بسم الله الرحمن الرحيم

برنامج عيادة على الهواء

موضوع الحلقة : الـشـخيـر – بثت 14- 6 – 2012م

مقدم البرنامج :

اسراء زين العابدين

الضيف :

بروفيسور / كمال عامر استشارى الاذن والانف والحنجرة         

مقدم البرنامج :

مرحبا اهلا بكم ايها الاصدقاء نحييكم كثيرا جدا نسعد بمتابعتكم وهذا اللقاء الجديد من عيادة على الهواء ، ايها الاصدقاء تذكروا دائما ان هذا البرنامج نهدف من خلاله الى نشر الوعى الصحى وايضا نحاول ان نزيل الكثير من المفاهيم الخاطئة حول بعض ممارساتنا الصحية ، ايضا نحاول نحن وانتم ومجموعة الاختصاصيين اصدقاء وضيوف البرنامج ان نحل بعض هذه المشكلات الصحية ، ايها الاصدقاء نذكركم اننا نستقبل الاسئلة والاستفسارات عبر الهاتف وعبر البريد الالكترونى وعبر البريد والرسائل فى استقبال الاذاعة ، ايضا نتمنى من كل المستمعين انهم يتصلوا بنا فى اى وقت ويحكوا قضاياهم ومشاكلهم ونحن مستعدون معهم لحلول بعض هذه المشاكل ، مرحبا اهلا بكم لقاء جديد عيادة على الهواء ، بدءاً هاكم تحايا الفريق الذى يصحبنى عبر هذا اللقاء ، عزيزنا المستمع دعنا نسأل سؤال فى هذه الحلقة هل تشخر وتصدر ذلك الصوت المزعج اثناء النوم ، قد يكون الكثيرين مننا لا يعرفون انهم يشخرون لانو يحدث يا اما الشخص بيكون نائم نوم عميق جدا او حتى فى احيان كثيرة بعض الناس فى غفوة صغيرة يصدر ذلك الصوت عموماً سيكون انشاء الله ذلك موضوع هذه الحلقة ، بنرحب كثير جدا بضيف هذا المساء ضيف العيادة بروفيسور/ كمال عامر استشارى الاذن والانف والحنجرة مرحب بك دكتور وحبابك عشرة فى البداية حمد لله على السلامة على عودتك من الخارج لفترة قصيرة   

بروفيسور/ كمال عامر :

شكرا جزيلا والسلام عليكم ، وشكرا استاذة اسراء على حسن الضيافة

مقدم البرنامج :

انت دكتور كمال كنت فى مؤتمر مهم جدا وكان مرتبط بالشخير انشاء الله حنسلط عليه الضو ونتعرف على اهم ما جاء فى هذا المؤتمر ، طبعا زى ما قلنا انو الشخير هو عنوان هذه الحلقة ولكن هناك موضوعات اخرى ، نتوقف دكتور كمال انو الشخير ما مشكلة صحية فقط وانما كلنا نعرف انو عندو اثار اجتماعية ونفسية كبيرة لدى الشخص والمحيطين به ، اذاً ايها الاصدقاء الشخير هل هو مرض فى حد ذاته ام هو عرض لمشكلة صحية يستدعى زوال هذه المشكلة ، هل هو عيب خلقى تشريحى فى الشخص وهل تختلف اسباب الشخير من الصغار الى الكبار ومن شخص الى اخر ، كيف يمكن التغلب على هذه المشكلة وهل هناك حلول ، ايضا نتعرض فى هذه الحلقة للحديث حول الجيوب الانفية هذه المشكلة الصحية الكبيرة   والتهابها المزمن والحاد ، اذاً نذكركم بارقام هواتفنا 87553151 و 87553152 ، دكتور كمال نبدا وعنوانا الكبير الشخير

بروفيسور/ كمال عامر :

