بسم الله الرحمن الرحيم

برنامج عيادة على الهواء

موضوع الحلقة : الـروماتـيـزم  –  بثت  26 - 7 – 2012م

مقدم البرنامج :

اسراء زين العابدين

الضيف :

دكتورة / مواهب بن ادريس الادريسى  اختصاصى الطب الباطنى والروماتيزم الاستاذ المساعد بجامعة الرباط الوطنى

مقدم البرنامج :

اذاً كيف نحقق الصوم انشاء الله صوم بكل الصحة وبكل العافية ونبعد فيه من المخاطر ومن المشاكل الصحية حتى نستطيع ان نحقق ذلك ندعوكم للدخول فى هذه الحلقة من عيادة على الهواء ، بدءاً هاكم تحايا الفريق الذى يصحبنى عبر هذا اللقاء ، تذكروا دائماَ اننا نسعد باتصالكم استفساراتكم واسئلتكم تثرى البرنامج ارقام هواتفنا 87553151 و 87553152 ، اهلا مرحباً بكم كثير من المشاكل والامراض الصحية ربما نكون بنعرفا ونتابعا ويأتى رمضان ولابد كثير من النصائح وكثير من التحوطات حتى نستطيع ان نصوم هذا الشهر بكل الخير وايضا ان كانت هناك بعض المشكلات لابد ان نستخدم هذه الرخسة التى منحنا لها الله ان نفطر لانو ممكن هذه الاشياء تتسبب فى كثير من المشاكل الصحية التى ربما تفاقم مشكلتنا او مرضنا عموماً نحن بندخل بكل هذه التساولات ونرحب بها كثير جدا معنا اليوم دكتورة / مواهب بن ادريس الادريسى اختصاصى الطب الباطنى والروماتيزم الاستاذ المساعد بجامعة الرباط الوطنى دكتورة حبابك عشرة واهلا بك تصومى وتفطرى على خير

د/ مواهب بن ادريس الادريسى :

وعليكم السلام يا استاذة اسراء واهنئكم والشعب السودانى بهذا الشهر المبارك اعاده الله علينا وعلى الامة الاسلامية بالخير والبركات انشاء الله

مقدم البرنامج :

انشاء الله ، دكتورة مواهب نحن بنرحب بك وامكن نحن فى هذه الحلقة حنتكلم عن عدد من المشكلات الصحية لكن حنخصص كثير الحديث حول الروماتيزم وبالاخص القاوت او النقرس او مرض الملوك زى ما بيقولوا عليه بعض الناس عموماً هى واحدة من المشكلات الصحية المهمة جدا كيف نكتشفها وماهى اعراضها وكيف يتعامل الناس الذين عندهم هذه المشكلة الصحية وبياخدوا لها علاجات وبيتابعوها هل يمكن ان يصوموا ام لا يصوموا ، عموماً بنرحب بكم وهذا هو لقاءنا عبر عيادة على الهواء ، دكتور مواهب الروماتيزم عندما نسمع هذا الاسم او هذه المشكلة الصحية نعنى بها شنو يعنى هل هناك انواع من الروماتيزم اعراضه شنو وامكن كثير من الناس تتشابه عليهم المسألة مرات بنقول والله انا عندى ألم بتاع مفاصل او فى اكثر الاحوال بنقول رطوبة هل الرطوبة هى الروماتيزم هل هناك انواع مختلفة وما هو الفرق

د/ مواهب بن ادريس الادريسى :

