SmartSection is developed by The SmartFactory (http://www.smartfactory.ca), a division of InBox Solutions (http://www.inboxsolutions.net)
البرامج الاذاعية > عيادة على الهواء > مشاكل الأطفال حديثي الولادة
مشاكل الأطفال حديثي الولادة
نشره Hassan في 2010/2/8 (2235 عدد القراءات)

بسم الله الرحمن الرحيم

عيادة على الهواء

موضوع الحلقة : مشاكل الأطفال حديثي الولادة - بثت28/ 1/ 2010م

 

مقدم البرنامج :

إسراء زين العابدين

الضيف :

دكتور/ على عربي استشاري الأطفال الأستاذ المساعد بكلية الطب جامعة الخرطوم

 مقدم البرنامج :

المستعمون الأعزاء أهلا مرحبا بكم نحييك كثيرا جدا عبر هذا اللقاء الجديد وعيادة على الهواء ، دوما تتجدد لقاءتنا بكم ودوما تتجدد امنياتنا لكم بكل الصحة والعافية وتذكروا دائما انو صحتكم عندنا بالدنيا ، أيها الأصدقاء بداءً هاكم تحايا الفريق الذي يصحبني عبر هذا اللقاء ، أيها الأصدقاء أهلا مرحبا بكم كتير جدا وهذه حلقة جديدة نأمل أن تنال متابعتكم وبقدر ما نطمح في هذه المتابعة أيضا نتمنى أن يمتدد حبل التواصل بيننا وبينكم نذكركم دائما برقم هاتف البرنامج ( 0187553152 ) أيها الأصدقاء من أم درمان الإذاعة السودانية وعبر عيادة على الهواء نرحب كثيرا في هذه الحلقة بضيف العيادة دكتور/ على عربي استشاري الأطفال الأستاذ المساعد بكلية الطب جامعة الخرطوم أهلا بيك دكتور على ونحنا بنحييك كثير جدا وسعداء بحضورك ضيف على هذه الحلقة من عيادة على الهواء

دكتور/ على عربي : شكرا جزيلا ونتمنى الصحة والعافية لكل أطفال السودان

مقدم البرنامج :

إنشاء الله ونحنا بنحييك كثيرا جدا وبنقول لكل المستمعين اليوم أيها الأصدقاء في هذه الحلقة سنتحدث عن بعض المشكلات الصحية التي تتعلق بصحة الأطفال اذاً أمراض الفواصل ، المشاكل الصحية المرتبطة بها وانتشار الحميات العالية ، وفى هذه الحلقة أيها الأصدقاء نحاول أن نركز الحديث حول مشاكل الأطفال حديثي الولادة اليرقان وما هو الاستسقاء الدماغي ونتابع معا تطور ونمو الطفل ، وكلنا أيها الأصدقاء نعرف جميعا علاقة الأطفال بالحيوانات المحيطة بنا وربما التي يتعرضون لها اذاً سنخصص الحديث عن ( السَــعَــر ) ما هي هذه المشكلة الصحية كيف يصيب الأطفال وما هي العلاجات الوقائية ، اذاَ أهلا بكم مستمعي الأعزاء دكتور عربي ذي ما انت بتقول خلينا نرتب حسب تسنين الأطفال نبدأ بالأطفال حديثي الولادة مرحب بيك

دكتور/ على عربي :

شكرا جزيلا أستاذة إسراء طبعا الطفل هو دائما هو في مرحلة نمو نحنا كاخصائى أطفال بنستلم الطفل لحظة ولادته وناس الباطنية لسانهم بالغ جدا عشان كدا بيمروا بمراحل كثيرة جدا ذي مراحل بتاعة حديثي الولادة ومراحل ما قبل النمو والمدرسة وفترة المراهقة عشان كدا نحنا دائما بداية الأطفال لمن تكون بداية صحية بعداك كل المشاكل مرات يعنى كل ما الطفل كبر كلما زادت المشاكل وكلما الطفل صغر كلما زادت المشاكل وخاصة الطفل لمن يكون صغير جدا ومولود خاصة الأطفال لوالدين أول مرة يتعاملوا مع الطفل في مشكلة كبيرة في فهم بعض المشاكل فدائما المشاكل تأتى مع الطفل الأول

مقدم البرنامج :

أيوا تلقى الطفل تم أسبوع مشوا بيهو للدكتور يعنى في كل أسبوع تكون في زيارة زيارتين للدكتور

دكتور/ على عربي :

أيوا لأنو في أشياء كتيرة ما بيفهومها لأنو الطفل طبعا ما عندو غير انو يبكى ويرفض الرضاعة ولى تحصل ليهو اى مشكلة بعداك الأهل لازم يتدخلوا مافى شكوى مافى اى حاجة عشان كدا دائما فدى مهمة جدا جدا طبعا لأنو نحنا لسه شغاليين في المرحلة العلاجية وهم وصلوا مرحلة الوقاية لسه فنحنا دائما مفروض أطفال ذي ديل قبل ما يكبروا شوية مفروض الناس تتكلم عنهم لأنو لمن تحصل المشاكل بعداك دا يسموا الطب العلاجي لكن حقيقة الطب الوقائي قبل الطب العلاجي ، فالأطفال حديثي الولادة لهم مشاكل كتيرة جدا ويستحسن انو اى طفل حديث الولادة لازم يكشف عليه طبيب أطفال بعد الولادة مباشرة خاصة في لحظة الولادة لأنو في لحظة الولادة الطفل بيتولد مرات بيتعرض لمشاكل كتيرة جدا منها مشاكل التنفس خاصة النقص بتاع الأوكسجين لو استمر لفترة بتاعة ربع ساعة أو تلت ساعة أو بدت من خمسة دقائق وانت ماشه تبدأ المشاكل ، ونقص الأوكسجين لحظة الولادة أو بعد الولادة مباشرة دا بيخلى الطفل طفل معاق ويعطل حياته عشان كدا مهم جدا انو الولادة الآمنة الى هي في حته فيها طبيب أطفال وفى حته فيها معينات تساعد الطفل على التنفس دي اللحظة الأساسية المهمة في حياة الطفل يعنى البداية الصاح انو الطفل أول ما يطلع يصرخ وبعد الطفل ما صرخ تبدأ المشكلة انو هل في عيوب خلقية ولى لا طبعا العيوب الخلقية هي نادرة لكن تمثل بعض المشاكل

مقاطعة من مقدم البرنامج :

يعنى انتم بتعرفوها من الأول من الطفل لحظة الولادة يعنى ذي ما ذكرت يا دكتور انو مسألة التنفس أو خلافوا وبعد كدا بتبدا مسألة البحث إذا كانت في مشاكل

دكتور/ على عربي :

 أيوا المشكلة الأساسية هي نحنا بنبداها لازم انو يكون في الممرات الهوائية بتاعتوا كويسة يعنى في أطفال لمن يولدوا يكون في نقص بتاع أوكسجين يعنى في مشكلة في القلب قد تكون خلقية يبدأ الطفل لونوا لون بنفسجي أو ازرق في اللحظة دي لازم الطفل يحتاج الى أوكسجين ويحتاج الى كشف يشوف هل في عيب خلقي ولى مافى عيب خلقي اذاً مهم جدا جدا الأم تلاحظ لون الطفل لحظة الولادة أو لمن يجيبوا ليها الطفل إذا كان لونوا لون ازرق لازم تراجع الطبيب لأنو بيكون في كترة بتاعة دم خاصة دي بتحصل في التوأم واحد يكون دموا كتير وواحد يكون دموا بسيط ودا برجعنا لواحد من الأسباب برضو الولد لمن يكون لونوا ابيض ودا برضو لون ما كويس لأنو اللون الأبيض لحظة الولادة إما الطفل يكون فاقد أوكسجين أو الطفل ناقص دم كتير جدا جدا وهنا بيحتاج الى تدخلات سريعة بعد الولادة مباشرة بعداك تبدأ العملية بتاعة الطفل من الرأس لحدي الرجلين تحت