حقيقة الشخير هو الحاجز الكبير فى المجتمعات الاوربية والعربية وعندنا هنا فى السودان عشان كدا عملوا مؤتمر عالمى فى هولندا من 2 / 6 من هذا الشهر لطرح هذه القضية الكبيرة لانو فى اوربا يعنى حقيقة نسبة الطلاق ارتفعت ارتفاع كبير بالنسبة لاسباب الشخير وهنا  المسألة لسه ما وصلتنا لكن هو موضوع كبير واسباب الشخير توجد اسباب موضوعية وتوجد اسباب عامة الاسباب الموضوعية هى توجد فى الانف يكون هناك تضخم فى غضاريف الانف وبتالى يحصل الشخير هنالك بتكون فى حساسية فى الانف والجيوب الانفية ويظهر الشخير وايضا هناك بعض اللحميات التى توجد فى الانف ويحصل الشخير دا عند الكبار وعند الصغار طبعا هناك اللوزة الثالثة التى توجد فى سقف الحلق وتسبب الشخير للاطفال نحن يهمنا هنا الشخير بالنسبة للكبار وهناك سبب اخر هو ترهل سقف الحلق ودا بيزيد الشخير فى اسباب عامة وهى ارتفاع ضغط الدم عند بعض الاشخاص ويتسبب فى الشخير فهذه هى الاسباب الرئيسية لهذا الشخير طبعا لعلاج هذا الشخير يعنى المسببات لو هناك فى تضخم الغضاريف لازم تزال هذه الغضاريف بتالى الشخير بيروح علاج حساسية الانف لو تعالجت موضوع الشخير بيروح ارتفاع ضغط الدم لو الواحد انتظم فى الادوية بتاعته ربما يحصل انخفاض فى ضغط الدم وبتالى يروح الشخير حقيقة فى هولندا اكتشفوا جهاز عبارة عن بلاستيك صغير يوضع فى الانف فدا بيوضع بالليل فى الانف يؤدى الى تنفس طبيعى للانف دا اكتشاف جديد اكتشفوا الهولندينوقدم فى المؤتمر وانا الحقيقة احضرته معى هنا فى السودان وممكن الناس تستعمل هذا الجهاز اسمه ( ايرماكس ) انا الان بعطى الاخت اسراء زى اربعة قطع من هذه القطع وممكن الناس ياخدوها فى الاذاعة هو عبارة عن بلاستيك يوضع فى الانف والواحد ينوم به ويفتح الانف على اساس الهواء يدخل وبتالى الشخير بيقل

مقدم البرنامج :

يعنى القطعة البلاستيكية الصغيرة دى هى زى المشبك

بروفيسور/ كمال عامر :

ايوا توضع داخل الانف والواحد ينوم بها عادى وعشان تفتح الانف والهواء بيدخل وبتالى الشخير بيروح نحن بنضعها عندكم هنا وممكن المستمعين يستلموها وموجودة فى السودان الاير ماكس ودا افتكر اكتشاف جديد وناجح وبيقلل من التدخل الجراحى والعلاجى

مقدم البرنامج :

الحقيقة امكن دكتور كمال فى بعض الناس انت زى ما تفضلت وذكرت الان انو قد يكون الشخير مرتبط بمشكلة صحية ومسألة مؤقتة يعنى بحل هذه المشكلة لكن هل هناك اعراض مزمنة ممكن تصبح هى متسببة فى نوع من الشخير

بروفيسور/ كمال عامر :

هى الاسباب المزمنة مثلا زى امراض الضغط دا سبب رئيسى فى حدوث الشخير وبتالى نفسو الشخير مش بيسبب ازعاج اثناء النوم او كدا لكن وصول الاوكسجين الى المخ بيكون قليل فبتالى بيكون فى عدم استيعاب فى الفترة الصباحية او كسل فى الشغل فدا بيؤدى الى تأخر الشغل وتأخر الاستيعاب بتاع الشخص

مقدم البرنامج :

هل عندو علاقة بزيادة الوزن

بروفيسور/ كمال عامر :

نعم ايضا دى سبب اخر هو زيادة الوزن السمنة الكبيرة بتؤدى ايضا الى الشخير الارهاق المستمر ايضا يؤدى الى الشخير بتجد انو اخواتنا فى البيوت يعنى الواحدة من الساعة خمسة صباحاً هى بتقوم من النوم بتعمل الاكل وتلبس اطفالها تجدها طوالى هى الى الساعة عشرة و12 هى فى شغل دائم وبعد ان ترقد يعنى بيكون فى ارهاق شديد وبيحصل الشخير ايضا

مقدم البرنامج :

شكرا دكتور كمال ، نستقبل اولى هذه المكالمات الو السلام عليكم

مشاركة عبر الهاتف :

