SmartSection is developed by The SmartFactory (http://www.smartfactory.ca), a division of InBox Solutions (http://www.inboxsolutions.net)
البرامج الاذاعية > عيادة على الهواء > : إلـتهـاب اللـوزتين المتكــرر
: إلـتهـاب اللـوزتين المتكــرر
نشره أصدقاء في 2010/7/15 (5261 عدد القراءات)

بسم الله الرحمن الرحيم

عيادة على الهواء

موضوع الحلقة : إلـتهـاب اللـوزتين المتكـرر – بثت 1 / 7/ 2010م

 مقدم البرنامج :

إسراء زين العابدين

 الضيف :

دكتور/ يوسف الأمين عبد الحي استشاري الأذن والأنف والحنجرة

 مقدم البرنامج :

 لكل الذين يتابعوننا عبر هذا البرنامج الاسبوعى نقول شكرا لكل الأسئلة والاستفسارات والمتابعات التي ترد الى البرنامج نشكركم على حسن ثقتكم في البرنامج نأمل أن يكون دائما عند حسن الظن ونأمل أن نوفق في تقديم خدمة ترضى جميع مستمعينا وتذكروا أن هذا البرنامج نهدف من خلاله وفى المقام الأول الى نشر الوعي الصحي ، مرحبا أهلا بكم لقاء جديد يتواصل معكم وهاكم تحايا الفريق الذي يصحبني عبر هذا اللقاء ، أيها الأصدقاء أهلا بمتابعتكم ونرحب كثيرا جدا بمشاركاتكم عبر أرقام هواتف البرنامج ( 87553152 ، 87553151 ) أيها الأصدقاء دعوني أرحب به ضيف هذا اللقاء دكتور/ يوسف الأمين عبد الحي استشاري الأذن والأنف والحنجرة أهلا بيك كثير جدا دكتور يوسف وبنحييك وسعداء بهذا الحضور وتلبيتك لدعوة البرنامج ونسعد دائما بكثير من الخدمات التي تقدمها للبرنامج ولمستمعينا الأعزاء أهلا بيك

 

دكتور/ يوسف الأمين : وعليكم السلام ورحمة الله

 مقدم البرنامج :

 مرحبا دكتور يوسف ، اذاً أيها الأصدقاء في هذا اللقاء سنتحدث عن ( التهاب اللوزتين المتكرر ) ومشاكل بعد إجراء العملية ، ما هو التهاب الغدد اللمفاوية وكيف يحدث وكيفية الوقاية منه ، مشاكل ضعف السمع أسبابها وان كانت ترتبط ببعض الأمراض المزمنة ، أيضا ونحن مع بداية الموسم المدرسي كيفية الوقاية من العديد من الأمراض المعدية في اللوزتين وأيضا مشاكل أمراض الغدد الأذن والأنف وخاصة عند الأطفال ، اذاً أهلا مرحبا بكم دكتور يوسف الأمين بنرحب بيك مرة تانية ونبدأ بواحدة من المشاكل أو الأمراض الشائعة جدا التهاب اللوزتين المتكرر

 دكتور/ يوسف الأمين :

 هو في البداية أحب أقدم حاجة عن تشريح اللوزتين يعنى كتير من الناس ما بيعرفوا كم عدد اللوز في الجسم هي ما بس لوزتين موجودتين في جنبهم اتنين برضو بين اللوزتين العروفتين وبين اللسان وفى لوزة ثالثة في منطقة سقف الحلق وغير ديل وديل امكن يكون خمسة لوز كبيرة في أنسجة لمفاوية موجودة تحت الغشاء المخاطي في منطقة البلعوم من ناحية عامة

 

مقاطعة من مقدم البرنامج : دا كلوا بيلتهب

 دكتور/ يوسف الأمين :

ممكن كلوا يلتهب في وقت واحد وممكن تلتهب بس اللوزتين الموجودتين في مقدمة الحلق فإذا شلنا اللوزتين في لوز غيرهم موجودة في لوزتين جنب اللسان وفى لوزة ثالثة خلف الحلق أو خلف الأنف أو في سقف الحلق ذي ما بيسموها ، الالتهاب التكرر دائماً بيحصل اكتر في الأطفال برضو ممكن يحدث عند الكبار التهاب اللوزتين في الكبار دائما بيكون شديد اكتر من الأطفال والتكرار بتاعوا ما بيكون كتير وبعدين المضاعفات منه بتكون اكتر ما ذي بتاعة الأطفال

 مقدم البرنامج :

 يعنى أعراضه بتكون نفس الأعراض ولى هنا بتكون ذي ما انت ذكرت شديدة

 دكتور/ يوسف الأمين :

 شدتها بتكون اكتر والمضاعفات منها مثلا وجود خُراج باللوزة دا موجود اكتر عند الناس الكبار اكتر من الأطفال الاستجابة دائما للعلاج بتكون سريعة في الأطفال اكتر من الناس الكبار دا بالنسبة للالتهاب المتكرر وهو ما عندو سبب محدد يعنى طفل يكون عندو لوز متكررة وطفل يكون ما عندو لوز متكررة ما فى سبب محدد لكن تعرض الطفل الى الميكروب وانتقال الميكروب للطفل حتى الناس الآخرين سواء كانوا إخوانه أو زملاءه في المدرسة أو الروضة دا البيخلى الالتهاب يحصل اكتر وطبعا له علاقة بنمو الجسم بتاع الطفل ومقاومته للأمراض وتغذيته يعنى في عوامل كثيرة بتخلى الطفل يكون معرض اكتر لالتهاب اللوزتين المتكرر

 مقدم البرنامج :

 طيب دكتور ذي ما انت تفضلت وذكرت انو بيصبح أحيانا مزعج يعنى تكراره ممكن شهريا يكون عند الأطفال أو أحيانا يتكرر اكتر ويتسبب في غياب من المدارس يتسبب في عدم شهيه الطفل ، مشاكل في البلع والوزن ، كتير من الأطباء ينصحوا أو يقول ليك والله ما تشيل اللوزتين خليهم لما يكبر الطفل المسألة بتختفى أو بتقل وانت أسى قبل شوية قلت ممكن برضو يحصل عند الكبار يعنى المسألة بتمشى ولى فعلا هو ممكن تكرار العملية أو إزالة اللوزتين ذاتا هي بتخضع لمعايير مختلفة

 دكتور/ يوسف الأمين :

