المساعد الشخصي الرقمي

مشاهدة النسخة كاملة : كلمات أغاني الحماس والسيرة



روعه أحمد محمد
30-07-2012, 11:00 PM
اغاني الحماس والسيرة ضرب فريد من ضروب الفن التي يتفرد بنظمها شعراء وشاعرات السودان دون غيرهم ممن نظموا الشعر في البلاد العربية وتفردهم في هذا المجال ياتي من كونهم صاغوا أشعارهم بالعامية السودانية لكنهم أتوا بمعاني في غاية البلاغة ودقة التعبير. أشعار الحماس تولد فيمن يسمعها إحساساً لا أستطيع وصفه وتدفعه دفعاً نحو الإعجاب بها وقد يعبر الشخص من غير قصد عن إنفعاله بها عن طريق ترديدها او التحرك الا ارادي معها, فهي تدخل في النفوس البهجة ولا أظن أن سودانياً أصيلاً لا تهزه هذه الأغاني والقصائد المنظومة باتقان. ولما كانت أغاني وأشعار الحماس بهذا المتسوي الرفيع والقدر الكبير من الأهمية رايت ان صفحات منتدانا العامر لا بد لها ان تتحلي بهذه الدرر الفريدة, وساعمل جاهدة ما أمكني ذالك أن أورد إسم شاعر القصيدة ومناسبتها ما وجدت الي ذلك سبيلا وارجو أن يساعدني باقي الأعضاء بالتصويب والشرح والإضافة حتي ياتي البوست بالشكل الذي يتناسب مع مكانة المنتدي المتميزة بين المنتديات فان وفقت فحمداً لله وهو الموفق وإن لم أوفق أكون قد كسبت أجر الإجتهاد ولكم مني كل الحب.

روعه أحمد محمد
30-07-2012, 11:05 PM
(1) عجبوني تيراني
الشاعرة زينب بابكر عبد الله الشوبلي
نشب صراع بين العوضية وعائلة فرح الذين يقيمون حول أم مغد بمركز الكاملين وذلك بسبب الأراضي مما تسبب في صدام وقتال بين الطرفين حيث حشد العمدة البخيت بابكر ضحوي أهله وأبناء عمومته وكذلك فعل الطرف الآخر وحينها شاهدت الشاعرة (زينب بابكر عبد الله الشوبلي) تلك العركة وهي ابنة عم البخيت باعتبار أن ضحوي والشوبلي أشقاء وقد سمي ضحوي بذلك الاسم لأنه كان كريماً كالمطر الذي يصب في الضحى لذا قالت الشاعرة زينب مادحة أبناء عمومتها:
ماشفنا الاسد بلاعب الجاموس
وماشفنا المرق بدخلو عرق السوس

عجبوني تيراني ياقاصدين لماي انا طرقوا لساني

مك ود مكوك من اربعين طاقيه
وابواتك قبيل جابوها بالزنديه

عجبوني تيراني ياقاصدين لماي انا طرقوا لساني

حلال المضيق وقت الخيول يتشبكن
رباي للضعيف قشاش دموع الببكن

عجبوني تيراني ياقاصدين لماي انا طرقوا لساني

تركب صافنات نجيبها ضرعانيه
اصلو الزول بموت والزكري تصبح حيه

روعه أحمد محمد
30-07-2012, 11:08 PM
(2)أنا فوقهم بقول كلام
كما وصفت الشاعرة زينب بابكر عبد الله الشوبلي
أشقاء البخيت الذين استبسلوا في تلك العركة وكانوا كالديدان وهم (أبو زيد وموسى ومحمد وعبد المجيد وعامر وعبد الدائم والطيب) حيث قالت الشاعرة زينب ممجدة إقدامهم وشجاعتهم:

انا ليهم بقول كلام دخلوها وصقيرها حام
سم اب درق البصقع جدرى القيح البفقع
صوتك مانع برجع الطيب فى شطارتو مبدع