وعليكم السلام معك امين – نيالا بسأل عن حساسية الجيوب الانفية وحساسية العيون بتقوم فى فترات معينة بنستعمل لها مرات القطرات بتزيلا لكن مؤقتة تانى بتجى راجعة وما يقومها الا غبار وعندى ضربات فى القلب يعنى مثلا زى الزول تجدى خايف يعنى الضربات بتجى سريعة وتانى تتوقف لوحدها

مقدم البرنامج :

يعنى الضربات دى بتكون عندما تكون متهيجة عليك الحساسية ام عادة

مشاركة عبر الهاتف :

الضربات دى لوحدها

مقدم البرنامج :

امين خليك معنا لحظة اذا الدكتور عايز يوجه لك بعض الاسئلة وتابعنا بعد كدا بالتلفون ، تفضل دكتور

بروفيسور/ كمال عامر :

هى طبعا حساسية الانف دا موضوع كنا حنتناوله ايضا حساسية الانف والجيوب الانفية هى حقيقة تمثل حاجزاً كبيراً فى امراض الانف والجيوب الانفية امكن النسبة فى السودان 90% من امراض الانف والجيوب الانفية هى حساسية الانف فطبعا اسباب كثيرة زى ما ذكرت انت يعنى الاتربة والغبار والتلوث البيئى المأكولات والعطور القوية فدى بتسبب حساسية الانف بيكون معلق هذا الجسم بتاع الحساسية ويدخل فى الانف ويفرغ مادة اسمها هستامين هى بتعمل اعراض الحساسية وهى انسداد الانف ، الصداع ، فقدان حاسة الشم ، وارتفاع فى درجة الحرارة وبتالى الناس هنا بتعطى قطرات للانف عشان تفتح الانف وبتعطى مادة انتهستامين عشان توقف التدفق بتاع الهستامين وحقيقة كثرت الاستعمال بتاع الانتستين والقطرة ايضا يسبب حاجات اخرى بسبب نشاف فى الانف وهناك علاج اخر نحن فى الحلقة سوف نتطرق له انشاء الله بيكون علاج جزرى للحساسية

مقدم البرنامج :

شكرا امين ، حقيقة امكن النقطة التى ذكرها اخيرا دكتور عامر فى الاخر دى نقطة مهمة انو الناس عادة بتمشى وتاخد زى ما ذكر هذه القطرات بصورة يعنى امكن نحن اسى داخلين على فصل الصيف وارتفاع درجات الحرارة اغلب الناس الذين يعانوا من هذه المشاكل بتبتدى عندهم فواحد كدا من الصيدلية تبقى له مسألة راتبة يعنى ستة او ثمانية سنين هو بيستخدما امكن نحن عايزين نتوقف فى النقطة دى انشاء الله لكن بعد ان ناخد الاتصال الاخر الو السلام عليكم ، يبدو انو لم نوفق فى الاتصال ، عموماً بنرحب بك دكتور كمال وبنذكر المستمعين انو حنتكلم انشاء الله عن حساسية الانف والحنجرة والعلاج الناجح لها والاختلاف بين التهابات الحنجرة والحساسيات المرتبطة بالموسمية بالتحديد ، مرحبا اهلا بكل الذين يتابعوننا ن دكتور كمال حنرجع لمسألة حساسية الانف والاذن لانها مهمة

بروفيسور/ كمال عامر :

زى ما ذكرت اسى حساسية الانف والجيوب الانفية بتختلف اختلاف كبير جدا من التهابات الانف والجيوب الانفية الحساسية سببا حاجة اسمها ( الألرجين ) هى معلقة فى الاتربة والهواء وعدة اشياء فى العطور فهذه المادة الزول بيستنشقا وتدخل فى الانف بتدخل فى خلايا اسمها ( الماكسل ) الخلايا الغير مرئية فى الغشاء المخاطى للانف وتتدفق المادة بتاعة الهستامين هى السبب المباشر فى حدوث اعراض الحساسية فاعراض الحساسية هى انسداد فى الانف ، فقدان حاسة الشم ، وسيلان من الانف ، صداع ، وارتفاع فى درجة الحرارة اما التهابات الجيوب الانفية طبعا الجيوب الانفية هى الموضع بتاعا هى موجودة وبتفتح فى الانف عندنا خمسة جيوب انفية وهى الجيوب الامامية ، الجيوب الوجنية ، والجيوب جنب العين ، والجيوب جنب المخ فدى بتفتح فى الانف وبيكون فيها فتحات عشان تطلع لنا السائل مجرد ما هذه الفتحات تتقفل يبقى داخل الجيوب الانفية هى ملانة هواء عشان كدا بتحتفظ لنا التقل بتاع الرأس ربنا خلقنا على اساس انو تقل الرأس دا جاب لنا الجيوب لانفية عشان يملاها لينا هواء وتخفف الحركة بتاعة الرأس مجرد هذه الفتحات تتقفل بتسبب مُخاط او لحميات او التهبات فى الجيوب الانفية وايضا بيكون فى ارتفاع فى درجة الحرارة بيكون فى صداع دائم بيكون فى فقدان حاسة الشم فدا سببه بكتيرى فيروسى التهاب بتاع الجيوب الانفية لكن بيختلف حساسية الانف والجيوب الانفية

