كلمات أغاني الفنان محمد جباره

[محمد ناصر]

ضــــــــــــل الغيمــــــــــــه - محمـــــــــد جـــــــــباره

http://www.alnsri.com/upload/uploads/2_118793296916.mp3


http://www.alnsri.com/upload/uploads/doalgima5562.wma


ضل الغيمه غش قليبي قال ينجمّ خت رحالو
فات خلاهو للكان ظنو في عز الهجير يرتالو

عاد وريني ليه يا غيمه ماك عارفي السفر وأحوالو
ولا قليبي تحتك حالفي ما يطيبلو المقيل يحلالو

ضلك من بعيد يا غيمه كان دايماً بيتمارالو
جافل منو لكن برضو كان عاقد عليه آمالو

جاييك من بعيد يا غيمه قاصدك داير يريح بالو
والله لحظات بس يعيشهن هاني تحتك زي عُمر تبقالو

فاكرك والهجير يا غيمه صاليهو مبشتن حالو
ولا بي تحنان تحضني عليكِ تمسحي منو دمعات سالو

إنتِ لو كان ليكِ قلب يا غيمه عاشقك فات رحلبو شالو
ولا كان واديك دمعك رشّ كترت عربو في حلالو

مادام فُتي آه يا غيمه قصدو الدايرو ما تمالو
ولا شن الحارسو باقي وراكِ مادام غرزو تب ما نالو

بالليل والنهار يا غيمه ناوي يقوم علي ترحالو
وحده خلاص يواصل تاني مشواراً كتير يهوالو

قوليلو الوداع يا غيمه لو كان في الوداع يلقالو
ولا حبة زاد يشيلا معاهو في سفرو ليالي الطالو

داير يوصيكِ هاك يا غيمه لي زولاً قبيل غنالو
ولا تمشيلو توصفي ليهو كيف جمر الغرام سوالو

كيفن بُعدو آه يا غيمه تب في الدنيا ما خلالو
ولا غير جرحاً يزيد إيلامو كل ما صحبو قالوا وقالوا

غير بيت من قصيد يا غيمه يفرِح حتى لي عُزالو
ولا مهما سو فوقو وجابو زادولو الملامه وكالو

غير طيفو الحبيب يا غيمه في دنيا العذاب هلالو
إتذكر زمانو الولى رقّ قليبو تب حنالو

غير قيداً خلاص يا غيمه معقود وإنعدم حلالو
والله رغم البيهو قولي ليهو ما فارقت لحظه خيالو

[خالد الريح]

يا سلام عليك يا ود ناصر ..
واااااااااااااااااااااااااااااااااااااصل

[د.احمد]

والله رائع .......... لك الشكر و التقدير

[محمد ناصر]

الأخوان الأعزاء الحنين و د . أحمد أشكر لكم مروركم العطر , وقد قمت بإضافة تسجيل آخر بناءاً على طلب بعض الإخوه ...

[محمد ناصر]

بت البلد - أداء محمد جباره


http://www.ma7room.org/up/images/3p8xybz7j9qj3o4iijlr.mp3



وبلا خبر
طق الخبر مالي البلد
قالوا العريس قام بالأحد

الحلي جاطت والحريم يتهامسن
جاي الولد
كوم من بنات للبير ورد
يتحدثن جاي الولد
يا بختها وا شوقنا
نحنا اللينا جمر الشوق وقد
كل الحديث الليلي فوق بت البلد

لامن خلاص الليل دخل
آخر شعاع من الشمس روّح نزل
ضو القميره جا من بعيد بهر قدل
دافر ظلام الحلي قداموا وصل
ناس البلد النام رقد
والماسك السبحه وعبد
مشغول هو
بخبر العريس القالوا قام يوم الأحد

وهناك بعيد بي غادي في آخر الديار
راكوبة ضلها احر من حر النهار
كوم من بروش وجريد تمر عيدان صغار
ودلوق هدوم موروثة من زمن الكبار
وتلات عناقريبا صغار
كرابة متقطع نزل
والنوم من البيفوقا روح تب جفل

راقد هناك كوم من ضياع
مركب مسافري بلا شراع
احلام مسافري بلا وداع
ودموع ضياع تنجارى
من غير انقطاع
احرف أنين ما خطتن ايد بي يراع
وليلا نجومو يودعنو
خلاص مسافرات هن سراع

بت البلد عبراتا سدت في الحلق
تبكي وتنوح تشرب دموعا وتنشرق
لامن حسيس نقارة جاها من الشرق
قامت مع الليل صنقرت
وبكت بكت شالت طريحتا
للدميعات كفكفت
فجأة سنين الفاتو جن
وايام زمان إتلملمن

واتذكرت كانت تقوم فجر الصباح
لمن يقوم اهل الصلاح
ابوها شايل السبحي صاح
ياشافعه سوي الشاي سريع
شدي الملاح
شيلي المناجل وامشي قدامي الجرف

