بسم الله الرحمن الرحيم

برنامج عيادة على الهواء

موضوع الحلقة : مـشـاكل الكُلـى – بثت 2 - 8 – 2012م

مقدم البرنامج :

اسراء زين العابدين

الضيف :

دكتور / خليفة العوض الحسن استشارى امراض وزراعة الكُلى مدير مستشفى الامام التخصصى

مقدم البرنامج :

مرحباً اهلا بكم ايها الاصدقاء نحييكم ونسعد بمتابعتكم عبر لقاءنا هذا حتى العاشرة انشاء الله ، نذكركم فقط برقم هاتف البرنامج لهذا اليوم رقم واحد فقط 87553152 ، وبه يمكنكم التواصل معنا عبر هذه الحلقة هاكم تحايا فريق البرنامج الذى يصحبنى ، رمضان كريم وانشاء الله كل الناس يا رب يصوموا ويفطروا على خير وانشاء الله الناس تاخد اجر، كثير من المشكلات الصحية يمكن نحتاط بها لنتحدث فيها ونحاول ان نحل بعض هذه المشكلات وهذه الاستشارات عبر عيادة على الهواء ، مشاكل الكُلى بالنسبة للذين يعانون قصور فى الكلى وبالنسبة للذين يتعاطون بعض العلاجات او الذين يقومون بغسيل الكُلى عدد من المرات فى الاسبوع او الزارعين للكُلى فى مراحل او فترات مختلفة كل تلك التساؤلات كيف يتعاملوا مع رمضان اهمية الصيام وعدم الصيام او امكانيته ، ايضا ماذا يشربون ماذا يأكلون وكيف نحتاط للذين يعانون من بعض المشاكل مثل الحصاوى والتهابات الكُلى عموماً كل تلك التساؤلات بناخدها وندخل مباشرة الى عيادة امراض وزراعة الكُلى معنا دكتور/ خليفة العوض الحسن استشارى امراض وزراعة الكُلى مدير مستشفى الامام التخصصى مرحبا بك دكتور وحبابك عشرة كل سنة وانت طيب رمضان كريم

د/ خليفة العوض الحسن :

مرحبا بك استاذة اسراء ومرحب بالتيم العامل وتحياتى وامنياتى بالصحة للاخ يس عبد الله مع عاجل الشفاء لك وللتيم ولجميع المسلمين واهل السودان جميعاً اقول كل عام وانتم بخير تصوموا وتفطروا على خير ورمضان كريم

مقدم البرنامج :

انشاء الله انت بخير وكل المستمعين دكتور خليفة عايزين نبدا فى البداية امكن بترد لنا كثير من التسأولات وعايزين نخصص جزء من هذه الحلقة للحديث حول الجديد فى زراعة الكُلى واين موقفنا نحن فى السودان من كثير من التطورات التى حدثت فى العالم فى زراعة الكُلى لكن دعنا نبدا برمضان وكثير من الذين يعانون قصور فى وظائف الكُلى بمختلف مراحل هذا القصور

د/ خليفة العوض الحسن :

طبعا مقولة صوموا تصحوا مقولة حقيقية حتى علمياً وطبياً هى مقولة صحيحة 100% فرمضان هو عبارة عن اجازة نحن فى السودان امكن ادب الاجازة حتى ادب الاجازات غير موجود عشان كدا اجازة بالنسبة للامعاء اجازة للمعدة اجازة من ثقل ما نحمل هذا الجهاز اثناء 11 شهر فربنا سبحانه وتعالى جعل من هذا الشهر فرصة للاسترخاء واجازة لكى تستعيد هذه الاجهزة عملها على الصورة الاكمل وهى اجازة لانو الانسان تسمو روحه بامتناعها عن كل ما يكدر هذا الجسم من سموم وما يكدر من بعض الاشياء الحياتية التى تترك بعض الاثر على صفاء ونقاء هذه الروح فهو اجازة روحية بدنية وشفاء للناس ، بالنسبة لمرضى الكُلى من النصائح التى نقولا لهم طبعا هم لابد يكونوا تحت استشارة الطبيب قبل ما يقدموا على الصوم بنقسم هؤلاء المرضى الى مجموعات فى مريض بالقصور الكلوى لكنه يتعالج بالادوية ودا ممكن نقول انو المريض الذى عندو نسبة بتاعة عمل للكلى اكثر من 50%

مقدم البرنامج :

يعنى نسبة الكُلى هى متضررة او لا تؤدى وظيفتها بصورة كاملة   

د/ خليفة العوض الحسن :