 أكيد هي عشان تعمل عملية اللوزتين لازم يكون في ما يسمى دواعي يعنى حاجة بتبرر شيل اللوزتين لأنهم هم برضو عندهم وظيفة لكن مرات لما يفقدوا الوظيفة دي أو يكونوا مصدر لمضاعفات ومشاكل تانية ممكن تحصل منهم والتكرار لما يكون كتير يؤدى طبعا الى مشاكل داخل الجسم وبعدين في مشاكل تانية اجتماعية واقتصادية حتى ممكن تدخل في الحته دي فالالتهاب المتكرر مرات بيبرر شيل اللوزتين لأنو بيكون وجوده فيه ضرر للجسم اكتر من عدم وجوده عشان كدا مرات بينصح بإجراء العملية لتفادى مشاكل الالتهاب المتكرر ولتفادى المضاعفات التي ممكن تحصل من اللوزتين في الجسم ومسائل النمو ومسائل برضو تأثيرهم على الأسرة وعلى المدرسة والحاجات الاجتماعية دي كلها بتدخل في تقييم الإنسان للحالة وبعدين الحل عن طريق إجراء عملية

 مقدم البرنامج :

هل بتجرى العملية أيضا عند الناس الكبار ذي عمليات الأطفال بكل أشكالها

 دكتور/ يوسف الأمين :

 نعم ممكن تجرى في الناس الكبار برضو لما يكون فيها مشاكل وفيها مضاعفات أو التهاب شديد أو حصل فيها خُراج الواحد بيتخوف منها إنها تعمل مشكلة في الجسم

 مقدم البرنامج :

نحنا حا نرجع برضو امكن حا نقيف عند اللوزة الثالثة التهابها ومتين بتظهر وأيضا يعنى هل قرار إزالتها أو مشاكلها ممكن تسبب إذا تكررت في شكل التهابها عموماً بنرحب بكل البيتابعونا ومعنا أول اتصال في هذه الحلقة الو السلام عليكم

  مشاركة عبر الهاتف : وعليكم السلام ورحمة الله  

مقدم البرنامج : أهلا بيك يا ستى منو معانا

 

مشاركة عبر الهاتف : معاكم امانى عباس المليح

 

مقدم البرنامج : أهلا يا أخت امانى اتفضلى

 مشاركة عبر الهاتف :

 طبعا عندي وجع حلق لمدة شهر ونص واخدت له علاجات واسى يعنى فيه ورم وأخر شيء أسى كان مشيت الدكتور واخد منى فحوصات واسى قال لي تقابلي اخصائى على أساس انو يعمل عملية يعنى أسى الحلق جوه فيه ورم احمر

 مقدم البرنامج : امانى انتِ عمرك كم  

مشاركة عبر الهاتف : عمري 27 سنة

 مقدم البرنامج :

طيب خليك معانا لحظة دكتور يوسف إذا حابى توجه لها بعض الأسئلة

 دكتور/ يوسف الأمين :

 امانى انت الالتهاب دا بيكون باستمرار والألم في الحلق بيكون على طول موجود ولى بيروح وبيجى بعد العلاجات

 مشاركة عبر الهاتف :

 زمان كان عمري سبع سنة كان بيجينى طوالى واسى بعد ما كبرت ما بيجينى واسى لمدة شهر ونص بقى بيجينى طوالى

 دكتور/ يوسف الأمين :

 هو طبعا مرات يعنى يستمر شهر ونص دي كتيرة شوية في قصة انو العلاج مفروض يشيلوا أو يقللوا يعنى يختفي أيام ويرجع تانى دا بيحصل عندك ولى ما بيحصل

 

مشاركة عبر الهاتف : أيوا يعنى يومين تلاتة تانى بيقوم علىّ

 دكتور/ يوسف الأمين :

 مرات الحالة دي سببها العلاج ما بيكون مكتمل أو ما بيكون فعّال لأنو في مكروبات معينة في اللوزتين بتحتاج لنوع معين من المضادات الحيوية والاستعمال لفترات طويلة ما بسيطة بتاعة أربعة خمسة يوم امكن تحتاج علاج لمدة أسبوعين على الأقل ، أولا إذا قابلتي اخصائى نتمنى انك تاخدى العلاج لفترة طويلة وتنتظمي فيه لأنو مرات كتيرة يعنى الواحد بيبدا العلاج ومجرد ما يحس انو هو بقى كويس يقوم يوقف العلاج ودا خطأ مفروض الجرعة تكون كاملة لمدة محددة يحددها الطبيب المشرف للعلاج فبعد ما تكمل العلاج حتى بعداك تفكري في قصة العملية يعنى بعد الفشل في العلاج بالأدوية حتى بعداك تجى قصة العملية

 مشاركة عبر الهاتف :

 يعنى أول كان فيه ألم أسى بقى ما فيه ألم

 دكتور/ يوسف الأمين :

 أيوا الالتهاب لمل يبقى مزمن ما بيكون فيه الألم بتاع الالتهاب الحاد والالتهاب الحاد فعلا بيكون معه ألم

 مقدم البرنامج :

 امانى نحنا بنتمنى انك ترجعي تانى تعاودي طبيبك وذي ما ذكر دكتور يوسف برضو تشوفي المسألة بتاعة العلاج تتناقشي معه فيها عشان ما تلجأى للعملية مباشرة ، شكرا ليك يا امانى ربنا يديك الصحة والعافية ، دكتور يوسف امكن سؤال اختنا امانى بيرجعنا لنقطة مهمة جدا هل في بعض الممارسات والسلوكيات هي ممكن تخلى الالتهاب متكرر خاصة عند الناس يعنى تخلى حدة الالتهاب يعنى يقول ليك والله الطفل دا بيشرب موية باردة شديد أو عندما يتعرض لجو معين أو سخانة أو حتى الشخص إذا كان كبير

 دكتور/ يوسف الأمين :

 نعم هو كتير من الحاجات ذي دي لها تأثير مباشر على انو تبدأ المسألة بتاعة التهاب اللوزتين بالذات الموية الباردة الشديدة والحاجات السُخنه شديد وبعدين بمجرد ما يبدأ العلاج مرات الناس بيمشوا وحدهم للصيدلية ويتناول كبسولات أو يعنى يتصرف بطريقته ودا خطأ كبير جدا ما ننصح انو الزول يمشى ياخد علاج بدون ما يستشير طبيب وثانيا لما الطبيب ذاتو يوصف الدواء الواحد يلتزم بالجرعة وبالمدة دا عشان يقضى على الالتهاب ما يقللوا وبعدين يرجع تانى لأنو الميكروب إذا كان أخد مضاد حيوي وبعدين لما يجى تانى إلا نديوا مضاد حيوي أقوى لأنو احتمال يكون حصل نوع من المقاومة للأدوية من الاستعمال الغير مرشد

 مقدم البرنامج :

 دا لو ما التزمنا نبلع حبه الساعة كدا نفط تلاتة أربعة ساعات من مواعيد الجرعة الثانية