مقاطعة من مقدم البرنامج :

في مسألة الألوان دي يا دكتور قبل ما نمشى في اللون الأصفر يعنى مرات بنلقى طفل عندو ذي اصفرار يعنى في اللون

دكتور/ على عربي :

دي المشكلة الشائعة الىّ هي دائما ما بيحصل لحظة ولادة لكن بيحصل في نهاية اليوم الأول أو بداية اليوم التانى فبداية اليوم التانى بيحصل اللون الأصفر فالأصفر دا لو ظهر في اليوم الأول بتبقى مشكلة كبيرة جدا جدا لأنو معظم اللون أو الأصفر أو اليرقان يظهر من اليوم التانى قد يكون طبيعي لكن لو ظهر في اليوم الأول دا معناها في حاجة غير طبيعية فاللون الأصفر بيحصل طبعا ونحنا عندنا اللون الأحمر فمشكلة اللون الأصفر مشكلة اللون البنفسجي عشان كدا لازم الطفل يكون لونوا يعنى كويس عشان الناس تلاحظ في مشكلة ولى ما في مشكلة

مقدم البرنامج :

طيب في مسألة اليرقان دي يا دكتور ذي ما انت ذكرت هي أكثر شيوعا حقيقة امكن في قلق كتير لكتير من الأمهات عادة الولادة الطبيعية الأم بتطلع بالطفل يعنى بعد 24 ساعة تانى يوم وذي ما انت ذكرت أحيانا بتظهر لها هذه المشكلة بعد يومين يعنى يبتدى الطفل تحس بي انو لونوا لمن يبكى في أجزاء جسمه أو في الأجزاء الداخلية أو أطرافه بدا اللون بتاع الاصفرار دا شنو الإجراء الممكن تقوم به الأم في هذه الأيام دي

دكتور/ على عربي :

 أول حاجة اللون الأصفر دا فيهو بعض الأشياء الأساسية يعنى إذا كان الأم والأب فصائلهم مختلفة نتكلم مثلا عن العامل الريسى إذا كان هي مثلا العامل الريسى بتاعا ( negative) والزوج (positive ) لازم الأم إذا ظهر صفار أو قبل ما يظهر صفار تكلم الاختصاصى بتاع النساء والتوليد وتكلم اختصاصي الأطفال لأنو في حقنة ممكن الزول ياخدا فدى أشياء أساسية فيهو حتى إذا كان في اختلاط بين الفصائل مثلا حكاية الأم (O) والأب (B) أو (A) قد تحصل برضو بعض المشاكل فالطبيب لازم يعرف الحاصل عشان كدا الأم لازم تعرف فصيلتها يعنى نحنا مرات نسأل الأم فصيلتها شنو ما بتعرفا والزوج فصيلتك شنو ما بيعرفا

مقدم البرنامج :  دي يعنى لمن يجوا ياخدوا يعنى بعد الولادة

دكتور/ على عربي :

يعنى نحنا ناخد تاريخ بسيط إذا كان في اختلاف فصائل إذا كان في لون اصفر لازم الناس تقلق تمشى الدكتور لأنو الاصفرار دا لو كان اصفرار غير طبيعي معناتا الطفل برضو عندو تلف في الدماغ دي الحاجة الخطيرة جدا جدا الحاجة التانية إذا كان في الأسرة في أطفال بيولدوا بصفار أو يحصل لهم تغير دم لازم الأم تقلق وإذا كان الطفل الصفار دا ظهر في اليوم الأول لازم الأم تقلق وإذا كان الصفار دا بدا في الطفل والفسحة بقت بيضاء واللون بقى غامق شديد لازم الأم تقلق

مقاطعة من مقدم البرنامج :

إذا كانت الأم أصيبت بي اى مشاكل يعنى إذا كان جاها يرقان أو جاها يعنى في أثناء فترة الحمل هل عندها علاقة برضو

دكتور/ على عربي :

هي عندها علاقة يعنى اليرقان دا قد يكون سببوا التهابات فيروسية في الكبد منها اليرقان الوبائي إذا كان الأم عندها أو جاها أثناء الولادة عن طريق الدم فدا ممكن يحصل للطفل يعنى اليرقان في الطفل هو ثلاثة أنواع واحد بينتج عن تكسر الدم وواحد بيجى عن طريق الالتهاب في الكبد الىّ هو الفيروسات وواحد بيجى بيرقان انسدادي خلقي الىّ هو بيكون في المجارى الىّ هي بتمرر اليرقان بيحصل فيها بعض المشاكل وبيحصل فيها قفل ودا لازم يحتاج لعملية جراحية لأنو لو ما اتعملت ممكن تحصل مشكلة

مقدم البرنامج :

دكتور نحنا حا نقيف هنا ومعانا اتصال نسمع ليهو ونرجع إنشاء الله نواصل في هذا الحديث وننتقل منه الى الاستسقاء الدماغي برضو كواحدة من المشاكل ذي ما تفضلت وذكرت أطفال حديثي ، الو السلام عليكم ، يبدو انو انقطع خط الهاتف اذاً نرجع ونتابع الحديث إنشاء الله اتفضل دكتور

دكتور/ على عربي :

قلنا واحدة من المشاكل قد تكون عيوب خلقية في الممرات الىّ هي بتنزل اليرقان المادة الصفراء دي وفى الحالة دي قد تحتاج لعملية الفسحة لونها ابيض والطفل يكون لونوا اصفر شديد جدا جدا في الحالة دي يحتاج الى تدخل جراحي

مقاطعة من مقدم البرنامج :

يعنى ما ننتظر انو دي حاجة عادية يعنى امكن في بعض الفتاوى بتجييك من البيت من الأمهات والحبوبات والمسألة عادية نعمل ليهو كدا ونعمل ليهو كدا اى كلام ذي دا

دكتور/ على عربي :

هو طبعا من 70  -  80% قد يكون طبيعي لكن في جزء قد يكون فيهو مشكلة وديل دائما بيضيعوا في النص مثلا ذي التشنجات في الأطفال فالتشنجات في الأطفال قد تكون تشنجات حرارية عادية لكن في نصها تكون في نسبة بتاعة سحائي أو التهاب في الدماغ ملاريا خبيثة فالناس مرات بتخلط بينها لمن تكون في حالات كتيرة بتجى طبيعية والغير طبيعي بيخش في النص

مقدم البرنامج : يبقى الفيصل الدكتور

دكتور/ على عربي :

أيوا الفيصل الدكتور بعداك الطبيب هو بيقوم يعمل فحوصات الى هي اليرقان ممكن يتعمل فحصين فحص في الدم نشوف نسبته قدر شنو بعداك بيعتمد على العلاج إذا كان العلاج ضوئي أو تغيير دم أو علاج لالتهابات بتاعة الكبد أو علاج جراحي