مقدم البرنامج :

معنا اتصال الان الو السلام عليكم

مشاركة عبر الهاتف :

وعليكم السلام معاك الامين عبد الله حامد – شمال كردفان يا دكتور انا عندى ألم فى اذنى الشمال والاذن اساساً ما فيها ألم لكن تصدر صوت فالصوت دا انا قابلت دكاترة كثر وحتى اللحظة اوراقى معى وقبل فترة قابلت دكتور فى مستشفى بحرى وحولنى لمركز السمع السودانى وعملوا لى صورة وهم تانى حولنى واكملوا لى باقى الشغل فى مركزهم الثانى قرب صندلية القندول وادونى حبوب لكن الحال فى حالوا ما فى جديد والشىء الاكثر من كدا وخوفنى الطبيب قال لى انو العصب الناقل من الطبلة للرأس او حاجة زى دى ما عارف انو الذى فيه اصابات الالتهاب دى فانا ما عارف هل الحته في لها علاج ام الحاصل شنو ما عارف  

بروفيسور/ كمال عامر :

فى علاج ، حقيقة الطنين مسبباته كثيرة فى مسببات مسئولة منها الاذن وفى مسببات عامة فالمسببات العامة وهى وهى الزول العندو ضغط بيكون عندو طنين والسكرى ايضا الزول بيكون عندو طنين المسببات الداخلية بتاعة الانف بيكون فى تليف حقيقة ما يسمى فى ثلاثة عظام هنالك فى الاذن الوسطى وهى بتربط الاذن الوسطى بالاذن الداخلية ففى تليف فى عظمة الركاب فبيحصل الطنين حقيقة الاخ فى الادوية ما نافعة فنحن بنعمل تخطيط سمعى ونركب سماعة يعنى مفروض تكون فى ثقافة السماعة لانو الناس بيرفضوها السماعة دى بتوضع عشان الاصوات القوية هى بتعمل لها بتدخل داخل الاذن اصوات ناعمة وبتالى الطنين دا بيروح فانت لازم تعمل السماعة دى لانو فى ناس بيرفضوها لكن هى العلاج الناجح الحبوب لا تنفع حقيقة ، فى اكتشاف جديد ما وصلنا السودان هنا وهو قلم بتاع ليزر يوضع فى الاذن والطنين بيروح انشاء الله هذه التقنية تصلنا فى السودان لكن الان انا افتكر الان انت تلبس سماعة والطنين دا بيروح منك تانى انو انت تحاول تنوم اكثر يعنى النوم ايضا علاج للطنين لكن الحبوب ما مفيدة

مقدم البرنامج :

الامين نتمنى لك الصحة والعافية وانشاء الله تكون تابعت نصيحة دكتور كمال وايضا لو احتجت متابعة من البرنامج نحن على استعداد ، معنا اتصال اخر الو السلام عليكم

مشاركة عبر الهاتف :

وعليكم السلام معاك عمار حسين – الابيض ، حقيقة بشكى يا دكتور تحت الاذن بيكون فى ورم خفيف حاجة بيقولوا عليها الغدد اللمفاوية كلما امشى لدكتور بيقول لى ملتهبة اخد مضاد حيوى ولفترة عشرة يوم او اسبع بتروح لكن تانى ترجع بعد شهرين ثلاثة

بروفيسور/ كمال عامر :

الورم دا وراء الاذن مباشرة فى عظمة الاذن من الوراء

مشاركة عبر الهاتف :

تحت الاذن طوالى

بروفيسور/ كمال عامر :

يعنى فى عظمة الاذن من وراء

مشاركة عبر الهاتف :