 دكتور/ يوسف الأمين :

 أيوا بالضبط يعنى الواحد ما يوقف براهوا العلاج ويبدأ العلاج

 مقدم البرنامج :

 شكرا دكتور يوسف امكن عايزين نرجع لموضوع اللوزة الثالثة لكن قبل كدا معانا اتصال الو السلام عليكم

 

مشاركة عبر الهاتف : وعليكم السلام والرحمة

 

مقدم البرنامج : أهلا بيك يا سيدي منو معانا

 مشاركة عبر الهاتف :

 النور نور الدين صالح محلية غرب بارا ولاية شمال كردفان

 

مقدم البرنامج : أهلا بيك أخ النور اتفضل

 

مشاركة عبر الهاتف :

والله أنا بصراحة عندي سؤال خارج الموضوع لكن داير دكتور يوسف يرد عليه

 

مقدم البرنامج : خارج التخصص يعنى ولى الموضوع شنو

 مشاركة عبر الهاتف :

 سؤال مكلف به يعنى طفلة عمرها شهرين ومصابة بموية في العيون اكتشفناها بعد عشرين يوم من الولادة وديناها لدكتور في الأبيض وقال لنا دي ما عندها علاجات فانا داير اعرف هل يكون يعنى دي خِلقة ولى بتتعالج شكرا جزيلا

 مقدم البرنامج :

 شكرا يا النور ، هو تكلم عن موية في العيون

 دكتور/ يوسف الأمين :

 أنا افتكر انو وأفضل يعرضها على استشاري إذا جابا الخرطوم يكون أحسن طبعا عشان ما طوالى يقولوا ما في علاج لأنو على حسب علمي في تطور وكل يوم في شيء جديد ، بالنسبة لاخونا النور ينصح الجماعة أهل الطفلة انو يجيبوها الخرطوم يشوفا اخصائى

 مقدم البرنامج :

 نتمنى انو تكون سمعت نصيحة دكتور يوسف ودي نصيحة اى طبيب انو لازم الناس تسعى عموماً يا النور نحنا نتمنى انك ذي ما قال ليك تعرضوها مرة تانية على اختصاصي عيون برضو لو احتجتا لي اى متابعة أو مساعدة اتصلوا بنا في البرنامج عبر عيادة على الهواء شكرا جزيلا، نرجع دكتور يوسف لموضوع اللوزة الثالثة متين بيظهر هذا الالتهاب بتاع اللوزة الثالثة هل هو حاجة خَلقية بيتولدوا بها الأطفال وبتظهر عند البعض وما بتظهر عند الآخرين أحيانا تسبب في كثير من المشاكل خاصة عند الأطفال ربما حتى في السنوات الأولى

 دكتور/ يوسف الأمين :

 امكن كتير من الأمهات بيتفاجأوا لما يقولوا لهم في لوزة ثالثة ، يا جماعة اللوزة الثالثة دي هي شيء طبيعي موجود في اى طفل موجودة في سقف الحلق بمعنى انو خلف الأنف يعنى في تجويف خلف الأنف المنطقة دي بتوجد فيها غدد ليمفاوية تحت الغشاء المخاطي وما يعرف باللوزة الثالثة وهى ما حاجة خطيرة ولا حاجة غير طبيعية ولما تلتهب اللوز بتقوم تلتهب اللوزة الثالثة ولما تلتهب اللوزة الثالثة بيكون حجمها زائد وتتضخم وتسد مجرى الأنف من الوراء عشان كدا الافرازات ما بتلقى طريقة تتصرف خلف الأنف بتجى لقدام والطفل بيشوفوا انو انفوا بيجرى والانسداد الذي يحصل في المنطقة دي بيؤدى الى انو الطفل يتنفس عن طريق الفم والتنفس عن طريق الفم طبعا أساسا دا ما الشيء الطبيعي الموجود عشان كدا بيقوم يحصل مشاكل في الإنسان ومشاكل في الحلق ومشاكل في النمو بتاع المنطقة الوسطية للوجه وتأثير اللوزة الثالثة على الأذن ممكن يؤدى الى التهاب غير صديدي داخل الأذن أو التهاب صديدي متكرر في الأذن الوسطي وجود اللوزة الثالثة والتهابها المتكرر ممكن يؤدى الى مضاعفات والمضاعفات دي ببساطة ممكن علاجها بعلاج اللوزة الثالثة نفسها سواء علاج طبي أو جراحي ودائما نحنا بنلجأ في الأطفال للعلاج الطبي في الأول وبعد الفشل بعداك ممكن تتعمل عملية والعملية بسيطة وساهلة وما فيها اى مشاكل إنشاء الله

 مقدم البرنامج :

 الطفل بيكون فاتح فموا على طول عندو حمى أحيانا وشخير ، شكرا دكتور يوسف معانا اتصال الو السلام عليكم

 

مشاركة عبر الهاتف : عليكم السلام والرحمة

 

مقدم البرنامج :

أهلا بيك يا سيدي مرحبا

 

مشاركة عبر الهاتف : نور الدائم احمد مكي من الهلبة غرب الدويم

 

مقدم البرنامج : مرحب أخ نور الدائم اتفضل

 

 مشاركة عبر الهاتف :

 دايرين نعرف يا دكتور تأثير التهاب اللوزتين على الجهاز الهضمي أو البولي والسؤال الثاني أنا داير اعرف يعنى دخول الجسم الغريب في الأذن أو الأنف ما مدى تأثيره

 

 مقدم البرنامج :

جسم غريب قاصد به شنو يا نور الدائم يعنى حاجة ينظف بها اذنوا ولى حشرة ولى شنو

 

 مشاركة عبر الهاتف :

أيوا حشرة ولى حاجة صغيرة بتكون قاعدة ساكنة في الأنف فدايرين نعرف مدى تأثيرها وشكرا لكم

 

 

مقدم البرنامج : شكرا يا نور الدائم كتر خيرك اتفضل دكتور

 دكتور/ يوسف الأمين :