هؤلاء طبعا بنضعهم فى علاجات والعلاجات مع انتظاما ممكن المريض يحولا من النهار الى الليل ويواصل الصيام بالصورة العادية ، النوع الثانى وهو قصور شديد فى وظائف الكُلى ومزمن هؤلاء طبعا فى الفترة الاولى هى تحويل المريض من العلاج الطبى او العلاج الدوائى الى استصفاء دموى او البرتونى فى المرحلة دى نحن بنقول للمريض ما عليك صيام ورخصة انو هو عشان يحافظ على الادوية بتاعته وعلى صحة الجسد بتاعه فما عليه صيام ، النوع الثالث من هذه الفئة هم الناس العندهم ما قصور كلوى جزئى او كامل لكن عندهم تكون الحصاوى بصورة مستمرة وهؤلاء ايضا يحتاجوا الى كميات كبيرة من الماء اذا كان حتى يصوم لازم يراجع الطبيب فى انو يعرف كمية الموية التى يشربها وديل اكثرهم هم الناس فى تكوين الحصاوى نتيجة لامراض مثل مرض النقرس او القاوت بعد كدا نجى للمجموعة الثانية وهى مجموعة زارعى الكُلى الزارعين طبعا فى الستة شهور الاولى بيكون المريض احتاج الى دقة شديدة جدا فى العلاجات بتاعته وننصح نهائياً بعدم الصوم فى الستة شهور الاولى بعد الستة شهور واستقرار الكُلى وادوية المناعة او مصبطات المناعة تكون وصلت المرحلة المستقرة يمكن للمريض الصيام بدقة ومتابعة الطبيب لانو هو تحتاج لى انو هو يعدل فى مواعيد العلاج فى بعض العلاجات تتاخد كل 12 ساعة فيبقى من الصعوبة جدا انو نحن نضغطها فى ثمانية او عشرة ساعات الا اذا كنا حاولنا نقلل الجرعة ديل يصوموا لكن صوم تحت اشراف طبى دقيق جدا

مقدم البرنامج : طيب دكتور انت ذكرت نقطة مهمة عايزين نرجع لها تانى فى كثير من الناس بيكون عندهم مشاكل فى الكُلى اذا كان نوع من القصور او نوع من خلل فى وظائف الكُلى يعنى بتحبذ انو هو يجى قبل الصيام قبل ما يبدا هذا الشهر مع الاستعداد لحاجات كثيرة جدا يستعد بى انو هو يمشى يستشير طبيبه ويعمل من كثير من هذه التحاليل والفحوصات عشان تتحدد بعداك هذه النسبة اذا كان هى 50% زادت او نقصت او فيها بعض الاشكالات ولكن من الملاحظ انو الناس زى بتدخل رمضان وكثير من الناس بيعانوا من بعض المشاكل وخاصة الاسبوع الاول بيكون لسه فيها باقى عافية وبيصوم لكن بتجى تظهر المشاكل فى النصف الثانى من الشهر يعنى مشاكل بتاعة آلام او مشاكل ناس يحصل لهم استفراغ او كثير من حتى هذه الانواع او المراحل المختلفة بتاعة الحصاوى وغيرو ايضا عايزين حديث فى هذا الامر

د/ خليفة العوض الحسن :

دا كلام مظبوط نحن طبعا فى السودان عادة الاشياء بتفاجئنا يعنى حتى رمضان ممكن يفاجئنا بين يوم وليلة يكون رمضان بكرة طبعا من المفيد جدا والمهم جدا انو قبل رمضان باسبوعين او ثلاثة اسابيع نحن المريض يراجع الطبيب على اعتبار انو فى بعض الفحوصات يعملا وفى اشياء دقيقة لازم تتعرف بالنسبة لوضعه الصحى وبالنسبة للاشياء يستفيد والطبيب يتدخل انو يعطيه التعليمات المهمة جدا هى اذا كان التزم بها ممكن يصوم صوم امن وفى بعض الناس زى ما انت تفضلتى انو عندهم اشياء الصيام بالنسبة لهم بدون استشارة الطبيب خش وصام الاسبوع الاول والاسبوع الثانى جابوا على قسم الطوارىء بمغص كلوى المسائل دى تجنبها بى انو الانسان قبل اسبوعين ثلاثة اسابيع يمر على الطبيب بتاعوا حتى اذا كان عندو حصاوى او عندو قابلية لتكوين الحصاوى او حتى قبل كدا نزل حصوة يعمل الفحوصات دى ويصوم وهو امن والا اذا ما تمكن من مقابلة الطبيب نحن ننصح انو ما يصوم بدون معرفة او ما يصوم بدون استشارة الطبيب

