويل بمجرد تدوس زر على الهاتف الموجود فى المركز بيحولك الى الاخصائى

مقدم البرنامج :

يا اخ فتحى سؤالك مهم فعلا ودى واحدة من الاشياء نحن نتمنى انو واحدة من اهدافنا فى هذه الوزارات مسألة الوعى الصحى والتثقيف عبر الاجهزة الاعلامية بنفتكر انو دى خدمة مهمة لكن ايضا لو اصبحت فى مشاكل تثقل على المواطن ايضا بالنسبة لنا بنتوقف عندها ونتمنى انو تجربوا هذه الخدمة وتتابعوها انا عموماً لسه ما جربتها وبعد كدا نشوف تتصلوا بنا فى العيادة فى اى وقت ونحن ايضا نرفع شكاواكم ومشاكلكم دى الى المسئولين من هذا المركز عشان ما تصبح المسألة فيها رهق على المواطن ، السؤال دا بنرجع به طوالى لدكتور طارق اذا عندنا شكاوى معينة

د/ طارق فتح الرحمن عامر :

حقيقة عندنا رقمين للشكاوى الرقم 0120669037 او 0120669038    

مقدم البرنامج :

يا ريت الناس كلهم يسجلوا لانو رقم مهم اذا كانت فى شكاوى معينة ، نحن نرجع مره تانية دكتور طارق وامكن انا عايزة ادخل بمدخل مهم جدا الامراض المزمنة او المشاكل بتاعة الناس العندهم سكرى او اذا زول عندو ارتفاع فى ضغط الدم اذا الناس العندهم صرع او زول بيتعاطى علاجات غدة درقية اذا كانت زيادة او نقصان هذه المشاكل والامراض التى ترتبط بمتابعات كل فترة كيف يمكن التعامل معها بالنسبة لملاحظة الصحة العامة اسئلة نوع التغذية اذا طرا طارىء او مشكلة طلرئة يعنى هل يمكن التعامل معها عبر هذا المركز

د/ طارق فتح الرحمن عامر :

دا سؤال مهم جدا استاذة اسراء ومن اهداف المركز انو يقللوا الضغط على الخدمات الصحية الشحيحة اصلا ولوقلت لك مثال مثلا فى زى 7500 واحد مسجلين صرع زديل بيحضروا من مختلف ولايات السودان للخرطوم عشان يسألوهم سؤالين ثلاثة انو جاتك صرعة ام لا المهم زيد الدواء او نقص الدواء المسألة دى بسهولة ممكن تتحل بالتلفون ولو جيت العيادات المحولة بالمستشفيات بنجد كمية من المرضى الذين عندهم امراض مزمنة زى مرض السكر مثلا مريض السكرى ما فى داعى يجينى كل شهر هو عارف عندو سكرى يعنى فى البيت ممكن يقيس السكر بتاعه ويضرب تلفون يقول والله انا السكر بتاعى وجدته كذا انا اقدر بالتلفون اتعامل معه اقول له زيد الجرعة او نقص الجرعة اضيف حبة او نقص الانسولين يعنى ممكن تتعامل معه بسهولة لو قدرنا نستقل هذا المركز بهذة الصورة بنقدر نقلل عدد كبير جدا من الناس الذين يراجعوا الحوادث فى المستشفيات ونقدر نقلل عدد كبير جدا من الناس الذين يراجعوا العيادات المحولة وبتالى نكون وفرنا للمواطن مجهود وقت وقروش يعنى ما حيتحرك من مكانه يركب مواصلات او ياخد عربية خاصة عشان يمشى بها ويجى ينتظر فى العيادات لساعات طويلة جدا عشان يضيع الوقت ويضيع المجهود ويضيع القروش ممكن يتصل على الرقم 3434 وبسهولة جدا ناس الامراض المزمنة ممكن نحن نقدر نتعامل معه بى انو نعطيهم النصيحة التى كان بيقطعوا الفيافى عشان يسمعوها فى العيادات المحولة