دخلوها وصقيرها حام انا ليهم بقول كلام

سم اب درق الجرادى تكل الجدرى البعادى
للخصيم ضربو بياذى موسى المر الحجازى

قرقر ملا للوسادة برنو و شال لى مكادة
ديل جنياتنا الندادة سيد الدار فى السيادة

قرقر فوق للدرب و ربط الهوي و الشرق
كدى ميزو لينا الضرب و ديل جنياتنا ما بتتغلب

عامر سوقك مبدر مجرجر توبك مسدر
الطيب للشر مقدر مر كالتكل المجدر

انا نميت جبت قلبو فشلو القالو قصو دربو
ديل رازوه و قصو دربو دق السندالة قلبو

عبد الدايم شك تيلو من ولدوه الشكره هيلو
الخصيم ما بجيلو صوتو بهدي قبيلو

عبد الدايم معاهو اخوانو
ضربو البلا فى بكانو
وكت رماهم قنعو قامو
الصف العمر زحامو
هو مستعد لى لطامو

انا نميت جبت غناكم يا البيينين هوي براكم
البدوركم تراكم حلق الطير لى غداكم
الصف العامر يرجاكم ؟
اتباشرو لى بلاكم و اركزو زينب وراكم

انا ليهم بقول كلام دخلوها وصقيرها حام

روعه أحمد محمد
31-07-2012, 09:59 PM
(3) الباسل بابكر
الشاعرة زينب بابكر عبد الله الشوبلي
ألفت هذه القصيدة في جدها بابكر ضحوي

بجر القول والشكر لي الباسل بابكر
---------------------------------
يابنية جري القدح للاسد الما انفضح
ابوي مما قام قرح بحر المالح طمح
---------------------------------
يابنية جري الكلام للاسد الفي الملم
ابوي مما تب قام ابوي قدحه سبق السلام
---------------------------------------
لا بزعل لا بضيق ولا بتغابي الرفيق
يسلم ضو الفريق يشيل حملو بلا طبيق

روعه أحمد محمد
31-07-2012, 10:02 PM
(4) السيل بوبا
نُظِمت القصيدة في البطل محمود ود بساطي أحد ضباط قوة دفاع السودان الذي منحه الحكم الثنائي رتبة بك لشجاعته وإقدامه في الحرب العالمية الثانية مما جعل شقيقته آمنة تمدحه بقولها:


غير خالد ماليك تنين عرش دود الأربعين
السيل بوبا يا الفوتك مو دحين
تغني ليك أم هاني
ويشهدو أهل المعاني
نضيفا خاتي ريحة الشاني
كتل ديلاك خبرو جاني
يا القمره الماك شهير
يا الرأسى الماك صغير
أبوك بساطى القبيل
تبراهو الشعبه والجنزير
خت كرسيه للعديل
وكورك قال يا غفير
سيفه بدلي الجفير
العاداك وين يطير
شقيا صادف نكير
شدلوا ليك في أم سبيب
كشفن ليك أمات وضيب
يالقاصدو ظنك ما بخيب
والف الشمس قبال تغيب
تغنى ليك ظبية الحدر
ما بتبلع من بي وصفو مر
المكنه فوقو بتكاكى
والمدفع تحتو بيخر
لا بيخاف ولا بيتر
قدام العينهم خضر