بسم الله الرحمن الرحيم والصلاة والسلام على رسول الله الكريم ، الروماتيزم او امراض الروماتيزم هى مجموعة كبيرة من الامراض هى تشمل آلام المفاصل او الانسجة او العضلات وهى مجموعات تندرج تحت خلل فى الجهاز المناعى طبعا كل واحد فينا عندو جهاز مناعى يدافع عنه لما الجسم يكون فيه اى جزء غريب او جسم غريب لكن اذا حصل بعض الخلل فى الجهاز المناعى باسباب فى كثير من الاحيان ما معروف سببا تبدا اجسام مضادة من الجهاز المناعى تخرج من الجسم وتضرب المفصل تعمل لنا آلام فى المفاصل وتورمات فى المفاصل ما نسميها ( الروماتويد ) وقد تسبب هذه الاجسام المضادة بعض التأثير على الانسجة والعضلات وتسبب لنا التهاب العضلات وآلام العضلات والواحد بيكون عندو صعوبة فى انو يتحرك بسهولة من الكراسى بالذات البنبر عندنا وبيكون عندهم آلام فى العضلات او قد تكون فى حاجات تانية زى الزئبة الحمراء وهى مختلفة شوية ، الروماتويد عموماً فى منه السالب والموجب ودى حاجة بنعرفا بالفحوصات المجهرية ودى بتوضح درجة تأثر الجسم بالاجسام المضادة فى المفاصل شوية تختلف من امراض الروماتيزم القلبية يعنى اسى فى خلط الناس بتقول لك الزول عندو رماتيزم ما معناها عندو مشكلة فى القلب او فى الصمام الفرق بينهم واضح انو الواحد كلما كان عندو مشكلة فى الصمام حصلت له آلام فى المفاصل دى حاجة مختلفة تماماً عن الروماتويد هم مرضين مختلفين المرض الاول هو رماتيزم القلب هو عبارة عن تعاطف المفاصل مع المرض الموجود او مع صمام القلب ودى بيختصوا بها اختصاصى القلب ، اما اذا جانا زول بيشتكى من آلام فى المفاصل بصورة متكررة يعنى مفاصل مختلفة صغيرة وكبيرة بالذات المفاصل تكون فى الجهتين يعنى الواحد يكون عندو ألم فى الرزقين مع بعض او الركبتين مع بعض او الكاحلين مع بعض وتكون الآلام دى متكررة لفترة يعنى تزيد عن ستة اسابيع بصورة متكررة هنا بنقوم نتوقف ونبحث عن الحاجة دى الحاجة الواضحة جدا من الاعراض المهمة جدا فى الناس العندهم رماتويد انهم الصباح لما يقوموا من النوم بيكون عندهم عسم شديد وهى نسميها العسم الصباحى  بيستمر فى كثير من الاحيان الى ساعات لا يشعر بالراحة الا بعد الشمس تطلع والجو يبقى دافىء الحاجة دى بتكون ظاهرة جدا فى البرد فى فترة الرطوبة ديل طوالى بيلفتوا الانتباه الى انو عندهم امراض الروماتويد غير عن كدا الواحد بيكون عندو آلام المفاصل العارضة دى وما بتكون اخدت فترة طويلة يعنى نحن دائما بنختها ستة اسابيع او شهرين اى حاجة اقل من كدا قد تكون حاجة عارضة لانو فى كثير من الاحيان اى فيروس مثلا الانفلونزا لما تجينا انفلونزا بتكون عندنا آلام فى المفاصل ايضا الملاريا بتعمل آلام فى المفاصل لكن بتاخد زمن بسيط وتاخد فترتها وتروح نحن محتاجين لعرض لفترة من الزمن ويكون معه عسم بالذات فى الصباح دى فى كثير من الاحيان بتلفت انتباه الزول انو يبحث ويتابع هل العيان دا عندو رماتويد ام لا

مقدم البرنامج :

طيب امكن دكتورة مواهب زى ما انت تفضلتى وذكرتى انو الروماتويد هو بيدخل فيه القاوت او مرض الملوك ومرات بنقول عليه النقرس مرات بيكون الفاصل فيها مسألة التحليل او الترسيب للدم اذا ظهرت هذه النسبة بتتفاوت مرات الشخص بيكون عندو ورم وما بيقدر على الحركة واحياناً فى بعض الناس بتكون مسألة خفيفة زى ما انت ذكرتى مع قيام الصباح او مع الحركات او مرات لا يقدر يشيل حاجات بيديه تقيلة

د/ مواهب بن ادريس الادريسى :