مقدم البرنامج :

طيب دكتور انت تحدثت عن الناس الذين يغسلوا او الناس العندهم غسيل كُلى محدد يعنى استصفاء دموى بعدد مرات فى الاسبوع ديل ايضا كيف يتم التعامل مع الصيام معهم مع كميات الموية المفروض يشربوها من حيث الزيادة او النقصان

د/ خليفة العوض الحسن :

طبعا ينطبق عليهم انو استشارة الطبيب لكن الملاحظ كثير جدا فى السودان انو اغلب المرضى عندنا فى السودان يعالجوا باستصفاء الدموى عندنا حوالى 6500 مريض ملاحظتنا انهم اثناء رمضان الناس الذين يحاولوا يصوموا يجدوا متاعب جمة لماذا لانو ارتفاع درجة الحرارة فى السودان عندنا الحركة اثناء الذهاب للغسيل والرجوع والمسائل دى وبعداك شرب الماء او السوائل الانغضاض على شرب السوائل بكثرة نتيجة للعطش او عشان الواحد يروى الظمأ يشرب كميات كبيرة فدائما بيدخلوا فى مشاكل عشان كدا انا بقول انو الفترة الاولى الاسبوع الاول دا الى الامور تستقر الانسان الذى يغسل مرتين او ثلاثة مرات فى الاسبوع يستحسن انو ما يصوم دى لصحته انو ما يصوم فى الاول ربنا اعطاه رخصة لانو الصيام بالنسبة له عبارة عن تهلكة

مقدم البرنامج : نبدا اول اتصال فى هذه الحلقة الو السلام عليكم

مشاركة عبر الهاتف :

وعليكم السلام معاك حاتم التوم – ود الزاكى انا بسأل الطبيب انو انا كان اصبت بالتيفويد قبل فترة استعملت حبوب سبترين كثيرة وبعد ان اصبحت كويس وتعافيت من التيفويد اصبحت انو لا اتحمل العطش وبتألم ألم شديد من الكلى مشيت راجعت طبيب عملوا لى موجات صوتية قالوا لى فى كيس فى الكلية بسأل الطبيب هل ممكن اصوم او ممكن الكيس دا يزال جراحياً او ممكن يتعالج بدون جراحة بالعقاقير

د/ خليفة العوض الحسن :

الاخ حاتم بيسأل انو كان عندو تيفويد واستعمل السبترين وبعده طبعا يفترض انو اذا كان استعمل السبترين بالجرعة العادية هذه الجرعة التى تعالج التيفويد لا تؤثر فى الكلى عدم مقدرته او تحمله للصيام يعنى هنا الصيام جهاد ود الزاكى امكن ابرد شوية او احسن حال لكن كيس الكلية اذا كان كيس وفى الموجات الصوتية هو كيس حميد لا يؤثر فى وظيفة الكلية ونحن لا نعطيه اعتبار ابدا الا اذى كبر واصبح يضغط على باقى جسم الكلية ويؤدى الى قفل فيها ففى الحالة دى نحن بنتدخل جراحياً ولكن فى 99% من الحالات بتاعة كيس الكلية ما عندو اى مضاعفات وهو لا يؤثر فى الصيام الآلام بالجنبتين انا دائما بقول انو ربنا سبحانه وتعالى جعل المغص الكلوى بجنبة واحدة يعنى المريض بيجى يتلوى وماسك جنبته اليمين او اليسار يعنى نحن ما حصل شوفنا مريض جاى يتلوى بمغص كلوى فى الكليتين الاتنين لانو ربنا سبحانه وتعالى يعنى خاصية ما عندها تفسير علمى نهائى الا انها حكمة ورحمة من عند الله انو المغص الكلوى دائما بيجى بجنبة واحدة اى انسان يقول عندى ألم بالجنبتين دائما يجى المريض عندو ألم بالجنبتين وخايف على الكليتين الطبيب بيكون مرتاح فالجنبتين ديل يا اخوانا عبارة عن القولون الصاعد والقولون النازل الاتنين ديل بالجنبتين و بيجوا بناحية قريبة من الكلية المغص او الألم بالبجنبتين دائما فى كثير من الاحوال اكثر 90% هو عبارة عن ألم نتيجة للقولون وليس للكليتين المغص الكلوى اكرر مره اخرى دائما بجزء واحد بصايد واحد والمغص الكلوى عندو اعراض اخرى وهى سخانة فى البول او تكسيح او سرعة فى التبول واشياء اخرى تدل انو المسألة دى كلوية وليست جهاز هضمى اطمأن الاخ حاتم انو الكيس الذى فى الكلية غالباً هو كيس حميد ما عندو قضية ولا يؤثر فى الكلى وتنساهو على طول