روعه أحمد محمد
04-08-2012, 10:52 PM
(5) قصيدة فخر
كلمات الشاعر / احمد محمد الشيخ الجاغريو
غناء الفنان / خلف الله حمد
نحن صغيرنا عنده حياته ما هميه
وفى زمن الحروب الواحد يوزن ميه
نحن أرواحنا يفدن ناس سعاد وصفيه
ونحن اللي وطنا وعودنا ديمه وفيه
*********
نحن فرحنا يوم الكتله والمكيه
يوم حر النهار ويبقى الكتال باركيه
الموت هيلنا قُبال تظهر التركيه
والعادانا كُله خلفنا ليه الكيه
********
لو بقت الشجاعه من النفوس ممحيه
ما بتفوتنا حارسه قلوبنا دائما حيه
نهاجم الموت نخش وكره ونجيه ضحيه
نهز في الحي والميت نعده ضحيه
*******
صوت المستغيث نقمز نجيه سويه
وننحر خرزه الشايل لضيفنا هويه
نطرب لي قنابل الطائره الجويه
ما فينا البمد إيده وتصد ملويه
********
يوم الحاره يوم تبقى الحروب دوليه
والفارس أب زنود قدامنا يبقى وليه
ما بنخت نقيصه إن متنا بالكليه
بنخاف من ملام ست السُوار أب ليه

معاني المفردات
* باركيه : يقاتلون بالدرقه
* : ضحيه : وقت الضحى
*نقمز: اى نهب ونثب
* الشايل : البهيمه على وشك الولادة

روعه أحمد محمد
05-08-2012, 11:08 PM
(6)
أسد الخشش
للشاعر الاستاذ عباس الطيب الهادي

اسد الخشش الضرية
كابي فوق الولية
ياليلة ....ود العز والبنية
.................
غنت ليك ام سماحة
يا الولدة التامة النجاحة
خيولك ما جن قماحة
انت اليلي العم البطاحة
وانت جلة وبارودة فاحة
.................
اهلك سموك اللصم
وما سرحوك بالبهم
يالتام الراي والفهم
في يوم الهول واللطم
حيرت الفصاح والعجم
..................
شدوا ليك البتاتي
كريم الخيل العواتي
وكت الموت ساعتو تاتي
بتذكر دهب البراتي
وبشق الزول ان جاهو خاتي
................
يا التمساح العشاري
يا الليلي العم الضهاري
ما قالوا خاف جانا جاري
شايل البلصف يراري
وبضرب يمين و يساري
.................
شدوا ليك البطير
وسيفك باغد الجفير
الكازاك وين اطير
في اليوم النحس الخطير
بخوض النار ام زفير

شرح بعض العبارات
1/ يكابي فوق الولية: يهب لنجدتها ومساعدتها مسرعاً متعجلاً
2/ ود العز والبنية:البنية نوع من المباني يبني علي قبور الأولياء والصالحين وهذا يعني ان المفتخر به أهله من أولياء الله.
3/ بشق الزول إن جاهو خاتي : لايعتدي علي أحد الا أنه إذا أخطأ احد في حقه لا يرحمه ويشقه شقاً
4/ البلصف يراري هو السيف شديد اللمعان لحدته.
5/ شدو ليك البطير تعني أن فرسه من سرعته يكاد يطير.
6/ الكازاك أي الذي عاكسك أو عاداك.

روعه أحمد محمد
12-08-2012, 09:24 PM
(7)
أب نفلين

أغنية أب نفلين هي كلمات الشاعر احمد محمد الشيخ الجاغريو
غناءالفنان خلف الله حمد...

أنا غنيت على أب نفلين
يا سيدي الرسول تنجوه من العين
********
الليله اللدر بتمشى في الوديان
طالع من القيف ومن الغضب مليان
بعزل في الجواميس ما بكشكش الغزلان
بتذكر حديثها وخدها النديان
*******
برز في الميدان بتطّلع المجهول
وبٍطرنه البنات ساعة الضجيج والهول
ده أب نفسا رضيه الحقه فيها القول
ده أب سيفا بشلّع الخوده وبقسم الزول
********
الليله الجنيات في الوادي ليهم صوت
يضحك مانجلن ساعة الكتال مبسوط
يجيك من تبّ هيلو الفوت
وما بيأسف على الروح الوراها الموت

معاني بعض التعابير
1/ النفل: الطبع والفضيلة والمنفل هو الزائد في الحسب والنسب, ذو الفخر , وذو المرؤءة والحسن.
2/ الخودة: هي الخوذة أو هي قبعة من الحديد تستعمل كحماية للرأس من السيوف
3/ اللدر : التمساح الشديد الخطر ويشبه به الرجل الجرئ الذي يهابه أشجع الفرسان
4/ مانجلن : المانجل أو المانجلك أو المانجيل كما ورد في بعض أغاني الحماس هو رئيس القوم
5/ الفوت: التفوق علي الأقران في ميدان الحرب وفي الأخلاق والصفات السامية.

