بسم الله الرحمن الرحيم

برنامج عيادة على الهواء

موضوع الحلقة : مخاطر الأمراض المزمنة مع الحمل – بثت 7 - 6 – 2012م

مقدم البرنامج :

اسراء زين العابدين

الضيف :

دكتور / على عبد المحمود العربى استشارى أمراض النساء والتوليد والعقم    

مقدم البرنامج :

ايها المستمعون الاعزاء اهلا مرحباً بكم هذه دعوتنا لكم لندخل معاً عيادة على الهواء ، لقاء جديد عبر العيادة نذكركم بان هذا البرنامج نهدف من خلاله الى نشر الوعى الصحى ونحاول ايضا ان نزيل الكثير من المفاهيم الخاطئة فى بعض ممارساتنا الصحية ونحاول ان نحل بعض مشكلاتكم التى ترد الى البرنامج عبر الرسائل وعبر التلفونات مرحباً اهلا بكم ايها الاصدقاء بدءاً هاكم تحايا الفريق الذى يصحبنى عبر هذا اللقاء ، ايها الاصدقاء تذكروا دائما ان اسئلتكم واتصالكم واستفساراتكم هى دائما تثرى هذا البرنامج نذكركم بارقام هواتفنا 87553151 و 87553152 ، مرحباً اهلا بكم ويسعدنا كثير جدا يشرف البرنامج ان يكون ضيف هذا اللقاء دكتور/ على عبد المحمود العربى استشارى امراض النساء والتوليد والعقم مرحب بك حبابك عشرة دكتور على

د/ على عبد المحمود :

مرحباً تحية التجلة والاحترام اخت اسراء والفريف المصاحب تحية الصحة لكل مستمعينا الاعزاء

مقدم البرنامج :

نحييك كثير جدا دكتور على ونشكرك على تلبيتك لدعوة البرنامج ، ايها الاصدقاء فى هذا اللقاء سنتحدث عن مخاطر الامراض المزمنة مع الحمل ، وايضا نتحدث عن تسمم الحمل الاعراض وما هى الاسباب وكيف يمكن اكتشافها وهل من الممكن تلافى المشاكل التى ممكن ان تتعرض لها المرأة ، اذاً اهلا مرحباً بكم ايها الاصدقاء ونبدا دكتور على مخاطر الامراض المزمنة مع الحمل حتى اذا كانت تعانى من بعض هذه الامراض المزمنة فى البداية نعرفها ونتحدث عن الحمل فى هذه المرحلة

د/ على عبد المحمود :

شكرا جزيلا ، دا موضوع حيوى جدا الحمل طبعا هو معروف حدث فسيولوجى وحدث طبيعى منذ ان انشأت البشرية لكن هناك امراض تتأثر سلباً فى الحمل لانو الحمل يضع عبء على الجسم وتقريباً على كل اعضاء الجسم اهم الامراض التى يؤثر عليها الحمل سلباً امراض القلب ، امراض السكر ، ارتفاع ضغط الدم ، وتصلب الشرائين لو تكلمنا عن امراض القلب طبعا الحمل بيضع عبء ثقيل جدا على القلب لانو القلب يضخ الدم للاطراف ، فى الحمل فى زيادة فى السوائل بنسبة 50% الزيادة الضخمة بنسبة 50% دى فى السوائل فى الجسم تحتاج الى مجهود اكثر لضخ الدم فى للاطراف بتالى القلب المعطب يتعب اذا ما شخصنا الامراض دى من بدرى وهناك احتراسات بنعملا يعنى اول حاجة مريضة القلب

مقاطعة من مقدم البرنامج :

يعنى امكن لحد وقت قريب كان الناس بيعتقدوا انو اذا كانت المرأة بتعانى بعض المشاكل فى القلب زى يحظر تماماً حملها زى ما كنا بنقرأ ونسمع وتصورها لنا الدراما  

د/ على عبد المحمود :

لا ما كلهم فى شريحة بسيطة بيكون ديل عندهم ضغط عالى فى الشريان بتاع الرئة بيكون عندهم دم مخلوط يعنى فى نقص حاد فى الاوكسجين حتى انو يكون عندهم ضيق فى التنفس حتى لو هم جالسين الامريكان طبعا قسموا امراض القلب الى اربعة فصائل الفصيلة رقم واحد واثنين وثلاثة واربعة فالفصيلة رقم ثلاثة واربعة الحمل طبعا بالنسبة لهم صعب جدا لانو حتى هم مرتاحين قلبهم شغال بنسبة 15 – 20 % لا يتحملوا خالص لكن فى الغالب الناس العندهم مثلا ضيق فى الصمام وعندهم حاجات بسيطة بسيطة ديل ممكن يحملوا لكن عايزين مراقبة لصيغة عايزين يتفادوا الاجهاد عايزين يتفادوا الالتهاب لو حصل لهم اى التهاب ياخدوا مضاد حيوى من بدرى وعايزين ياخدوا ساعات معينة من الراحة يخلدوا للراحة اكثر من غيرهم والاهم من كدا انو زياراتهم تكون اكثر من غيرهم يعنى زيارات متقاربة بعداك ثم يجى موضوع الوضوع لازم نكون مستعدين لانو الوضوع نقسمه الى ثلاث درجات درجة اولى وثانية وثالثة بعد الطفل يوضع الدم كله الذى كان جايى للطفل من الخلاصة بيرجع فجأة للدورة الدموية بتاعة الام ودا ممكن يدخلا فى فشل حاد لكن لذلك نكون مستعدين فى اثناء الوضوع لازم يكون وضوع خالى من الألم لانو الألم ايضا بيزيد ضربات القلب وضربات القلب تؤثر سلباً على وظائف القلب بعداك بنعطيهم مضاد حيوى اثناء الولادة او اثناء سير الوضوع مضاد حيوى بالعضل ويكون فى اوكسجين جاهز ويكون عندنا عقاقير جاهزة ويكون ايضا عندها حقن بتاعة مدرر عشان بمجرد الطفل يطلع نعطيهم بالوريد عشان يحاول ينقص الكمية التى فجأة تجى للدورة الدموية وتؤثر على القلب ربما يدخل فى فشل