مقدم البرنامج :اخ حاتم ربنا يديك الصحة والعافية ، معنا اتصال اخر الو السلام عليكم

مشاركة عبر الهاتف :

وعليكم السلام محمد نور – اللعيت جار النبى انا بعد شراب الموية طوالى بيكون عندى آلام فى المفاصل وألم فى الظهر شديد

مقدم البرنامج :هل بتعانى يا محمد نور من مشاكل اخرى يعنى التهابات بول

مشاركة عبر الهاتف :ايوا

مقدم البرنامج :طيب لحظة دكتور اذا عندك  له اى استفسار قبل ان نفقد الخط 

د/ خليفة العوض الحسن : انت قلت ألم المفاصل بيجى بعد شراب الموية

مشاركة عبر الهاتف :ايوا الكلام دا قبل يومين وعندى التهاب مصران

د/ خليفة العوض الحسن :

يعنى انت عندك داء المصران يعنى دا الكلام الذى كنت اتكلم عنه انو المصران او القولون التهابات القولون او تهييج القولون حتى بدون التهابات يعمل الألم بالجنبات ودائما نحن لما نكون ملانا البطن بكمية من السوائل الابرى والكركدى وغيره انكربت المسألة وعصرت على القولون او المصران وادت الى التهيج بتاع المصران تهيج المصران ممكن تكون اعراضه عدة ممكن يحصل خدر فى الرجلين وسخانة فى راحة الرجلين من تحت وممكن يكون فى آلام فى المفاصل وممكن يكون فى اشياء كثيرة وحتى ممكن نرفزة الانسان واعراض ممكن تكون نفسية او فتور عام دى كلها اشياء انا اعتقد انها هى من اعراض القولون من انها اعراض مرض كلوى

مقدم البرنامج :

محمد نور نتمنى لك الصحة والعافية وزى ما ذكر دكتور خليفة انشاء الله تكون تمشى تقابل اى اختصاصى وانشاء الله ترتاح ونقول للجميع رمضان كريم وانشاء تصوموا وتفطروا على خير

د/ خليفة العوض الحسن :

حتى هو قبل ما يقابل اختصاصى الجهاز الهضمى هو يقابل طبيب نفسى فى انو يعنى ما نقع فى السوائل والموية والعصائر بالصورة طوالى كدا فجأة تدريجياً الليل دا طويل ممكن نحن نوزع الجكين بتاعين الموية التى سوف نشربهم بدل نشربهم فى الافطار

مقدم البرنامج :

عموماً اليومين ديل بردوا لكن قبل كدا المسألة كانت صعبة يا دكتور عموماً ربنا يعظم الاجر، ايها الاصدقاء نتواصل عبر عيادة على الهوء ، معنا اتصال الو السلام عليكم

مشاركة عبر الهاتف :

وعليكم السلام معاك بابكر حسان عبد الله – الخرطوم ، دكتور خليفة ما هى مسببات الكُلى وبالنسبة للانسان العايش بكلية واحدة هل تؤثر وفى خطورة بالنسبة لحياته

د/ خليفة العوض الحسن :