مقدم البرنامج :

 ايها الاصدقاء نرحب بكم ونتواصل معكم عبر العيادة نذكركم بالرقم الموحد لمركز الاتصالات والاستشارات الطبية هو 3434 ، دكتور حاتم امكن انا عايزة ارجع قبلها بيقولوا فى اتصال الو السلام عليكم

مشاركة عبر الهاتف :

وعليكم السلام معاك بشير محمد عوض الله – شمال كردفان ريفى النهود ، الموضوع جميل جدا بالنسبة للخدمة بتاعة الرقم 3434 انا فقط عايز استفسر هل عندما اذهب لطبيب مثلا فحصت لانسان طفل او مرأة والمريض كان ما استجاب للدواء فهل فى الحالة دى مباشرة اتصل على هذا الرقم

د/ طارق فتح الرحمن عامر :

يعنى امكن اتصال فى كل المشاكل الصحية

مقدم البرنامج :

يعنى دى تكون واحدة من الاشياء المهمة

د/ طارق فتح الرحمن عامر :

يعنى المركز مفتوح فى اى وقت فى اى مكان لى اى استفسار طبى او استشارة طبية

مقدم البرنامج :

القلق ايضا يا دكتور طارق امكن الناس مرات الزول بيرجع ياخد الدواء وحس انو المريض ما تحسن لساعات او الصباح

د/ طارق فتح الرحمن عامر :

يعنى يجيك انسان يعنى واحدة طفلها بلع حبة باليوم بالغلط تفتكر انو خلاص الطفل بتحصل له حاجة ضربت تلفون نحن بنطمنها يعنى بمجرد انها تتصل  

مقدم البرنامج :

او التحوطات التى تعملا

د/ طارق فتح الرحمن عامر :

قد يكون بلع حاجة بسيطة قد تكون للانسان حاجة مزعجة الطفل حتحصل له مشكلة فى الحالة دى نحن نقول لها لا تنزعجى الحاجة دى بسيطة يعنى فى النهاية انت بتعطى النصيحة الصحيحة

مقدم البرنامج :

نرجع دكتور حاتم حقيقة مثل هذا المركز واستخدام التقنية الى اى مدى يمكن امكن فى كثير من المؤسسات زينا نحن مثلا بنحتاج الى الاحصاءات ومسألة الارقام وزى مسألة الرصد والمتابعة الى اى مدى يمكن ان يحقق مثل هذه الخدمات لكم انت فى مركز التدريب المستمر حتى على نطاق المناطق فى السودان ونشر المشاكل والتحوط لكثير من الاوبئة والامراض او المشاكل

د/ حاتم سيد احمد :

انا افتكر انو الموبايلات الان فى كثير من البرامج التى ممكن تعطيك التقارير وتعطيك المعلومة لاتخاذ القرار ونحن ادارة التدريب المستمر بصدد انو الان فى برنامج ممكن يعطيك التقصى المرضى يعنى مثلا انت تكون قاعدة فى مركز صحى من داخل الموبايل تدخل المعلومة تقول والله الليلة جاتنى عشرين حالة ملاريا فورياً هنا بتظهر فى الوزارة او تظهر فى المركز الموحد انا افتكر استخدام المعلومة لانو المعلومة مهمة جدا لاتخاذ القرار على المستوى الاتحادى انا عايز معلومة انا افتكر دا جانب كبير جدا فى جانب تانى الان مثلا فى كثير من الناس بيذهبوا للعيادات الخاصة انا افتكر انو من الحاجات البسيطة جدا لحقوقه للمريض الليلة المريض بيجى للعيادة اول بيدفع رسوم معينة قد تكون كثيرة او شوية لا ندخل فيها لكن ممكن العيادة نفسها تشيل رقم التلفون بتاع الطبيب بصورة مبسطة جدا يضربوا له يقولوا له يا اخى العلاج مشى كيف لانو الحكاية دى مجربة فى كثير من الاحيان وهو تلفون واحد لمتابعة المريض