عارفة يا اسراء اسى الحاجة الواضحة انو فى غلط انو الناس بتقول لك الزول دا عندو ترسيب عالى عموماً العيانين بيمشوا يفحصوا الترسيب عندى وجع مفاصل افحصوا لى الترسيب يقولوا له الترسيب عالى طوالى يقول انا عندى روماتيزم دى ما حقيقة يعنى الترسيب دا عبارة عن مرآة الجسم لامراض كثيرة فى الجسم يعنى الواحد لو عندو انيميا ممكن ترسيبه يكون مرتفع الواحد لو عندو التهاب مزمن لفترة من الزمن بالذات الناس العندهم الالتهابات الصدرية وامراض الدرن بيرفع الترسيب اذا كان عندو نشاط فى الروماتويد الترسيب بيكون مرتفع اى مرض فى الجسم نشط بيرفع لنا الترسيب

مقدم البرنامج :

طيب القاوت يعنى شُخص الشخص انو هو عندو قاوت او كثير من الناس بيكون عندهم مثلا قاوت بياخدوا له حبوب او عقاقير لفترات منتظمة ما هى العلاقة بين القاوت والصيام او علاقة بين القاوت والحاجات التغذوية وخاصة امكن فى شهر رمضان    

د/ مواهب بن ادريس الادريسى :

اول حاجة نعرف القاوت هو شنو ويحصل كيف القاوت عبارة عن مرض يصيب الجسم نتيجة لزيادة مادة بروتينية فى الجسم المادة اسمها بيورين وهى بتجى من البروتين احد يأكل اللحمة الحمراء بيأكل مواد فيها بروتينات كثيرة زى الفول اللحمة الحمراء العدس بتقوم تزيد البروتين فى الجسم بتالى يقوم الجسم يكون  مادة البيورين وهى الاساس لتكوين مادة القاوت نسميها يورك اسك اول ما اليورك اسك دا يزيد من حدوا الطبيعى هو عندنا حد معين اذا زاد منه بيبدا يرشح المادة دى زى الدبابيس بنسميها كرستال تبدا ترشح جوه المفاصل خلاص حاجة زادت عن حدها بدات يحصل لها فلتر ترشح جوه المفاصل مجرد ما نزلت فى المفصل بتبدا تكون جسم غريب عن المفصل ومن هنا المفصل يقوم يتعامل بطريقة يبدا يتعامل مع القصة دى انو جسم غريب تظهر عليه علامات الالتهاب والورم والألم المبرح القاوت عندو ألم شديد جدا ومن اكثر الاعراض التى تخلينا انو نقول الزول دا عندو قاوت انو مفصل واحد او على الكثير مفصلين بيكونوا فيهم ألم شديد جدا يعنى الواحد لا يستطيع يستحمل الهبشة فيهم زائد انو بيكون فى ورم والقاوت مشهور بى انو بيحبذ مفصل من باقى المفاصل يحبذ صُباع الرجل الكبير بعده مفصل الكاحل بعده الركبة بعده اليدين اذا جانا واحد عندو ألم شديد والألم دا جاء يعنى فجأة وفى مفصل واحد فقط ولا يحتمل فيه الألم وحاجة يعنى متكررة انو فجأة قام من النوم وجده او صحى به دا فى كثير من الاحيان بيكون القاوت عشان نفرقه شوية القاوت مختلف تماماً عن انو الترسيب يكون عالى كثير من الاحيان الناس يكون عندهم ترسيب طبيعى يكون عندهم قاوت لكن نحن بنعرف القاوت فى اننا نقيسوا باليورك اسك فى الدم

مقدم البرنامج :

طيب حنرجع دكتورة مواهب انشاء الله عشان نعرف يعنى بعد تكلمنا عن اعراض القاوت ومسبباته بنرجع عشان نعرف اننا كيف نتعامل معه وعلاقته شنو ببعض الامراض المزمنة الاخرى ومرضى القاوت علاقتهم كيف بالصيام وماهى متطلبات الشخص حب انو يصوم او ممنوع تماماً من الصيام ، ايها الاصدقاء نتابع معكم عيادة على الهواء ، بنرحب بكل الذين يتابعونا ونستقبل اولى المكالمات الو السلام عليكم

مشاركة عبر الهاتف :

وعليكم السلام معاك بشير محمد عوض الله – النهود بتتكلموا عن القاوت بالنسبة للحمة الابقار

مقدم البرنامج :

بشير يبدو انو الخط انقطع هو تكلم عن لحمة الابقار عموماً ، معنا اتصال اخر الو السلام عليكم