طبعا مسببات الكُلى كثيرة جدا نحن اذا ذكرناها فى عُجالة الكلية دى عبارة عن جهاز يفلتر الدم وينقيه لازم عشان الجهاز دا يشتغل زى مكنة العربية لازم يصلا بنزين ولازم تكون هى نفسها فى حالة جيدة وبعدا كدا المجرى الخارجى لها مفروض يكون بالصورة السلسة معناها اى شىء يعطل فى وصول الدم الى الكلية معناها ممكن يؤثر فى وظائف الكُلى الحاجات دى زى شنو مثلا انسان تعرض الى نزلة معوية حادة فقد السوائل والسوائل اذا كانت عن طريق الاسهال او الاستفراغ او عن طريق نزف شديد جدا ادى الى نقص فى الدورة الدموية معناها البنزين الواصل الى المكنة ما كافى معناها هو بوقف الكلى او المكنة نفسها تعثرت نتيجة الى انو البلوفة حصلت فيها مشكلة المسألة بالظبط مكنيكة اذا تعطلت اشياء فيها بتؤدى الى الفشل الكلوى او ما قبل الكلية كويس والكلية نفسها كويسة لكن لما تطلع السائل الذهبى دا ما بيطلع معناها فى قفلة فى المخرج معناها حتنضغط الكلية ويرتفع الضغط حقها ويؤدى الى الفشل الكلوى فى اسباب تانية كثيرة منها اسباب وراثية فى اسباب تسمم اما تسمم الكميائى او تسمم نتيجة للحالات بتاعة الانتحار بالصبغة ايضا فى نوع ثانى بيحصل نتيجة الى تناول الادوية بدون استشارة الطبيب زى ادوية الروماتيزم على مدى طويل وبعض المضادات الحيوية عندها تاثير مباشر على الخلايا بتاعة الكلية ديل كلهم مع بعض بنقول كان من ناحية تشريحية ولكن من الناحية المرضية بنقول انو زمان بيقولوا السكرى والضغط يمثلوا 60 – 70% من اسباب الفشل الكلوى الان ما عاد الكلام دا زى ما هو لكن القاوت اصبح واحد من الاسباب العالية جدا فى السودان وبالذات الفول اسباب تانية ممكن تؤدى الى اضطراب وظائف الكليتين بى انو الانسان يهمل فى علاجاته بالنسبة للسكرى او بالنسبة للضغط او بالنسبة للقاوت دى كلها اشياء من المسببات بتاعة الفشل الكلوى كلية واحدة عبارة عن ثلاثة كلى انا دائما بقول انو ربنا سبحانه وتعالى اعطى الانسان ستة كلاوى وليست كليتين يعنى واحدة فى اليمين وواحدة فى اليسار لماذا لانو بنقول الجسم بتاع الانسان ممكن يعيش حياته كلها بحياة عيشة طبيعية بثلث كلية معناها الكلية الواحدة بتكفيه ثلثها يكفى معناها عندو اسبير ثلثين فى الكلية الواحدة وفى الثانية ثلثين ثلاثة معناها عندو ستة كلاوى يعنى واحد ثلث من الستة ديل سدس يكفى الانسان معناها الانسان العندو كلية واحدة حسابياً عندو ثلاثة كلاوى ممكن يعيش عادى جدا حياته عادية والا ما كان نحن نشيل كلية من نفر ونزرعها فى زول تانى

مقدم البرنامج :

طيب دكتور عايزين نسأل عن المشروبات فى كثير من المشروبات عندنا فى السودان الناس الذين يعانوا من بعض المشاكل اصلا فى الكلى او الناس الذين يغسلوا او الزارعين فى رمضان تبقى الصينية شاملة لكل الناس وخاصة مثلا مشروبات رمضان هل فى محاذير معينة بالنسبة للناس انهم يشربوا شن واو ما يشربوا شنوا ذا كان عندهم مشاكل فى الكلى وايضا عايزين كمية الموية  المفروض يشربا الشخص زى نحن بنهمل دائما بنقول والله نحن شعب عطشان زى ما انت بتردد دائما بنهمل شرب الموية فى الايام العادية فناهيك فى رمضان نشرب موية قدر شنو من الفطور حتى السحور الكمية المفروض نحن على الاقل عشان نحافظ بها على صحتنا

د/ خليفة العوض الحسن :

