SmartSection is developed by The SmartFactory (http://www.smartfactory.ca), a division of InBox Solutions (http://www.inboxsolutions.net)
البرامج الاذاعية > برنامج مؤتمر إذاعي > استعدادات هيئة الحج والعمرة لحج هذا العام
استعدادات هيئة الحج والعمرة لحج هذا العام
نشره obada [obada] في 2011/5/17 (1612 عدد القراءات)

بسم الله الرحمن الرحيم

برنامج مؤتمر اذاعى

بثت هذه الحلقة في يوم 13-  مايو- 2011

موضوع الحلقة

استعدادات هيئة الحج والعمرة لحج هذا العام

مقدم البرنامج 

 الأستاذ الزبير عثمان احمد

مشاركون في التقديم

الأستاذ ضياء الدين بلال رئيس تحرير صحيفة السوداني

 الأستاذ الطاهر ساتى الكاتب الصحفي

ضيوف الحلقة

داخل الأستوديو

الأستاذ احمد عبدالله احمد المدير العام للهيئة العامة للحج والعمرة

مقدم البرنامج

سيداتي وسادتي السلام عليكم ورحمة الله تعالى وبركاته أحييكم وأرحب بكم في حلقة هذا الأسبوع  من  برنامج مؤتمر اذاعى وأرجو أن تسمحوا لي  بان أترحم على اخى وزميلي نجم الدين محمد احمد الذي طالما جلس معي في هذا البرنامج مديرا للحوار مع ضيوفنا الأعزاء الذين نتشرف بهم في هذا البرنامج لابد أن اذكره بالخير وهو رجل محاور لا يشق له غبار نسال الله سبحانه وتعالى أن يتقبله قبولا حسنا ويسكنه فسيح جناته مع النبيين والصديقين والشهداء وحسن اولائك رفيقا وان يبدله دارا خيرا من داره وأهلا خيرا من أهله وان يلهمنا واله وذوبه الصبر وحسن العزاء إنا لله وإنا إليه راجعون أيها الإخوة والأخوات حلقتنا لهذا الأسبوع ستكون عن إجراءات الحج والتي أصبحت محل اهتمام رسمي وشعبي وتعلمون أن مجلس الوزراء قد خصص في الأسابيع الماضية جلسة لأعمال الحج وتعلمون إن الجدل حول أعمال الحج وإجراءات الحج تتجدد عاما بعد عام والشكاوى تتكرر سنة بعد سنة ودائما أصابع الاتهام تشير إلى الهيئة العامة  للحج والعمرة يسعدنا جدا أن  نستضيف في هذه الحلقة من هذا الأسبوع ونتشرف بان يكون معنا في هذه اللحظات الأستاذ احمد عبدالله احمد المدير العام للهيئة العامة للحج والعمرة نقلب معه العديد من الملفات ونفتح بين يديه الكثير من القضايا التى هي محل اهتمام الشارع السوداني باعتبار أن الحجيج هم منتشرين في كل أنحاء ولايات ومدن وقرى وأرياف أنحاء السودان الأستاذ احمد عبدالله السلام عليكم ورحمة الله وبركاته

الأستاذ احمد عبدالله احمد

عليكم السلام والرجمة اخى الزبير وفرصة سعيدة الإنسان يلتقي بالإخوة والأخوات وإنشاء الله دي تكون مقدمة لحجاج 1432ه وهى ضربة البداية

مقدم البرنامج

إنشاء الله أرجو كذلك أن تسمحوا لي أن احي زميلي داخل الأستوديو الأخ  الأستاذ ضياء الدين بلال رئيس تحرير صحيفة السوداني  والأخ الأستاذ الطاهر ساتى الكاتب الصحفي أرحب بهم في هذه الحلقة في هذا الأسبوع ولنبدأ أستاذ احمد لست ادري من أين نبدأ هل نبدأ بالجدل الذي أثارته إجراءات الحج العام الماضي  أم تخطيطكم للعام القادم إنشاء الله لكن اعتقد انه من المفضل أن نتحدث عن تقييمكم لأعمال الحج السابقة وما هي الإجراءات التى اتخذتموها على ضوء الجدل الذي أثاره الكثير من المواطنين وحتى المجلس الوطني أثار جدلا كثيرا حول أعمال الحج تفضل أستاذ احمد

الأستاذ احمد عبدالله احمد

حقيقة نحن في الهيئة العامة للحج والعمرة وفى وزارة الإرشاد بعد عام 1431ه عقدنا جلسات كثيفة جدا جدا وتناولنا فيها محاور عدة وقرانا كل ما كتبته الصحف وكل ما درج على المجلس الوطني وكل الناس الحريصين على مسيرة الحج يعنى وفندنا هذه الأشياء  واحدة واحدة وجلسنا مع أخوانا في المجلس الوطني وبعدها خرجنا بسياسات عامة هذه السياسات أن الهيئة العامة للحج والعمرة تكون جهاز اشرافى ورقابي وتتنزل كل الأعمال التنفيذية للقطاعات والولايات لان معظم ما رشح كان هو علاقة في المستوى التحتى أو القاعدي وليست على المستوى الاشرافى الأعلى وكذلك كثير من  الأشياء مثل تكدس الطائرات في مطار جدة ودي أعمال يعنى بتكون في المملكة العربية السعودية لا الهيئة ولا وسائل الطيران لها يد في ذلك وهذا كله ناتج أن حجاج 1431ه كانوا اكبر من التصور الموضوعي

مقدم البرنامج

طيب لماذا تأخذون عددا اكبر لا تستطيعون إدارته في الهيئة العامة للحج والعمرة

الأستاذ احمد عبدالله احمد

لا نحن نقصد الحجاج في العالم كلهم مش نحن فقط يعنى العام السابق شهد أعداد ضخمة جدا جدا  من الحجيج نسبة لان العام الذي قبله كانت هنالك جائحة  أنفلونزا الخنازير وأقعدت عدد كبير جدا من الحجاج أن لا يحجوا  وخاصة أن حجاج الداخل وحجاج بعض الدول التى يعنى قد أعلنت أنها في عام1430 ما جاية الحج فاضطرت أن تضاعف أعدادها تعويضا للحج الذي سبقها يعنى

مقدم البرنامج

الأخ احمد عبدالله فهمت من حديثك أنكم الآن وتقييمكم للعام الماضي خرجتم من الأعمال الحج والعمرة فيما يتعلق بالإجراءات على المستويات الأدنى وأنكم فقط الآن تقومون بأعمال رقابة ومتابعة وإشراف هذا صحيح

الأستاذ احمد عبدالله احمد

نعم هذا صحيح نحن حقيقة متوافقين جدا مع طبيعة الحكم في السودان الحكم في السودان فدرالي وولائي ومحلى ولذلك كل الأعمال التى تصدر إذا كانت أعمال حج أو أخرى هي برضها تندرج على هذه المستويات فالحج يعنى أعماله من ذلك القبيل  انو في اعمال سيادية لا تقوم بها إلا الهيئة وهناك اعمال تنفيذية حتى لو الهيئة حاولت أن تدخل نفسها فيها لا تستطيع أن تجودها

مقدم البرنامج

ما هي هذه الأعمال السيادية التى تقومون بها على ضوء السياسات التى وضعتموها

الأستاذ احمد عبدالله احمد

الأعمال السيادية هو أول حاجة التفاوض مع وزارة الحج السعودية وهذا ما تقوم به إلا وزارة الإرشاد لأنها الوزارة المقابلة لوزارة الحج ودي يكون اسمها محضر التفاوض محضر التفاوض هو المرجعية للحج إذا حصل اى خلاف بين البعثة السودانية ووزارة الحج السعودية أو اى من مكاتب الخدمة السعودية فذلك مفصل بالسنتمتر كما يقولون في هذا المحضر  فبنرجع ونشوفه ودائما هذا يكون الفيصل إذا حصل بيننا اى خلاف في اى من المسائل سواء كان نقل الركاب سواء كان إسكانهم سواء كان تمريضهم أو غذائهم كل ما يتعلق بالحاج موجود في هذا الكتيب