مقدم البرنامج :

يعنى يشيلوا ارقام التلفونات لكن ما قاعدين يرجعوا لها ما قادين يرجعوا للزول يقولوا له الدواء مشى معاك كيف

د/ حاتم سيد احمد :

لانو انا افتكر انو لا يكلف قروش كثيرة الحكاية دى مجربة فى كثير من الدراسات يعنى الليلة المريض بيمشى البيت ممكن يقول للطبيب يقول له والله انت بكرة قياس الضغط بتاعك فى المركز الفلانى والحكاية دى ما بالضرورة يعملا الطبيب او الاخصائى انت معاك ناس شغالين فى العيادة لانو الحكاية دى جربت فى كثير من الدراسات وبدات ترفع مستوى الرضا للمريض يقول لك والله انا قاعد فى البيت ضرب لى الدكتور الفلانى او ضربوا لى ناسوا قالوا لى والله انت مفروض تجى تتابع يوم كدا الحكاية دى مؤثرة جدا والحكاية دى انا افتكر قضية المعلومات الصحية قضية اساسية انت مثلا بدل الزول يرسل لك تقرير وما وصل لكن التقرير ممكن يعطوك له فى لحظته دون ان تمشى المركز انا افتكر انو قضية التقنية دى قضية الشعار بتاعا تكلفة بسيطة لكن اثرها كبير جدا قليلة التكلفة لكن اثرها كبير جدا

مقدم البرنامج :

شكرا دكتور حاتم حقيقة كلام مهم جدا نحن حنرجع للجزء مهم وما تبقى لنا كثير فى حلقتنا دى امكن اقل من ربع الساعة تفصلنا عن نهاية هذا اللقاء ، معنا اتصال الان الو السلام عليكم

مشاركة عبر الهاتف :

وعليكم السلام معاك محمد احمد بسأل من الرقم دا بتاع المركز يعنى ممكن تلفونين يدخلوا فى وقت واحد  ويستقبل كثير من المكالمات فى وقت واحد

د/ طارق فتح الرحمن عامر :

المركز مجهز انو يستقبل 60 مكالمةلكن فى الوقت الحاضر هو يستقبل تقريباً 8 مكالمات فى وقت واحد  لكن قابل للتوسعة عشان الناس ما ينتظروا كثير فى الصف نحن مقللين عدد الخطوط لكن الخطوط متاحة  60 خط لكن الان فى ثمانية خطوط  هى متاحة

مقدم البرنامج :

 ثمانية خطوط يعنى فى المستقبل قال حتكون 60 خط حسب الحوجة انشاء الله نتمنى انو الناس تستفيد منه والان الخدمة موفرة من الساعة 9 صباحاً حتى 12 بالليل لكن مهم دكتور طارق مسألة الليل يعنى مسألة الخدمة 24 ساعة او بالليل يا ريت لو قلبتوها تبقى مهمة جدا

د/ طارق فتح الرحمن عامر :

عما قريب حتكون انشاء الله 24 ساعة ونتأكد انو فى حوجة حقيقية نحن لحدى الان فعلا جات اتصالات كثيرة لكن دائما بعد الساعة 11 بتكون الاتصالات قليلة جدا ونحن لو شعرنا انو الاتصالات بعد الساعة 11 بتكون كثيرة ممكن نعمل المركز يستقبل 24 ساعة  

مقدم البرنامج :

دكتور طارق امكن فى مسألة مهمة جدا مسألة المشاكل والامراض التى ما زالت عندها وصمة يعنى زى الامراض النفسية ومرض الايدز وبعض الامراض التناسلية وهذه الامراض انا فى راى انها هى مرتبطة ارتباط كبير جدا بمسألة الوعى ومسألة معرفة المعلومات عن هذه المشكلة الى اى مدى متاح تقديم هذه الخدمة التى هى تحتاج الى زمن يعنى الزول بيضرب وبيدخل على الخط لكن الى اى مدى محتاجة الى زمن ومتابعة