مشاركة عبر الهاتف :

وعليكم السلام معاك العايز على – محلية الدالى والمذموم ، انا عندى تمزق فى العضل ذهبت للدكتور قال لى عندك ملاريا اخدت علاج الملاريا والتمزق ما زال ذهبت للدكتور وقال لى دا فتور ادانى حبوب وما زال الألم موجود السؤال الثانى بسأل من التهاب المصران العصبى هل يصيب الاطفال ام الناس الكبار فقط

مقدم البرنامج :

شكرا يا العايز كتر خيرك كثير ، اخونا بشير دكتورة مواهب تكلم عن لحم الابقار نحن ما كملنا السؤال لكن انت قلت اللحوم الحمراء ايضا نفصلها عشان تصبح المسألة واضحة

د/ مواهب بن ادريس الادريسى :

تخيل لى انو الاخ بشير بيسأل عن علاقة القاوت باللحوم فعلا القاوت له علاقة مباشرة باللحوم او اللحوم الغنية بالبروتينات العالية وهى فى اللحوم الحمراء يعنى كل اللحوم الحمراء فيها بروتينات لكن السمك والدجاج نحن نحبذ انو ياخدوها

مقدم البرنامج :

العايز امكن تكلم عن آلام العضلات المصاحبة لبعض الامراض الدكتور قال له ملاريا

د/ مواهب بن ادريس الادريسى :

بالنسبة لتمزق العضلات فى كثير من الاحيان الناس بتقول له انو انت عندك تمزق او شد عضلى زى ما ذكرت اى مرض سواء كان فيروسى ممكن يسبب آلام فى العضلات ياخد فترته وبيروح فى حاجة تانية انو الناس بيحصل لهم شد عضلى والشد العضلى دا قد يكون ناتج من بعد مرات حركات ملتزمة او زى الواحد قد يكون ما بيعمل رياضة لفترة من الزمن ويجى فجأة يعمل رياضة العضلات نفسها جواها بتبدا تحصل فيها بعض التغيرات بتزيد فيها مادة من المواد الاسدية وبتعمل آلام وبتاخد فترتها والتمزق العضلى دا اذا ما كان فعلا تمزق عضلى ناتج من مرض فى العضلات هو قد يكون نوع من التعاطف مرض جوه الجسم وياخد فترته وبيروح فى كثير من الاحيان بنعطيهم مسكنات وحاجات ترخى العضلات مراهم ومفيدة جدا لكن اذ كان ناتج من تمزق عضلى نتيجة التهابات فى العضلات وبتاخد زمن ودى بنعرفها كيف الواحد بيكون عندو آلام تستمر فى العضلات والعضلة بيستعملا سواء كان بيرفع بها حاجات او يقعد ويقوم و كثير من الاحيان تسريح الشعر الواحدة ما بتقدر تواصل دى لها علاقة بى انو العضلة فيها التهابات وبيكون فيها آلام ودى عندها علاج مختلف وطريقة تشخيص مختلفة جدا فالتمزق العضلى هنا كان مفروض نسأل العايز عن الزمن بتاعا وهل عندها اى اعراض مصاحبة عموماً تمزق العضلات الذى نتكلم عنه مرضى بيكون معه حمى وبيكون معه صعوبة فى استعمال العضلة نفسها اذا كان فى آلام فى العضلات الواحد لا يستحمل انو يهبشوا فى عضلته تماماً

مقدم البرنامج :

امكن كان عندو سؤال عن المصران العصبى

د/ مواهب بن ادريس الادريسى :

المصران العصبى طبعا هو من الامراض يعنى تستبعدى امراض عشان تشخصى المصران العصبى هو مرض ناتج من بعض الاضطرابات العصبية يعنى بيكون فى تعاطف فى المصران مع الحالة العامة وزى ما بتحصل للكبار بتحصل للصغار المصران العصبى هو عبارة عن آلام فى البطن وبتعمل كل الفحوصات وبتكون نظيفة وهو مربوط دائما بالحالة النفسية يقوم يقول لك انو انا والله لما اسمع خبر ما سعيد طوالى بطنى بتوجعنى وبيحصل لى نفاخ فهو عبارة عن حاجة ناتجة عن البيئة حوليك يعنى البيئة حولك تؤثر عادة الواحد بيكون عارف نفسو والله لما يحصل كدا بيحصل لى كدا فالمصران العصبى مرض يشخص مثل الامراض الاخرى