مقدم البرنامج

هذه المفاوضات بينكم وبين وزارة الحج السعودية ما هي  الأعمال السيادية الأخرى التى تقومون بها

الأستاذ احمد عبدالله احمد

نعم مع وزارة الحج وكل ما يتعلق بمكتب الوكلاء الموحد  النقابة العامة للسيارات مؤسسة الدول مطوفي الدول العربية المؤسسة الأهلية بالمدينة فروع وزارة الحج في جدة وفى المدينة الشئ  الآخر اى علاقة بالبعثات الخارجية هي من صميم اعمال وزارة الإرشاد والتي تنوب عنها الهيئة العامة للحج والعمرة يعنى إذا كان في اى علاقة مع البعثة المصرية أو التركية هذا لا تقوم به إلا الهيئة العامة للحج والعمرة كل التوثيق للعقود بتاعة الخدمات بالمملكة العربية مسئولة عنها الهيئة ومسئول عنها رئيس بعثة الحج السودانية باعتبار أن هذه أموال آخرين لابد أنها تدفع لهم ومافى جهة تكون ضامنة  لهذا الدفع إلا الهيئة العامة ممثلة في رئيس بعثة الحج السودانية

مقدم البرنامج

طيب إيجار العمائر لسكن الحجيج يعنى هذا تعتبرونه من الأعمال السيادية

الأستاذ احمد عبدالله احمد

 لا دا من اعمال القطاعات هي بتقوم تؤجر لكن نحن بنوقع العقد مع المؤسسات السعودية

مقدم البرنامج

نعم نتيح الفرصة للأخ ضياء الدين بلال تفضل الأخ ضياء

الأستاذ ضياء الدين بلال

شكرا الأخ الزبير حقيقة حقو نحن نبسط المسالة بأكثر وضوحا المتغيرات يعنى في هذا الحج من الإجراءات الحيختبف شنو عن ما كان في السنوات السابقة

الأستاذ احمد عبدالله احمد

والله الذي يختلف فيها الكثير لكن بيكون في تحديد للأدوار تحديد الأدوار هذا القصد منه تحمل المسئوليات لكن ليس الخروج عن السياسة العامة للحج يعنى إذا قلنا التفاوض تقوم به الهيئة  إذا قلنا إيجار المساكن وإيجار النقل واختيار رؤساء القطاعات هذا سلم بالنسبة لهم نحن بنخليهم هم يمارسوا هذا الدور لكن مش معناها الهيئة تكون بعدت نفسها تماما يعنى أنا داير أقول دا تحديد للأدوار وليس يعنى حاجب أو حاجز عن التكامل في اعمال الحج

الأستاذ ضياء الدين بلال

لا يعنى الإجراءات التغيير الحيحصل شنو أنا حاج حجيت قبل سنتين داير أحج  الآن الفرق شنو في الإجراءات في هذه المرة

مقدم البرنامج

يعنى حدث تقدم في تطور في تحسن

الأستاذ احمد عبدالله احمد

طبعا قطعا في تحسن لأنو في تخصص أدق وبعد ذلك صارت المسئوليات بصورة واضحة  مثلا اختيار الحاج واختيار الأمير والمرشد والناقل هذا من صميم اعمال القطاعات يعنى أنت إذا جئت تقدم ما حتمشى للهيئة داير تقدم عندها تمشى طوالى أنت إذا في موقع جغرافي تمشى الحتة الجغرافية الموجودة فيها تسجل فيها طوالى

الأستاذ ضياء الدين بلال

هل القطاعات هذه مؤهلة للقيام بهذه الأدوار

الأستاذ احمد عبدالله احمد

طبعا هي مؤهلة هي كانت تمارس نفس العمل لكن ما بمسئولية كاملة لكن كممارسة هي مؤهلة جدا جدا الناس الموجودين فيها لهم خبرة كبيرة جدا جدا أنا احسب انو يقوم بهذا الدور يعنى خير قيام

مقدم البرنامج

لكن ما كان في اختلاف في أسعار العمائر التى يأجروها في قيمة السكن في حتى الفروق في قيمة الحج بين قطاع وقطاع وبين ولاية وولاية يعنى هذه ربما أربكت الناس وربما يعنى أحدثت كثير من الجدل حول

 الأستاذ احمد عبدالله احمد

طوالى طبعا ما خلاص هذا بقى خيار القطاع يعنى نحن السنة الجاية ذاتها نفتكرها تكون متباينة التكلفة ما حتكون موحدة في كل الأحوال في تكلفة حتكون متباينة لأنو اى قطاع على حسب نظرته هو رغبة حجاجه الآن الحجاج ما عندهم رغبة لان الحجاج إلى الآن ما اتحددوا لكن القطاع الآن يتلمس رغبات حجاجه يعنى من خلال خبرته من خلال أشياء كثيرة يكون قعد مع المجالس التشريعية ومع مجلس الوزراء الولائى ويكون اخذ بعض الفكرة

الأستاذ ضياء الدين بلال

طيب العملية التى ستتم تأثيرها شنو على التكلفة

الأستاذ احمد عبدالله احمد

والله ما بقدر احدد لأنو

الأستاذ ضياء الدين بلال

هل التكلفة سترتفع أم ستنخفض كدا يعنى

الأستاذ احمد عبدالله احمد

دي برضو إنا بكون في علم الغيب معاك لأنو معظم هذه الأعمال تدار بواسطة أخوانا ديل يعنى أنا تجينى العقودات النهائية

مقدم البرنامج

لكن أستاذ احمد مجلس الوزراء يعنى قرر ضرورة تخفيض تكلفة الحج وهنالك إجراءات اتخذت من مجلس الوزراء يعنى نتوقع أن تكون تكلفة الحج هذا العام اقل مثلا من العام الماضي مليون مليونين مثلا على ضوء هذه الإجراءات الحج بقى سبعة ملاين وثمانية ملايين مرات تسعة ملايين

الأستاذ احمد عبدالله احمد

والله أخ الزبير والأخ الطاهر وضياء الدين نحن دايرين نصحح معلومة في هذا الجانب مجلس الوزراء ما قال هو داير يخفض تكلفة الحج قال داير يخفض الرسوم الحكومية وفعلا

الأستاذ ضياء الدين بلال

هي بتمثل كم الرسوم الحكومية

الأستاذ احمد عبدالله احمد

الرسوم الحكومية هي كانت حوالي 515 جنيه بجلسة رأسها السيد نائب الرئيس الأستاذ على عثمان محمد طه انخفضت هذه الرسوم إلى 350 جنيه والاهم من ذلك

مقدم البرنامج

التخفيض اقل من 200 جنيه

الأستاذ احمد عبدالله احمد

نعم الأهم  الدولة دايرة تقول والله إنها هي دايرة ترسل رسالة بانو هي ما تملكه خفضته لكن بقية الأعمال هي ما تملكها بقية الأعمال هي  اعمال بتاعة قطاع خاص إذا الشخص داير يركب له سيارة يركب لموزين داير يعنى يركب بص كبير دي حاجة بتخصه هو الدولة ما عندها حق أنها تدخل في أسعار الآخرين لكن قالت هي تتدخل في أسعار الحكومة