تكلم عن تأثير اللوزتين أو التهاب اللوزتين على الجهاز الهضمي والجهاز البولي امكن يكون اللوزتين موجودات في البلعوم والبلعوم طبعا بوابة الجهاز الهضمي والجهاز التنفسي الاتنين ففي الجهاز الهضمي الالتهاب المتكرر في اللوزتين في الأطفال بالذات ممكن يؤدى يعنى التهاب اللوزتين يكون مصحوب بألم في البطن فدا شيء عادى مع اللوز بيحصل ، أما بالنسبة للمضاعفات التي ممكن تحصل من التهاب اللوزتين في الجهاز الهضمي فممكن يكون مسألة إسهال أو مسألة إمساك اكتر من طبيعي ولى في مضاعفات تانية ممكن تحصل برضو في الجهاز البولي ذي التهاب أغشية الكلى من الداخل ودا بيؤدى الى وجود زلالي في البول بالنسبة للالتهاب المتكرر في اللوزتين بيعمل مضاعفات في الكلى لكن اخطر من الجهاز الهضمي والبولي وهو الجهاز الدوري وهو القلب فوجود اللوزتين والتهابهم بيؤدى الى بالذات في مكروب محدد لما يصيب اللوزتين الجسم بيفرز مضاد ضده ولسوء الحظ انو المضاد الذي يفرزه الجسم ضد المكروب الذي يصيب اللوزتين ممكن يؤثر على أغشية القلب وأغشية الصمامات وفى عضلات القلب والغشاء المغطى للقلب يعنى ممكن يعمل مشكلة في كل الثلاثة مناطق في القلب ودي اخطر حاجة نحنا بنخاف منها انو تحصل بالنسبة للأطفال عشان كدا في فحص محدد بنحدد به المادة السامة التي تفرزها اللوزتين في الجسم ودي بتحدد سرعة إجراء العملية اكتر لما يكون في تحديد القلب من ناحية الالتهاب المتكرر

 مقدم البرنامج :

 طيب دكتور يعنى أحيانا كتيرة ناس يقول ليك والله عملنا عملية اللوزتين لكن برضو مع كل المؤثرات دي أحيانا بيتعرض الشخص الى التهابات تغير في الصوت احتقان في الحلق

 

 دكتور/ يوسف الأمين :

طبعا أساسا اللوزتين هي جزء من الحلق ما كل الحلق وما الالتهاب الذي يحصل في اللوزتين هو بس يعنى خاص باللوزتين فقط فدائما بيكون معه  نوع من الالتهاب في أغشية الحلق الموجودة في غير منطقة اللوزتين فاستئصال اللوزتين ممكن يعقبه التهاب في الحلق لأنو الحلق موجود يعنى ما بيستأصل بيكون موجود عشان كدا الألم الذي يجى بعد استئصال اللوزتين قد يكون نتيجة لالتهاب في الحلق

 

 مقدم البرنامج :

  يعنى نفس المؤثرات الكانت بتؤثر على الزول برضو بيكون ممنوع من الأشياء الباردة أو الثلج

 

دكتور/ يوسف الأمين :

 نعم لأنو دي ممكن تهيج الحلق وتعمل التهاب بعداك

 

 مقدم البرنامج :

 شكرا جزيلا دكتور يوسف ، ما زلنا نتواصل معكم مستمعي الأعزاء عبر عيادة على الهواء ، مرحبا أهلا بكل المستمعين البيتابعونا نذكركم بأرقام هواتفنا ( 87553151 ، 87553152 ) دكتور يوسف الأمين هو ضيف العيادة ، معانا اتصال الو السلام عليكم

 

  مشاركة عبر الهاتف : عليكم السلام ورحمة الله التحية ليك ولإذاعة أم درمان

 

 

مقدم البرنامج : أهلا بيك يا سيدي منو معانا

 

 مشاركة عبر الهاتف :

 معاك قسم الله إسماعيل عوض الله قرية مستورة جلاب الهوارة محلية تندلتى ولاية النيل الأبيض

 

 

مقدم البرنامج : أهلا بيك يا قسم الله حبابك اتفضل

 

 مشاركة عبر الهاتف :

 أنا معجب بالبرنامج الشيق والذي خدم المواطنين الضعفاء بالذات وأنا شخصياً الحمد لله بلغت الصحة عبر هذا البرنامج وشكرا للدكتورة امتثال محمد على والدكتورة مواهب بن إدريس

 

مقدم البرنامج :

شكرا ليك ونحنا بنحيهم ونتمنى انو إنشاء الله نوفق في هذه الخدمة ونشكر كل السادة الاختصاصيين والأطباء ضيوف البرنامج الذين يتعاونوا معنا دائما

 

مشاركة عبر الهاتف :

 نتمنى لكم التوفيق وبسأل دكتور يوسف عن الجفاف بتاع الحلق والنحنحة الكتيرة دي يا دكتور أحيانا الواحد يتنحنح كتير والريق ينشف بعض الأحيان هل عملية وضع الملح هل هو عملية صحية دي عندنا نحنا هنا العرب نحنا بنستعملها يعنى أحيانا بلين والواحد بيكون كويس

 

مقدم البرنامج :

 شكرا ليك يا قسم الله ، موضوع مهم جدا يعنى مسألة جفاف الحلق ، قسم الله انت معانا على الخط

 

 مشاركة عبر الهاتف : أيوا

 

دكتور/ يوسف الأمين :

 انت يا قسم الله بتشكي من اى شيء في الأنف

 

مشاركة عبر الهاتف :

 والله يا دكتور في الأنف بالذات الحمد لله بلغت الصحة ا عندي اى مشكلة لكن الجفاف في الحلق شوية

 

دكتور/ يوسف الأمين :

 هو مرات الجفاف الذي في الحلق بيكون نتيجة لمشكلة في الأنف لكن طالما انت ما عندك المشكلة دي احتمال يكون في شيء في الحلق نفسه امكن التهاب أو حساسية فى الحلق أو انك ما تشرب سوائل كفاية يعنى مفروض الجسم ياخد كفايته عشان ما يحصل جفاف في جزء من أجزائه ، وموضوع الملح بالمناسبة هو رغم من انو شيء بسيط وموجود لكن الناس بيجهلوا أهميته هو حاجة مفيدة جدا يعنى أهم شيء ما يكون التركيز بتاع الملح كتير يكون تركيز خفيف في موية مغلية ومبردة ودي ممكن تكون كغرقة مفيدة جدا للإنسان يعملها في البيت لكن بالنسبة لمشكلتك بتاعة جفاف الحلق فبتحتاج انو يعاينك واحد من الأطباء عشان يشوف المشكلة في الحلق ولى في حته تانية

  مقدم البرنامج :

دكتور يوسف امكن يكون عرض لواحد من الأمراض أو المشاكل أيا كان مسألة جفاف الحلق أو العُشراقة أو النحنحة ، شكرا ليك نحنا بنحييك امكن السؤال برجعنا الى سؤال كان سألو واحد من المستمعين قبل قليل مسألة دخول شيء غريب في الأنف أو الأذن وامكن بتكتر ونحنا داخلين على فصل الخريف ، وهو برضو تكلم عن الناس الذين يعيشوا في الخلاء أو البتكون حركتهم يعنى أحيانا بيتعرضوا لهذه المسائل

 دكتور/ يوسف الأمين :