اتذكرت كانت تسبقو تمشي تنزل بي تحت
تمسك سبيط التمرة بي ايدا وتحت
تقعد تحش اللوبي للكاويق تقش
تصل البحر والموج يداعبا فوق هدوما ينط يرش
بعدين تشيل القش تفوت
واليوم يفوت
وتفوت سنين وتمر سنين
يكبر عمير بت البلد
يكبر معاهو كمان حنين

في يوم صباحو صباح هنا
واحة عبير نغمة غنا
ريحة لبيني مقننة
مر الجنى وسلم علي بت البلد
زي عادتو سلم وابتعد
تابعاهو عين بت البلد
بت البلد سمعت ضريبات القلب
يا الله مالو ده القلب
بعد الثبات كبفن خرب
بت البلد عرفت تحب

واليوم داك بت البلد ما جاها نوم
مادام خيال ود البلد يمشي ويحوم
بين الخيال شافت وجيهو الهاش وباش
شافت عيونو الفيها فيض احلاما عاش
شافت سحاب الريدة فوق واديها راش

بت البلد تاهت مع الشوق الما عاد ينكتم
والصوره ها دي في قليبا بتترسم
إسمو العلي نونة خديدا صبح وسم

تاهت مشت سايقاها دقات الدليب
لي دار حبيبه منى القليب
لي قعده عصراويه فوق العنقريب
للونسي والخاطر يطيب
لي مسكه في إيد الحبيب
الوقفه قدام الجنات
القرمصيص وغنى البنات
يالله وين تلقى الثبات
والصفقه من تال الولاد
ما بتسمعا وجاياها من آخر بلاد

اتذكرت كبف حاج محمد والدا
حالف يمين ود البلد ما ياخدا
لو كان ركع قداما صلى ويعبدا
أتذكرت كيف حاج محمد والدا
قال ليها ما عندك أدب
تعبان سنين فوقك تعب
واديكي لي زولاً كعب
تربال وعيشتو عدم عدم
لو قاري لو ماسك قلم
تاخديه تندمي صح ندم
يشقيكي يوريكي الالم

واتذكرت كيف حاج محمد والدا
وصف العريس الجاي بي قطر الاحد
كتر محاسنو وعددا
راجل موظف عندو مال
يأويكي في بيت الحلا ل
تبقيلوا لي امو العيال

واتذكرت لامن ابت
قول حاج محمد والدا
كيف نهرا وحالف يمين بيودرا
لو مارضت بالجاي بي قطر الأحد

إتذكرت كيف الحبيب ود البلد
في الغربه روّح وإبتعد
وبكت بكت بت البلد
لما الخبر زاع في البلد
إنو العريس قام بالأحد
الحلي جاطت والحريم يتهامسن
جاي الولد
كوم من بنات للبير ورد
يتحدثن جاي الولد
يا بختها وا شوقنا
نحنا اللينا جمر الشوق وقد

لكنهن ما عرفن الشوق كيف وقد
وما عرفن انو هي شوقا تب ماليهو حد
مو ليس للعريس ليهو الحبيب ود البلد
ده الراح وفي زحمة ضياع هو ما اتوجد
يا حليلك انت يا بت البلد
ويا حليلك انت يا بت البلد

[محمد ناصر]

الحــنين - كلمات الشاعر : السر عثمان الطيب
أداء الفنان : محمـــد جــباره


http://up.sudanradio.info/upradio/upload//3334-1-574669943.mp3



الحنين وداني جيت بالساقي سادر
قلت انشد ناسا عن زولي المسافر

الحفير شـوف عيني يبكي معاي يكابر
دمعو جدول جاري لي بيتكم مجاور

قال لي وين ما بنت طوّل ماك ظاهر
دار اجيكم قتلو لو كان لاقي خاطر

كانن الايام حنان بالحيل نواضر
الله يلعن حظي شوم يا اخواني عاسر

لي محل اللقيا سقت خطاي ازاور
استعيد الماضي اتعللبو صابر

احضن الاغصان واهيم في وهم سادر
وحدي تحت المنقة للأحزان مصاقر

مالو من خلاني ما يكتب يخابر
بس لعلّو المانعو خيروكتر بشاير

ناس فلان قالوا لي طاريك ديمة ذاكر
بي غرامك قلبو ديمه ملان وعامر

لابس الاخلاص حرير وهلال واساور
قلدوه فوقوا اكليل من ازاهـر

آه تقاليد ريفنا يا الابو ماب تشاور
نحن سرمأساتنا بتنا قولا قاصر

برضي بمحبوبتي مهما كان بفاخر
أنا زولتي خلقت مني زول فنان وشاعر

مـن جراحي ونوحي والاذي والدرادر
أنا من جحيمي الفيهو مرمي كأني كافر

من ضيا القمره البشق الليل يدافر
من حسيس طنبوري يرن في روعة يناقر

من فؤادي وروحي من آخر وآخر
بهدي أجمل شعري لؤلؤ در جواهر






للتحمـــــــــــــــيل .... (http://up.sudanradio.info/upradio/upload//3334-1-574669943.mp3)

[د.احمد]

ياسلام عليك يا محمد ناصر