مقدم البرنامج

اللهى عبارة عن شنو أسعار الحكومة

الأستاذ احمد عبدالله احمد

هي إن الهيئة العامة للحج والعمرة عندها رسوم كانت حوالي 150 انخفضت إلى 110 وزارة الإرشاد كانت عندها رسوم دعوية كانت 40 جنيه انخفضت إلى 20 جنيه وزارة الداخلية كانت عندها رسوم حوالي 102 انخفضت إلى 50 جنيه وزارة الصحة كانت عندها رسوم حوالي  63 جنيه انخفضت إلى 10 جنيهات وابقوا على القطاعات 75 جنيه والولايات 50 جنيه بالإضافة إلى رسم التامين لشركات التامين 35 جنيه دي كلها تمثل حوالي  350 جنيه من 515

الأستاذ ضياء الدين بلال

طيب الانتقال للقطاعات مرة أخرى هل هو إقرار عملي لفشل الهيئة في إدارة عملية الحج

الأستاذ احمد عبدالله احمد

هو تنظيم نحن هو قلنا من بدري القطاعات ذاتها كانت بتقوم بنفس الأعمال دي لكن ما كانت بتقوم بها بتفويض يعنى كان بتقوم بها بتفويض من الهيئة ما بمسئولية رسمية حتى الآن المسئولية حقتها

الأستاذ ضياء الدين بلال

طيب أنا حاسى  بصراحة من خلال متابعاتنا والكلام الذي أثير في الصحف واضح انو الهيئة هاربة من هذه المسئولية أكثر من كونها ساعية للتسهيل والتيسير للمواطنين

الأستاذ احمد عبدالله احمد

والله نحن بنفتكر انو كل ما يتعلق الحاج دا هو ما مواطن في ولاية معينة يعنى نحن في المركز بعيدين جدا جدا عنه إذا  قمنا بأعمال تنفيذية معه  بتصعب علينا جدا جدا فأولى إن الناس القريبين لهم هم يقوموا معهم بالأعمال التنفيذية يعنى فالقضية هو انه داير يختار سكنه ومواصلاته  والطائرة التى يركبها أو السفينة التى تمخر به البحار يعنى داير يختار في مكة مكان سكنه في الهيئة قد تكون عندنا رؤى معينة لكن قد لا تكون عند كل القطاعات ناس القطاعات يقوليك واحدين أنا داير أكون قريب للحرم وقريب للحرم معناها تدفع قروش كثيرة نحن بنقول والله ناس  دايرنهم بالعزيزية لأنو نحن مشكلتنا الأساسية القروش مشكلتنا أن المنطقة بتاعة المشاعر منطقة مزدحمة جدا فالعزيزية تعمل تنفس فالرؤى مختلفة لذلك قلنا خلاص الناس تمشى على حسب رغباتهم

مقدم البرنامج

نعم نواصل هذه الحلقة سيداتي وسادتي مع الأستاذ احمد عبدالله احمد المدير العام للهيئة العامة للحج والعمرة ونحن  إلى الآن الأخ الطاهر ساتى لم نعطيه دقيقة واحدة نريد أن نعطيه فرصة ولكن قبل ذلك أود أن نتيح فرصة اكبر للإخوة المستمعين لأنو بالمناسبة يكون عندهم أسئلة أكثر مما معنا بالرغم ما لدينا من أسئلة الأخ الطاهر مباشرة نسال أسئلة مباشرة عشان نتيح فرصة للمستمعين

الأستاذ الطاهر ساتى

شكرا ليك ما ابتدرت به حديثك  أن الحكم الفدرالي يمكن نزل في كل أجهزة الدولة وفى كل مجالات الدولة لكن للأسف لحدي الآن في الحج والعمرة ما نزل يعنى هو يتكلم عن أن المسئولين والقطاعات بالولايات شكلي لكت الواقع لما تجئ تشوقه انه في سيطرة المركز على عمليات الحج وهذا الذي جعل البرلمان يطالب يعنى النواب في البرلمان يطالبوا قبل أسابيع بخصخصة أو بحل هيئة الحج والعمرة ووسائل الإعلام دعمت البرلمان قدم مقترحات زى دي والسبب أن المركز مهيمن على التفاصيل التفاصيل نبدأها بالنقل دي يمكن النقطة الأساسية ودي مشكلة كبيرة جدا دائما الاتى تواجه الحجاج النقل الآن فيه سيطرة للمركز يعنى  الاحتكار ملازم حتى في عملية التامين والاحتكار حتى ملازم في الأمراء لو اطلعت على

مقدم البرنامج

أنت كدا بتلخبط الكيمان يا الطاهر واحد واحد سوف ناتى لها مرة أخرى مباشرة سؤال محدد

الأستاذ الطاهر ساتى

طيب داير أتكلم عن على انه إلى الآن الحج محتكر والمركز هو سبب الاحتكار

مقدم البرنامج

نعم تفضل أستاذ احمد

الأستاذ احمد عبدالله احمد

نحن طبعا إذا في اى حاجة بتاعة احتكار نحن قلنا بالسياسة الأخيرة التى أعلنت دي فض الاحتكار يعنى لكن دايرين نقول بالنسبة للنقل النقل محضر التفاوض بيننا وبين السلطات السعودية بالاتى وليس للسودان فقط أن الطيران 50% شركات سودانية 50% شركات سعودية  يعنى أنا ما عندي حق أمشى أجيب طيران خليجي ما عندي حق أمشى أجيب طيران اوربى أبدا لازم أجيب طيران سوداني أو سعودي إلى أن تتغير المعادلة دي حاجة أخرى لكن نحن في محضر التفاوض مع الأخ الوزير وقع على هذا وليس الوزير فقط وإنما وزراء كل البعثات

الأستاذ الطاهر ساتى

نقول إن الولايات لها حق اختيار يعنى تجربة البحر الأحمر المرة الماضية لما ولاية البحر الأحمر حاولت أن تستقل بحجاجها انتوا هنا أول شئ ما رضيتوا انتوا ذاتو في الهيئة ما رضيتوا رغم أن التكلفة بالنسبة للحاج بتاع البحر الأحمر قطع البحر تكلفة قليلة جدا وعملوا دراسة ووجدوا انه ممكن بأقل تكلفة حجاج البحر الأحمر يمشوا يحجوا لكن انتوا ما رضيتوا على هذه المسالة فشلتوا لهم مشروعهم عشان كدا دايرين تهيمنوا على الولايات

الأستاذ احمد عبدالله احمد

لا نحن ما قلنا خلاص قلنا اى زول دي الشركات المؤهلة بعد ذلك اى شخص يختار الشركات التى تعنيه يعنى الهيمنة حتكون وين يعنى بعدين  بالنسبة لذكر البحر الأحمر يعنى تول مرة يا أستاذ الطاهر نحن دي نقولها لك لأول مرة يجئ لفت نظر للبعثة السودانية أول مرة يعنى لفت نظر للبعثة السودانية من ممارسة البحر إنما دخلت في أعمال الحج في المملكة العربية السعودية

الأستاذ ضياء الدين بلال

لفت نظر جاءكم من وين

الأستاذ احمد عبدالله احمد

جاءنا من وزارة الحج السعودية دا لأول مرة

الأستاذ ضياء الدين بلال

قالوا شنو مضمونه شنو

الأستاذ احمد عبدالله احمد

مضمونه انه ما اتبعوا الإجراءات السعودية في تأجير المساكن  قاموا اجروا مساكن غير مصرح لها بالسكن نحن دائما هناك بعثتنا نتأكد أن المسكن دا مصرح له أم ما مصرح له ثانيا أعطوا المسالة هذه إلى مقاول هناك ودي الناس في المدينة قال لهم ستة أيام وعندنا نحن طبعا بندى المدينة ثمانية أيام وحصل لنا إشكال إن حجاج ناس البحر الأحمر رفضوا يخرجوا من المساكن إلا بعد أن قعدوا ثمانية أيام اضطر رئيس البعثة والطاقم الموجود أن يوفروا لهم سكن لمدة يومين عشان قالوا لرغبات الحجاج فالدخول بتاع