أخونا نور الدائم امكن سأل عن دخول جسم غريب ، طبعا الجسم الغريب عشان يدخل في الجسم قد يكون شيء مقصود زول بنفسوا يقوم يدخل حاجة أو يكون شيء غير مقصود الىّ هو مسألة حشره جاية طائرة ودخلت في الأذن أو الأنف أو الحلق أو غيره

 

مقدم البرنامج : يعنى ممكن تقعد في مكانا

 

  دكتور/ يوسف الأمين :

 أيوا مثلا إذا دخلت في الأذن بكل بساطة إذا أضاءت لها نور يعنى بطارية ممكن تجى طالعة وإذا كانت مزعجة وإذا كان فيها أطراف حادة ممكن تعمل مشاكل جوه وممكن تكب لها مثلا زيت سمسم أو زيت زيتون في الحالة دي ممكن هي توقف التحرك وبعداك تستشير طبيب انو تطلعا ما تخليا لأنو جسم الإنسان بيرفض اى شيء غريب عليه وإذا دخل جسم مثلا وقعد فترة طويلة ممكن يؤدى الى تقلص في منطقته أو يؤدى الى التهاب متكرر أو يؤدى الى رائحة نتنة مثلا بالذات في الأطفال ما يكلموا الناس الكبار يقوموا يدخلوا حاجات في انفهم أو اذنهم ويجى بعد فترة يكون في شيء يعنى رائحة نتنة تطلع من الأنف نتيجة لوجود الجسم الغريب المنسي والأهل ما شافوا وما قدروا يعرفوا فاستخراج الجسم الغريب مهم من الأعضاء الطبيعية للإنسان لتفادى المضاعفات الممكن تحصل منه لكن دائما استخراج الجسم الغريب مفروض يتم عن طريق دراية بتشريح المنطقة وعن طريق طبيب مختص وممارس ومتمكن لأنو المضاعفات الممكن تحصل من استخراج الجسم الغريب قد تكون اكتر من وجود الجسم الغريب نفسه حاجة بسيطة لكن الناس ممكن تحصل منها مشاكل من عدم العلم بطريقة استخراجها

 

 مقدم البرنامج :

 أحيانا يا دكتور الموية يعنى الشخص يتعرض لموية تدخل له في اذنه في حمامات السباحة أو حتى في الحمام ودائما الأطفال بيتعرضوا لها وتسبب لهم قلق وبكاء وصًراخ بالليل وأحيانا عدم نوم وحتى الكبار ممكن يتعرضوا لهذه المشكلة

 دكتور/ يوسف الأمين : 

المشكلة فيها انو لو الموية فيها ملوثات غير البكتريا فيها أيضا فطريات وفيها أملاح وفيها أجسام غريبة كتيرة ممكن تدخل معها فدى الخطورة هنا وبالذات إذا الإنسان أساسا كان عندو مشكلة في الأذن ودخلت موية مثلا عندو مشكلة بتاعة التهاب مزمن في الأذن والطبلة مفتوحة فالموية مباشرة بتدخل داخل الأذن الوسطي وبعدين تجدد الالتهاب ويحصل ودا يمكن يلاحظوا كتير من المرضى الذي يكون عندهم أساسا التهاب مزمن في الأذن وصديد بيطلع من الأذن بتكون الأذن بتنشط أو بطلع صديد بعد ما تتعرض للموية أثناء الحمام أو أثناء الوضو مثلا الواحد يعمل حسابوا ما يخلى الموية تدخل جوه ودي دائما نصيحة بنديها للناس الذين يعانوا من التهاب مزمن في الأذن الوسطي

مقدم البرنامج : يعنى يطلعوها كيف

 دكتور/ يوسف الأمين : 

بالوضعية إذا كان الواحد وضع رأسه مثلا على الجانب الذي دخلت فيه الموية لفترة ومع تحريك الصيوان يجر الصيوان الى الأعلى والى الخارج فممكن تطلع يعنى الوضعية دي مهمة الىّ هو الواحد يجر الصيوان بتاع الأذن لفوق ولبرا ويكون وضع الإذن التي دخلت فيها الموية على الجانب الأسفل أو يكون وينتظر فترة شوية ممكن الموية تطلع

مقدم البرنامج :

مرات الناس بتحس بانها ما طلعت أو لسه في يحس بطنين يقوم يدخل قطن أو حاجة تانية

 

 دكتور/ يوسف الأمين :

بس أهم شيء ما يدخلوا عيدان القطن أو الحاجات التانية لجوه شديد لأنو الطبلة ما بعيدة منطقتها 4و2 سنتمتر فدى ممكن تصيب الطبلة فأحسن تحت استشارة طبية وفى اضاءه كافية وطريقة محددة استخراج الأجسام الغريبة أو الموية من الأذن

 مقدم البرنامج :

 شكرا دكتور يوسف وشكرا لكل المستمعين الذين يحاولوا الاتصال بنا وما زلنا معكم عبر عيادة على الهواء مرحبا أهلا دكتور يوسف نحنا بنتواصل معك وامكن عايزين نتتقل مباشرة الى الغدد انت قبيل تفضلت وذكرت انو في عدد من الغدد في أسفل الحلق أو الفك في بعض الأطفال أو حتى أحيانا في أعمار مختلفة بيكون في ناس بيتعرضوا لالتهابات في غدد تحت الأذن وأحيانا بتلقي شكلها ظاهر أحيانا بتعرضهم لحميات ومشاكل ذي دي شن أسباب التهابات هذه الغدد وكيفية الوقاية منها

 

 دكتور/ يوسف الأمين :

نعم قبيل تكلمنا عن النسيج اللمفاوي الموجود في الجسم من ناحية عامة في نسيج لمفاوي موجود داخل تجويف الجسم ذي اللوزتين واللوزة الثالثة ولوزة اللسان وغيره وفى غدد لمفاوية موجودة خارج التجاويف هي موجودة مثلا في الرقبة وفى أعلى الفخذ وداخل الإبط ومناطق كتيرة موجودة فيها الغدد اللمفاوية هنا مهمة الغدد اللمفاوية هي تصريف مثلا الالتهابات التي تحصل داخل التجاويف وفى الحالة دي إذا كان حصل التهاب قولي مثلا في اللوزتين ففي غدد في أعلى الرقبة بتتضخم معه نتيجة الى انو الميكروبات بتمشى عن طريق السائل اللمفاوي وبيصل الى العُقد اللمفاوية وهى بتتضخم مع الالتهاب الحاد وبيصل حجمها كبير كلما الالتهاب تكرر بيزيد الحجم اكتر دا بالنسبة لي شنو إنها تصرف في التهاب موجود داخل التجاويف

 