مقدم البرنامج : معانا اتصال الو السلام عليكم

مشاركة عبر الهاتف : عليكم السلام ورحمة الله

مقدم البرنامج : أهلا بيك يا سيدي مرحبا

مشاركة عبر الهاتف : حسن محمد الشيخ – ولاية النيل الأزرق

مقدم البرنامج : أهلا بيك أخ حسن اتفضل

مشاركة عبر الهاتف : أنا عندي ولدى عمروا 9 سنوات  وبيتبول بالليل طوالى

مقدم البرنامج :

خليك معانا يا حسن لحظة الدكتور يوجه ليك بعض الأسئلة وبعدين نستمع إنشاء الله للحل

دكتور/ على عربي :

 التبول لا ارادى من بدري يعنى مما هو صغير ولى حاجة جديدة ظهرت

مشاركة عبر الهاتف : والله من هو صغير ما خلاهوا

دكتور/ على عربي : والقصة دي كل يوم بيعملا

مشاركة عبر الهاتف : أيوا طوالى بالليل

دكتور/ على عربي :

دي طبعا واحدة من مشاكل السلس البولي والتبول لا ارادى الليلي طبعا عندها أسباب كتيرة جدا ولها علاج واتخيل لي لو مشى للدكتور لأنو معظم الناس العندهم السلس البولي مرات ما بيمشوا للدكتور فدى عندها علاجات وعندها إرشادات وعندها متابعات إنها تخلينا نمشى لأقرب اخصائى بتاع أطفال وما حاجة صعبة هي فممكن يمشى وياخد منو بعض الفحوصات ويتأكد انو ما في مشاكل في المجارى البولية بعداك في بعض العلاجات الىّ هي يفترض انو ما يتبول بالليل

مقدم البرنامج :

دكتور امكن أخونا حسن حقيقة امكن دا سؤال مهم جدا ونحنا دايرين شوية نركز انو متين يبدأ القلق على المشكلة يعنى انت ذي ما ذكرت انو اكتر الناس ما بتمشى الدكتور وتسأل أو تمشى تودي الطفل كنوع من الخجل أو الطفل ذاتو ما يقبل أو الأسرة تفتكر إنها ممكن تعالج المشكلة متين نبدأ نقلق من مسألة التبول الليلي عند الأطفال ونعرضهم متين على الطبيب

دكتور/ على عربي :

هو حقيقة بعد سن الخامسة إذا كان الأسرة قلقت لازم تعرضوا على الطبيب  وعادة الطفل بعد سنتين مفروض يكون بعداك حصل ليهو يعنى يتمرن انو يقدر يبول ويقدر يقول أنا ماشى أبول وبالليل يصحى لكن إذا استمر لحدي خمسة سنين بعد خمسة سنين لازم الطفل يعرضوا على الطبيب ودي عندها علاج يعنى معروف الحاجة عالميا ومعروف انو أسبابها شنو ومعروف فحوصاتها شنو ما حاجة صعبة الناس تمشى وفى علاج للقصة دي

مقدم البرنامج :

شكرا ليك أخ حسن نتمنى تكون سمعت لنصيحة دكتور على وولدك يعنى إنشاء الله ربنا يشفيهوا والمسألة ذي ما قال دكتور على دايرة استشارة بسيطة وأكيد في النيل الأزرق تقابلوا اختصاصي هناك إذا كانت المسألة ساهلة يا دكتور إنشاء الله ، وبنرحب بكم أيها الأصدقاء وما زلنا بنتابع معكم عيادة على الهواء

                                 *** فاصل موسيقى ***  

مقدم البرنامج :

مرحبا بكم أيها الأصدقاء عبر هذا اللقاء ودكتور على عربي استشاري الأطفال هو ضيف العيادة مرحب بيك مرة تانية دكتور على ، الظاهر حا نبدأ الجزء إنشاء الله باتصال الو السلام عليكم

مشاركة عبر الهاتف : وعليكم السلام ورحمة الله

مقدم البرنامج : أهلا بيك يا سيدي مرحبا

مشاركة عبر الهاتف : معاك يس حسن على – كرمة ولاية النيل الأبيض

مقدم البرنامج : مرحب بيك أخ يس اتفضل

مشاركة عبر الهاتف :  

عندي بنتي بعاني منها معاناة شديدة خلاص بجيب ليها دواء الشراب ودواء الملاريا وما في اى تحسن واسى اليوم بتشعر بحمى – الو

مقدم البرنامج : أهلا بيك منو معانا

مشاركة عبر الهاتف : اسمي ميادة

مقدم البرنامج :

مرحب بيك يا ميادة كدي أدينا أبوك نتكلم معاهو إنشاء الله ربنا يشفيك ، أخ يس بس خليك معانا لحظة نعرف عمرها وكدا والدكتور معاك

دكتور/ على عربي : قلت مسكتها حمى ولى شنو

مشاركة عبر الهاتف :

 والله البنت دي انت عارف عندها وجع في البطن بس وديتها الدكتور وقام أداها دواء شراب بتاع فلاجين والبطن مرات الفسحة تتغير ومرات تجى كويسة أنا أسى قاعد اسقيها شراب القنقوليس ( تبلدي ) لأنو شوية بيوقف الإسهال

دكتور/ على عربي : عندها إسهال ولى وجع بطن ولى عندها شنو

مشاركة عبر الهاتف : عندها إسهال ووجع بطن أحيانا بترقد على بطنها

دكتور/ على عربي : والإسهال بيعدى معاها كم

مشاركة عبر الهاتف :

  الإسهال بيَعدى معاها في الأسبوع يوم يومين بيخليها وتانى بيرجع

دكتور/ على عربي : صحتها ماشه كيف ووزنها ماشى كيف

مشاركة عبر الهاتف : والله يعنى ما في نمو

دكتور/ على عربي : عمرها كم

مشاركة عبر الهاتف : عمرها سنتين

دكتور/ على عربي : وزنها كم

مشاركة عبر الهاتف : والله الوزن في النتيجة أسى ما بستحضروا ليك

مقدم البرنامج : بتجيها حمى انت قبيل قلت يا يس

مشاركة عبر الهاتف : أيوا أحيانا بتجيها حمى بالمساء

مقدم البرنامج : ربنا يشفيها يا يس

دكتور/ على عربي : عيانه ليها كم أسى

مشاركة عبر الهاتف :

 ليها ستة شهور بالصورة دي لكن أسى هي بتمشى الروضة وبتجى

مقدم البرنامج : يعنى الأعراض من بدت تجيها وتروح يعنى حوالي ستة شهور

مشاركة عبر الهاتف : أيوا

مقدم البرنامج : شكرا يا يس تابع معانا اتفضل دكتور

دكتور/ على عربي :

 الحقيقة طبعا الأخ يس بيتكلم عن تغيرات في الفسحة والحمى اتخيل اكتر حاجة محتاج ليها انو لازم هو يقابل طبيب بتاع أطفال عشان يحدد المشكلة شنو ، طبعا الحميات في الأطفال ما كويسة كونوا الطفل يقولوا عندو حمى ووزنوا ما يمشى كويس ويظهر عندي إسهال وتبدأ المشاكل بتاعة انو هو يبدأ علاجه البلدي ويجرب فترة بتاعة ستة شهور وستة شهور ما ساهلة انو هو يخلى الطفل تجيهوا حمى بالليل فلابد انو يقابل طبيب عشان الحالة تشخص لأنو الحالة دي هي في المرحلة دي مرحلة بتاعة علاج إذا كان القصة دي مشت قدام وبدت صحتها ما تمشى واسى هي كويسة قاعد تمشى الروضة لكن قد تصل مرحلة انو ما تقدر تمشى الروضة ويحصل ليها فقر دم وضعف وحاجات ذي دي فالأعراض هي أعراض متشابهة لأمراض كتيرة جدا جدا والله الزول ما يقدر يقول ليك عندها شنو عن طريق التلفون لكن لابد انو يشوف حالتها ويشوف تاريخ مرضها ويشوف إذا كان فعلا محتاجة لبعض الفحوصات أنا اتخيل لي انو يمشى لأقرب وحدة صحية يقدروا يعرفوا الحاصل شنو يعنى حالتها بتتعالج ما في مشكلة إنشاء الله