مقدم البرنامج

لكن أنت الآن المشكلة في ناس البحر الأحمر الذين اجروا بدون امن السعودية  اجروا عمائرهم يعنى دون علم سلطات المملكة

الأستاذ احمد عبدالله احمد

السعوديين ديل ما أنت اصلو يعنى الآن هنا في امبدة شخص ماسك المنطقة يؤجر ما عنده مشكلة في هذا أصلا لكن أنت لما تمشى هناك كبعثة لازم تستوفى الاشتراطات السعودية

مقدم البرنامج

ما هي الاشتراطات الأخرى التى تضعها المملكة العربية السعودية

الأستاذ احمد عبدالله احمد

السعودية طبعا في السكن عندها اشتراطات واضحة جدا أن يكون السكن مصرح له من ناس الكهرباء الإجراءات المدنية المعروفة يعنى فإذا ما كان مصرح له جئت سكنت حجاجك فيه تكون عملت مخالفة

الأستاذ ضياء الدين بلال

طيب لكن يا أستاذ إذا كان ولاية البحر الأحمر وهى ولاية لديها وضع خاص في السودان من ناحية اقتصادية تحصل فيها مثل هذه الأخطاء ما بال البقية يعنى أنا ما ماشى في الاتجاه المضاد للطاهر لكن حقيقة أنا قلق انه إذا كانت المسائل دي فشل فيها المركز بالتالي الولايات كتجربة حديثة بالنسبة لها الناس يتوقعوا مشاكل اكبر  في الفترة القادمة

الأستاذ احمد عبدالله احمد

نحن بنديهم الحق في الحتة دي ما اى حاجة تحصل في المملكة هي مسئولتنا نحن يعنى

الأستاذ ضياء الدين بلال

يعنى أنت ما أتيت بالنموذج بتاع البحر الأحمر

الأستاذ احمد عبدالله احمد

 أنا داير أقول انه ما دام الوقت داك اتعمل من غير ذلك  كان بالإجراءات الجديدة يعنى الإجراءات الجديدة أن الهيئة والبعثة السودانية تكون مشرفة بعد ما أنت تقول لي والله أنا داير ااجر مع الطاهر ساتى أنا بمشي استوثق أن الطاهر ساتى دا هو مضمن من ضمن المساكن الموجودة في البعثة في وزارة الحج ولا لا إذا ما مضمن يجئ ارجع ليك اقوليك لا الشخص دا ما ما مضمون قوم شوفليك  شخص تانى وهكذا أو أمدك بقائمة من أصحاب العمائر السعودية اقوليك دي القائمة  تختار منها

الأستاذ الطاهر ساتى

يعنى الآن دور الهيئة انحصر في استلام حصة السودان وتوزيعها للولايات  ونحن في الموسم القادم دا

الأستاذ احمد عبدالله احمد

لا عندها دور تانى

الأستاذ الطاهر ساتى

طيب اللهو النقل

الأستاذ احمد عبدالله احمد

منها أول حاجة النقل لكن ما بنختار للولايات النقل أنت 

الأستاذ الطاهر ساتى

يعنى نحن نقول والله السنة دي هم مؤهلين هم الخطوط الجوية السعودية وسودانير

الأستاذ احمد عبدالله احمد

غير سودانير دي ذاتها من شعائر الحاج سودانير وشيكان

الأستاذ الطاهر ساتى

أنا بتكلم ليك عن الاحتكار

الأستاذ احمد عبدالله احمد

التفاوض ما زال يحمل هذه السمات في 50 % طيران سوداني و50% طيران سعودي

الأستاذ الطاهر ساتى

ما تدوا الفرصة  للولايات نختار أن الناقل حسب ما هو في السودان في كم شركة نقل

الأستاذ احمد عبدالله احمد

 ما مؤهلة نحن بنمشي بالطيران المدني

الأستاذ الطاهر ساتى

شغالة الآن سودانير شغالة الخطوط

الأستاذ احمد عبدالله احمد

نحن المرجعية بتاعتنا هنا الطيران المدني والطيران المدني نقول له أدينا الخطوط السودانية المؤهلة للخارج يعنى تشتغل في بعثات حج ويقوم يمدنا بيها

مقدم البرنامج

الحقيقة أنا عارف انه كل سنة بعثة الحج الحقيقة عددها مربوط بعدد السكان هذا قرار منظمة المؤتمر الاسلامى وأنا ما عارف إلى الآن ما فك الاشتباك بين جنوب السودان وشماله يعنى هل الحجيج الجنوبيين سيكونون ضمن الحجيج السوداني أم أنهم خرجوا الآن من الحجيج السوداني

الأستاذ احمد عبدالله احمد

والله طبعا نحن هذا العمل لأننا عملنا إجراءات الحج مبكرا وطبعا كما تعلم انه الآن يعنى الدولة دولة جنوب السودان حتعلن في شهر يوليو فالآن هم موجودون من ضمن الحصة بتاعة السودان الموحد

مقدم البرنامج

لكن الحج إلى شهر أكتوبر

الأستاذ احمد عبدالله احمد

لا الآن الإجراءات بدأت بعد ذلك إذا جاء شهر يوليو وفى شخص عنده وجهة نظر أخرى

الأستاذ ضياء الدين بلال

طيب إذا كانت الإجراءات المذكورة هي للهيئة هي إجراءات محدودة كان في حديث يعنى يدور في الصحف ويدور حتى في البرلمان أهمية وجدوى هذه الهيئة

الأستاذ احمد عبدالله احمد

ما هي دي جدوتها أنها تنظم العلاقات الاتحادية والسيادية يعنى

الأستاذ الطاهر ساتى

والى الآن ما واضحة الآن هي تتدخل تشتغل شغل تنفيذي المفروض البشتغلها الولاة والولايات

الأستاذ احمد عبدالله احمد

الآن نحن لا قاعدين نختار أمير ولا مرشد ولا نختار طيران نقول والله ناس الجزيرة امشوا على الخطوط الجوية السودانية ولم نفرض عليهم اى رسوم حاجة دا كله نحن ما قاعدين نعمله

الأستاذ الطاهر ساتى

الرسوم دي الآن الهيئة لديها مائة وعشرة مقابلها شنو طيب لو قلت لنا كل الرسوم مقابلها شنو واحدة واحدة الولائية والمحلية والاتحادية كل خدمة مقابلها شنو  أنا مثلا ادفع للولاية خمسين جنيه مقابل شنو

الأستاذ احمد عبدالله احمد

هذا يجاوبوا عليه ناس الولاية لكن في خمسة وسبعين بتاعة القطاعات يا جماعة القطاعات دي لديها أعمال تحت هي تقوم باختيار الحاج وفى أعمال إدارية  وهى رسومهم طلعت بمنشور تشريعي من عندهم فنحن السيد نائب الرئيس أبقى عليها باعتبار انه في خدمة نحن أهم حاجة أن نقول انه مافى رسم بدون خدمة دي الحاجة الأساسية

مقدم البرنامج

الحقيقة أستاذ احمد في إشكالية في البعثة اللهى الأشياء المائة والمائة وخمسين اشكاليتها أن بعثة الحج عدد كبير فعلا ينهك الحاج ويزيد التكلفة وكذا يعنى ما هي الاعتبارات التى على  ضوئها انتوا بتجيبوا بعثة الحج والبعثة الإدارية  وأطباء والإداريين والدعاة أنا ما كنت عارف أن الدعاة يشيلوا لهم قروش أنا غايتو ما فاهم الحكاية يعنى