مقدم البرنامج :

معنا مكالمة الو السلام عليكم

مشاركة عبر الهاتف :

وعليكم السلام معاك الناجى عيسى والله عندى ألم فى يدى الشمال قبل اربعة شهور ألم مبالغ فيه يدى الشمال فى المفصل الفوق الاصبع الكبير بتاع اليد الشمال ممكن بالجنب اشيل اى حاجة تقيلة لكن القلم انا ما بقدر ارفعه وانا اصلا عندى رطوبة اخدت حبوب الرطوبة وعملت الدهان يعنى كلها ما عملت لى حاجة وخائف امشى يقولوا عندك حاجة تانية وانا عندى كلسترول وعندى سكرى خائف يقولوا لى عندك حاجة ثالثة عشان كدا صابر لكن ألم فظيع لا يطاق

د/ مواهب بن ادريس الادريسى :

فى صباع اليد

مشاركة عبر الهاتف :

فى حته معينة يعنى اشيل حاجة بجنبة معينة مشكلة لكن اليد نفسها ممكن بجنبة معينة اشيل بها اى حاجة تقيلة

د/ مواهب بن ادريس الادريسى :

يعنى فى الصُباع الكبير

مشاركة عبر الهاتف :

ايوا فى الصُباع الكبير فى العظم

د/ مواهب بن ادريس الادريسى :

وما حصل انضربت فيهو

مشاركة عبر الهاتف :

لا ما حصل لكن ألم لا يطاق وعندى اصلا رطوبة علمت الفكس وعملت حاجات بلدية موية الملح

د/ مواهب بن ادريس الادريسى :

هل عندك خشونة فى الركب

مشاركة عبر الهاتف :

لا الركب كويسة انا عمرى زى 45 سنة   

د/ مواهب بن ادريس الادريسى :

لانو ألم المفصل الاصبع الكبير دى دائما بتكون حاجات معينة هى بتكون زى ظاهرة الخشونة دائما بتظهر فى الحته دى او يكون فيها اذا انضربت يدو والعظيمات الصغيرة لما تنترم منها حته بتسبب ألم شديد جدا غير عن كدا فى حالات زى دى لو قلنا قاوت ليهو اربعة شهور فالقاوت ما بيستمر مع الواحد اربعة شهور بالعكس القاوت عندو فترة بتاعة عشرة يوم او اسبوع يسبب ألم شديد جدا لو الواحد ما اخد له علاج واستحملوا بيروح لكن اربعة شهور قاوت دا ما قاوت انا انصحه يعمل صورة اشعة يعنى مهمة جدا نعمل صورة اشعة فى الحته دى ونشوف الحاصل شنو 

مقدم البرنامج :

اخ ناجى هو وخاصة امكن عشان عندو سكرى نتمنى انو تكون تابعت نصيحة الدكتورة وانشاء الله انت ما تخاف وانشاء الله تكون خفيفة وربنا يديك الصحة والعافية ، دكتورة مواهب امكن نحن وقفنا فى الحته بتاعة القاوت واستخدامات بعض الانواع من الاكل انت تكلمتى عن الاكل الذى فيه البروتينات لكن هل كل مرضى القاوت او مشخصين عندهم قاوت ممكن يصوموا ام لا

د/ مواهب بن ادريس الادريسى :