د/ طارق فتح الرحمن عامر :

الحقيقة المركز جاهز تماما للتدريبات على الامراض التناسلية اذا عندك اى اتصال وهذه الامراض محتاجة الى خصوصية والانسان يكون قد يخجل انو يمشى الطبيب واذا بقى تكلم فى التلفون بيكون افضل بالنسبة له عندنا امكن الاتصال بالمركز وتحويلك الى اخصائى فى مرض الايدز والتخصصات التناسلية المختلفة والامراض النفسية يعنى ناس كثيرة جدا يفتكروا انو المرض النفسى هو مرض لا يذهبوا به الى الطبيب ففى الحالة دى ممكن يضرب تلفون ويتحدث مع معالج نفسى او طبيب نفسى

مقدم البرنامج :

والنساء والتوليد بتجينا كثير بتتكلم عن انو هناك مشاكل يتعرضوا لها الفتيات او مشاكل صحية وما زالت هناك مسألة الاحجام عن التعاطى مع اخصائى النساء والتوليد سواء كان رجل او امرأة قبل الزواج امكن لسه هذه المسألة دى مستمرة

د/ طارق فتح الرحمن عامر :

بالظبط  وممكن تختار عايز مثلا تتحدث مثلا مع اخصائية او اخصائى  

مقدم البرنامج :

موفرين يعنى   

د/ طارق فتح الرحمن عامر :

ايوا موفرين من الجنسين وحقيقة فى المركز عندنا ناس اخصايين بتاعين نساء وولادة موجودين واخصايين بتاعين طب نفسى  

مقدم البرنامج :

دكتور امكن فى ايضا نقطة مهمة جدا مشكلة مرض السرطان وكيفية التعرف على اعراضه والخوف الذى يجى للناس من انو والله قد تكون دى مثلا اعراض سرطان او لا وخاصة سرطان الثدى والتعرف عليه الى اى مدى هناك يمكن الاستفادة وتوفير مثل هذه الخدمة

د/ طارق فتح الرحمن عامر :

بالنسبة لمرض السرطان وامراض السرطان عموماً الحقيقة نحن جزء من  الخدمة بتاعة المركز الرسائل النصية بتعنى بالصحة العامة وتعنى بفروع الطب المختلفة فيها تركيز كبير جدا على انو كيف نتعرف على السرطان مبكر اعطيك مثال مثلا سرطان الثدى فى بعض الرسائل ترسل عبر المركز للمشتركين طبعا كيف انو المرأة تفحص الثدى وتتأكد انو ما فى اورام والعلامات المبكرة للسرطانات المختلفة وكيفية انو الواحدة تنتبه لهذه العلامات يعرض نفسو على الطبيب فى الوقت المناسب لانو كثير جدا من امراض السرطان حقيقة اكتشفنا انها امراض ممكن تتعالج اذا تم اكتشافها مبكراً  

مقدم البرنامج :

نرجع امكن دكتور حاتم ونتكلم عن مثل مركز التطوير المهنى والتدريب المستمر الذى يعنى امكن المتعاملين فى الكادر الصحى عموماً ومهم جدا التعامل مع الكوادر الطبية المساعدة مسألة رفع هذا الوعى خاصة فى مشاكل ترتبط بالوعى لدى المواطنين يعنى لو فقط تكلمنا عن مثلا التحليل يعنى كثرة التحليل وفحص الملاريا او عمل القابلات عمل الزائرات الصحيات مثل هذه الاشكالات دى الى اى مدى يمكن ان يستفيد منها هذا الكادر فى مثل هذه الخدمات والمتعامل مع الكادر الصحى امكن ديل الاقرب الى الناس زى ما انت تفضلت وذكرت فى الريف او فى اغلب مدنا او مناطقنا فى السودان  