الأستاذ احمد عبدالله احمد

ما هم الدعاة ديل زى المذيعين برضو بشيلوا لهم قروش يعنى المذيع ما يتكلم مجانا برضو داك ما بيدي فتوى مجاني قصدي يا جماعة شنو أن البعثة بتاعتنا دي جزء منها الاشتراطات السعودية كبير جدا جدا نحن الاشتراطات السعودية كل خمسة وأربعين حاج لابد يكون أمامهم يرتب أمورهم يشيل جوازاتهم يكون مسئول منهم والى اخره

الأستاذ الطاهر ساتى

طيب ما يكون مطوع لأنه هو أصلا يحج مجانا على حساب الدولة ليه ما يكون خدمته مقابل الحج الذي يحجه دا ليه يدوه تانى قروش خمسة ألف ريال وستة ألف ريال

الأستاذ احمد عبدالله احمد

والله طبعا هو ما بياخذ خمسة ألف ريال هم بياخذوا مبلغ بسيط جدا ألفين ريال في الغالب الأعم يعنى

الأستاذ الطاهر ساتى

ما الألفين دي بيدفعها الحاج

الأستاذ احمد عبدالله احمد

ما هي ما نسبة كبيرة أنت الليلة إذا أنت جئت انحن أنا أديك بحاجة بمعادلة بسيطة أن الحاج يدفع للطاقم الادارى خمسين ريال يعنى إذا جئت عديتها وضربتها الليلة افتكر هي حاجة ضعيفة جدا صحي لما تضربها أنت ما بتقسمه ما بتديه لشخص واحد بتدى برضو لعدد الأمراء

مقدم البرنامج

نعم دايرك تمشى في حكاية الاشتراطات السعودية

الأستاذ احمد عبدالله احمد

البعثة طبعا عندها مكونات أساسية نحن علينا بعثة بتاعة تامين إذا ما ودينا بعثة هسا بتاعة تامين مشاعر الناس بعدين يجوا يقولوا لنا ليه ما وديتوا بعثة تامين مشاعر إذا ما مشى أطباء وطاقم طبي  الناس بعدين يقولوا ليه ما وديتوهم يعنى ما دي كلها خدمات مع الحج يعنى كلها أن الحاج دا محتاج إلى شخص يؤمنه  ويعالجه ويرشده فالا إذا قلنا والله الحاج دا أصلا ما عنده شغلانية

الأستاذ ضياء الدين بلال

التامين دا ما شغل خاص بالمملكة العربية السعودية

الأستاذ احمد عبدالله احمد

 لا تامين المشاعر هناك عندنا إشكال كبير جدا في تامين المشاعر عندنا حاجة اسمها حجاج الفرادى وعندنا حاجة اسمها حجاج الداخل وقت الناس يجوا يدخلوا عرفة ديل بيجوا يكبسوا على المعسكرات ما عندهم تنظيم هناك فديك بيجوا داخلين علينا فنحن

الأستاذ ضياء الدين بلال

السعودية ما قاعدة تقوم بالدور

الأستاذ احمد عبدالله احمد

لا السلطات تقوم بدور  كبير جدا جدا لكن اى زول يكون مسئول عنه حاجته  الآن الشرطة السودانية ما قاعدة تحمى المساكن ليلا لكن أنت  لابد بيتك دا تعمل له طبلة وتقفله وتعمل حاجات بالصورة دي فنحن برضو مسئولين مسئولية ذاتية عن تامين

الأستاذ ضياء الدين بلال

طيب من المشاكل التى كانت تثار بشكل كبير المسالة بتاعة الأمراء اللهى أشار لها الأخ الطاهر أن الناس ديل لما يمشوا هناك يكونوا مشغولين بذاتهم هم وباهتماماتهم وبعباداتهم ويقل اهتمامهم بالحجيج يعنى

الأستاذ احمد عبدالله احمد

والله توصية مجلس الوزراء بان الناس الذين يمشوا يخدموا الحجاج أن البعثة تكون غير حاجة كانت بعثات التامين فقط من الاشتراطات لكن تقريبا  السيد رئيس



الجمهورية ومعه عدد من الوزراء توافقوا بان ديل يمشوا يخدموا الحجاج تقع عليهم خدمة الحجاج

الأستاذ الطاهر ساتى

ديل حتغيروهم ديل من سنة 90 ما أتغيروا

الأستاذ احمد عبدالله احمد

أنا افتكر لو دخل علينا واحد من ناس القطاعات المديرين التنفيذيين يكون كويس عشان يقوم يجاوب على أخونا الطاهر نحن بنعمل معايير

الأستاذ الطاهر ساتى

لا ما انتوا معاييركم دي  الآن السنة الماضية ولاية الخرطوم الأمراء كانوا في سن الحياة الطلابية كانوا طلاب دي واحدة من المشاكل في ولاية ثانية زى ولاية دارفور وجنوب كردفان نفس الأمراء يتكرروا من سنة 90 كانوا المهنة بالنسبة لهم سوق موسمي وهذا يجعل الأمير يركز على فوائد أخرى غير خدمة الحجاج

الأستاذ احمد عبدالله احمد

نحن بالأمس كنا في ورشة سميناها ورشة المعايير فيها دعينا كل الوزراء الولائيين وكل المديرين التنفيذيين للقطاعات وتناقشنا في المسالة دي والله يعنى إذا كل الإخوة الوزراء قالوا نحن هذا العام يعنى نشهد ربنا بأنه مافى زول ما يستحق أمير ما يطلع أمير يعنى قالوا أن دي مسئولية ويعنى خاصة بهم وهم يطبقوها على الوجه الأكمل

مقدم البرنامج

المطلوب في الأمير شنو عشان الناس يختاروا الضوابط شنو المعايير

الأستاذ احمد عبدالله احمد

والله المعايير معايير أول حاجة عمره ما يقل عن ثلاثين سنة وما يزيد عن خمسين سنة لان نحن بنقول القوى الأمين الحاجة الثانية أن يكون عنده علم بالإدارة وبفقه الحج على أساس انه برضو إذا سئل في المسائل العادية مش المسائل المتخصصة شديد المسائل العادية ممكن أن يجاوب عليها زول يكون عنده خلق وعنده صبر والصبر دا مهم جدا جدا أهم حاجة الأمير دا يكون عنده جديد الحاجة الأخرى ان الأمير جوازه مع ناسه يعنى الجوازات  ال45 و46  هو الأمير هي في رحلة واحدة يعنى ما عنده طريقة يقوم يطلع من الناس ديل ويمشى زى ما حدث في سنوات ماضية

 الأستاذ الطاهر ساتى

في أمراء بيجوا راجعين ويخلوا حجاجهم هناك ويجوا 

الأستاذ احمد عبدالله احمد

من قبل سنتين الحكاية دي ما حصلت لكن نشدد عليها توالى والآن صارت ال46 جواز هي بحجز واحد مافى  طريقة ان الأمير يطلع من الحج أصلا يعنى إلا زول حصلت له ظروف خاصة وفاة أو كدا

الأستاذ الطاهر ساتى

الظروف التى تأتيهم دائما ودي الأغلبية في الأمراء معظم الأمراء للأسف شاغلي مواقع تنفيذية وتشريعية في الدولة يعنى دي كثيرة في أمراء من البرلمان يعنى في أعضاء مجالس تشريعية أمراء ونجيب الأسماء لو دايرين دا اقرب لاستغلال النفوذ ودا الذي يجعلهم يخلوهم ويجوا

الأستاذ احمد عبدالله احمد

طيب نحن نسال الله انو أخوانا الذين يختاروا الأمراء يتحاشوا هذه الظاهرة

الأستاذ الطاهر ساتى

ما هم بيضعوا شروط انو قلتوا الأمير ما شاغل اى منصب

الأستاذ احمد عبدالله احمد

اى منصب عنده علاقة بالحاجات الانا ذكرتها لك  تلقى مرات  الشخص الذي شاغل منصب دا حريص جدا انو شكل الدولة والحجاج في السودان يكون عندهم وضع