روعه أحمد محمد
12-08-2012, 09:29 PM
(8)
اولاد ابو فركة
كلمات الشاعر/ احمد محمد الشيخ الجاغريو
غناء الفنان / خلف الله حمد

نحن أولاد أبو فركه نقعد نقوم على كيفنا
في لقى في عدم دايما مخرف صيفنا
نحن الخرس بنملاه وبنكرم ضيفنا
نحن الفوق رقاب الغير مجرب سيفنا
*********
نحن جدودنا اظهر من علم بينين
نحن قلوبنا من فولاذ حديد ما بلين
نحن العن عروضنا لؤام وجبارين
بعرفنا الصبر يا الملكه صبارين
*******
نحن أهل كُتال كل الدول عارفانا
ما بنهاب من الموت والدخل القبر بطرانه
**********
نحن المابنكن الزاد ونتحشربو
ونحن المابندى عطانا نتفرشبو
يوم الموت نريدهو ديمة ونتباشربو
نحن هنية الولد البنتعاشربو

معاني الكلمات
أبو فركه : الشيخ إدريس ود الأرباب
الخرس : القدح الكبير وكان يصنع من الخشب
نتفشربو : نفخر به

روعه أحمد محمد
12-08-2012, 09:36 PM
(9)
الخيل في حنح الدباس
كلمات احمد محمد الشيخ الجاغريو قالها في عبد الله ود دفع الله
غناء ثنائي الدبيبه

الخيل في جنح الدباس ..... نادوا ليهم العباس
*********
في الهيجات ما بخشى باس
بالسيف بهاجم أم ترباس
تلت الليل تلقاه حاس
ما بحمل صوت النحاس
*******
طرفـــــه ما بتلقاه لاج
ضربه ما بداويه العلاج
بحـــــمل يوم اللجــــاج
والدم مخلوط بالعجاج
********
ود على قشاش الورم
يا قشاش دموع الحُرم
قاصع مو عتيّد برم
جامع فراسه وكرم

أم ترباس : البندقية
النحاس : طبل الحرب

معاني التعابير

1/ الدباس: نبات يكون كثيفاً عن جزوره ومنبته في الأرض وتندس فيه الهوام. والدباس أيضاً هو الظلام الكثيف.
2/ الهيجات: العارك الضارية
3/ حاس: مستيقظ
4/ أم ترباس: البندقية
5/ جنح الدباس : الليل البهيم
6/ قاصع: القاصع هو السيف القاطع القاتل
7/ عتيّد : تصغير عتود وهو صغير الغنم
8/البرم: نوار شجر الطلح والذي تحبه الأغنام وتتغذي عليه.

روعه أحمد محمد
12-08-2012, 09:41 PM
(10)
سمحه الهيبة فوق مختار
شاعرة الأغنية مجهولة ولكن الممدوح هو مختار ود رحمة ناظر العبيدية . يقال أ ن شاعرة الأغنية إتهمته بسرق مبلغ من المال فما كان منه الا أن أخرج المبلغ من جيبه وأعطاه للمرأة دون أن يدافع عن نفسه ثم تكشفت الحقيقة وقبض اللص الحقيقي واعترف بجرمه فاعتذرت المرأة وردت له المبلغ لكنه رفض أخذه ومن ثم عرفت المرأة أن مختار هذا ممن يضرب بهم المثل في الشهامة والكرم ونجدة الضعيف فالفت هذه القصيدة في مدحه