ايوا مع الفك بتاع الاسنان

بروفيسور/ كمال عامر :

حقيقة دا كيس يزال بالجراحة انا افتكر لو هناك عندكم اخصايين بتاعين انف واذن وحنجرة يعنى ممكن تعرضها عليهم ولو ما وجدتهم ممكن تجينا فى الخرطوم نحن نقدر نشيل لك وهو كيس يعنى من وراء الاذن دائما بيكون فى اكياس وهى بتلتهب والزول بيعطى مضادات حيوية بتروح وتانى بتجى فاحسن تعمل لها جراحة وتزال

مقدم البرنامج :

عمار ايضا نتمنى تكون تابعت هذه النصيحة ، معنا اتصال اخر الو السلام عليكم

مشاركة عبر الهاتف :

وعليكم السلام معاك يوسف بخيت انا عندى مشكلة لها قرابة ثلاثة سنوات وهى فقدان حاسة الشم

بروفيسور/ كمال عامر :

من متى فاقدها

مشاركة عبر الهاتف :

والله عملت حادث حركة بعدها فقدت حاسة الشم يعنى هو كان قبل الحادث انا فاقدها والغريبة بعد الحادث شميت

بروفيسور/ كمال عامر :

يعنى عالجتها

مشاركة عبر الهاتف :

قابلت اخصائى فقام صدمنى يعنى انو قال لى يا اخى ثلاثة سنة نحن الذى لا يشم سنة او شهر واحد عندنا فيه راى

بروفيسور/ كمال عامر :

هو طبعا العلاج بيد الله ، فهل عملت صورة مقطعية

مشاركة عبر الهاتف :

لا ما عملت

بروفيسور/ كمال عامر :

مفروض تتعمل صورة مقطعية ، انت فى الخرطوم هنا

مشاركة عبر الهاتف :

ايوا انا فى الخرطوم وساكن الامتداد

بروفيسور/ كمال عامر :

تجينى فى العيادة بتاعتى وانشاء الله تجد الشفاء وربنا يساعدنا فى شفاءك فممكن تضرب تلفون وتجينى نشوف الحاصل شنو واحضر معك كل الاوراق بتاعتك

مقدم البرنامج :

انشاء الله يا يوسف تكون حفظت الرقم ونتمنى انو ما نزعج الدكتور عموماً نحن نتمنى لك الصحة والعافية وكتر خيرك كثير دكتور كمال ، ايها الاصدقاء نتواصل معكم عبر عيادة على الهواء ، بنرحب بكل المستمعين الذين يتابعوننا دكتور كمال امكن فى نقطة مهمة جدا حقيقة نحن كنا ما عايزين نبرح الجزء بتاع التهابات الاذن لانو وردت اسئلة كثيرة للبرنامج حول التهاب الاذن الوسطى واسبابه لكن قبل كدا عايزين نتكلم عن استئصال اللوزتين تكثر عمليات استئصال اللوزتين وخاصة امكن ما تجى اجازة بتاعة مدارس الا تجد كميات من الناس بيستأصلوا اللوزتين خاصة للاطفال عايزين نتكلم عن امنية عمليات استئصال اللوزتين فى السودان اجراء مثل هذه العمليات والتطور او التقنية الحديثة فيها

بروفيسور/ كمال عامر :