الأستاذ الطاهر ساتى

طيب انتوا ما تقولوا الدعاة أئمة المساجد وديل الأولى أنهم يكونوا هم أمراء

الأستاذ احمد عبدالله احمد

نحن دايرين نقول والله المعايير وبعدين أهم حاجة انو الناس هناك يعرفوا الأمير أحسن منى أنا يعنى الشخص مدير القطاع والوزير الولائى طبعا بيعرف الأمير أحسن منى أنا مهما أضع المعايير وكدا في النهاية بتكون هي معايير بتاعة ورق لكن داك بتكون مباشرة

مقدم البرنامج

في معايير للحاج موضوعة منكم ولأمن المملكة العربية السعودية

الأستاذ احمد عبدالله احمد

نعم في أشياء موضوعة من المملكة وفى موضوعة من وزارة الداخلية السودانية هنالك الإجراءات التشريعية

مقدم البرنامج

إذا سمحت يعنى نشوف المعايير المطلوبة في الحاج شنو من المملكة العربية السعودية

الأستاذ احمد عبدالله احمد

من المملكة طبعا يكون الشخص عنده هيئة صحية واستطاعة مالية يعنى ديل الشرط العام بتاعهم هم طبعا بالنسبة للجانب النسوى اى واحدة اقل من 45 سنة لازم يكون معها محرم بالدرجة الأولى يعنى معها فوق لذلك يكون الرفقة المأمونة فقط دي بالنسبة للضوابط يعنى الشرعية

الأستاذ ضياء الدين بلال

العدد حيزيد ولا حينقص

الأستاذ احمد عبدالله احمد

زاد الفين السنة دي السودان عدد الحجاج ستة وثلاثين ألف حاج

مقدم البرنامج

طيب أنت زمان كان عندكم ناس قدرتهم أعلى من قدرة القطاعات دي ويسموها الحج السياحي الحج السيادي وبعدين في حج شاغلي المناصب الدستورية داير اعرف يعنى من حق شاغلي المناصب الدستورية ان يحجوا  لكن هل هم ضمن الناس يعنى انتم واضعين لهم اعتبار

الأستاذ احمد عبدالله احمد

هذا العام مافى حج بتاع دبلوماسيين اى دبلوماسي يا يختار وكالة أو يختار قطاع يمشى عليه يعنى مافى حاجة اسمها دبلوماسيين هذا العام يعنى

مقدم البرنامج

والجيش والشرطة وديل

الأستاذ احمد عبدالله احمد

لا تجئ حملات زى دي تلقى في ناس سوداتل عندهم حملة ناس البترول عندهم حملة في ناس أخوانا في القوات المسلحة عندهم حملة

الأستاذ ضياء الدين بلال

وحج الفرادى كيف

الأستاذ احمد عبدالله احمد

والله دا الهاجس الانحن كل مرة نحاول ان نحارب هذه الظاهرة طبعا إجراء حج الفرادى دا أول حاجة نتج على انو تاريخيا الحج انتظم في السنوات الأخيرة زمان الحج كله فرادى يعنى ما كان في تنظيم مافى اى حاجة ولا في المملكة كان في إجراءات بتاعة انو كل خمسة وأربعين يجئ معهم شخص وكدا دي كلها خدمات كان مافي لأنو ارتبط بفترة طويلة بصورة معينة التقليد انو دائما يحتاج إلى إجراءات شديدة جدا جدا طبعا كثير من الناس الذين يحاولوا يعنى يصطادوا  في هذه الأيام عن طريق الحج الفرادى يقوليك بندى الحاج جوازه في يده وطبعا دي زمان كانت عندها قيمة ولكن بقت ما عندها قيمة الجوازات كلها أول حاجة الحاج كله بقى بالجواز لان الحج كله كان بما يعرف بالوثائق يعنى فكان الإنسان يفتكر ان جوازه لما يشيله معه أهم له من ما يمشى الحج ذاتو فدى تاريخيا دي واحدة من الأشياء الانحن الآن مع أخوانا في السفارة مع أخوانا في الجوازات بنشتغل مع بعض على أساس أن تتناقص هذه الظاهرة

مقدم البرنامج

حج الدستوريين كيف  تنظيمه هذا العام

الأستاذ احمد عبدالله احمد

مافى الدستوري  هو مواطن عادى يحج على حسب ما هو يرغب في وكالات طبعا

الأستاذ ضياء الدين بلال

 الحديث ما يقال على ان التكلفة في السودان يعنى مرتفعة جدا مقارنة بالأعلى في المنطقة

الأستاذ احمد عبدالله احمد

لا هي الأقل في المنطقة أنا يا أخ ساتى مشيت كنت قبل شهر أو شهرين كنت في جمهورية مصر العربية ورسلت وفد إلى تركيا وأنا في جمهورية مصر العربية لقيت الحاج السوداني معه الحاج المصري المتواجدين  مع بعض في قطاعات داك ما يدفع ما يعادل 13 ألف جنيه سوداني ودا يدفع ما يعادل سبعة إلى سبعة ونصف ألف جنيه سوداني الحاج المصري زايد على الحاج السوداني  أنا  بعد ما مشيت جلست مع بعثة الحج المصرية السنة الماضية انتوا طبعا لاحظتوا ان كثير من الناس بيجوا يحاولوا من السودان سواء كان من دول الخليج أو من الجالية بتاعتنا في مصر وطبعا هي لعلمكم  هي الجالية الوحيدة التى  أعطيناها حصة من السودان هي الجالية السودانية في مصر دي دلالة كبيرة ان  إجراءات الحج عندهم غالية والا لماذا طلبوا هذه الحصة

مقدم البرنامج

نعم نواصل سيداتي وسادتي هذه الحلقة في مؤتمر اذاعى من الإذاعة السودانية في أم درمان مع الأستاذ احمد عبدالله المدير العام للهيئة العامة للحج والعمرة وكما وعدنا نريد ان نتيح فرصة اكبر للمستمعين مؤكد لديهم الكثير من التساؤلات والمداخلات إذا كان في مستمع على الهاتف الآن السلام عليكم ورحمة الله وبركاته مين معنا تفضل سؤالك مباشرة حتى نتيح فرصة اكبر تفضل

مشاركة هاتفية 

  الزبير احمد السلام عليكم معكم مجدي الطيب من بحري أولا اقوليك حاجة في الحج قديما في ناس من غرب أفريقيا بيجوا عابرين السودان وبيطلعوا البحر الأحمر لا في وزارة أوقاف لا في وكلاء والحج بالاستطاعة هل يجئ زمن حتى المستطيع لا يقدر يحج

مقدم البرنامج

سؤالك وصل نتيح فرصة لمستمع آخر تفضل السلام عليكم منو معانا

مشاركة هاتفية  

 السلام عليكم معكم  حسن هلال من نيالا أنا افتكر ان الرسوم التى تم تخفيضها في 150 جنيه دي ما عندها معنى إذا كان نحن في المناسبات العامة بقولوا والله يمشوا للشخص الفلاني يعنى كان بالضرورة ان القطاع الخاص يساهم في مسالة الحج والعمرة بفئات على الأقل انحن نضمن ان ال150 جنيه بعدين التخفيضات هي أفضل يعنى

مقدم البرنامج

شكرا نستمع لمستمع آخر السلام عليكم

مشاركة هاتفية  

 السلام عليكم حسن إبراهيم من سنار التقاطع أنا أسال من موضوع الحج الخاص كيف الحج الخاص