مقدم البرنامج :

 يس يعنى انت أكيد مهتم بها لكن كلام دكتور على دا مهم جدا انت لازم تصبر شوية ما تعتمد على القنقوليس بس هو قال في الأخير لجا الى القنقوليس ولازم ترجع للطبيب تانى وتصبر ذي ما بيقول دكتور على والفحوصات والتحاليل هي مضنية شوية لكن أكيد عشان تعرف المشكلة أصلها شنو وعلاجها إنشاء الله وربنا يدها الصحة والعافية  

                                 *** فاصل موسيقى ***

مقدم البرنامج :

دكتور على امكن يعنى نحنا ما زلنا في كلامنا عن مشاكل الأطفال حديثي الولادة الحقيقة نحنا عايزين نقيف في واحدة من المشاكل يعنى وردت في عدد كتير من أسئلة الأصدقاء المستمعين الاستسقاء الدماغي شنو ماهية هذا المرض هل هو عيب خلقي وهل هو بيحدث نتيجة لخطأ في الولادة وكيف التعامل معه

دكتور/ على عربي :

 الحقيقة طبعا الاستسقاء الدماغي هو مرض شائع واسبابوا كتيرة جدا في أسباب هي أثناء الحمل الىّ هي قبل الولادة ومرات يكون في أسباب خلقية يعنى معروف السائل النخاعي بيمشى بممرات معينة ومرات بيحصل قفل في واحد من الممرات دي والرأس يبدأ يكبر والطفل ما يقدر يطلع بطريقة كويسة قد تحتاج الأم لعملية قيصرية عشان يطلعوا الرأس أو أحيانا قد تحتاج انو الرأس ذاتوا يهشموا عشان الأم صحتها تكون أحسن فواحد من الأسباب بتاعتوا أسباب خلقية في أسباب تانية مرات بيحصل نزيف في واحد من التجاويف بتاعة المخ وبرضو يحصل قفل ويحصل استسقاء الىّ هو بيبدا من الولادة ويمشى قدام السبب الثالث برضو شائع جدا انو الطفل اذا كان أصيب بسحائي أو أصيب بي اى التهاب في المخ قد يحصل ليهو استسقاء دماغي يعنى الطفل بعد تجيهوا الحمى والتشنجات يبدأ بعد شوية الرأس يكبر ويكبر ويحصل الاستسقاء الدماغي .

مقدم البرنامج : يعنى تكون حالة التهابية ممكن

 

 

دكتور/ على عربي :

قد تكون حالة التهابية وقد تكون حالة بتاعة نقص أوكسجين أو حالة خلقية في بعض الأسباب مرات تكون أسباب بتاعة انو نزيف داخل المخ نتيجة ضربة في الرأس أو نتيجة حاجات تانية في بعض الأسباب قد يكون في ورم داخل المخ يعنى الطفل قد يحصل ليهو ورم في داخل المخ وبعداك يحصل الاستسقاء الدماغي الىّ هو انو الموية بتاعة الرأس بتزيد اذا كان الموية بتاعة الرأس بتزيد فحجم الرأس يزيد لأنو حجم الرأس بيكون لسه لين والطفل بيبدا يكبر ويبدأ يصل الى مقاسات كبيرة جدا وفى بعض الأحيان نادرة جدا يحصل انو سبب الوفاة أو ينزل تحت ويحصل ضيق في التنفس والطفل بيتوفى فالاستسقاء الدماغي قد يكون سببوا خلقي وقد يكون سببوا نقص بتاع أوكسجين أثناء الولادة وقد يكون سببوا التهابي مابعد اذا كان الطفل جاهوا اى التهاب في المخ أو جاهوا سحائي أو قد يكون سببوا نزيف أو سببوا ورم فدى الأسباب الأساسية للاستسقاء الدماغي

مقدم البرنامج :

هل في كل الأحوال يعنى يا دكتور الإصابة بالمشكلة دي تسبب إعاقة أو شيء له علاقة بالنمو السلوكي ونمو الطفل وفى تطور القدرات بتاعتوا

دكتور/ على عربي :

هو طبعا القصة دي تعتمد على الاكتشاف المبكر طبعا المشكلة في المخ انو كل مراكز الحركة وكل المراكز بتاعة الإحساس وكل المراكز بتاعة النظر والسمع الحاجات دي كلها في المخ فإذا كان في ضغط عليها نتيجة السائل الزائد دا قد يحصل مشكلة مثلا في النظر الطفل ما يشوف قد يكون في السمع الطفل ما يسمع مرات القصة يعنى تكون مشكلة في كل النخاع الشوكى يكون في بروز الظهر نتيجة ورم والطفل بعداك ذي يحصل شلل نصفى معه ودا مرات بيخلى الطفل يكون عندو إعاقة دائمة لأنو في أعصاب بتكون تؤثر على المثانة وتحصل مشكلة في الكلى هو كلما كان التدخل من بدري كلما كان القصة بقت أحسن وكلما تأخر كتير كلما القصة دي انو السائل دا ضغط على الأشياء الحيوية بتوجه وظائف الجسم وبتالي انو الطفل قد يصاب بإعاقة دائمة أو ما يسموها ( الشلل الدماغي ) الىّ هو عدم الحركة وعدم الكلام

مقدم البرنامج :

شكرا دكتور على حقيقة امكن نحنا ما زلنا في كلامك عن المشاكل التي يتعرضوا لها الأطفال حديثي الولادة ومتين تصبح الاستشارة الطبية خاصة اذا كان ذي ما انت ذكرت انو يعنى في نسبة امكن ما زالت الآن بتولد أمهات ولادة غير أمنة أو ما نسميها ولادة غير مؤسسات صحية أو مستشفيات شنو العيوب الخلقية التي يجب انو الناس تنتبه لها حتى لو كانت هي في مستشفيات وما تعرضوا لاختصاصي بتاع أطفال في الأيام الأولى

 

 

دكتور/ على عربي :