مقدم البرنامج : يعنى إذا كان التهاب أسنان أو غيره

 

 دكتور/ يوسف الأمين :

 أيوا إذا كان التهاب أسنان أو التهاب في الجيوب الانفية أو التهابات في اللوزتين أو في الحلق أو حتى في الأذن أو في مناطق الرأس من ناحية عامة حتى في فروة الرأس مثلا في غدد بتحى من خلف الأذن بتتضخم مع التهابات فروة الرأس وهكذا دي كلها بتصرف لالتهاب موجود داخل الجسم وغالبا هو الالتهاب البكتيري الذي يمشى الى منطقة دي ، مرات الالتهاب بيكون يصيب الغدد بدون ما يكون تصريفي يعنى يصيب الغدد نفسها ذي بعض الالتهابات الفيروسية وذي الدرن وهو يكون مباشرة موجود في الغدد بدون ما يكون مؤثر عليها والمناطق الداخلية في الحالة دي إذا كان هو نتيجة لتصريف أو تضخم في الغدد نتيجة لوجود التهاب موجود في الجسم علاج الالتهاب بيشيل الغدد اللمفاوية نفسها إذا كان التضخم الذي يحصل في الغدد اللمفاوية هو التهاب نتيجة لالتهاب داخل الغدد نفسها فبرضو بتتشال عينه من الغدة وتتزرع وبعداك بتعرف نوع العلاج المفيد بالنسبة لها ويعطى العلاج المناسب بالنسبة للغدة نفسها دا باختصار بالنسبة للغدد أو العُقد اللمفاوية

 

 مقدم البرنامج :

 يعنى شكلها إذا بقت هي ظاهرة يعنى كتير من الناس بتهملها تفتكر إنها هي حاجة متلازمة أو مع الطفل بتكبر معه

 

 دكتور/ يوسف الأمين :

 أيوا حجمها كبير لدرجة انو مخيف بعض المرات لكن دائما العلاج إذا كان بالطريقة السليمة بتنتهى في النهاية

 

مقدم البرنامج : شكرا دكتور يوسف ، معنا اتصال الو السلام عليكم

 

مشاركة عبر الهاتف : وعليكم السلام

 

مقدم البرنامج : أهلا بيك يا سيدي منو معانا

 

مشاركة عبر الهاتف : معاك عوض الجيد إبراهيم من النيل الأبيض

 

مقدم البرنامج : مرحبا أخ عوض اتفضل

 

 مشاركة عبر الهاتف :

 بحييك وبحيي الدكتور ، أنا بشكي من التهاب صديدي في الأذن من فترة طويلة احتمال ما يقارب الوقت داك عشرة سنوات لحدي أسى عمري ممكن يكون خمسة وعشرين لكن الى الآن ما زال قائم قابلت عدد من الاخصائين والأطباء لكن لحدي أسى المرض قائم حبيت استفسر انو هل هو عندو اثر على السمع الحاجة التانية هل عندو علاج بصورة نهائية

 

 مقدم البرنامج :

 شكرا ليك يا عوض الجيد لحظة خليك معانا ، دكتور يوسف إذا عندك له اى أسئلة

 دكتور/ يوسف الأمين : 

عوض الجيد انت الالتهاب الصديد دا في الأذنين الاتنين ولى في واحدة

مشاركة عبر الهاتف : ابداً في الأذن اليسرى فقط

 

دكتور/ يوسف الأمين : غالباً بيجى من زمن الطفولة وانت قلت من بدري معاك

 

مشاركة عبر الهاتف : والله عمري عشرة سنوات الوقت داك

 

 دكتور/ يوسف الأمين :

 من عشرة سنوات ومستمر لحدي أسى ، دا غالبا التهاب صديدي مزمن أو وطالما هو بجانب واحد فتأثيره ما كبير دائما هو من النوع الحميد لكن أهم شيء في العلاج بتاع التهاب الأذن الصديدى الذي يحصل في الطفولة ذي دا الىّ هو متابعة العلاج وبعدين الالتزام بعدم إدخال الأجسام الغريبة والموية ما تدخل داخل الأذن لحدي ما تكون الأذن جافة من اى صديد يطلع منها أهم شيء تحافظ عليها لفترة وبعد ما تكون ناشفة لفترة بعداك ممكن تتعمل عملية زراعة طبلة ويرجع السمع طبيعي لو كان تأثر وكلما طال الزمن يعنى احتمال التأثير على السمع يكون اكبر فدائما العلاج الأولى بدون ما يحصل مشكلة في السمع فدا بيدي نتيجة كويسة بالنسبة لموضوع السمع لكن أساسا من خصائصه هو التهاب مزمن ما فيه ألم وفى نفس الوقت بيكون فيه نقص في السمع الواحد يلاحظ انو في فرق بين الأذن التي فيها الصديد والأذن التي ما فيها صديد بالنسبة لاخونا عوض الجيد بيكون في تأثير في البداية طفيف على السمع لكن كلما زاد الوقت ممكن مشكلة السمع تزيد زيادة فأهم شيء انو تعرض نفسك على اخصائى وتتابع العلاج لحدي ما تنشف الأذن خالص يكون ما فيها مشكلة بعداك ممكن تعمل لها عملية ترقيع أو تزريع للطبلة

 

 مقدم البرنامج :

عوض الجيد نحنا بنتمنى ليك الصحة والعافية وإنشاء الله ربنا يعينك وبرضو لو احتجت لمتابعة اتصل بنا عبر العيادة شكرا جزيلا ، أيها الأصدقاء ما زلنا نتابع معكم عيادة على الهواء من أم درمان ضيف هذا اللقاء سعادة اللواء طبيب يوسف الأمين عبد الحي ، مرحبا دكتور الحقيقة امكن في عدد من الأسئلة والاستفسارات نحنا حا نحاول نفرد لها جزء من هذه الحلقة لكن موضوع ضعف السمع هو واحدة من الموضوعات المهمة وبترد كتير في الأسئلة وخطابات المستمعين ، ضعف اسمع أسبابه خاصة انو هل هو ممكن يكون عيب خَلقى أتولد به الشخص ولى عندو عوامل وراثية أو هو ممكن يتأثر إذا كان بالنقصان أو بالزيادة لي اى ممارسات أو علاجات ومتابعات

 

 دكتور/ يوسف الأمين :