عرش دود مراقد السار
لي المو فشار
خايلة الملكه فوق مختار
********
سيد الأبيض النهار
سيد المهره والقرقار
ايدك الما بتخون الجار
ايدك ترجم الحفار
لي المو فشار
*******
عرش زى أبوك يا دود
احسب لي تمانيه جدود
ات فوق الرجال بالعود
ضربك جله مو بارود
*********
قالت امو جيد لى
لي ناظر العبيديه
جدك يغفر السيئة
وخالف للرجال كيه
********
ما بيدى ويقول أديت
ما اتفشر وقال سويت
القنديل سراج البيت
حمد لله سلامتك جيت
********
العنتيل جاء يتقنت
من شوفتو الرجال جنت
عرشّ فوقن أتعنت
وما بخيب رجاء الظنت
*******
ميرف ود ملوك بربر
خت الكرسي واتحكر
قال للمستر أتذكر
مك في دارنا ما بتظهر
**********
يا الماسك الدريب طلش
ديل ناس رحمه لا تنغش
ضربك جله مو بالرش
شن جاب الحديد للقش

شرح التعابير

1/ فشّار:الفشار هو كثير الإفتخار بنفسه وهو من يحاول دائماً إظهار محاسنه حتي يخفي عيوبه.
2/ القرقار:القرقار هو الجمل عند قبيلة الرباطاب حسب ما جاء في قاموس العامية في السودان للدكتور عون الشريف والذي أخذت منه أغلب معاني المفردات الوارده في هذا البوست.
3/ العنتيل: القوي الصلب الشديد.
4/ يتقنت: يشمي مشية تظهر أنه قوي صلب.
5/ ميرف:الميرف إبرة كبيرة الحجم تستخدم لحياكة الأشياء الكبيرة مثل الجلود والشوالات والإستخدام هنا مجازي ويقصد به أنه يربط أنساب ملوك بربر ببعضهم رباطاً قوياً.
6/ طلش: الطلش هو البلاهة وقاة العقل وتقصد الشاعرة أن من مشي درب غير درب أولاد رحمة تاه وفي هذا إشارة لتوهانها حين اتهمت الرجل بالسرقة.

hatim_abbas
13-08-2012, 01:53 PM
الله اديك العافية

روعه أحمد محمد
15-08-2012, 12:39 PM
نسال الله العافية لنا ولك أخ حاتم وكل سنه وأنت طيب.

روعه أحمد محمد
15-08-2012, 01:41 PM
(11)
الواعي ما بوصوه
شاعرتها بت مسيمس
وهى حكامة وشاعرة الزبير باشا ولقد عاصرت ود حبوبه وثورته واسمها الحقيقي رقية أيضا وهى من منطقة المسلمية

الواعي ما بوصوه من أمس الضحى
تورى أب زنود ساقوه يا مقنع ولياتو
الواعي ما بوصوه الفتح الدرب خلى العريب يمشوه
************
غنيت بجيب مسدار
المكنه بتكاكى جنك مدافع النار
يا قصر الرجال اللي الفقر عصار
يا قصر الفراسه اللي الضلع كسار
يا نار الزبل الما بندركلك حال
يا رحل الكحل لا بتنزاح ولا بتندار
عوج الطنضبه الما بتعدلو النار
درعولو أم خريز العسكر الزنهار
مأمن بالقماحه اتقدلت ليك برجال
***********
الليله عليك غنيت
بلع الألف كلو قال ولا استكفيت
يوم جوك للحرب لا سخيت ولا ضليت
صامت بالقماحه أتفرشت واتغطيت
دا تور الجواميس العليهو الرك
دا عقد الحديد لى الحلبى ما بنفك
دا سم الغدور الفى الحلق عشرق
منو غيرك فى الحراجه البدق مدافع الحق
***********
قلت ليهم عشارى مسكو يفوح
ما ختف البدينقا وما جفل مجروح
بلع الألف كلو درب الجبين مطروح
جابوك بى أم خريز الزدخانه تفوح
سيفك بشيل الفقر ومعاها ملاح المخ
***********
من كوجه وكجيج لي عند بلاد الصين
جابونا الضحى في مركز الكاملين
الأهبل يقول أدوه عشره سنين
والعاقل يقول حكموا عليهو بسنتين
وكتا جانا الجنا الطبق الجنات أتنين
كملت العمد والمشايخه وحلانين
********
ابشر يا صقر ما تكتر الحلقان
تأكل ليك مطايباً ما لحم سخلان
تأكل في مطايباً ما لحم عيران
تأكل في مطايباً فوق ضهر سلطان
تتغدى وتفوت كبده وكلا ومصران
شن منك نقول ما مات عِقيد مُرجان
********
تكلم يا لساني تكلم المنطوق
عن مدافع الحق الفى مشيها بروق
لو كان بالمراد و اليمين مطلوق
ما كان بتشنق ود ان كريق في السوق