طبعا أهم العيوب ونحنا لازم نحرك بها القابلات انو الطفل لازم يلاحظوا المخرج بتاع البراز لأنو في أطفال بيتولدوا والمخرج دا ما موجود اذا المخرج ما موجود والطفل بدا يرضع بالتالي حا يصاب بانسداد وبيحتاج لعملية مستعجلة جدا عشان كدا لابد انو يتأكدوا من المخرج والطفل برضو بدا البول بتاعوا كويس انو مكان البول هو البول ومكان الفسحة للفسحة لأنو مرات بيحصل ذي اختلاط  انو الفسحة تطلع عن طريق البول أو البول يطلع عن طريق الفسحة ودي لازم تتراقب كويس ومرات في عيوب انو الطفل يكون في فتحة بين المرئي والرئة والطفل أول ما يرضع بيحصل ذي شرقة يعنى الطفل أول ما يرضع بيحصل شرقة لأنو في فتحة بين المرئي والقصبة الهوائية ويبدأ الطفل يتشرق ودي كلها مفروض تلاحظها وفى حاجات تانية الىّ هو الرجل الملفوته دي طبعا حاجة مهمة جدا ولابد ان يكون لها التدخل بتاعا بدري جدا يعنى مرات الرجل أحيانا يكون الاتنين داخلات لجوه أو الاتنين خارجات لبرا فبتالي لابد انو يحتاج الى تدخل لأنو القصة دي لو بدت لازم يعملوا لها جبس من بدري من الولادة وقد تستعدل بدل العملية الجراحية وكلما تأخر كلما احتاج لعمليات جراحية كتيرة فالعيوب التانية هي انو مرات في مشكلة في المفصل بتاع الرجل برضو إذا كان مخلوع برضو يحتاج الى تدخل من بدري وطبعا في مشاكل في الجلد هي لابد انو الأم ويعنى الأطباء بيعرفوا شنو الحاجة التي تحتاج لعملية مستعجلة أو لحاجات  باردة فالأطفال حديثي الولادة عشان ياخدوا التمام يعنى انو الطفل دا سليم لابد انو يقابلوا اختصاصي أطفال يكشف عليه كشف كامل يتأكد انو الطفل ما عندو مشاكل وحتى حكاية الاستسقاء الدماغي معروف انو امراضوا

مقاطعة من مقدم البرنامج : الكشف على الايادى

دكتور/ على عربي :

والكشف على الترقوة يعنى في مشاكل برضو في أطفال بتولدوا بمشاكل في القلب يكون في الجزء الشمال ما في الجزء اليمين وفى أطفال بيتولدوا بأورام في الكلى يعنى في مشاكل كتيرة جدا بتحصل مرات يعنى الأمهات بيعتبروا انو الطفل طبيعي بيخلوا المشاكل دي بعد تحصل أعراض وأعراض كبيرة جدا حتى بعداك يجيبوا للدكتور ويخشوا في معمعة

مقدم البرنامج :

 يعنى الوظائف الأولية دي بتاعة بتاعة انو التبول والتبرز انو الطفل ما يكون في ألم في اى حركة من حركات جسمه ممكن تكون دي مؤشرات أو دلالة على إنها تظهر اى مشكلة من المشاكل في الأيام الأولى

دكتور/ على عربي :

بعدين الطفل خاصة إذا كان هو كسلان شديد في بعض الأطفال الىّ هو لين يعنى ( الطفل اللين ) يعنى بيجونا أطفال يقول ليك الطفل دا لين ويكون عمرو سنة تقول من الولادة لا قعد ولا اتحرك يكون لين ورقبتوا ما بتثبت وبعداك يجيبوا متأخر جدا جدا فالأشياء دي كلها لو الناس لاحظتها من بدري بيكون أحسن واهم حاجة في الطفل انو تكون رضاعته جيدة وحركته تكون جيدة وبكاءه يكون محدود يعنى ما البكاء الكتير الذي يتواصل الليل كلوا والنهار كلوا والناس تعتبر خلاص دي حاجة طبيعية فلابد أن يعرض على طبيب أطفال يشوف الحاصل شنو ويتأكد انو اخراجوا كويس والتبول كويس ما يكون عندو مشاكل بتاعة حمى أو اسهالات أو مشاكل ذي دي  

مقدم البرنامج : شكرا جزيلا دكتور على يبدو انو معانا اتصال الآن الو السلام عليكم

مشاركة عبر الهاتف : وعليكم السلام ورحمة الله وبركاته

مقدم البرنامج : أهلا بيك

مشاركة عبر الهاتف : معكم الهجا موسى الإمام قرية فقيدة – المناقل

مقدم البرنامج : مرحب

مشاركة عبر الهاتف :

 يا دكتور عايز تعريف في بعض المعطيات الطفل في عمر تلاتة شهور الأم بتعطيه ماء بالجرعات هل الماء في مثل هذا العمر مفيد وما هو الزمن المطلوب حتى يعطى الماء للطفل وأخيرا حدثنا عن

مقدم البرنامج :

يبدو انو انقطع الخط بيننا وبين الأخ الهجا ، نحنا بنحييك وامكن فهمنا السؤال الأول حقيقة وكنا نتمنى نتواصل معه عبر السؤال الثاني ، الموية متين ندىّ الطفل الموية يا دكتور

دكتور/ على عربي :

الحقيقة طبعا أهم حاجة في الطفل تغذيته الىّ هي الرضاعة الطبيعية وطبعا الرضاعة الطبيعية دي ثروة قومية كبيرة جدا لا يضاهيها اى شيء والرضاعة الطبيعية أهميتها لا يختلف عليها اثنان يعنى الألبان الصناعية الموجودة يقول ليك لا يوجد لبن يضاهى لبن الأم وحسب شهادات الصحة العالمية ودي حاجة عالمية متعارفة انو الطفل ما مفروض يأخذ اى موية أو اى حاجة من برا يعنى اى أكل أو شرب قبل ستة شهور يعنى القصة زمان كانت أربعة شهور لكن أسى بقت ستة شهور فالطفل طبعا الموية ما بيحتاج ليها خلال ستة شهور

مقاطعة من مقدم البرنامج :

يعنى ناس بيقول ليك ناس الصحة العالمية ناس بيتكلموا على مناطق باردة ودول باردة نحنا هنا نولد الطفل شهر ستة أو شهر خمسة يا دكتور ونشرب في اليوم عشرة مرات موية فما ممكن ما نديوا موية في الفترة دي نقليها أو نعمل ليها شنو ولى برضو ما نديها

دكتور/ على عربي :

 أيوا طبعا هو نحنا لمن نعاين للطفل بياخد شنو الطفل بياخد لبن امو ولبن الأم بيمر بثلاثة مراحل المرحلة الأولى بيجى موية يعنى في شكل مائي بعداك بيجى شكل لبن عادى وبعد شوية يحصل الدهون وبعداك الطفل يشبع ينوم فالطفل بياخد حوجته من الموية من اللبن ذاتوا واى لبن أم 70% منه موية وبتالي ما بيحتاج لموية عادية

مقدم البرنامج : يعنى ما بيعطش نحنا بنتخيلوا عطشان

دكتور/ على عربي :

 أيوا لأنو لو شرب اللبن بتاع امو هو خلاص بيروى لأنو الموية موجودة في لبن الأم فالموية عندها مشاكلها التانية شنو البيحتاج ليها لأنو معظم الموية بيسموها موية غير صحية لان الناس بتشيلها وبتديها بالبزز والبزز مشاكلها للأطفال معروفة لأنو ما معروف التعقيم بتاعا كيف والحاجة البيدوا بيها ذاتا كان ملعقة أو كباية ما مدى نظافتها بتخلق مشاكل غير كدا انو الطفل معدته بسيطة جدا لمن تكون 30  -  40 ملى لمن تديها موية بيبقى انو الطفل يكون ما أخد غذاء بتالي صحته حا تتأثر فالموية ليس نافعة بالعكس مرات تكون مضرة جدا فالموية ما بننصح بيها إلا بعد ستة شهور فكل الأطفال نحنا أسى بنتابع أمهات كتيرات جدا يرضعوا رضاعة طبيعية مطلقة أطفالهم أصحاء ما بيجوا إلا للمتابعة ما بيجوك لأنو لا عندو إسهال ولا استفراغ لا حساسية في الجلد ولا التهاب في الصدر ويكون الطفل وزنوا ممتاز جدا يعنى زائد زيادة كويسة جدا وتقول ليك اديوا حاجة تقول ليها لا تديوا اى حاجة في الجو الحار دا نحنا مش القصة نقصد بيها ضرر الأطفال لكن بنفتكر ما دام في ناس بيعملوا القصة دي ومتابعين وحالتهم كويسة فبتالي ممكن القصة تتعمم عشان تعم الصحة والعافية لكل الناس ما تكون عند ناس معينين