مقدم البرنامج :

طيب دكتور امكن فى موضوع مهم جدا مسألة اذا تعرضت المرأة لجلطة فى اى مرحلة من المراحل وخاصة انو لو وضعت وضوع وحدث لها جلطة فى وضوع بعد كدا اذا حدث لها حمل تعمل شنو حتى لو كانت قبل الزواج او فى اى مرحلة من مراحل حياتها حدثت لها جلطة ايضا امكن دى واحدة من المشاكل بترد للبرنامج اسئلة كثيرة حولها

د/ على عبد المحمود :

الحمل طبعا هو من العوامل التى تؤدى الى الجلطة لماذا لانو عوامل التجلط دائما بتكون عالية فى الحمل ربنا سبحانه وتعالى هيأ الست الحامل عشان تقاوم اى نزيف عشان كدا عوامل التجلط عندها عالية بالذات لو كانت ضخمة ووزنها كان عالى اذا كان حدثت لها جلطة فى حمل سابق من المستحسن انو بمجرد ما تحمل نحن نضعها فى حقن السيولة وقائية بنعطيهم هيربرين تحت الجلد طيلة ايام الحمل وبعداك حتى ما يلدوا اقل شىء ستة اسابيع فى ناس بيقولوا لحدى ثلاثة شهور لكن دائما بنعطيهم حقن عشان ما تحصل لهم جلطة فى الحمل الثانى ونشجعهم ايضا يتحركوا اثناء الحمل ما يرقدوا كثير لانو الرقاد الكثير ايضا بيؤدى الى كسل فى الدورة الدموية ويشجع التجلط بعد العمليات كل الناس اى الزمن دا بعد اى عملية قيصرية بنعطيهم هيربرين طوالى عشان ممكن تحصل لهم جلطة فى الرئة بعد العملية ودى اخطر

مقدم البرنامج :

طيب دكتور امكن نحن ما زلنا بنواصل الحديث عن الامراض المزمنة مع الحمل وامكن ايضا السكرى والضغط زى ما انت تفضلت وذكرت

د/ على عبد المحمود :

السكرى طبعا يتأثر سلباً بالحمل لانو فى السكرى بيكون فى مقاومة للانسولين لذلك بيكون فى مقاومة للانسولين عشان كدا السكرى بيتهيج اثناء الحمل لذلك لازم جرعة الانسولين نضاعفها اذا كانت مثلا بتاخد عشرين وحدة قبل الحمل اثناء الحمل مفروض تاخد اربعين وحدة بعداك طبعا معرضة بالذات لو السكرى ما عاملين له كنترول فى الثلاثة شهور الاولى دا ربما يؤدى الى التشوهات الخلقية فى الاجنة بالذات تشوهات الجهاز العصبى وهى الاستسقاء فى الرأس والنافوخ الطالع برا دى لها علاقة مباشرة بالسكرى ايضا امراض القلب كذلك امراض العيون ممكن تلد يكون عندها كتراك مورث دى المشاكل بعداك الطفل نفسو اذا السكرى بقى ما كنترول حجموا بيكون كبير جدا وما بيطلع ولادة طبيعية يحتاج الى عملية قيصرية وايضا ناس السكرى معرضين الى ضغط الجنين تسمم الحمل

مقدم البرنامج :

امكن نحن دكتور حنرجع لانو فى موضوع سؤال عن الغدة الدرقية واستخدامات الحبوب التى تؤخذ فى المرحلة دى وايضا اذا ظهر السكرى او ارتفاع فى ضغط الدم فى اى مرحلة من مراحل الحمل حنرجع انشاء الله عشان نتكلم عن هذه المشكلات الصحية ، ما زلنا نتابع هذه الحلقة ايها الاصدقاء بنرحب بكم ومعنا ولى الاتصالات الو السلام عليكم

مشاركة عبر الهاتف :

وعليكم السلام معاك احمد الحافظ تأمل – الثورة الحارة 76 السؤال الاول تشتهى بعض الحوامل تناول اشياء غريبة مثل الفحم والتراب او طلب فاكهة فى غير موسمها او تناول اللحم المشوى فى الصباح الباكر هل ربما يكون ذلك مؤشر للاصابة بنقص فى احد المعادن او الفيتمينات سلط لنا الضو دكتور على ، السؤال الثانى تعتبر الولادة المبكرة من ابرز المشاكل التى تواجه المرأة الحامل نظر لعواقبها السلبية عليها وعلى الجنين وان كانت اسبابا عديدة الا ان بعضها يبقى غير معروف علماً ان ابرز المشاكل التى تؤدى الى الولادة المبكرة تتمثل فى ارتفاع ضغط الدم والسكرى والالتهابات النسائية التهاب المسالك البولية والتهاب السائل الامنيونى عند الام او كثرته مما يؤدى الى تشوه الجنين وضعف عنق الرحم ما هى السن المثالية لحمل المرأة ايضا نسبة سقوط الحمل واسبابه والعلاجات الممكنة له وما هى اخطار الولادة المبكرة وما هى العلاجات وسبل الوقاية وما هى مشاكل الجنين التى تؤدى الى ولادة مبكرة وشكرا جزيلاً

مقدم البرنامج :