مقدم البرنامج

شكرا جزيلا مستمع آخر إذا كان هناك مستمع آخر السلام عليكم منو معانا تفضل

مشاركة هاتفية 

  السلام عليكم الجيلى إبراهيم احمد من المناقل اسأل عن الناس أول فوج بيمشى بيجئ آخر فوج  الناس بيتاخروا تأخير ما عادى

مقدم البرنامج

نعم شكرا نتيح فرصة للأخ احمد عبدالله يجيب ثم نعود مرة أخرى

الأستاذ احمد عبدالله احمد

بالنسبة للأخ مجدي والله نحن في الهيئة حريصين انو اى اسلامى يؤدى الحج وعنده استطاعة نحن نوفر له سبيل الحج أنت السنة دي إذا مستطيع وأول نحن ما نعلن الحج تقدم

الأستاذ الطاهر ساتى

هو بيقول الآن رسومكم دي بتخلى المستطيع ما يكون مستطيع

الأستاذ احمد عبدالله احمد

هو ما سال عن المستطيع هو قال ان الناس المستطيعين ما قادرين يحجوا

الأستاذ الطاهر ساتى

ما انتوا بترفعوا حج الاستطاعة كل سنة بزيادة

الأستاذ احمد عبدالله احمد

ما هو دي الاستطاعة الموجودة الآن المعلنة بالنسبة للأخ حسن هلال من نيالا طيب واضح ان أخونا حسن دا استوعب الكلام الذي قلته ان الحكومة فيما تملك خفضت الباقي هو قطاع خاص أنا أناشد كل أخوانا في القطاع الخاص ان الحجاج يكرموا والإنسان إذا عنده يعنى تخفيض يخفضه وإذا بيربح 20% خليه يربحلينا 5% القطاع الخاص هو يقصد الطيران البعثات كل الأشياء الأخرى دي

مقدم البرنامج

تذاكر السعودية دي أيام الحج أغلى من الأسعار في الأيام العادية

الأستاذ احمد عبدالله احمد

ما هي الطائرة تمشى من هنا مليانة بتجينا فاضية وفى الرجوع بتجينا مليانة وترجع من هنا فاضية

مقدم البرنامج

بتجيبوا فيها موية زمزم

الأستاذ احمد عبدالله احمد

لا موية زمزم أوقفت بقرار ملكي بالنسبة للأخ حسن إبراهيم من سنار التقاطع  الحج الخاص هو يعنى هو حج غير حج القطاعات يعنى مثلا ناس يمشوا على الوكالات ناس يمشوا على المؤسسات يعنى الناس بيطلبوا خدمة خاصة يعنى فدا  الحج الخاص بالنسبة للأخ الجيلى من المناقل نحن يا جماعة أقصى حاجة عندنا عشرة أيام في المملكة يعنى البرمجة معمولة على  عشرة إلى اثنتي عشرة يوم فقط الحاجة الأخرى هو قال أول فوج بيجئ آخر فوج هو بالعكس نحن أول فوج يمشى من السودان بيجئ أول فوج من هناك لأنو دي برمجة الحجز كدا هي ذاتها لكن داير أقول له انه أقصى حاجة عندنا ما بزيد من 12 يوم في المملكة بعد ما انتهى من أعمال الحج ما يقضى أكثر من 12 يوم

الأستاذ ضياء الدين بلال

مافى ناس مستعجلين لكن

الأستاذ احمد عبدالله احمد

ما اصلو السودانيين مستعجلين طوالى

مقدم البرنامج

طيب مستمع آخر السلام عليكم منو معانا تفضل

مشاركة هاتفية 

  محمد احمد الأمين ولاية نهر النيل الباوقة نحن والله الحج دا دايرين نحج لكن التكلفة دي صعبة شوية

مقدم البرنامج

الغريبة هنا  في سؤال وصلنا من زميلنا معتز حاج الصديق بأنه زمان الحج كان باثنين مليون وثلاثة مليون فجأة كدا في سنتين تلاتة كدا بقى ثمانية ملايين وسبعة ملايين ودي سببها شنو إيه ارتفاع الأسعار بتاعة تكلفة الحج هل هناك مستمع آخر أتفضل أستاذ احمد

الأستاذ احمد عبدالله احمد

بالنسبة لمحمد احمد من الباوقة طبعا يا جماعة للمعلومية السنة الماضية نهر النيل أول قطاع أكمل حصته وزاد عليها ب800 شخص اضافى فجونى يعنى الحجاج من مناطق أخرى قالوا لي دي تعويضات السد ولا شنو الناس ديل كلهم سالوا فنحن السنة الماضية كان أكثر قطاع عنده قدرة من الاستطاعة كان هم حجاج نهر النيل والشمالية ديل أكثر ناس أكملوا حصتهم

مقدم البرنامج

أنا بتكلم بشكل شخصي هم بيفتكروا التكلفة  كبيرة

الأستاذ احمد عبدالله احمد

 أنا بتكلم عن عموم السكان السكان في نهر النيل السنة الماضية كانوا أكثر الناس حصلوا على حصة بتاعة حج واضح ان الوضع الاقتصادي بتاعهم كويس

مقدم البرنامج

لا زى ما قلت الأخ معتز حاج الصديق دا أتكلم عن الحج صحي كان قبل عشرة سنة كان بثلاثة أو اثنين فجأة وصل خمسة وبعد شوية صار ستة وسبعة وما عارفين بعد شوية حيصل كم يعنى

الأستاذ احمد عبدالله احمد

طبعا هو معظم الحج هو أعمال في المملكة هي خدمات في المملكة سواء كان سكن أو غذاءات معظمه يعنى نحن 78% من تكلفة الحج هي المملكة العربية السعودية فدى معناها مرتبطة بأسعار الريال والجنيه

مقدم البرنامج

نعم تفضل الطاهر

الأستاذ الطاهر ساتى

برضو من الملاحظات ان العقارات والأشياء التى انتوا تستأجروها سعرها مقارنة بأسعار الناس الاصلا مقيمين هناك عالية جدا سواء كان في الفنادق ويقال انه في تضاربات بتحصل وفى سماسرة بيدخلوا في الشغل دا من السودان ومن المملكة هم الذين يعلوا الأسعار لتصل هذه المرحلة 

مقدم البرنامج

طيب في مستمع آخر منو معانا

مشاركة هاتفية  

 معكم عبدالباقى عبد الرحمن أنا داير أقول لهيئة الحج والعمرة بعد ما تنزلت كثير مسئولياتها كثير للمستوى الولائى وهو المستوى التحتى المرتبط أصلا بشان الناس أتوقع لها الدخول في الأطر المتقدمة جدا مثلما كان عدد من دول شرق آسيا في أنها انشات بنوك الحج وشركات الحج يستثمر فيها الناس للمستقبل على اعتبار ان الحج نفسه هو شعيرة من شعائر الدين وهى واجبة على كل مسلم طالما هو على الهيئة فيمكن الإنسان ان يدخل في الهيئة باستثمار معين بواسطة مؤسسة معينة تديره له حتى ياتى في الوقت المناسب ليحصل على استثماراته ويقوم بأداء شعيرة الحج من خلال هذا الاستثمار الذي قدمه إلى تلك المؤسسة

 مقدم البرنامج

افتكر واحدة  باعتبارها من السياسات في أخ على الهاتف نتيح له فرصة لا مافى أتفضل أستاذ احمد

الأستاذ احمد عبدالله احمد

 أولا شكرا جزيلا يا أخ عبدالباقى واضح ان الأخ عبدالباقى زول متابع جدا ونحن هذا العام إنشاء الله سيطرح صندوق الادخار للحاج والمعتمر وهذا الصندوق حيشرف التدشين بتاعه السيد رئيس الجمهورية في الشهر القادم بإذن الله وحيلقى عدد من الحجاج على صندوق الادخار للحاج والمعتمر ودي فرصة سعيدة نحن ندعو كل المؤسسات مؤسساتنا السودانية أنها تساهم في صندوق ادخار الحاج والمعتمر