سؤال مهم شديد حقيقة كثرت استئصال اللوز عندنا هنا يعنى امكن ولاية الخرطوم يومياً بتجرى 200 عملية وفى الشهر ستة الف وفى السنة و72 الف عملية بتاعة لوز دا رقم كبير وقعدنا على اساس نشوف اسبابه شنو هى طبعا كلها العمليات التى اتعملت كلها صحيحة لكن ما هى الاسباب لماذا تحصل التهابات طوالى فى الاذن وتحصل عمليات طوالى هنا عندنا فى اللثة بتكون فى زى 30 ، 50 ، 60 عملية انا ذهبت فى هولندا دخلت فى مستشفى وجدت فى عملتين بتاعة لوز ، فى اسباب الاسباب المسببة لالتهابات اللوز يعنى نحن ما قاعدين نهتم بصحة الفم يعنى امكن الاسنان 80% من التهابات اللوز هى اسبابا الاسنان يعنى انا بوجه هنا اى طفل واى شخص لازم يمشى يزور طبيب الاسنان وبتالى بيكون فى تسوس بيكون فى مواد جيرية هى بتسبب الالتهابات بتاعة اللوز فدى نحن لو عالجناها بتالى ما حيكون فى التهابات لوز بتالى ما حيكون فى عمليلت كثيرة ، التلوث يعنى غسيل اليد مهم شديد خاصة عند الاطفال يعنى لازم الناس فى البيت يعلموا الطفل بعد كل وجبة يغسل يدوا حتى امكن خمسة ستة مرات وانا هنا من المنطلق للاخت اسراء مفروض انتى تتبنى مره برنامج لغسيل الايادى لانو مهم شديد فى التوعية الصحية بجانب التهابات اللوز يسببا التهابات بكتيرية هى بتجى ايضا من صحة الفم وتجى من الخارج استئصال اللوز الطبيب بيستئصال اللوز فى حالتين فقط الحالات لو كان هناك خُراج فى اللوزة وبعد ستة اسابيع لازم تزال هذه اللوزة لو كان فى تضخم كبير فى اللوزتين قافل الحلق وحاجز التنفس دى لازم تزال دى الحالتين التى يشيل فيها الطبيب ، اللوز بتلعب دور كبير جدا فى المناعة يعنى ما مفروض اللوز دى تتشال لطفل عمرو سنتين او ثلاثة لانو بيستفيد منها لقدام لانو قلنا هى بتلعب دور كبير جدا المناعة وبيستفيد منها فنحن بننصح انو استئصال اللوز لازم يكون بعد سن عشرة او 12 سنة الان انا بعمل فى بروتوكول لاستئصال اللوز متين الطبيب يقدر يشيل الوز ومتين ما يقدر ودى نفسها بنعطيها للمواطن فالمواطن هو ايضا بيمثل هاجس للطبيب بيجى يقول له والله انا ذهبت لدكتور فلان ادانى علاج وولدى ما بقى كويس فبيطر الطبيب هو عايز يشيلا الادوية عليه كثيرة من ناحية مادية لكن اللوز بتلعب دور كبير جدا ففى حالتين زى ما ذكرت هى بتتشال فيها وممكن الناس تعطى علاجات فدى انشاء الله بنضع لها بروتوكول صحى على اساس الناس تلتزم به

مقدم البرنامج :

معنا اتصال الان نحن ما تبقى لنا كثير ستة دقائق فقط تفصلنا عن نهاية هذا اللقاء ، نسمع الاتصال وربما هناك اخر سريع جدا الو السلام عليكم

مشاركة عبر الهاتف :

وعليكم السلام والله يا دكتور انا لى سنة بعانى من التهاب انفى فى الجيب الشمال انا ما عارفة اعراضه شنو لكن فجأة جاتنى ريحة كريهة باتجاه جيب الانف الشمال فقابلت دكتور قل لى اعملى سى سى وعملت سى سى وطلع انو فى التهاب حاد وادانى معظم علاجات بتاعة حقن بالوريد والالتهاب بعد ستة شهور شوية يعنى بقيت كويسة تانى رجع بقى اكعب من الاول الريحة اصبحت بصورة اسواء من الاول لدرجة انو انا اصبحت لا اقدر اكل او اشرب الا اقفل الانف الشمال حتى اقدر اشرب او اكل الدكتور تانى قال لى اعمل صورة بتاعة سى سى لما عملت صورة ظهرت لحمية واسى اذنى الشمال اصبح فيها تقل شديد

بروفيسور/ كمال عامر :

ظهرت لحمية فى الجيب

مشاركة عبر الهاتف :

ايوا ظهرت لحمية

بروفيسور/ كمال عامر :

واحد من الجيوب ام الاتنين

مشاركة عبر الهاتف :

الجيب الايسر

بروفيسور/ كمال عامر :

طيب انت ساكنة وين

مشاركة عبر الهاتف :

ساكنة ام درمان

بروفيسور/ كمال عامر :