مقدم البرنامج :

 إنشاء الله ، نحنا بنحييك كتير جدا دكتور على وبنذكر كل المستمعين إننا بنتابع معكم عيادة على الهواء وساعتنا الآن العاشرة إلا ثلث تذكروا حدود البرنامج العاشرة بمشيئة الله

                               *** فاصل موسيقى ***

مقدم البرنامج :

أيها الأصدقاء ( 87553152 ) هو رقم عيادة على الهواء هذا المساء دكتور على عربي استشاري الأطفال هو ضيف العيادة في هذا اللقاء ، دكتور على عايزين ننتقل امكن لواحدة برضو من المشاكل امكن كلنا يتعرف انو علاقة الأطفال بالحيوانات كتير جدا ولا سيما امكن في الأيام دي كلنا بنتابع مشكلة الناس بتتكلم عنها مشكلة انتشار الكلاب أو انو يختلط الأمر بين كلابنا القاعدة معانا والكلاب البتجى من الشارع الأطفال بيتعرضوا لي اى نوع من أنواع الهجوم من كلب أو قطط أو اى نوع من الأنواع التي يتعرضوا لها في البيت شنو الإجراء المفروض يتخذ إذا الطفل تعرض لي اى شيء من الكلاب ودايرين نعرف لو خلينا المسألة طنشناها ودعكنا لينا حتة ليمون مكان العضة أو الخربشة شنو الممكن يحصل نعم

دكتور/ على عربي :

الحقيقة طبعا دي حاجة مهمة جدا طبعا الحاجة البتطبق عليها انو الوقاية خير من العلاج فالسعر لمن يجى ما عندو علاج يعنى الطفل حا يموت حا يموت فبتالي اخطر حاجة انو تخلى الطفل يعضيهوا كلب أو اى حيوان بدون ما يمشى لأقرب وحدة صحية وبدون ما ياخد المصل بتاع السعر لأنو حالات كتيرة جدا مرات بتجى نتيجة انو حصل خربشة والناس تنتظر الطفل انو القصة عادى والطفل ما دام هو كويس وما في دم كتير ظاهر أو ما يحتاج لحاجة بيخلوها وبعداك الطفل يصاب بسعر ويموت لأنو أعراض السعر بدت يعنى لحدي أسى مافى حالة بدا السعر والعلاج واخد العلاج وبقى كويس

مقدم البرنامج :

بتظهر بعد كم يعنى أحيانا هذه الحالة انت قلت أحيانا أطفال ممكن يكونوا يلعبوا في الشارع أو كورة أو واحد يتعرض ليهم كلب أو طفل ما شايف قطة أو غيروا يضربا ويعفصا تقوم تخربشوا أو تعضيوا ومرات كتيرة بتقوم ذي ما قلنا بنعمل ليهو نغسلا ونمسحا وما فيها دم كتير وشوية ليمون ونفتكر انو المسألة انتهت والطفل ماشى عادى  

دكتور/ على عربي :

هو طبعا بيعتمد على حاجتين بيعتمد أول حاجة على المكان مثلا اى حته مثلا في الرقبة أو في العنق بتكون فترة الحضانة بسيطة جدا وعلى حسب الكمية التي ياخدها من المصل بتاع السعر وعلى حسب العضة ذاتا فدا كلوا بيؤثر فكلما كانت العضة عضة كبيرة في حته حساسة في أوعية دموية كبيرة كلما فترة الحضانة قلت كتير جدا وكلما كانت بعيدة جدا من الجسم مثلا في الرجل في حتات بعيدة كلما كانت فترة الحضانة قد تزيد شوية قد تستمر أسبوع قد تستمر عشرة أيام قد تستمر أسبوعين ويتفاعل السعر عشان كدا السعر يعنى اى اشتباه ليهو لابد انو يمشوا يقابلوا اقرب وحدة صحية عشان ياخدوا مصل السعر

مقدم البرنامج :

 نحنا حا نرجع دكتور على عشان نشوف مصل السعر دا والىّ هو أصلا بخلي الناس مرات تقول الله يكضب الشينة بدل نمشى نديوا ( 21 ) حقنه في البطن نشوف مصل السعر دا عملتوا فيهو شنو ونشوف نوع الجرعة وشكلها وشنو الإجراء الذي يتخذ لو الزول شك انو الطفل خربشوا كديس أو كلب أو اى شيء ممكن يعرضوا لمرض أو داء السعر

دكتور/ على عربي :

 طبعا الجرعة الناس بيتخوفوا يعنى زمان الناس لسه بيفتكروا انو لسه الحقن حول الصرة وهى ( 21 ) حقنه وكدا فمصل السعر أسى تغير يعنى أسى في حقن تقريبا ذي ستة حقن أو أحيانا سبعة حقن بيدوها على فترات معينة وهى فعالة جدا في منع السعر وفى أنواع برضو في بعض أنواع السعر بياخدوا بس ذي عشرة حقن برضو موجودة في أنواع كتيرة غير الحقن بتاعة البطن والحقن بتاعة البطن دي خلوها أسى يعنى خلال فترة الخمسة أو السبعة سنين الأخيرة دي انو ما في حقن بتاعة سعر في البطن فالمصل متوفر والناس تمشى وتطلبوا وبس

مقدم البرنامج :

يعنى هو موجود وممكن اى شك الزول يتصل بأقرب وحدة صحية وهو بعداك ياخدوا ويكون في مأمن من المشكلة حتى لو ما كان هو الحيوان الذي تعرض ليهو هو عندو سعر أو لا ، نحنا بنحييك دكتور على استشاري الأطفال وبنتابع معاك وبنحى المستمعين البيتابعونا عبر عيادة على الهواء.



                                 *** فاصل موسيقى ***

مقدم البرنامج :

مرحبا أهلا بكم برضو امكن دكتور ونحنا في هذا الفصل فصل الشتاء نحنا ما عارفين دي بداياتوا ولى نهاياتوا ولى أوسطوا الحقيقة امكن ارتباط الأطفال بكتير من المشاكل الصحية في الفواصل هي مشكلة وخاصة الأطفال الاصلا هم عرضة أو بيتعرضوا كتير يقول ليك والله الطفل دا صدروا خفيف كتير عندنا مسميات أقل فيروس اقل أنفلونزا اقل كحة بلقطا وبالعكس بتزيد عندو المسألة بتكون اكتر من الباقين عايزين نتكلم عن المشاكل الصحية المرتبطة بهذا الفصل شنو الوقاية المفروض نحنا نتخذا

 

دكتور/ على عربي :

 الحقيقة طبعا فصل الشتاء وهو دائما مشاكلنا بتجى مننا ذاتنا يعنى دائما فصل الشتاء الناس بتحاول قدر الامكان تقفل اى حته فيها هواء وتكون دائما قاعدة في حتات مغلقة وحتات مرات مزدحمة لأنها فيها دفو فهنا دي بيئة جميلة جدا جدا للأمراض يعن إذا كان اى زول عطس وطبعا العطس دا بيشيل ملايين الميكروبات فكل الناس الحولوا حا ياخدوا العدوى دي