انا ابدا من السؤال الاخير لانو تناقشنا فيه قبل كدا سنوات فى انو نحن قلت انو نحن شعب لا نعرف كيف نشرب الماء وقلت تماماً واردد واكرر مع انو الاستماع يكون قليل جدا بالنسبة للكلام دا ويسموا كلام لا يمكن تطبيقه شرب الماء الصحيح قلنا قبل ما نحن نقعد فى الصينية بربع ساعة نشرب كوب من الماء وبعد الاكل بثلاث ساعات نبتدى نشرب كوب اخر واذا حبينا نشرب تانى معناها قبل الاكل بربع ساعة وبعد الاكل بثلاث ساعات دى الطريقة الصحيحة لشرب الماء كمية الماء لو ذكرتها لك معناها  الناس حيقولوا دا مجنون اى زيادة عن درجة الحرارة فوق للاربعين يفترض بعداك على كل درجة حرارة واحدة يكون فى 2 لتر اذا كان درجة الحرارة 42 كمية الموية مفروض تكون اربعة لتر اذا كان درجة الحرارة 67 زى ما هو حاصل قبل ايام معناها نحن عايزين كمية ما يصل صفيحة بتاعة موية فنحن بنحتاج على الاقل فى فترة الصيف الانسان هو بيفقد فى جسمه عن طريق العرق عن طريق التنفس حكاية بتاعة لتر اول حاجة نعوض اللتر دا عشان بعد كدا نشوف الجديد شنو وهى لتر اول حاجة بعداك عليه لترين تانى واللتر نحن بدل ما نتكلم باللتر وما اللتر نقول الكباية فيها 150 يعنى ستة كبايات بتاعة الشب المتوسطة دى عبارة عن لتر ستة كبايات معناها نحن بنحتاج فى اليوم الى 18 كباية دا بالنسبة للزول العادى الذى ما عندو كلى المريض بتاع الغسيل هو لما يقعد فى الصينية الكركدى والحلو مر والقنقليس والشعير اتمنى انو ما يكون فى المشروبات الغازية والاشياء الغير طبيعية زى التانج وحاجات نحن ما عارفين جاية من وين اتنمى انو صينيتنا تحافظ على سوداتنيتنا الاصيلة لكن يهمنى فيه ما نوعية الشراب الذى يشربه لكن كمية الموية التى يشربها زى ما انا بقول انو المريض الذى يغسل الكلى ما يزيد عن لتر يعنى ما يزيد عن ستة كبايات ونصف او سبعة كبابى اذا كان شربهم بالليل شرب ثلاثة كبايات وبالنهار مسموح له اربعة كبابى اذا كان صائم ما يشرب الكمية دى يشرب زى ما داير فى القنقليس او الشعير يعنى مشروباتنا دى كلها بالمناسبة مشروبات صحية جدا لكن الكمية التى يشربها هى التى تهمنى لا يزيد من لتر فى الاربعة وعشرين ساعة  

مقدم البرنامج :

بالنسبة للزارعين ايضا ما عندهم تحوطات معينة

د/ خليفة العوض الحسن :

الزارع دا بعد الستة شهور الاولى خلاص اصبح عادى ما عندو محظورات بالنسبة لشرابه الا فى بعض الاشياء فى الاكل نحن بنقول له الدهون والمسائل التى ممكن تزيد الكلسترول بنقولوا امتنع عنها لكن الاكل والشراب عادى يعطش يشرب وفى بالمناسبة يا استاذة فى مفهوم بيقولك انا بشرب موية كثير مع انى بشرب موية كثير حصل كدا بشرب موية كثير دى دائما انا ما بحبها لانو ارجع تانى انو نحن لا نعرف نشرب الموية ما تشرب موية كثير قمت الصباح انت عطشت اشرب كباية رويت خلاص ما تقول لى انا بشرب الجك فى الصباح ثابت لا هنا معناها انت ارهقت الجهاز الهضمى وجعلت المعدة تترهل نخوف بناتنا انو المسألة دى من اسباب الكرش لكن نشرب الموية اذا عطشنا يعنى الزول عطش وطنش وقال لا الى ان اصل بعدين البيت حرام عليه يعمل كدا ومسألة غير مقبولة عطش يشرب

مقدم البرنامج :

يعنى ثقافة انو الزول يكون شايل معه زجاجة صغيرة بتاعة موية فى الحركة دى ما عندنا مع انو كثير من الدول بيتعاملوا بها تجد اى زول عامل طالب بيحمل معه قارورة بتاعة موية ، عموما بنحييك دكتور خليفة وعايزين نرجع للحديث حول الجديد فى مجال زراعة الكلى والتطورات التى حدثت فى العالم فى مجال الزراعة ونحن واقفين وين منها فى السودان

د/ خليفة العوض الحسن :