خلاص انا فتكر تجى الاذاعة وبيعطوك العنوان بتاعى ، حقيقة نحن قبيل تكلمنا مفروض نتكلم عن العلاج حقيقة اكتشفوا علاج حاسة الشم وعلاج حساسية الانف ما يسمى ( المنظار الانفى الضوئى ) دا عبارة عن ضو قوى يوضع فى الانف بيعمل طبقات عازلة لمادة الهستامين التى تعمل الاعراض دى وبيعملوا ستة جلسات وناجح شديد الان نحن احضرناهوا فى السودان يعنى بدل الناس تاخد الانتستين كثير والقطرات كثيرة فى المنظار الانفى الضوئى يعنى شبه بيعالج الحساسية نهائياً او جزئياً فحصلت طفرة كبيرة فى اوربا واسى نحن فى السودان احضرناهوا وايضا عمل طفرة كبيرة فى علاج حساسية الانف ، الاخت دى هى تجينى نشوف الحاصل عليها شنو بعداك انا بفتكر بيكون فى علاج ناجح لها

مقدم البرنامج :

نحن بنتمنى لها الصحة والعافية الحقيقة نحن ما اخدنا اسمها ممكن تتصل بنا عبر البرنامج ونحولها ربنا يجزية خير دكتور كمال انشاء الله يقابلها ، معنا اتصال اخر الو السلام عليكم اخر اتصال سريع

مشاركة عبر الهاتف :

وعليكم السلام معاك على النيل – النهود انا عندى جيوب انفية وزوجتى عندها جيوب انفية وكان مره فى العيادة اتصلنا عليكم واعطيتونا الرقم 3434 واتصلنا على الدكاترة صرفوا لنا علاج قطرة ومعها حبوب والان بصحة جيدة جدا لكن بعد القطرة انتهت فى عطس شديد فى وقت صلاة الصبح

بروفيسور/ كمال عامر :

هى دى حساسية انا بفتكر لو حضرت للخرطوم انشاء الله نقدم لك علاج

مقدم البرنامج :

نحن بنتمنى لك الصحة والعافية ونتمنى زى ما ذكر دكتور كمال انشاء الله مشكور سوف يقابلك ، ما تبقى لنا كثير دكتور كمال الحقيقة امكن قبيل كنا بنتكلم عن التهابات الجيوب الانفية والتهابات الحنجرة ما اديناها حقها لكن هناك بعض المفاهيم المصاحبة يعنى امكن الزول حتى لو اجرت له عملية بتاعة لوزتين او عندو التهابات اللوزات المتكرر نمنعوا من شراب الحاجة الباردة او انو ياكل اسكريم

دبروفيسور/ كمال عامر :

بعد العملية يعنى

مقدم البرنامج :

يعنى حتى لو الشخص فى حياته العادية

بروفيسور/ كمال عامر :

والله دا مفهوم غلط انا افتكر ودا ما سبب يعنى الواحد بيشرب موية باردة ما سبب انو بيعمل التهابات للوز واصلوا الزول بعد ان زالوا له اللوز يشرب بارد يشرب اى حاجة

مقدم البرنامج :

ايضا ما هى النصائح ممكن نقولا للناس لالتهاب الجيوب الانفية فى الجو دا بالذات

بروفيسور/ كمال عامر :

النصائح هى بقدر الامكان الابتعاد من الارهاق الكثير ومن الاتربة وبالذات اتربة المنزل يعنى الغبار العالق فى المنزل مفروض الناس بعد ان تنظف ما يكونوا خارج الغرف الواحد يستحم ويقعد شوية حتى بعداك يطلع ، الارياح القوية لو فى ارياح مسببة له عطس فبتالى يتجنبها ، المأكولات زى سلطة الاسود ايضا دى بتسبب الحساسية ، الاشجار زى دقن الباشا لو فى واحد عندو الشجرة دى ايضا خطيرة تسبب حساسية الانف فدى لو الناس ابتعدوا عنها يعنى ممكن يقللوا من اعراض الحساسية

مقدم البرنامج :

نحن نشكرك كثير جدا دكتور كمال عامر على هذه النصائح ربنا يديك كل العافية انشاء الله ونتمنى نلتقي فى حوارات اخرى اكثر ثراء

بروفيسور/ كمال عامر :

والله جزاك الله خير وان زى ما قلت لك الاجهزة للمستمعين الناس العندهم شكوى يجوا يشيلوها منك انشاء الله يستفيدوا منها شديد

مقدم البرنامج :

شكراً بروفيسور كمال عامر استشارى الاذن والانف والحنجرة ، شكرا لكم ايها الاصدقاء كنا معكم طه عبد الرحمن طه ، تحياتى اسراء زين العابدين ، الاسبوع القادم لقاء جديد عيادة على الهواء الاخراج طاهرة محمد احمد                                                            

.