طيب اول نتكلم هل فى علاقة بالقاوت والامراض الاخرى يعنى فى علاقة بالذات الناس العندهم الامراض السرطانية والقاوت والناس البيكون عندهم الفشل الكلوى ترتفع عندهم نسبة اليورك اسك بتزيد من احتمالية القاوت فديل بنحبذ انهم دائما يكونوا عاملين حسابهم لنسبة اليورك اسك عندهم ويكون عندهم تروية جيدة يعنى اهم حاجة الناس ديل يكون عندهم تروية جيدة يشربوا موية كثيرة جدا لانو العدو اللدود لمرض النقرس الجفاف والعطش نقص الماء فى الجسم بيسبب شنو زى ما قلنا قبيل بيزيد اليورك اسك ويرشح جوه المفصل والقاوت ناقص جوه مفاصل يعنى الواحد لما يكون عندو يورك اسك عالى المادة دى بترشح فى المفصل وترشح فى الكلى وتعمل لنا الحصاوى فديل حاجاتين يتخيل لى انو الناس تعمل حسابا ، هل مريض القاوت يصوم ام لا يصوم والله تصوموا تصحوا لكن اذا قدر المصاب بمرض القاوت يحافظ على نسبة التروية فى جسموا خلال اليوم يعنى بين الصيام ما يعرق يعنى يكون شارب موية كثيرة فى اليوم القبلوا يتخيل لى ما بتكون فى مشاكل كثيرة لكن صعب انو يكون الواحد عندو مرض القاوت وشغال برا فى الحر فبيعرق كثير جدا وما عندو تروية كاملة دى علاقة مباشرة بين انو الواحد يُصاب بالقاوت واصلا يكون عندو القاوت وتظهر له اعراض القاوت بى انو يكون عندو جفاف فى الجسم وتظهر معها اعراض التورم

مقدم البرنامج :

المستمعون الاعزاء بنتواصل معكم عبر عيادة على الهواء وامكن فى سؤال ورد للبرنامج حول الحديث عن عرق النساء نسمع كثير عن عرق النساء ما هو وعلاقته بكثير من هذه المشاكل ومن الامراض التى لها علاقة بالآلام فى العضلات

د/ مواهب بن ادريس الادريسى :

عرق النساء هو ألم فى مؤخرة الظهر والألم دا بيمتد لحدى الرجل تحت فى كثير من الاحيان بيحضروا المرضى يقول لك انا عندى ألم شديد فى فى ركبتى او ألم شديد ونميل فى رجلى تحت ويكون اصلا منبع الألم وين فى مؤخرة الظهر لانو نحن اصلا لو جينا وفصلنا الكلام دا انو الواحد ظهروا بيكون فيه النخاع الشوكة فالنخاع الشوكى هو بيحتوى على كل الاعصاب التى تغذى الجسم وبتنزل من فوق لحدى تحت فى اماكن معينة اذا كان العصب دا مربوط فى حته معينة فى الظهر نسمى ألمه تحت فى حته تانية مختلفة يعنى انا يجينى زول عندو ألم شديد جدا ونميل فى رجلوا لكن اصلا منبع الألم وين فى مؤخرة الظهر والسبب الفعلى الى انو الواحد اصلا يكون حاصل له عرق نساء هو ضغط فى العصب فوق فى المنبع زى ما قلنا طالع من النخاع الشوكى طيب لماذا تحصل له الضغطة دى كثير من الاحيان الضغطة دى بتحصل عيب خلقى او طبيعة الرقاد بتاع الواحد نحن هنا عندنا بنحب شديد ونميل انو نرقد فى القناقريب والمراتب اللينة ودى دائما بتخلى الظهر يكون ما مستوى واذا بقى الظهر ما مستوى بيسبب بسهولة جدا الضغطة بتاعة عرق النساء وكثير من المرضى وانا انوه دائما واقول لهم انهم ارقدوا وما ترقدوا فى سرير الحبل يقول لك لا والله ما برتاح الا ارقد فيهو ديل اكثر الناس المعرضين للحاجات دى   

مقدم البرنامج :

يعنى الاسم ما عندو علاقة بالفعل يعنى النساء ما هم الاكثر عرضة به يعنى ايضا يصيب الرجال

د/ مواهب بن ادريس الادريسى :

ايوا يصيب الرجال والنساء واكثر عرضة له النساء لانو كلما زاد وزنهم كلما زاد الضغط على العصب

مقدم البرنامج :

وامكن فى اسباب تانية الحمل يؤثر على مسألة الظهر

د/ مواهب بن ادريس الادريسى :

ايوا بالظبط وحقيقة والله وبعدين الرقدة الغلط

مقدم البرنامج :

معنا اتصال الو السلام عليكم

مشاركة عبر الهاتف :