هو في الحقيقة ضعف السمع موضوع كبير جدا وهو فيه كل الكلام الذي ذكرتيه المسائل الوراثية والخَلقية وزواج الأقارب ودي بتؤدى الى انو تحصل مشكلة داخل الأذن الداخلية بالذات وممكن يؤدى الى فقدان في السمع في الطفل منذ الولادة يعنى يكون ما بيسمع وبعد شوية ما بيتكلم وهكذا وفيه الأسباب المكتسبة ذي مثلا التهابات الأذن الوسطي إذا حصل التهاب للطفل في الأذن الوسطي وحصل صديد داخل الأذن وما تعالج بالطريقة السليمة ممكن يؤدى الى فقدان في السمع ، التهابات الأذن الخارجية ممكن تؤدى برضو لفقدان في السمع وبعدين العيوب الخَلقية برضها ممكن تسبب فقدان في السمع لأنو مرات بيكون في عدم نمو مناطق محددة في الأذن مثلا العظيمات السمعية أو طبلة الأذن ما تكون موجودة أو القناة بتاعة الأذن تكون منسدا انسداد خَلقى ففيها الأسباب الخَلقية والأسباب المكتسبة بس أهم شيء الأسباب المكتسبة دي يعنى لأنها في اليد ذي ما بيقولوا بتتعالج وممكن تتعالج أول بأول مثلا طفل حصل له التهاب وألم في الأذن وبقى يبكى كتير من الأذن وبعد شوية طلع صديد من الأذن لازم دا يتعالج أول بأول عشان ما يبقى التهاب مزمن لأنو لو خلينا الصديد دا طال الالتهاب بيستمر ويبقى ذي مسألة أخونا عوض الجيد قبل شوية انو يستمر من عشرة سنوات لحدي الزول ما يبقى كبير فدا ممكن يتعالج أول بأول وتانى في أسباب من ضعف السمع يعنى بمجرد زوال السبب يرجع السمع طبيعي وهى حالات كتيرة بنشوفا في الناس الكبار ذي مثلا دخول موية أو دخول جسم غريب أو وجود شمع داخل الأذن فالشمع دا إفراز طبيعي أساسا في الأذن لكن الإنسان بنفسه ممكن يساهم في انو يتراكم داخل أذنه بي انو يدخل حاجات أو يدخل القطن يحاول يطلع الشمع ومرة بيدخل الشمع لجوا يقوم يقفل الأذن فد بيكون هو سببه المريض نفسه لكن هو خلى الشمع يقفل له أذنه فدا بمجرد ما تشيل الشمع بيرجع السمع طبيعي لو ما كان في مشكلة من جوا له وبرضو مثلا الأجسام الغريبة دخلت في الأذن برضو بمجرد ما تشيلا ممكن السمع يرجع طبيعي ، الالتهابات قد تاخد وقت اكتر في العلاج الالتهاب الحاد إذا تعالج بالشكل الأسلم السمع بيرجع طبيعي بصورة أسرع الالتهاب المزمن لو عدى فترة طويلة بعداك تبقى مسألة تأثير على الأجزاء المكونة للإذن الوسطي نفسها يعنى يحصل تأكل من الالتهاب المزمن في عظيمات السمع وتتأكل الطبلة وحتى المواد السامة التي تطلع من البكتيريا ممكن تدخل داخل القوقعة وتؤثر على عصب السمع في الحالة دي بيحتاج لفترة طويلة من العلاج واحتمال يحتاج الى تدخل جراحي لزراعة الطبلة أو زراعة العظيمات السمعية أو غيروا ، الصعوبة بتجى في ضعف السمع الذي يكون نتيجة لمشكلة في الأذن الداخلية يعنى في العصب أو في القوقعة ففي الحالة دي إذا كان فقدان كامل قد تحتاج الى انو يزرعوا له قوقعة الىّ هو تزرع قوقعة كاملة وتوضع في منطقتها الطبيعية وبعداك العصب بينقل الإشارات الصوتية والإنسان بيسمع لكن ما بيكون سمع طبيعي ذي الإنسان الطبيعي هو بيسمع لكن بطريقة مختلفة عشان كدا بعد زراعة القوقعة بيحتاج الى انو يتعمل له طرق بتاعة تمارين وتدريب على أساس انو يفهم الكلام معناهوا شنو والحروف كيف تتسمع له داخل أذنه الداخلية أصعب حاجة هي قصة وجود ضعف في السمع نتيجة لتأثير على العصب والتأثير على العصب غير أسبابه مثلا قبل شوية قلنا امكن يكون من زواج الأقارب أو من ناحية وراثية أو بعض الأمراض مثلا ذي التهاب السحايا أو حتى مثلا الحصبة

 مقدم البرنامج :

 هل في أمراض برضها يعنى ذي كبار السن امكن كحاجة من المتلازمات انو في بعض الناس كلما يكبر بيضعف شوية السمع لكن هل في أمراض بتتسبب أيضا في هذه المشكلة

 دكتور/ يوسف الأمين :

 هو امكن النمو الطبيعي بتاع الإنسان لما يصل 55 سنة يبدأ يحصل نوع من التآكل في الخلايا العصبية فبيبدا يقل السمع تدريجياً لفترة طويلة وفى ناس بيكونوا أسرع أو في بعض العائلات بيكون اكتر يعنى ملحوظ اكتر من اى زول لما يصل عمر 60 يبدأ يحصل له تدهور في السمع اكتر من غيره فدى أشياء موجودة وبتزيد اكتر لما الإنسان مثلا يكون أساسا بيحصل له الكلام دا في العائلة وبعدين يقوموا يعرض أذنه لمشاكل ممكن تضر العصب اكتر يعنى الزول الذي يتعرض لأصوات عالية مثلا في وظيفته دي بتأثر مباشرة على السمع فدى لما تجى معها المسألة بتاعة الناحية الوراثية في فقدان الخلايا العصبية مع تقدم العمر بتخلي وجود الضعف بتاع السمع عندو اكتر

 مقدم البرنامج :

يعنى هي من الممكن انو الشخص على الأقل بالمحافظة يؤخر أو يقلل هذه المشكلة

 دكتور/ يوسف الأمين :

 نعم أكيد يعنى عدم التعرض للأصوات العالية أو إذا كان انت أساسا وظيفتك بتخليك تتعرض لأصوات عالية وتستعمل واقيات دي مهمة جدا عشان انت تحافظ على اسمع بتاعك وتأخر التدهور الذي يحصل

 مقدم البرنامج :

 يعنى العمال في المصانع أو الورش حتى الذين يستخدموا أجهزة الصوت وخلافه لفترات طويلة نحنا بنشكرك دكتور يوسف معانا اتصال الآن الو السلام عليكم

 

مشاركة عبر الهاتف : مرحبا

 

مقدم البرنامج : أهلا بيك يا ستى

 

مشاركة عبر الهاتف : معاكم اميمة الفاضل احمد من كردفان

 

مقدم البرنامج : أهلا بيك يا اميمة اتفضلى

 

 مشاركة عبر الهاتف :