شكراً اخ تأمل كتر خيرك كتير ، معنا اتصال اخر الو السلام عليكم

مشاركة عبر الهاتف :

وعليكم السلام معاك عيسى محمود – ولاية النيل الابيض – كوستى ، والله انا بسأل من بعض الحوامل انو بيتناولوا الطين الاسود وبعض الدكاترة قالوا الحكمة فى ذلك انو يحتوى على بعض فيتامين سى فطبعا نحن ما عارفين الحكاية دى لكن نشوف راى دكتور على هل الكلام دا صحيح

د/ على عبد المحمود :

شكرا جزيلاً ، الغريبة يعنى هو نفس السؤال الذى سأله اخونا تأمل والاخ تأمل خلانا نتأمل فى اشياء كثيرة لانو حام بنا فى السياحة يبدو انو هو عندو معلومات طبية لا بأس بها ، حالة اكل الطين والتراب بنسميها بكا وهى فعلا زى ما ذكرت تدل على انو فى نقص فى الحديد بالذات الناس العندهم نقص حاد فى الحديد بيكون عندهم قابلية هم بيكونوا ما عارفين انو عندهم نقص فى الحديد لكن بيكون عندهم قابلية بى انهم ياكلوا الطين دا الجواب ، سؤال الاخ تامل الثانى سأل عن الولادة المبكرة

مقدم البرنامج :

امكن قبل ما نمشى لموضوع الولادة المبرة ايضا فى اسئلة ترد للبرنامج حول الوحم يعنى امكن اسى هو اكل الطين دا سؤال اخونا عيسى وتامي لكن الوحم المعروف عند النساء بصورة يعنى اشتهاء اشياء او رفض اشياء

د/ على عبد المحمود :

الوحم طبعا هو يكاد يكون من الحاجات الطبيعية الفسيولوجية فى الحمل بالذات الطُمام فى الصباح لكن يتفاوت من شخص الى شخص فى اشخاص عندهم استفراغ فظيع جدا لدرجة انو يفقدوا سوائل ودرجة انو يحتاجوا مستشفى ودا مرتبط باكثر الحاجات شيوعاً بنشوفا فى الحمل حمل التوأم والحمل العنبى فى كل الحالتين بيجى فيه الهرمون بتاع الحمل عالى جدا فالنظرية بتقول انو الحكاية دى نتيجة شنو الى الهرمون العالى دا جاء من الملاحظات انو اكثر حاجة هو بيجى فى التوأم وفى الحمل العنبى وفى كلا الحملين المستوى بتاع الهرمون بيكون عالى جدا لكن ايضا فى نفسيات خلف هذا الموضوع انو فى ستات لا يشعروا بى اى حاجة ففى عامل نفسى وفى عامل هرمونى

مقدم البرنامج :

امكن الجزء الثانى زى ما تفضلت دكتور فى سؤال اخونا تأمل الولادة المبكرة

د/ على عبد المحمود :

والله اخونا تأمل طرق موضوع مهم جدا

مقدم البرنامج :

انا لحقيقة فهمت الحمل فى سن مبكرة

د/ على عبد المحمود :

هو عمل سياحة سريعة اول حاجة ما هو تعريف الولادة المبكرة لازم نعرف نحن الحمل ذاتو الحمل الكامل هو 37 اسبوع مكتملة الى 42 اسبوع اقل من 37 اسبوع مكتملة واكثر من 24 دا بنسميها ولادة مبكرة لانو اقل من 24 نسمية اجهاض

مقدم البرنامج :

يعنى انتوا عندكم لو دخلت الست فى التاسع بحساب اسبوع

د/ على عبد المحمود :

  37اسبوع مكتملة يعنى 38 اسبوع يعنى زى يبقى اسبوعين من مواعيدا خلاص بتكون تمت اقل من كدا دى ولادة مبكرة فالولادة المبكرة طبعا اسبابا الرئيسية ما معروفة لانو لو عرفنا اسبابا كنا منعناها لكن فى حالات معينة بتتوقع انو تحصل معها ولادة مبكرة مثلا التوأم لانو الرحم مشدود لدرجة بعيدة والاستسقاء الامنيونى ايضا بيحصل فى التوأم

مقدم البرنامج :

يعنى شنو الاستسقاء الامنيونى عشان نوضحه للناس

د/ على عبد المحمود :

اصلوا الجنين دا يعنى راقد الجنين فى رحم امه فى كيس مملوء فى سائل اسموا السائل الامنيونى فهذا السائل او الموية عندو وظائف كثيرة اول حاجة بيحمى الطفل من الكدمات وبيحمى الطفل من الالتهابات مهم جدا فالسائل دا بيكون زائد فى حمل التوأم بيكون شديد فى السكرى بيكون شديد فى تشوهات الخلاصة نفسها فى بعض الاورام الحميدة فى الخلاصة دى ايضا تسبب زيادة فى السائل وهو طبعا لحدى 800 مل لكن من 1000 الى فوق بيكون زائد وفى واحد بيكون اكثر من لتر ونصف دا بيكون شديد جدا طبعا الرحم بيكون مشدود شديد جدا فهناك احتمال فى ولادة مبكرة فى بعض الاحيان يوجد ضعف فى عنق الرحم فبفتح بدرى شوية ممكن ايضا يؤدى الى ولادة مبكرة كل الحميات تؤدى الى ولادة مبكرة وتؤدى الى اجهاض وبعد الحمل يتقدم يبقى شنو ولادة مبكرة لانو الحميات دى بتسبب تقلصات الرحم اى حمى سواء ملاريا او تيفويد التهابات المسالك البولية وطبعا فى الحمل اكثر التهاب بيحصل فى الحمل هو التهاب المسالك البولية دا طبعا عندو اسبابه ، الولادة المبكرة طبعا خطورتها فى المقام الاول على الجنين وليس الام لانو الجنين الرئة بتاعته بتكون ما نضجت هو فى باطن الرحم فى امه مستلم الاوكسجين من امه بمجرد يطلع الى العالم الخارجى فالعالم الخارجى دا لازم انت تكون عنيف عشان تعيش فيه لو الرئتين كانوا ما ناضجين الطفل طوالى بيدخل فى فشل الجهاز التنفسى الحاد فبيموت لو ما اسعف او وضعوا فى حضانة فلازم يكون فى مستشفى مؤهل فيه عناية مركزة للاطفال حديثى الولادة ومرات نضعه فى الجهاز لحدى شهرين ثلاثة    