نحن فى السودان شعب مسلم والحمد لله وكل ما نعتز به هو دينا الحنيف وسودانيتنا الاصيلة فى كتابنا العزيز سورة مريم الاية 25 بسم الله الرحمن الرحيم ( واهزى اليك بجذع النخلة تساقط عليك رطبا جنيا ) صدق الله العظيم ، جذع النخلة نحن عارفين انو الجزع هو عبارة عن اكبر حاجة جذع العمارة هو الهيكل بتاعا جذع الشجرة هو اكبر حاجة دا كلام نحن كنا فاهمنه ولكن فهمنا له قاصر لانو بدليل انو السيدة مريم وهى فى لحظة المخاض هزى اليك بجذع النخلة كيف تهز الجذع يعنى امكن الانسان الذى لا يتعمق فى الموضوع كيف هزت الجذع وكيف يساقط هذا الجذع الثمار الذى اكتشفناه اخيرا انو نحن لا نعلم شىء وعمق الآية القرآنية انو عمق الجذع ليس هو اكبر شىء فى النخلة وانو الجذع ليس هو اكبر شىء فى هيكل البناية اكتشفوا الناس الان انو هيكل الانسان لو قلنا انو ما هو جذع الانسان طوالى يتبادر لنا انو عبارة عن السلسلة الفقرية لكن وجدوا انو خلايا الجذعية داخل نخاع العظم مسألة صغيرة جدا ومتنامة الصغر لكنها كبيرة ولكنها عظيمة من هذه الخلية او من هذا الجذع يمكن الاستفادة منه فى أشياء كثيرة من ضمنها العملية بتاعة نقل وزرع الكلى يبقى معناها انو الجذع نحن امكن بالامر نهزه وليس باليد فهذه الخلايا الجذعية هى عبارة عن معجزة فى الطب قلبت المعايير فى كل مناحى الطب فى زراعة الاعضاء فى زراعة الكلى لما ننقلها من المتبرع قبلها بستة اسابيع او شهرين ننقل هذه الخلية نسحب المادة ونصفيها ونحقنها فى جسم الانسان يبقى هو الذى عايز يتلقى الكلية بنخدع الجسم اصلا القصة بالمناسبة انو نحن فى زراعة الكلى حراميين او خداعين بنخدع الجسم لماذا الجسم دا ربنا عمل فيه كمية من وسائل الدفاع عن النفس فى عدو او اى انسان خارج عن الجسم جايى داخل هو عبارة عن انسان دخيل ففى كمية من الاسحلة وكمية من خطوط الدفاع الاول والثانى والثالث عشان تدافع عن الجسم مناعة ربانية عملا ربنا نحن بنقوم نعمل شنو بنقوم نعطى علاجات عشان ننقل كلية نسبط المناعة ننومه  ونضع الكلية بعداك نخلى نائم الى ان يحصى يحصى وهو مدروخ وتدريجيا وشهر وشهرين ويكون الجسم تعود الذى يحصل انو نحن لما ننقل الخلايا الجذعية فى جسم المتلقى معناها لما نجى نجيب الكلية من الانسان الذى نقلنا منه الخلايا دى الجسم يعتقد انها هى عبارة عن ليست جسم غريب لماذا لانو الخلايا الجذعية الاولى اعطتوا الاشارة بى انو الزول الجايى داخل عليك دا زول ما غريب مننا يقبله الجسم هنا وقفنا مسبطات المناعة وهى مشكلتنا فى زراعة الكلى الكلية تنجح لكن مسبطات المناعة قد تسبط بنى ادم وتهبطه وتسقط المناعة بتاعته والالتهابات تبقى مشكلة كبيرة الموضوع دا وصل مراحل كبيرة عدد العمليات التى اجريت حتى الان ستة عمليات ومبشر واعتقد انو هو عبارة عن ثورة فى عالم الزراعة وينتهى الانسان من اخذ العلاجات الغالية والمضرة جدا ويزرع العملية ودى بالمناسبة اذا كان فى وقت قصة اكتشافها قصة يعنى ظريفة جدا يعنى اذا حان الوقت امكن اقول لك كيف اكتشفوها

مقدم البرنامج :

دكتور امكن نحن تبقى لنا زى سبعة دقائق فقط معنا اتصال هو الاتصال الاخير بعدها امكن حنمشى عشان نسمع بعض النصائح والتوجيهات للمرضى فى هذا الشهر الكريم نسمع الاتصال الو السلام عليكم انقطع الخط ويا ريت لو فى فرصة بتاعة اتصال اخير ، نرجع دكتور خليفة امكن دى بشريات كويسة فى هذا الشهر نتمنى انو ربنا يشفى كل الناس وهذه الاكتشافات الجديدة تحل كثير من المشاكل عايزين نرجع دكتور خليفة امكن بالنسبة للناس الذين يعانوا من الحصاوى وانت تفضلت وذكرت كان مفترض يكون عندهم تحوطات او الاصلا عندهم وراثة فى مشكلة الفشل الكلوى ومشاكل الكلى الان نحن قاربنا على منتصف الشهر الكريم شنو الاعراض التى ممكن تظهر على الشخص بصورة خفيفة عشان ما تجى فى اخر اسبوع من رمضان وتظهر الاعراض الصعبة او القاسية وشنو نصائحنا للناس الذين يعانوا من امراض القاوت بالنسبة للاكل لانو من الواضح انو صينية رمضان السودانية ما صديقة اصلا لهولاء الناس   