وعليكم السلام معاك حسن حامد الناير – جنوب كوستى انا بسأل الدكتورة عندى وجع فى المفاصل وعندى صداع وبعد ان افطر بشعر بى انو بطنى ما بتهضم يعنى بعد الافطار طوالى آلام فى المفاصل شديدة وسخانة ما عارف هل ملاريا

د/ مواهب بن ادريس الادريسى :

اهلا باهلنا فى كوستى ، فى علاقة مباشرة بين آلام البطن وعدم الهضم الجيد والاسهالات المتكررة وآلام المفاصل مباشرة جدا ودى بنسميها الرطوبة السالبة العلاقة انو فى مادة لما يكون الواحد ما بيقدر يهضم كويس مثلا عندو اسهالات متكررة والتهابات فى القولون بتفرز وتسبب آلام المفاصل اى واحد عندو الحاجات دى متكررة فعلا عندو نوع من العلاج وعندو نوع من التشخيص المجهرى الذى يثبته لكن عايزة انوه له انو آلام المفاصل التى تجى مع مشاكل البطن بتحتاج زى ما قلنا لفترة من الزمن تكون حالته متكررة لفترة من الزمن عندو مشاكل فى البطن او اسهالات وآلام او مثلا ذهب وعمل منظار للقولون وقالوا له فى التهاب فى القولون ما فى شك انو فى علاقة بين آلام المفاصل والتهابات القولون

مقدم البرنامج :

امكن يا دكتورة رمضان كان موسم او فصل معين فيه كثير من النشاطات المختلفة يعنى مسألة القيام والصلاة والناس الذين يعانوا من كثير من  المشاكل التى لها علاقة بشرب الماء او نوعية الطعام او ناس المفاصل او الحركة والرياضة يعنى كثير من الناس يقول لك انا والله بعد ان اشرب الموية جسمى بيتكسر بعد ان اشرب الموية بيحصل لى شنو وانا اصلا عندى رطوبة لما اشرب الموية بشعر بى انو ما قادر اتحرك شنو النصيحة التى ممكن ان نقولا للناس يعنى خاصة الناس الذين يعانوا من كثير من المشاكل التى لها علاقة بالحركة لها علاقة بنوعية الطعام لها علاقة بى كيف نصوم صيام كامل اذا كنا نعانى من بعض هذه المشكلات

د/ مواهب بن ادريس الادريسى :

يعنى شوفى انو الواحد يُصاب بفتور بعد الافطار دى لها علاقة بالتخمة ولها علاقة بالطريقة التى يأكل بها الواحد لو الواحد يعنى بدا اول حاجة صيامه بعدين كسره بالموية وحاجة سُخنة وصلى ورجع اكل الحكاية دى بتفيدوا كثير لكن عموماً كون الواحد يكون عندو آلام مفاصل ويصوم طبعا ما فيها كلام الواحد لما يصوم بارتياح ما لها اى علاقة وما بتزيد من آلام المفاصل ولا تسبب اى مشاكل ما لها علاقة خالص بالصيام والصلاة والتروايح وانو يتحرك بل بالعكس نحن بنشجع الناس العندهم روماتيزم انهم هم طول مرضهم ما نشيط اعنى بنشيط انو ما فى آلام وما فى اورام المرض تحت السيطرة بالادوية يتحرك ويمشى ويلعب رياضة ويمشى مشاوير ويصلى ويقيم الليل ويعمل اى حاجة دى بتخدم المرض وتخلى نوعية الحياة افضل بتخلى الجهاز المناعى نحن اصلا كنا بنتكلم عنه فى حالة افضل من انو الواحد يكون ما متحرك ، بالنسبة للتغذية نوع الاكل كثير من الناس يقول لك انا عندى روماتيزم ما حأكل يعنى فى حاجة واضحة انو الناس فهمهم فى النقطة دى ما صحيح كون الواحد عندو قاوت تكلمنا عن الحاجات المفروض يمتنع عنها غير عن القاوت ما فى حاجة بتمنع مريض الروماتيزم انو يأكل اى شىء الا اذا مصاب بالسكرى لكن ما فى مشاكل بالعكس

مقدم البرنامج :