مقدم البرنامج :

ايضا امكن الاطفال الذين يولدوا بيكون فى صفار اللون

د/ على عبد المحمود :

والله صفار اللون طبعا له علاقة بى انو الانزيمات بتاعة الكبد بتاعتهم بتكون لسه ما نضجت عشان كدا المادة الصفراء جسمهم لا يتعامل معها بالطريقة المثلى عشان كدا بيكون عندهم الصفار دا فديل بنعطيهم حبوب معينة ونعطيهم اشعة الضو فوق الحمراء واذا كان عنيف جدا بنغير الدم نشيل منهم دم ونعطيهم دم

مقدم البرنامج :

معنا اتصال الان الو السلام عليكم

مشاركة عبر الهاتف :

وعليكم السلام معاك حسن محمد على – ولاية سنار ، زوجتى وضعت اخر وضوع قبل سبعة سنوات والدورة وقفت وتانى جات واحيى حقيقة دكتور على بسأل بالنسبة للموضوع دا

مقدم البرنامج :

دقيقة ياخ حسن

د/ على عبد المحمود :

لا انا فهمت سؤاله قال زوجته وضعت اخر مره قبل سبعة سنين وبعداك قال الدورة انقطعت منها وما جاءت مش كدا يا سيد حسن

مشاركة عبر الهاتف :

جاءت راجعة

د/ على عبد المحمود :

اول حاجة زوجتك دى عمرها كم

مشاركة عبر الهاتف :

انا تزوجتها قبل 27 سنة

د/ على عبد المحمود :

انذاك كان عمرها كم عشان نعمل عملية حسابية نشوف عمرها كم متزوجين ليكم كم فترة

مشاركة عبر الهاتف :

بداية سنة 1985م يعنى 27 سنة

د/ على عبد المحمود :

يعنى 27 + 27 تبقى 54 سنة ، شوف الطمث دا لما يتوقف سنة كاملة وتجى راجعة تانى دى ما دورة دا اسموا نزيف غير طبيعى ولازم الست دى تعرضها على طبيب عشان ياخدوا تاريخ الحالة وعشان ياخدوا منها عينة من بيت الولد عشان يتأكدوا الحكاية دى تكون انشاء الله ما فيها مرض خبيث لكن لازم الدورة لما تقيف سنة كاملة وتجى راجعة تانى دى ما دورة دا دم غير طبيعى فانا انصح انو باسرع فرصة توديها لاقرب مؤسسة صحية

مقدم البرنامج :

حسن نحن نتمنى انك تكون استمعت لنصيحة دكتور على وايضا لو احتجت لى اى متابعة ممكن تتصل بنا عبر البرنامج ، معنا اتصال اخر الو السلام عليكم

مشاركة عبر الهاتف :

وعليكم السلام معاك عادل بخيت حسن النور – الحصاحيصا قبل ان ادخل لسؤالى لدكتور على انتم قلتوا فى الحلقة الفائت هوانا ما دخلت معكم قلتوا عندكم 3434

مقدم البرنامج :

لا دا ما تابع لنا يا عادل دا تلفون بتاع استشارات طبية تابع لوزارة الصحة ما تابع للبرنامج يعنى انت ممكن تدخل عليهم فى اى وقت بالرقم المختصر دا ، نحن بنذكر المستمعين ارقامنا ارقام تلفونات ثابتة هى 87553151 و 87553152 وايضا نتلقى كل الاسئلة طيلة ايام الاسبوع بنحييك عادل ونتمى انك تحاول الاتصال بنا مره تانية ، نرجع دكتور على لسؤالنا وانت وقفت فى الامراض المزمنة ومخاطرها مع الحمل فى مسألة السكرى اذا ظهر السكرى فى اى مرحلة من مراحل الحمل يعنى ما كان سكرى عند المرأة قبلها كيف التحوطات التى تتخذ وايضا ارتفاع ضغط الدم والغدة الدرقية كواحدة من المشكلات

د/ على عبد المحمود :

طيب نحن لما نتعامل مع نقول السكرى فى الحمل لازم نقسموا الى شريحتين شريحة اساساً عندها سكرى قبل الحمل ودى طبعا خلاص شريحة معروفة عندها سكرى ومعروف انو السكرى دا حيتهيج

مقدم البرنامج :

واصلا هى بتاخد علاجات ثابتة ومعروفة

د/ على عبد المحمود :

ايوا ، لكن سكر الحمل بالذات دا بيظهر فى الشهور الاخيرة يعنى من 28 اسبوع فى الحمل فما فوق ومفروض يختفى بعد ستة اسابيع من الوضوع وهى مدة النفاس ودا مؤشر انو الست دى يعنى فى عمر متقدم يعنى 100% حيجيها سكرى لانو السكر كشف النقاب انو عندو قابلية انو يجيها سكرى لانو بيكون عندها سكرى فى العائلة وعموماً بيكون عندهم تاريخ بتاع سكرى فى الاسرة فدا بنعالجه فى المقام الاول لان ودا طبعا اخف قدراً من النوع الاول لانو الجنين ما تعرض الى تشوهات خلقية زى ما ذكرنا فى الشهور الاولى ما حصلت له مشكل لذلك العلاج الاول هو الحمية اذا الحمية ما نفعت بعداك ممكن نعطيها حاجات تانية