الأستاذ ضياء الدين بلال

ما أتحدثنا عن العمرة إذا اديتنا خطوط عريضة

 الأستاذ احمد عبدالله احمد

 العمرة طبعا أول حاجة الحمد لله نحن هذا العام مستهدفين خمسة وثلاثين ألف وحتى هذه اللحظة نحن تجاوزنا قرابة الستة ألف وهذا بنفتكر انه مقارنة بالسنة السابقة يعنى كان الأداء طيب جدا العمرة هي تخصيص  خاص للوكالات  والشركات السعودية يعنى هي علاقة خاصة بين الوكالات والشركات السعودية

الأستاذ ضياء الدين بلال

انتوا دوركم فيها شنو

الأستاذ احمد عبدالله احمد 

 بتدخل الهيئة العامة كجهاز رقابي  اشرافى وضامنة لحقوق كل المتعاملين سواء كانت شركات سعودية أو وكالات سودانية أو معتمر سوداني  ديل كلهم نحن بندخل لضمان حقوقهم بواسطة عقود يعنى نستوثق ان في عقود أدرجت وموجودة بالنسبة للحاج السوداني انه لابد يأخذ معه العقد هنا بتاع الخدمات التى تقدم له هناك  دي مسالة مهمة جدا جدا كذلك الوكالة السودانية بتاعتنا لابد أن يكون عندها عقد عشان تضمن العلاقة بينها وبين الشركة السعودية

مقدم البرنامج

في مستمع نتيح له فرصة الو السلام عليكم تفضل يا أخ

مشاركة هاتفية  

 وعليكم السلام ورحمة الله الطيب منصور شرق بارا نسال يعنى مثلا التخفيضات ذاتها في هذا العام المفروض يوروا الناس من بدري المقرر قدر شنو وبعدين تحددوا الأشهر يعنى قبل ما الحج يقرب يقوموا طوالى يقدموا واحدين إلا يلحقوا متأخر

مقدم البرنامج

شكرا أخ الطيب منصور من بارا أتفضل أستاذ احمد

الأستاذ احمد عبدالله احمد

 أول حاجة هذا العام حتكون في شفافية عالية جدا يا أخ احمد الطيب كل القطاعات تدرج التكلفة بصورة واضحة ومفصلة ببند بند دي واحدة من الاشتراطات بيننا وبين أخوانا في القطاعات انه لابد ان المسالة دي تكون واضحة للحاج في هذا العام التقديم إنشاء الله غدا سيعقد بإذن الله المؤتمر الذي يعلن فيه بداية الحج هذا العام وحيكون مبكر جدا

الأستاذ ضياء الدين بلال

ممكن في حديث وتساؤل في الجوانب الصحية يعنى الناس المؤهلين صحيا

الأستاذ احمد عبدالله احمد

والله نحن عندنا لجنة اسمها لجنة اختيار الحاج

الأستاذ ضياء الدين بلال

السنة الماضية أو قبلها كان في نسبة بتاعة وفيات كثيرة في الحجيج السوداني

الأستاذ احمد عبدالله احمد

هو طبعا النسبة ما كبيرة نحن كان السنة الماضية احتسبنا حوالي اثنين وعشرين شخص بالنسبة لحوالى خمسة وثلاثين ألف حاج افتكر دي بالنسبة

 الأستاذ ضياء الدين بلال

دي أعلى من السنوات السابقة

الأستاذ احمد عبدالله احمد

لا اقل سنة نحن السنة التى قبلها أكثر السنة الماضية اقل كان اثنين وعشرين حاج فقط نحن احتسبناهم السنة التى قبلها كان حوالي أربعة وثلاثين حاج

مقدم البرنامج

طيب أنا حقيقة داير اسأل أسئلة قصيرة وسريعة يعنى متى ستعلنون عن بداية إجراءات الحج

الأستاذ احمد عبدالله احمد

غدا نحن حنعلن عن بداية الحج وبعد ثلاثة يوم من المؤتمر الصحفي تبدأ الإجراءات

مقدم البرنامج

طيب كم يعنى بشكل مختصر يعنى بشكل عام كم يكون سعر الحج

الأستاذ احمد عبدالله احمد

والله هذا كله متروك عند أخوانا في القطاعات

مقدم البرنامج

لكن التوقعات يعنى على الأقل رقم يمكن يكون تقريبي نعم

الأستاذ احمد عبدالله احمد

والله برضو ما املكه هذا متروك كله بعدين لأخوانا في القطاعات

الأستاذ ضياء الدين بلال

ممتنع عنه أم لا تملكه

 الأستاذ احمد عبدالله احمد

 الاثنين مع بعض عشان أكون صادق معاك  الاثنين مع بعض ما داير ادخل في حاجة ما شغلى يعنى حتى لو أنا عالمها ما داير ادخل فيها يعنى لأنها ما شغلى أنا

الأستاذ ضياء الدين بلال

المسالة شكلها حتكون عالية

مقدم البرنامج

طيب شيخ احمد لو نديك اقل من دقيقة في رسالة للحاج السوداني

الأستاذ احمد عبدالله احمد

 والله أنا الحقيقة الحاج السوداني أول حاجة الشئ الذي اطلبه ان يشرف السودان خارجيا يعنى أول حاجة يكون عنده صبر يتحمل الأذى نحن حنحتك مع شعوب أخرى شعوب لا تعرف العربية شعوب يكون فقهها قليل شعارنا هذا العام هو لا رفس ولا فسوق ولا جدال يعنى الأمير إذا استفذاك برضو لا ترفسه لا تفسقه  اى حاجة تحصليك اصلو هو إذا ما دفعت للرفس  مافى معنى انو تتكلم الآية عن الرفس مش كدا يعنى لابد انك تستفذ إذا استفذيت من اى حتة ما تستجيب

مقدم البرنامج

نعم نحن حقيقة رغم انه لم نشفى قليل كثير من المستمعين فيما يتعلق بالإجراءات ونمكن الإخوة المستمعين من الهيئة العامة للحج والعمرة لكن يعنى لم يتبقى لنا وقت في الختام نتقدم بالشكر الجزيل للأستاذ احمد عبدالله احمد المدير العام للهيئة العامة للحج والعمرة ونتمنى ان الله سبحانه وتعالى ان يوفقهم في هذا العام يعنى يضعوا إجراءات وأعمال تؤدى إلى تسيير عملية الحج وبتكلفة تكون معقولة للحجاج لهذا العام شكرا أخ ضياء الدين بلال شكرا الأخ الطاهر ساتى وأرجو ان اشكر الأخ محمد عبد الوهاب من الهيئة العامة للحج والعمرة الذي كان خلف هذه الحلقة عبد الملك محمود نفذ هذه الحلقة على الهواء موسى عبدالله إسماعيل كان في الإعداد نعم أستاذ احمد عبدالله

الأستاذ احمد عبدالله احمد

قلنا حقو أخوانا المعانا ديل  الذين يجادلونا ديل حقو يراقبونا هناك عشان يشوفوا المسالة نحن من الهيئة نقدم لهم الدعوة وكذلك يا أخ الزبير نقدم لك الدعوة عشان بعدين الحكاية ما تكون لينا في الاستوديوهات في  أم درمان تكون أنها هناك

مقدم البرنامج

إنشاء الله شكرا جزيلا  السلام  حتى نلتقي سيداتي وسادتي في الأسبوع القادم نستودعكم الله .


تنقل بين البرامج
قضية المياه بولاية الخرطوم الحلقة التالية البرنامج السابقة مشروع السجل المدني
التعليقات تخص صاحبها ولا تخص ادارة الموقع

أخبار من الأولى

آخر المواد الصوتية