 أحييكم وأحيى الدكتور ، أنا بشتكى من أكولة في الأذن مستمرة طوالى أكولة في الأذنين الاتنين وبرضو عندنا شخص مصاب بلوز وقاعد ياخد العلاج كل شهر وتانى بترجع له نفس الآلام أخر حاجة مشى للطبيب وقال له تعمل حقنه بتاعة بندول كل شهر لكن قاعد يتعب وتجيهوا حمى شديدة خلاص

 

 مقدم البرنامج :

طيب يا اميمة خليك معانا لحظة إذا الدكتور عاوز يوجه ليك بعض الأسئلة ونستمع كلنا لهذه الإجابة وفعلا هي واحدة من المشاكل الشائعة

 

 دكتور/ يوسف الأمين :

 انت يا اميمة بالنسبة للأكولة في الأذنين بس ولى في أكولة تانى في الأنف أو الحلق

 

مشاركة عبر الهاتف :

بس في الأذنين مستمرة على طول مرات بدخل القش بتاع العود

 

 دكتور/ يوسف الأمين :

 ودا خطأ طبعا ، هو أساسا الأكولة في الأذنين قد تكون عرض لفطريات داخل الأذن بالذات دخول الموية مثلا قبيل كنا بنتكلم عنه فدا بيؤدى الى أكولة والسبب التانى ومحتمل انو يكون في حساسية لكن دائما الحساسية ما بتكون في الأذنين بس بتكون برضو موجودة في الأنف أو في الصدر أو الحلق وبيكون في حكة مصاحبه دائما إذا في التهاب فطرى في الأذنين الواحد بيدوا علاجات محددة ضد الفطريات وبيحتاج الى انو يكشفوا يشوفوا السبب شنو وبعداك يدوك العلاج الامثل بالنسبة لالتهاب اللوزتين امكن تكلمنا عنه قبيل بالنسبة للوزتين المتكرر واستعمال حقن البندول الناس بيفتكروا انو الواحد بعد ما ياخد البندول خلاص تانى مفروض ما يلتهب أو ما يحصل له التهاب تانى في اللوزتين لكن أساسا البندول بيدوا كوقاية للقلب من التهاب اللوزتين المتكرر لكن مش عشان ينمع التهاب حاد في الأذنين لكن برضو بيحصل معه التهاب اللوزتين لكن دائما بننصح انو الناس استعمال الأدوية يكون لفترة طويلة ما كفاية ذي ما قلت ليك أسبوع يعنى لازم على الأقل أسبوعين من العلاج المتواصل من الدواء الفعّال بالجرعة الفعّالة برضو ممكن تقابلي طبيب انف وأذن وحنجرة والاستمرار في العلاج لفترة طويلة بعداك إذا في اى مشكلة تحتاج لعملية ممكن تتعالج عن طريق العملية

 

 مقدم البرنامج :

 شكرا يا اميمة ربنا يديك العافية نحنا بنحييك كتير وبنشكرك على اتصالك ، أيها الأصدقاء ما زلنا نتواصل معكم عبر عيادة على الهواء لم يتبقى لنا كتير ثلاثة دقائق فقط تفصلنا عن نهاية هذا اللقاء ، نحنا بنحييك كتير جدا دكتور يوسف ونحنا في نهايات هذه الحلة بنهنى كل الأسر ببداية العام الدراسي الجديد ونتمنى انو ربنا يوفقهم ويوفق الأبناء وتلاميذنا في انو يقضوا عام دراسي خالي من كتير من المشاكل الصحية التي ممكن يتعرضوا لها نحنا عايزين ندى نصائح مهمة جدا للاباء والمعلمين والأسر والأطفال وخاصة لكثير من المشاكل والأمراض المعدية التي تنتقل في هذا التخصص وهذه المشكلة

 دكتور/ يوسف الأمين :

 طبعا اكتر شيء مزعج مسألة تناقل المكروبات من التلاميذ مثلا إذا الطفل عندو التهاب فيروسي ذي ما كتير من الناس اليومين ديل بيشتكوا من نزلات فدا ممكن ينتقل من واحد الى كل بقية الفصل فأهم شيء في الحته دي انو يعنى الطفل المصاب دا إذا ما أتعزل من الباقيين ممكن على الأقل يكون عندو منديل ما يخلى المكروب ينتقل داخل غرفة الدراسة حتى إذا عطس يغطى انفه عشان المكروب ما يطلع لغيره وثانيا الاهتمام بالصحة من ناحية عامة النظافة الشخصية والتغذية السليمة لأنها دي ممكن تكون وقاية أهم من العلاج وبرضو تجنب الازدحام بقدر الامكان يعنى طبعا الفصول مرات بتكون مزدحمة جدا فممكن تناقل الأمراض فيها يكون أسرع ويكون مشكلة فعلا في داخل الفصل واهم شيء طبعا هو العلاج أول بأول للإنسان العندو مشكلة في الأنف أو الحلق أو في الأذن تتعالج أول بأول حتى ما تسبب له هو مشاكل وما تنتقل لغيره

 

 مقدم البرنامج :

 نحنا نتمنى انو يكونوا كل الناس استمعوا لهذه النصيحة اقل حاجة ذي ما تعودنا كلنا زمان لما كنا صغار انو كل طفل تكون عندو كباية بتاعته خاصة به وهم أتعودوا انو تلزمهم بها إدارة المدرسة أيضا المناديل ذي ما تفضلت وذكرت يا دكتور إذا كانت ورقية أو حتى مناديل يشيلا الطفل معه وتغسل يوميا مع ملابس المدرسة نحنا بنجييك كتير جدا دكتور يوسف الأمين عبد الحي استشاري جراحة الأذن والأنف والحنجرة بنشكرك كتير جدا على هذه الحلقة وهذه المعلومات القيمة ونتمنى انو نتواصل معك دائما عبر عيادة على الهواء

 

دكتور/ يوسف الأمين : شكرا ليكم كتير

 مقدم البرنامج : 

شكرا جزيلا لكل الذين تابعونا عبر هذا اللقاء كنا معكم عبد الملك محمود طه ربطنا بكم عبر أجهزة الصوت الرقمية ، يس عبد الله في الإشراف والمتابعة تحياتي دوما تسبقني أمنيات الصحة والعافية للجميع عبر المايكروفون إسراء زين العابدين الأسبوع القادم لقاء جديد عبر عيادة على الهواء الإخراج فريال ابشر                                                                    


تنقل بين البرامج
التـدخـين وتعـاطـى الـتبغ الحلقة التالية البرنامج السابقة تطــورات زراعــة القـرنية
التعليقات تخص صاحبها ولا تخص ادارة الموقع

أخبار من الأولى

آخر المواد الصوتية