مقدم البرنامج :

يعنى الحمية النظام الغذائى ما تأكل سكريات

د/ على عبد المحمود :

ايوا النظام الغذائى اسى لحسن الحظ فى الاونة الاخيرة فى حبوب معينة دى زمان بنعطيها للناس عشان ينقصوا وزنهم وهكذا ايضا نعطيها للناس العندهم تكيس فى المبايض لانها بتقاوم الانسولين الان وضح انو الحبوب دى اصبحت يعنى ممكن الواحد ياخدا بدون تخوف فى الحمل والكويس فيها انها لا تؤدى الى مشاكل لهبوط فى السكر مفاجىء زى الانسولين لانو الانسولين زى ما انت عارفة عايز حرص شديد جدا الانسولين نفسو الجرعة لو زادت يؤدى الى انخفاض حاد فى السكر وخلايا المخ تتغذى مباشرة من السكر لا تتغذى على اى حاجة تانية فالانسان يدخل فى غيبوبة ربما ما يقوم منها حتى لو اعطيناه سكر مركز ربما يموت بغيبوبة السكر او صدمة السكر فالناس زى ديل طبعا بعد الستة اسابيع بنعمل لهم فحص كامل نتأكد انو السكر راح ونعطيهم سكر وبعد كل ساعة بنفحص البول ونفحص الدم نشوف الرسم البيانى ماشى كيف وفى غالب الاحيان السكرى بيكون انتهى دا سكر الحمل لكن السكرى الاصلى دا بيكون قبل الحمل طبعا

مقدم البرنامج :

نحن حنرجى الضغط والغدة الدرقية فقط معنا اتصال الان الو السلام عليكم

مشاركة عبر الهاتف :

وعليكم السلام بسأل عن مجامعة الزوجة بعد الاربعين

مقدم البرنامج :

منو معانا

مشاركة عبر الهاتف :

احمد خالد

مقدم البرنامج :

شكرا جزيلا

د/ على عبد المحمود :

ليس هناك موانع طالما امو بعد الاربعين ما فى نزيف ما فى مشكلة

مقدم البرنامج :

نرجع دكتور على السكرى تكلمنا عنه ، ارتفاع ضغط الدم اذا كانت المرأة بتعانى من ارتفاع فى ضغط الدم قبل الحمل وكان هناك ظهر الحمل شنو ايضا التحوطات وخاصة لو بتاخد حبوب

د/ على عبد المحمود :

اول حاجة ضغط الدم نفسو بنقسمه الى ثلاثة شرائح زى ما ذكرتى قلتى عندو ضغط مزمن اساساً دا نسميه ارتفاع فى ضغط الدم مزمن او عندهم ضغط مرتبط بالحمل نسميه ضغط الجنين او تسمم الجنين او يكون تسمم الحمل جاء على ضغط مزمن فدى الثلاثة شرائح الناس العندهم ضغط مزمن طبعا هم عندهم قابلية يحصل لهم تسمم الحمل

مقدم البرنامج :

يعنى اكثر عرضة

د/ على عبد المحمود :

ايوا اكثر عرضة ، تسمم الحمل دائما بيحصل للناس العندهم ضغط قبل كدا بيجى للناس العندهم امراض الغدة بيجى للناس العندهم الزئبة الحمراء يعنى الامراض التى لها علاقة بجهاز المناعة كلها بتؤدى الى ارتفاع وبعدين التوأم زى ما ذكرنا ضغط الجنين والسكرى ضغط الجنين الحامل الصغيرة السن بالذات الحامل لاول مرة الاكثر عرضة لضغط الجنين هم الحوامل لاول مره   

مقدم البرنامج :

ودا امكن بنسميه الحمل الحرج او الحمل الذى يحتاج الى مراجعة

د/ على عبد المحمود : الحمل الحرج بتجى فيه طبعا الحامل لاول مره الست التى تلد بعمليات قيصرية

مقدم البرنامج :

نحن حنتوقف هنا دكتور عشان نشوف شنو التحوطات يعنى اذا كانت السيدة عندها غدة درقية بتاخد لها علاجات او عندها ارتفاع فى ضغط الدم او ظهر لها ارتفاع فى ضغط الدم بعد الشهور الاولى فيه تورم فى جسمها شنو التحوطات عشان هى تطلع بحمل امن وولادة سليمة لكن قبل كدا معنا اتصال الو السلام عليكم

مشاركة عبر الهاتف :

وعليكم السلام معاك عبد العظيم عبيد محمد حقيقة عندى سؤالين قبل كدا كنت سالتهم للبرنامج نفسو من بدرى شوية لكن لاهمية السؤالين ديل اولا فى مشاكل بتواجه الست الحامل من الاسرة او من الزوج او من مكان العمل نحن عايزين نعرف تأثير المشاكل دى على الحمل وعلى صحة الجنين وعلى صحة الست نفسها

مقدم البرنامج :يعنى على حالتها النفسية النرفزة والزهج

مشاركة عبر الهاتف : ايوا وايضا فى العمل تواجهها بعض المشاكل

مقدم البرنامج : اهم حاجة الزوج ومكان العمل دا مقدور عليه

مشاركة عبر الهاتف :