مقاطعة من مقدم البرنامج :

 العطس كتير في المدراس وفى الرياض وذي ما قلت الشبابيك مغلقة

دكتور/ على عربي :

 وفى المواصلات العامة فالناس مفروض تتعلم انو لابد أن تستعمل المناديل وتحاول بقدر الامكان إنها بتعطس كتير وتكح كتير ما تمشى الشغل يعنى أحسن حاجة تكون قاعدة في البيت لأنو انت جيت الشغل حا تعطل ليك تانى خمسة ستة سبعة أفراد غيرك وغير كدا لو كان في ناس عندهم أطفال فأكثر ناس بيتأذوا من المشاكل دي هم الأطفال

مقدم البرنامج :

 دكتور على نحنا حا نقيف هنا معانا اتصال ونرجع إنشاء الله لهذا الحديث الو السلام عليكم

مشاركة عبر الهاتف : وعليكم السلام

مقدم البرنامج : أهلا بيك يا سيدي مرحبا

مشاركة عبر الهاتف : التحية ليكم ولبرنامجكم الناجح

مقدم البرنامج : تسلم يا سيدي منو معانا

مشاركة عبر الهاتف :

معاك عادل بخيت حسن النور من الصداقة – معتمدية الحصاحيصا

مقدم البرنامج : مرحبا أخ عادل اتفضل

مشاركة عبر الهاتف :

 عندنا طفل عمرو سنة وتلاتة شهور أنا وديتوا للطبيب وكتب ليهو بندول وشراب كدي يخلوهوا أنا ما عارف اسموا وما بستحضروا أربعة سيسى ونص صباح ومساء وعايز أشوف رأى الدكتور في الحته دي

دكتور/ على عربي : هو عندو شنو يعنى المرض بتاعوا قال ليك الطبيب شنو

مشاركة عبر الهاتف : والله قال لوز

دكتور/ على عربي : وصف ليك مضاد حيوي وخافض للحرارة

مشاركة عبر الهاتف : أيوا بعدين الوجبات بنسأل منها هل مضرة للطفل

مقدم البرنامج :

 الوجبات الجاهزة ولى الوجبات شنو يعنى البيشتروها من الصيدلية أو من البقالات دي

مشاركة عبر الهاتف : أيوا الجاهزة دي بنسأل الدكتور وجزاكم الله خير

مقدم البرنامج :

 هو أول طفل معليش يا عادل سؤال للأسف انقطع الخط اتفضل دكتور

دكتور/ على عربي :

هو أهم حاجة وعادل قال كلام كويس جدا انو الناس تفهم انو الطفل عندو شنو وتشخيص الطبيب واضح قال ليهو عندو التهاب في اللوز ولازم يفهم انو الدواء الاخدوا دا مضاد حيوي مش أخد حاجة تانية المضاد الحيوي واخد معاهو مخفض للحرارة  

مقاطعة من مقدم البرنامج :

عفوا يا دكتور دي مشكلة مرات يعنى كتير الناس بياخدوا الطفل ويمشوا يشتكوا نص ساعة ويقولوا كلام كتير والدكتور يكتفي بي انو يكتب روشته ويدها ليهم وهم يقوموا ياخدوا الدواء لكن المسألة بتاعة عندو شنو وحصلت كيف حا يطور المسألة دي يجى متين ما بتكون واضحة ونحنا ما عارفين مشكلة المريض ولى مشكلة الطبيب

دكتور/ على عربي :

 أنا أتخيل لي مشكلة المريض في الأول لأنو نحنا عندنا ناس بيقعدوا معاك ويتعبوك جدا ويقول ليك وريني مرضو عندو شنو بعداك الكويسة جدا جدا انو انت الطبيب أداك دواء خاص بتاع أطفال لازم تمشى تقرأ الورقة الجوه بتاعة الدواء دي لأنو مرات في بعض المضاعفات بتظهر مرات يكون في غلط مثلا صيدلي يكتب ولى يسهى في انو يكتب الجرعة الصاح شنو فالأب أو الأم لازم يتأكد من انو الدواء المكتوب هو ذاتوا لأنو مرات في ناس بياخدوا أدوية بديلة ولازم إذا أخد دواء بديل لازم يرجع للطبيب حتى لو الدواء اخدوا ولى ما اخدوا

مقدم البرنامج : برضو الطبيب لازم يورى مهما كان مستوى تعليمه أو خلافوا

دكتور/ على عربي :

 أيوا لازم يوريهوا المرض شنو فهو لازم يفهم انو التشخيص هو شنو ولازم يفهم انو الدواء الاخدوا هو مضاد حيوي وياخدوا لمدة كم يعنى اخدوا لمدة خمسة يوم سبعة يوم عشرة يوم وياخدوا قبل الأكل أو بعد الأكل دي إذا الطبيب ما قال ليهو ممكن يسأل منها الصيدلي يعنى استعمال الدواء ذاتوا يشوفوا كيف ويستعملوا بي شنو يعنى بالملعقة ولى بالحقنة

مقدم البرنامج : وينبهوا لخطورة انو لو كرروا براهوا

دكتور/ على عربي :

أيوا لو كرروا براهوا أو إذا كان الطفل استفرغوا ممكن يعيدوا بعد كم يعنى ممكن الناس تاخد حقها في القصة فالناس ما قاعد تاخد حقها وأنا أتخيل المشكلة كبيرة في المريض ما في الطبيب لأنو المريض إذا كان بس قبل انو يدوا الروشته ويمشى معناها عايز يخارج نفسو ما عايز يفهم الحاصل شنو

مقدم البرنامج :

نحنا عايرين نحرض مرضانا انو لازم ياخدوا حقهم من الدكتور يعنى يقعدوا يعرفوا الحاصل شنو

دكتور/ على عربي :

لازم يقعدوا ويعرفوا الحاصل شنو لأنو إذا كان الطبيب كتب اى روشته لازم تعرف انو الروشته اى حاجة مكتوبة فيها لي شنو مثلا الدواء دا هل للنزلة هل للكحة لأنو مرات بتحصل لخبطة يعنى بيجونا ناس شايلين أكياس بتاعة دواء يعنى أول حاجة بيكون الدواء مع دواء تانى لخبطوا والدواء التانى ذيوا ومشابهة ليهو واخدوا مع بعض انت بعداك ما بتقدر تعالج الطفل بتقوم تعالج مشاكل الدواء الذي أخذه الطفل فدى هلا المشكلة  الأساسية اتخيل لي أهم حاجة هي امتثال الحاجة الأساسية التي ناخدها من الأخ عادل انو لازم الناس تعرف هي بتاخد في شنو

مقدم البرنامج :

نقطة تانية امكن ذكرها عادل وأنا كنت أتمنى انو أنا سألته دا الطفل الأول أو الثاني مسألة التغذية الجاهزة كتير مننا نحنا كأمهات أو أباء بيكون عندنا مشكلة الأمهات بالتحديد بفتكروا انو والله الأكل حق الحكومة الجاهز دا أو جايبنوا من برا دا حا يفيد الطفل اكتر وحا يصلح صحتوا اكتر من أكلنا البنعملوا برانا في حللنا وفى أطباقنا في البيت فإلى اى مدى الاعتماد على الوجبات الجاهزة أو نوعا أو التغذية

دكتور/ على عربي :