د/ حاتم سيد احمد :

والله اتفق معاك واحييى كل المهن الطبية المساعدة وعلى رأسهم مجلس المهن الطبية والصحية والمهن الطبية والصحية يتمثل 80% من كل الاطر الصحية الشغالة فى السودان وهى حقيقة القاعدة فى الخطوط الامامية فى الريف هم الذين يقابلوا المواطن ونحن نفتكر الان يعنى الرسائل التثقيفية دى ما للمواطنين وحدهم لكن نحن حتى المهن الطبية لو بتجيها رسائل بصورة مستمرة عشان يشتغلوا كمثقفين للمواطن ودا نحن العاملين له فى مركز التدريب المستمر انو نعطى كل هذه المهن الطبية والصحية رسائل تثقيفية مواكبة يعنى واحد مثلا تجيهوا رسالة تقول له والله الجديد شنو فى سرطان الثدى تجيهوا فى موبايه او الجديد شنو فى الملاريا

مقدم البرنامج :

او البروتوكولات العلاجية

د/ حاتم سيد احمد :

البروتوكولات الجديدة هى طوالى كمساعد طبى او مريض فتح الرسالة حيقوم ينقلا للمواطن يقول له والله نحن كنا زمان بنعالجك بالدواء دا لكن والله نحن الان الطب متطور جاتنا معلومة جديدة وبتالى صبحت بتساعد كثير جدا انا افتكر دى فرصة كبيرة جدا فى قضية التدريب المستمر لكل المهن الطبية والصحية

مقدم البرنامج :

بنحييك دكتور حاتم ونحن بنمشى الى نهاية هذه الحلقة انا عايزة اتوقف فى سؤال مهم سأله امكن عدد من المستمعين وهم كانوا يتسألوا عن ما تقدمه هذه الخدمة من حاجات تسهل على المواطن فنحن عايزنك زى ترسم لنا خارطة طريق دكتور طارق او خطة مستقبلية للمركز

د/ طارق فتح الرحمن عامر :

حقيقة فى الوقت الحاضر التعامل بالهاتف والرسائل الصحية زى ا ذكرت لكن عندنا خطة للمستقبل اننا نتعامل بالنظام بتاع الصوت والصورة يعنى مريض مثلا عندو مرض جلدى ممكن يصور بالموبايل ويرسلا لى انا اشوفوا فالمرض الجلدى ما انت اصلا عايز تشوفوا وكثير من الامراض ممكن تتصور بالموبايل وتترسل التقنية بتاعة الفيديو ممكن ايضا تدخل فى الموبايل ممكن يصور الحركة مثلا انت عايز تشوف انسان كيف بيمشى ممكن يتصور بالفيديو وبترسل بالموبايل ممكن تشوفوا ممكن تساعد فى التشخيص بتاعه عايزين انشاء الله فى المستقبل نطور التواصل بالانترنت للناس العندهم ديل شريحة قد ما تكون كبيرة

مقدم البرنامج :

الان هى واسعة وكبيرة حتى عبر الموبايل وحتى عبر الحواسيب هى الان منتشرة ونحن يتخيل لنا انها بعد شوية حتكون هى التقنية السائدة

د/ طارق فتح الرحمن عامر :

والله يا ريت ، عن طريق الانترنت فى حاجة اسمها استشارة عن طريق الانترنت وتترسل الاجابة ، فى الوقت الحاضر بنرسل نحن وصفات طبية يعنى انسان انا شعرت بى انو بقدر اعالجه بوصفة طبية ارسلها له عن طريق الموبايل ممكن ارسلها وما شايف فى اشكالية فى الحته دى اذا انا قدرت بالظبط اعرف المرض هو شنو وقدرت اشخصه بمجرد الحديث مع المريض بسهولة جدا ممكن انا ارسل له فى رسالة وصفة طبية يمشى الصيدلية يصرفها نحن مفروض نعرف تماماً انو فى ناس فى اماكن بعيدة جدا ما عندهم اى وسيلة لاتصال بطبيب او مساعد طبى او حتى ما عندهم ممرضين فنحن ديل ممكن نساعدهم اصلا هم ما حيقدروا يتحركوا من مكانهم ، الميزة فى الخدمة دى انو الواحد قاعد فى بيته