بتواجه ضغوط من الاسرة وبعدين فى اليرقان مصاحب للحمل يعنى الناس تتجنب اليرقان لانو عندو مشاكل كثيرة جدا نحن فى الاسرة واجهتنا حالة زى دى

مقدم البرنامج : فعلا دى نقطة مهمة شكرا لك اخ عبد العظيم الحقيقة جزء مهم

د/ على عبد المحمود :

طبعا المشاكل الاجتماعية والاجهاد والضغط النفسى يؤثر سلباً على اى انسان بالذات المرأة الحامل بتكون حساسة جدا اثناء فترة الحمل واثناء فترة النفاس

مقدم البرنامج : اصلا بيكون عبء عليه

د/ على عبد المحمود :

ايوا عبء لكن ما تزيد الطين بله انت وتجى تشاكلها لازم معاملة برفق شديد لان وهى لو دخلت فى صدمة دا بيؤثر سلباً سبحان الله الجنين دا بيتفاعل تفاعل كامل مع امه سبحان الله ففى بينهم ربط إلاهى فدا يؤثر على نموه ويؤثر على نفسياته بعدين اهم حاجة المرأة الحامل تعامل برفق الى ان تضع ونوفر لها كل مقومات الحياة الرفاهية يعنى ، اما سؤالك الثانى سؤال اليرقان طبعا اليرقان بيجى نتيجة لالتهاب الكبد الوبائى وبالذات فى الاقاليم اكثر حاجة الكبد الوبائى بينقسم الى ( أ ، بى ، سى )  حسب الفيروس لكن اكثر حاجة شيوعاً هو هباتايتس ( أ ) دا نتيجة للتلوث فى الطعام وتلوت فى البيئة والموية وتلوث فى الاطعمة وايضا بيجى لعدم النظافة نوصى بى انو الناس الرسول ( ص ) والاسلام وصى بالنظافة ( النظافة من الايمان ) فالحكاية انو اى حاجة جاءت فى الدين لها علاقة بحياتنا المباشرة وبصحتنا

مقدم البرنامج :

طيب خطورته شنو يا دكتور يعنى اذا اصيبت المرأة باليرقان فى مرحلة معينة من مراحل الحمل

د/ على عبد المحمود :

اليرقان ايضا من الامراض التى تعيج فى اثناء الحمل ربما تجهض المرأة لان وفى هرمونات عالية وهذه الهرمونات العالية بتضيف عبء على الكبد لانو الهستروجين والحاجات دى كلها الجسم بيتعامل معها عن طريق الكبد فبتهيج

مقدم البرنامج : معنا اتصال الو السلام عليكم

مشاركة عبر الهاتف :

وعليكم السلام معاك احمد محمد موسى – ولاية جنوب كردفان عندى زوجتى وضعت بعملية قيصرية السنة الفائته شهر سته والان كويسة ما عندها اى مشكلة لكن يعنى تانى لو ربنا قسم بتحتاج

د/ على عبد المحمود :يعنى بتحتاج الى عملية دا سؤالك

مشاركة عبر الهاتف :ايوا

د/ على عبد المحمود :

طيب انا عايز اعرف سبب العملية شنو هل العملية دى عملية مخططة ام عملية عاجلة يعنى السبب لماذا عملوا العملية انا عايز اعرف الدواعى بتاعة العملية

مشاركة عبر الهاتف : فى ضيق فى الحوض

د/ على عبد المحمود : عمرها كم

مشاركة عبر الهاتف : عمرها 27 سنة  

د/ على عبد المحمود :

لا خلاص الحوض معناها البيت دا اتبنى كدا وتم انا لو انت صغيرة لا اقولك الحوض ربما يوسع لكن الحوض ضيق معناها الحوض ضيق معناها لازم تلد بقيصرية طوالى لان وفى ضيق ولو كانت عمرها 16 او 17 والان عمرها بقى كم وعشرين امكن اقولك امكن تكون فى فرصة انو الحوض يكون وصل حجم معقول لكن من كلامك دا معناها قصيرة وعندها ضيق فى الحوض

مقدم البرنامج :

انا اتخيل انو هو خائف انو كم عدد الولادات لكن نحن حنجيب على السؤال دال انو معنا اتصال اخر الو السلام عليكم

مشاركة عبر الهاتف :

وعليكم السلام معاك نصر الدين محمد حسين – ولاية جنوب كردفان ، انا عندى زوجتى حامل وفى شهرها التاسع ودى الولدة الثانية لها المهم الولدة الاولى وضعتها طبيعى والولدة الثانية وضعت بعملية قيصرية الان حالياً هى حامل وبعدين عندها كم مقابلات وعملت امواج صوتية وقالوا لها انو الجنين قاعد كويس يعنى ما فى اى مشكلة وقبل ثلاثة يوم كان عندها مقابلة قال لها تعمل امواج صوتية وعملت الامواج الصوتية وقال لها انت تحتاجى الى عملية فانا عايز اسأل الدكتور انو فعلا العملية صاح وبعدين الامواج الصوتية دى يعنى بيعملوها فى الزمن دا ام قبل الزمن الاسى حاليا هى فيه ام كيف

د/ على عبد المحمود :

انا اسالك اسئلة اضاحية قبل ان اجاوب على اسئلتك من كلامك دا حملها الثالث

مشاركة عبر الهاتف : ايوا

د/ على عبد المحمود :الحمل الاول كان طبيعى

مشاركة عبر الهاتف : ايوا الحمل الاول طبيعى

د/ على عبد المحمود :والجنين حى وطلع وكويس

مشاركة عبر الهاتف :ايوا الجنين حى

د/ على عبد المحمود : طيب العملية التانية لماذا ولدوها بعملية المره التانية عايز اعرف السبب

مشاركة عبر الهاتف :