د/ خليفة العوض الحسن :

بالنسبة للاعراض انا كنت دائما بقول واردد انو اذا حضر المريض بمغص على قدر ما يتلوى المريض على قدر ما نحن نتألم له ونهب لمساعدته ولكننا داخلياً مرتاحين اكثر لماذا لانو فى مغص معناها الكلية شغالة معناها بتفرز معناها متحركة بتفرز كمية السائل وهى بتضغط على الحصوة والحصوة تتحرك معناها الموتور وراء شغال معناها انا مبسوط انو فى حاجة معينة اذا نحن شلناها الكلية ما عندها مشكلة المشكلة انو الذى يجينى بدون مغص ويجى بفتور او يجى باعياء ويجى باستفراغ او طمام دا بيكون هو عبارة عن الفشل الكلوى المزمن اعراضه قد تكون اى عرض يخطر على البال وقد يمشى الى طبيب الجلدية عندو حكة وعندو طفح جلدى وقد يمشى الى طبيب النفسية انو بدا يتكلم برا من رأسه وقد يمشى الى طبيب الصدر والازمة كل الاشياء دى اعراضه حماكم الله وحمى الجميع لكن الذى يجى بالمغص الذى يتلوى داك يعنى بعد نصف ساعة بيكون كويس تشخصت الحالة بتاعته واتعرفت الحصوة وين فى الحالب تتشال بالمنظار او بالتفتيت او بعملية وبعد كدا الوقاية هى انو دا يكثر من الشراب بتاع الموية اذا عطش وياخد العلاج بتاعه اذا كان من ناس القاوت ويبعد عن الاشياء التى ممكن ترفع القاوت زى البليلة وشوربة العدس واللحمة والاشياء دى كلها والفول

مقدم البرنامج :

 امكن نحن ما تبقى لنا كثير دكتور خليفة ماشين الى نهايات هذا اللقاء من عيادة على الهواء ايضا نتيح لك ما تبقى من زمن لتقديم بعض النصائح وبشريات للناس فى هذا الشهر انشاء الله

د/ خليفة العوض الحسن :

من أعظم البشريات التى أعطانا لها ربنا فى اليومين الفائتة انو حبانا بالغيث المطر والجو كان بصورة جميلة جدا وكل ما نقوله للانسان انو لان شكرتكم لازيدنكم يعنى نحن نذكر الله فى هذا الشهر الكريم نصفى اصلو هى فى بنى ادم الروح او البدن هو عبارة عن مادة وروح اذا كان نحن الروح عايزنها تبقى سليمة يعنى نقويها بالإيمان والدعاء والذكر والحمد والبدن سليم انو نلتزم بما فيه مصلحة هذا من ناحية الغذاء الجيد الماء اذا عطشنا عدم المغالاة فى الشىء اذا شربنا نشرب بمقدار وإذا أكلنا نأكل شوية شوية بمقدار ونحافظ على صحتنا البدنية والنفسية والذهنية ونرتاح شوية فى هذا الشهر اتكأة محارب ايمانية تعطى القلب راحة والجسم والمعدة راحة ونبقى فى امان الله انشاء الله

مقدم البرنامج :

بنحييك كثير جدا دكتور وبهذه الكلمات التى خصيت بها البرنامج والطمأنينة   الكبيرة وبشريات كثيرة فى مجال زراعة الكلى ومعاناة المحافظة على الجسم من المشاكل والالتهابات فى الستة شهور والسنة والقلق الذى يعانية الاسر والبسيطين فى مريض الفشل الكلوى نتمنى انو تنتهى كل هذه المعاناة ومزيد من الاكتشافات فى هذا المجال بنحييك كثير جدا دكتور/ خليفة العوض الحسن استشاري أمراض وزراعة الكلى مدير مستشفى الإمام التخصصي نتمنى انو ربنا يجزيك عننا كل خير ويديك الصحة والعافية وكل سنة وانت طيب

د/ خليفة العوض الحسن :

كل سنة وانتم طيبين وللسادة المستمعين وكل المسلمين والسودانيين والتيم العامل وربنا يتولاهم برعايته وصحته

مقدم البرنامج :

شكرا لكل الذين تابعونا عبر عيادة على الهواء لكم تحايانا جميعاً كنا معكم في هذا اللقاء محمد الحويرص ربطنا بكم عبر أجهزة الصوت الرقمية ، تحياتي عبر المايكروفون إسراء زين العابدين الأسبوع القادم لقاء جديد عيادة على الهواء الإخراج منى صالح