مقدم البرنامج :

او فى اى حته مكان عمله

د/ طارق فتح الرحمن عامر :

ايوا فى عمله فى بيته فى المزرعة فى اى حته

مقدم البرنامج :

ممكن الاستشارة والمتابعة ، الحقيقة امكن فى بعض الاشكالات التانية مهمة جدا ونحن دائما نركز عليها الاقلاع عن كثير من العادات والممارسات الصحية الخاطئة او الضارة وهى منها التدخين ، التمباك ، السمنة الزائدة او الافراط فى تناول كثير من المنبهات او الحبوب المسكنة كثير من هذه المشاكل نحن نتمنى انها ايضا تكون موفرة فيها مثل هذه الخدمات او الاستشارات عبر هذا المركز

د/ طارق فتح الرحمن عامر :

حقيقة دى موفرة وممكن الاستفسار عنها فى اى وقت وكذلك موفرة فى الرسائل يعنى بتفاصيل موفرة فى الرسائل الاثار الضارة للتدخين والتمباك وكل هذه الاشياء والرسائل هذه طريقة الاشتراك لها حتكون انشاء الله متوفرة بالصحف اليومية فى خلال اسبوع او اسبوعين بالكثير

مقدم البرنامج :

دكتور حاتم لو عندك اضافة

د/ حاتم سيد احمد :

والله انا عايز اضيف انو الفيديو مهم جدا نحن الان عندنا موقع الكترونى تبع الادارة والموقع دا بيتيح للشخص انو يشوف الفيديو من ناحية تعليمية جاك مريض فى غيبوبة تعمل له شنو ممكن بنفس الفهم فى الموبايل بدخل فيديو يبقى من ناحية تعليمية يعنى الان جاك شخص فى غيبوبة او جاك شخص فى حادث شنو الخطوات التى تعملها انت بتشوف قدامك وتبدا تطبق انا افتكر دى وسيلة تفاعلية بترسخ المعلومة بصورة اكثر وتخلى الشخص ياعلم ويطبق بصورة منفصلة

مقدم البرنامج :

نحن بنحييكم كثير جدا ونتمنى انو كل الناس الذين يتابعوا الان هذه الحلقة والذين تنتقل لهم هذه المعلومات انهم يكونوا استفادوا كثير جدا ن انو يمكن الاستفادة من مثل هذه المؤسسات الاعلامية والاتصالية مركز السودان للاستشارات والاتصالات الطبية عبر الرقم الموحد من كل الشبكات 3434 للاستفسار عن كل المشاكل الصحية بنحييكم كتر خيرك دكتور/ طارق فتح الرحمن عامر استشارى الباطنية رئيس قسم الباطنية والجهاز الهضمى بمستشفى الخرطوم التعليمى

د/ طارق فتح الرحمن عامر :

شكرا استاذة اسراء

مقدم البرنامج :

ايضا بنحييك دكتور/ حاتم سيد احمد اختصاصى طب المجتمع الاستاذ بكلية الطب جامعة الخرطوم ومدير عام مركز التطوير المهنى والتدريب المستمر بوزارة الصحة الاتحادية نتمنى انو نلتقيك فى حوارات اخرى اكثر ثراء

د/ حاتم سيد احمد :

انشاء الله

مقدم البرنامج :

شكرا لكم ايها الاصدقاء شكرا لكل الذين تابعونا عبر هذا اللقاء ، كنا معكم طه عبد الرحمن طه ، تحياتى اسراء زين العابدين ، الاسبوع القادم لقاء جديد عيادة على الهواء الاخراج منى صالح