المره التانية قعدت فى المستشفى خمسة يوم المهم قاعدين يدوها طلق صناعى وفى النهاية قال نعمل عملية فعلا عملوا العملية والجنين طلع سليم والحمد لله واسى فى الولدة الثالثة ايضا بنفس الصورة انا عايز اعرف الامواج الصوتية دى بالتحديد هل هى بيعملوها فى حالة هى دخلت فى الشهور الكبار

د/ على عبد المحمود :

الامواج الصوتية طبعا بنعملا فى الشهور الاولى خالص الثلاثة شهور الاولى لها عشان اول حاجة نتأكد انو فى حمل وثانيا نتأكد انو الحمل قلعد فى المطان الصحيح لانو مرات الحمل بيكون خارج بيت الولد يعنى بيكون حمل خارجى وبعدين الموجات الصوتية لما تتعمل فى الثلاثة شهور الاولى بالذات بتكون مظبوطة جدا بتوضح لنا بالظبط مدة الحمل كم ونتوقع الست تلد متين بالذات الناس لو كانت ما عندهم دورة منتظمة او ما متذكرين الدورة جاتهم متين او كانوا بيرضعوا وما كان بتجيهم دورة دى اهمية الموجات الصوتية تانى بنعيد الموجات الصوتية بعد الشهر الرابع او الخامس نتأكد انو ما فى تشوهات خلقية فى الجنين بعداك فى الشهور الاخيرة بنعيد الموجات الصوتية نشوف الخلاصة قاعدة كيف بعد مرات امكن تكون الخلاصة متقدمة فما بنقدر نعرفها الا نعمل موجات صوتية نمو الجنين ايضا هل هو نمو صحيح ا وفى ضمور فى نموه اذا كان فى ضمور فى نمو الجنين مفروض الجنين يطلع لانو ممكن يموت فى بطن امه نتيجة نقص فى الاوكسجين حاد اذا وصل شهور معقولة انو الرئة بتاعته نضجت بعد دا مفروض نطلعوا لانو ممكن يموت جوه من نقص فى الاوكسجين ، زوجتك دى الحقيقة الواحد ما بيقدر يعرف الحوامل المحيطة بحملها الحاصل دا اسى هل السائل الامنيونى قل ام لا هل الخلاصة راقدة صاح ام لا دى طبعا معلومات بيعرفا الطبيب المعالج نحن لا نقدر نعرفها لكن اقول لك عموماً القيصرية لا نعملا تانى الا لسببب متكرر مثلا واحدة عندها ضيق فى الحوض ضيق الحوض متكرر لكن مثلا واحدة عملت لها قيصرية لانو نبض الجنين كان وقع معناها عندو نقص فى الاوكسجين طلعناهو وانقذناهو دا ما معناها المرة الجاية نولدا بقيصرية اذا كان حجم الجنين سليم والحمل سليم والحوض كويس دا ما فى داعى نولدا بعملية قيصرية

مقدم البرنامج :

يبدو هو انو اتعملت موجات صوتية اسى فى الايام دى وهى فى التاسع وعليها حدد الدكتور

د/ على عبد المحمود :

امكن الموجات الصوتية وضحت انو فى مشكلة يا اما فى خلاصة متقدمة لانو الخلاصة المتقدمة لها علاقة بالقيصريات السابقة الناس الذين يعملوا لهم قيصريات هم عرضة لانو الخلاصة بتاعتهم تكون متقدمة او يكون فى ضمور فى نمو الجنين لا يتحمل الطلق وهم بالذات لاوزوا من الوضوع لانو المرة السابقة اخدت ساعات طويلة جدا يعنى رغم الوجع الاصطناعى ما حصلت نتيجة وطبعا الزول لما يكون عندو قيصرية سابقة وبيكون تم وما دخل فى ولادة لا تنتظر انت الى ما لا نهاية بتولدوا بقيصرية تانية

مقدم البرنامج :

اخ نصر الدين يا ريت الناس يعملوا بقرار الدكتور الذى هو عاينها لانو هو صاحب القرار السليم ونتمنى لها الصحة والعافية وانشاء الله ربنا يحلها بالسلامة ، امكن كان فى سؤال قبلوا دكتور على سؤال اخونا احمد كان بيتكلم عن انها هى لو اجريت لها عملية قيصرية المرة دى تانى فى بعض التخوف عند الناس يقول لك العمليات القيصرية يتحدد عدد الولادات امكن هى ثلاثة واذا زادت بتكون اربعة ولادات

د/ على عبد المحمود :

لا دا بيعتمد على عوامل معينة بيعتمد هل حصلت التهابات بعد العملية والتصاقات وحاجات زى دى فى العمليات السابقة ام لا حالة بيت الولد نفسو هل هو بقى ضيق ام لا لكن عملنا عمليات اربعة خمسة ستة قيصريات يعنى ما فى مشكلة فدى لا نقدر نحددها ا  كل مرة لما تعمل عملية نشوف حالة الرحم كيف اذا كان سليم وكويس خلاص نحن نعلق الموضوع فى الفايل بتاعا انو الرحم بتاعا كويس يعنى اربعة عمليات قيصرية دى 100% ما فيها مشكلة

مقدم البرنامج :

نحن بنحييهم وكل المستمعين الذين اتصلوا بنا امكن يا دكتور على ما تبقى لنا كثير سبعة دقائق فقط تفصلنا عن نهاية هذه الحلقة امكن عندنا سؤال مهم جدا الغدة الدرقية كواحدة من المشكلات المهمة وبتكون النساء عندهم فدة درقية بيبلعوا حبوب وبعدين بيحدث تخوف من علاج الغدة الدرقية اذا حدث او ظهر حمل

د/ على عبد المحمود :