لكن ناس القاوت لازم تكون فى محاذير خاصة انو الفطرة بتاعة رمضان فول وطعمية ولحوم 

د/ مواهب بن ادريس الادريسى :

ايوا دى حقيقة ولحوم والملاحات

مقدم البرنامج :

نحن بنحييك دكتورة مواهب امكن ما تبقى لنا كثير ثلاثة دقائق فقط تفصلنا عن نهاية هذا اللقاء ، بنرحب بكل المستمعين فى خواتيم هذه الحلقة حنتكلم ايضا عن اليقين والسكينة النفسية والحالة النفسية وتأثيرها مع كثير من الامراض والمشاكل التى لها علاقة بالامراض التى ذكرناها ، نتابع معكم عبر عيادة على الهواء ، دكتورة مواهب فى نهاية هذه الحلقة هل هناك علاقة بين الشىء النفسى امكن كثير من هذه الامراض لكن هل هناك علاقة مباشرة بين الامراض التى لها علاقة بالجهاز المناعى زى الروماتويد بانواعا والحالة النفسية للشخص

د/ مواهب بن ادريس الادريسى :

ما فى شك فى علاقة مباشرة جدا الجهاز المناعى هو جهاز فى الجسم بيتحرك تحت سيطرة الحالة النفسية بالذات قلنا الاجسام المضادة بتجى طالعة اصلا ما كان مفروض تطلع دى تحت سيطرة الحالة النفسية كلما كان الواحد مستقر نفسياً كلما الجهاز المناعى بتاعه كان مستقر كلما الخلل فى الجهاز المناعى قل فى كثير من مرضى الروماتيزم بالذات الزئبة الحمراء قدر ما نعطيهم علاجات لكن الحالة النفسية بتكون ما مستقرة بتجد المريض دائما ما مستجيب للعلاج فى رمضان طبعا الناس كلها بتكون متميزة بالطمأنينة والراحة وبتهيأ لى ما فى شك انا يتخيل لى الحالة النفسية بتلعب دور كبير جدا

مقدم البرنامج :

ايضا فى موضوع تانى مسألة استخدام المسكنات يعنى كثير من الناس بتبتدى تستخدم مسكنات مع اى احساس بالألم اذا كان مُشخص نوع من انواع هذه الامراض او ما مُشخصة يعنى استخدام المسكنات بانواعا المختلفة اقلها البندول

د/ مواهب بن ادريس الادريسى :

هو طبعا استخدام المسكنات فيه الحل الوحيدالى انك تسكن الألم بتاع امراض الروماتيزم لانو الألم بتاعا ألم شديد لكن استرسال المرضى فى انهم يستعملوا مسكنات دى دائما بيجونا بالاثار الجانبية للمسكنات هى منها تقرح فى المعدة كثير من المرضى الذين يجونا بامراض الروماتيزم عندهم قُرح وحرقان وما قادر يستحمل من انو يعمل حاجة وما قادر يستحمل انو ياخد الادوية لانو عندو حرقان شديد ودى ناتجة من المسكنات زى كوفين زائد انو بيجونا عندهم مشاكل فى الكلى يعنى نحن عندنا كمية من المرضى يعنى صُغار فى السن بتكون عندهم مشكلة فى الكلى وفشل فى الكلى تجى تسأل تلاقى عندها لفترة من الزمن آلام فى المفاصل بتاخد كوفين انا بحذر من الحاجة دى بحذر منها شديد بالذات فى بلدنا وهى ما فيها تروية كاملة للكلى

مقدم البرنامج :

شكراً جزيلا دكتورة / مواهب بن ادريس الادريسى اختصاصى الباطنية والروماتيزم الاستاذ المساعد بجامعة الرباط الوطنى كتر خيرك كتير كل سنة وانت طيبة ونتمنى نلتقيك فى حوارات اخرى اكثر ثراء

د/ مواهب بن ادريس الادريسى :

انشاء الله

مقدم البرنامج :

شكرا لكم ايها الاصدقاء كنا معكم طه عبد الرحمن طه ، تحياتى اسراء زين العابدين ، الاسبوع القادم لقاء جديد عيادة على الهواء الاخراج منى صالح                                                            

.