هو طبعا دي حاجة مهمة جدا جدا أولا نحنا عيبنا كبير ما بنخلي الأطفال وما بنعلمهم أكل خاص إذا نحنا بنلد الأطفال بتلقي طفل عمرو تمانية شهور وتسعة شهور يدوا الأكل العادي بتاع البيت ودا غلط وعموما الشركات أوحت لي شنو أوحت لي انو الأكل الموجود دا كلوا أكل مدعم ولذيذ وفيهو بعض الأشياء مكتوب عليه فيهو فتمينات  وحاجات كتيرة جدا ديل لأنهم هم حاجة سمحة ونحنا عيبنا الاساسى انو بعض الأمهات ما بيقوموا يعملوا أكل خاص للطفل بيخلوا الطفل يأكل أكل عادى ودا غلط  فالطفل محتاج هو على حسب عمرو إذا كان هو صغير عمر ستة شهور يحتاج لتغيير الوجبات في اليوم  يحتاج لخمسة ستة وجبات بعد ستة شهور في اليوم من غير الرضاعة ويحتاج لأكل مخصوص الىّ هو أكل ما فيهو ألياف واكل ما فيهو بهارات ودا إذا كان الطفل اخدوا وقدرنا نعمل ليهو أكل ما في البيت أحسن لأنو الأكل الفريش في البيت والأكل الطازج دا أحسن حاجة للطفل لكن لابد إننا نعرف ما هي عناصر الأكل يعنى نحنا عيبنا الاساسى في تغذية الأطفال مرات بنعتمد على صنف واحد يعنى بعض الأمهات بيعطوا الطفل بس لبن يعنى الطفل عمرو ستة شهور أو سنة طوالى في اللبن واللبن دا بعد ستة شهور ما كافي للطفل مفروض الطفل يعطى بعض العناصر التانية ذي الخضروات ذي الفواكهة ذي الدهون ذي البروتينات والنشويات تخش في الأكل لأنو إذا انت أديت الطفل يعنى وجبه ما فيها عناصر كاملة التغذية الطفل يصاب بسوء تغذية ودي خلت انو الوجبات الجاهزة تخش وواضح الخلل دا مننا نحنا

مقدم البرنامج :

 وشكل إعدادها انت امكن أسى تكلمت عن الخضروات يا دكتور مرات نشيلا بمصماص موية كتيرة ونطلعا بعد ما يكونوا صفوا منها الموية دي ونهرسا ونديها للطفل ما عندها اى ملامح أو تشيل اى نوع من أنواع المولاحات أو الطبائخ ذي ما انت قلت نبتدى نهرسا ونأكلها للطفل وهى بتكون بكل دسامتها دهون وبهارات وكل الحاجات دي

دكتور/ على عربي :

أيوا عشان كدا تغذية الرضع أو صغار الأطفال لابد انو الناس تتثقف  فيها كويس جدا وتعرف انو الطفل في عمر ستة شهور لابد انو يبدوا بوجبات معينة ويبدأ يلحسوا لحدى الطفل ما يتعود عيبنا نحنا لحدي أسى ما عندنا الأطفال يعملوا اى استساغة للأكل لأنو الاستساغة للأكل لىّ لأنو معظم الاباء الىّ هم سريعين جدا لأنو إذا الطفل أخد وجبة طوالى يعطوا الوجبة التانية في لحظتها ويعطوا الوجبة الثالثة والوجبة الرابعة وتلقى الطفل مرات يرفض كل شيء فنحنا لابد انو الطفل نصبر عليه ونبدأ نلحسوا حتى لو رفض المرة الأولى نديوا المرة التانية لحدي ما يتعود على الأكل ويستسيغوا ولمن يستسيغ الأكل خلاص الطفل يتعود عليه ويأكلوا

مقاطعة من مقدم البرنامج :

 يعنى إذا أكل الزبادي الليلة بيقول والله ما بحب الزبادي خالص   

دكتور/ على عربي :

 أيوا في نفس اللحظة الزول يغيروا ويحاول معه كم مرة تالت مرة ورابع مرة بتلقي انو في سلوكيات بتاعة أطفال مرات الناس ما بتفهما مرات الأطفال بيكونوا عنيدين شوية يعنى ما يتقبلوا الأمر يعنى الطفل تديوا حاجة يقول ليك لا أنا ما عايزا فأهم حاجة إننا ما نأكل الطفل نعلموا يأكل كيف ودي الرسالة الأساسية للأطفال انو الأطفال ما نأكلهم لكن نوريهم يأكلوا شنو ولابد نحنا نعمل عناية كبيرة جدا لعناصر الغذاء الأساسية الىّ هي الخمسة الخضروات البروتينات والنشويات والدهون والفواكهة فالطفل لازم ياخد من الأشياء دي ولازم يستسيغ الأكل ويتعود عليه بمقاساته وكمياته التي يحتاج لها على حسب وضعوا

مقدم البرنامج :

نحنا بنحييك كتير جدا دكتور على عربي الحقيقة امكن أخرنا الحديث لأنو فيهو نقطة التغذية دي دائما واحدة من الموضوعات المهمة البتوقفنا كتير في كل حلقاتنا بس امكن تبقى لينا من الزمن ما اكتر من دقيقة أو دقيقة ونص عايزين برضو بعض الإرشادات ونحنا عارفين في هذه الفترة الانفلونزات الكتيرة كل يوم بطالعنا وذي ما انت ذكرت بتكون اكتر على الأطفال بيكونوا عرضة للمسألة دي وهم متواجدين في مدارسهم أو في رياض الأطفال أو حتى معانا في البيوت نعم

دكتور/ على عربي :

طبعا أهم حاجة انو الناس تتابع الإرشادات بتاعة اتخيل لي انو الخنازير واحدة من الانفلونزات الأساسية انو علمت الناس تتعامل كيف مع الإنسان أول حاجة منها غسيل الايدى مهم جدا لأنو الميكروبات بتكون قاعدة في الايدى ممكن تنتقل من مريض لمريض بالايدى الحاجة التانية العطس قدام الناس ما صاح الحاجة التالتة التهوية بتاعة الغرف لابد انو تكون في تهوية كويسة جدا ولابد انو الهواء يتجدد في الغرفة بطريقة كويسة وإذا كان الطفل مريض أو الزول الكبير مريض أحسن ليهو يقعد في البيت ما يمشى للشغل أو الروضة عشان ما يعرض الناس الآخرين للإصابة دي أهم الرسائل المفروض الناس ترسلا

مقدم البرنامج :

شكرا دكتور على عربي استشاري الأطفال الأستاذ المساعد بكلية الطب جامعة الخرطوم نحنا سعدنا كثير جدا وبتأكيد امكن سعد معي كل المستمعين الذين تابعوا معي هذه الحلقة نحاول دائما إنشاء الله في حلقات قادمة إننا نتعرض لكثير من المشكلات التي ترد في أسئلة المستمعين ، دكتور على بنحييك وربنا يديك الصحة والعافية

دكتور/ على عربي : نتمنى الصحة والعافية للجميع إنشاء الله

مقدم البرنامج :

 شكرا لكل الذين تابعونا عبر هذا اللقاء من عيادة على الهواء لكم تحايانا طه عبد الرحمن طه ، يس عبد الله ، تحياتي إسراء زين العابدين الأسبوع القادم لقاء جديد عيادة على الهواء الإخراج منى صالح .

تنقل بين البرامج
مشاكل آلام المفاصل الأسباب والوقاية الحلقة التالية البرنامج السابقة مشاكل النساء بعد سن الخمسين
التعليقات تخص صاحبها ولا تخص ادارة الموقع

أخبار من الأولى

آخر المواد الصوتية