الغدة الدرقية هى نوعين اما نشطة او كسلانة وطبعا الغدة الدرقية امراضا اكثر شىء شيوعاً عند النساء مقلرنة مع الرجال عموماً بتاعة نشاء اكثر شريحة بنشوفا الناس العندهم كسل اكثر من النشاط وديل بياخدوا هرمون السايروكسين وهو تفرزه الغدة فى الظروف الطبيعية فلازم يستمروا فى السايروكسين فى بعض الزملاء للاسف بيفتكروا انو الثلاثة شهور الاولى دى انو ما تدى اى حاجة لكن هنا دا ما صحيح السايروكسين بالذات مهم جدا لانو الطفل الجهاز العصبى النمو بتاعة بيعتمد على السايروكسين فى الثلاثة شهور الاولى الطفل الغدة بتاعته لا تفرز السايروكسين لذلك لازم نحن نستمر فى السايروكسين طيلة الحمل لا نوقفه لو وقفناهوا بتحصل مشكلة فى النمو بتاع الجهاز العصبى وبتحصل مشاكل فى الذكاء بعدين

مقدم البرنامج :

لم يتبقى لنا كثير خمس دقائق فقط تفصلنا عن نهاية هذا اللقاء دكتور امكن فى الدقائق دى فى موضوع مهم وسؤال مهم تسمم الحمل او بيسموا الكلبشى يعنى عندو اسماء كثيرة اسبابه واعراضه وكيف يمكن اكتشافه لانو هو واحدة من المشاكل القديمة والمهمة

د/ على عبد المحمود :

طبعا اسبابه الرئيسية فى نظريات كثيرة جدا ما معروفة لكن الامريكان بيسموا الخلاصة العيانة لانو ليهو فى مشكلة فى تزريع الخلاصة فى الرحم هناك وفى اشياء كثيرة هرمونات معينة بتكون منخفضة وهرمونات بتكون عالية ففى النهاية بيكون فى ضيق فى الاوعية الدموية دا بيؤدى الى شن والى ارتفاع ضغط الدم هو طبعا بيؤثر على كل الاجهزة بتاعة الجسم من المخ والعيون والكبد والكُلى والقلب والدورة الدموية كلها يؤثر عليه اعراضه بيكون فى طبعا ارتفاع فى ضغط الدم بيكون فى زلالى فى البول بيكون فى تورم غير عادى التورم العادى بيطون فى القدمين لكن  التورم الغير عادى دا بيكون فى الوجه واصابع اليد وفى العيون دا لو اهمل بيؤدى فى نهاية المطاف الى الكلبشى وهو التشنجات طبعا التشنجات لو الست ما اسعفت بتموت لانوا ثناء التشنجات دى بيكون فى نقص فى الاوكسجين حاد المخ ما واصلوا اوكسجين بتقفل الفم بتاعا وتعضى لسانا بعداك حتى لو ما ماتت ممكن تدخل فى فشل كلوى لكن لحسن الحظ انو هو مؤقت لو اسعفت لمدة عشرة يوم بع\اك الكلى بترجع الى وظائفها الطبيعية لكن ما بحصل الكلبشى دا معناها فشل فى الرعاية الصحية الاولية وهى اهم حاجة واهمية قياس الضغط وفحص البول الدورى واذا كان وجدنا حاجة بنرقدهم فى المستشفى نعطيهم حبوب تنزل الضغط ونفحص البول كل يوم ولما يصلوا تاريخ معين انو الجنين ممكن يعيش برا بعداك ممكن نولدهم لا ننتظر

مقدم البرنامج :

طيب امكن انا عايزة اركز على النقطة دى يا دكتور لانو كثير من النساء امكن يهتموا بمسألة الكشف الدورى وزيارة الطبيب فى الحمل الاول او البكرية لكن بعد كدا تبتدى تهمل هذه المسألة

د/ على عبد المحمود :

بعد مرات بتفتكر انو خلاص عندها خبرة واصبحت عارفة الموضوع وبعدين الطفل اول واحد فى اهتمام ما فى الحمل فقط بل به هو نفسو يحضروا له ويستعدوا له ففى اى حمل ممكن تظهر حاجات زى دى لانو زى ما قلنا انو الحمل هو حدث طبيعى لكن مُحاط بالمخاطر ودى يوضح اهمية المتابعة اذا فى اى اختلال فى المسار الطبيعى نحن نتدخل دى اهمية المتابعة

مقدم البرنامج :

نحن بنحييك دكتور/ على عبد المحمود العربى استشارى النساء والتوليد والعقم سعدنا بهذا اللقاء وامكن كنا نتمنى انو نتواصل فى كثير من الموضوعات عشان نصل الى ولادة امنة وحمل امن وسليم عموماً نتمنى انو انشاء الله نلتقي فى حوارات اخرى

د/ على عبد المحمود :

شكرا جزيلا الحقيقة انا سعيد جدا الحقيقة الموضوع حيوى جدا لانو يتعلق بالحياة والاحداث السعيدة والواحد سعيد جدا انو يشارك فى هذا البرنامج شكرا جزيلا

مقدم البرنامج :

شكرا جزيلا دكتور على ، شكرا لكل الذين تابعونا فى هذا اللقاء ايها الاصدقاء لكم تحايا الفريق الذى صحبنى عبر هذا اللقاء من عيادة على الهواء طه عبد الرحمن طه ربطنا بكم عبر اجهزة الصوت الرقمية ، وتحياتى عبر المايكرفون مقرونة بامنيات الصحة والخير والعافية للجميع اسراء زين العابدين ، حتى نلتقى الاسبوع القادم انشاء الله ، عيادة على الهواء الاخراج منى صالح