شرح كلمات القصيدة :
1/ يا نار الزبل الما بندركلك حال
نار الزبالة لاتنطفئ بسهولة وتكون متقدة لفترة طويلة
2/ يا رحل الكحل لا بتنزاح ولا بتندار
الرحل هو مكيال حمل جمل .... والكحل وزنه ثقيل جد ويصعب رفعه عل ظهر البعير إذا امتلا به الرحل
قالت الشاعرة ...
3/ عوج الطُنضبه الما بتعدلو النار
طنضب هو الطندب وهو شجر أعواده قوية .... ودائما تعرض الأعواد المعوجه إلى النار لتعديلها حتى تكون مستوية ولكن عوج الطندب لا تؤثر فيه النار
4/ درعولو أم خريز بأم عسكرا زنهار
أم خريز هى حبل المشنقة وزنهار اى منتبه وواقف زنهار اى واقف انتباه وتقصد بت مسيمس إن من نصب المشنقة هم العسكر المنظمين
5/ يا جدري النزيله الفرزولو البيت
جدري النزيلة : النزيلة هي كل ينزل بالناس من مصائب مرض وبائي قاتل
الفرزولو البيت : قديما كان كل من يصاب بالجدري يعزل في بيت بعيد عن القرية حتى لا تنتقل منه العدوى للآخرين
6/ الحراجه : سوق الحراج أو سوق المزاد والدلالة. والجدير بالذكر إن ود حبوبه شنق في السوق .
7/ قلت ليهم عشارى مسكو يفوح
ما ختف البدينقا وما جفل مجروح
العشارى : هو التمساح
بدينقه : نوع من حراب الصيد يستعمله صائدو التماسيح يربط طرفه بحبل أو خيط قوى والخطف البدينقه كناية عن التمساح .. وتقول بت مسيمس إن ود حبوبه أقوى من التمساح حيث انه دا عقد الحديد لى الحلبى ما بنفك والحلب قوم من صعيد مصر لهم خبرة كبيرة في معالجة وفك وتركيب الحديد.
(المصدر الباحث فى التراث دكتور . أحمد القرشى).

روعه أحمد محمد
15-08-2012, 03:24 PM
(12)
الفارس الجحجاح
كلمات الشاعر عمر الحسين
غناء الفنان / سيد خليفة
شدوا لك ركب ..فوق مهرك الجماح
ضرغام الرجال... الفارس الجحجاح
السم النقوع...للبدن نتٌاح
تمساح الدميرة ..الما بكتلو سلاح
عصار المفازة ..للعيون كتاح
المال ما بيهمك ...إن كتر وإن راح
***
أبواتك جبير بيسدوا للعوجات
مطمورتك تكيل للخالة والعمات
في الجود والكرم إيديك دوام بارزات
ويا أب قلباً حديد في الحوبة ما بتنفات
***
بطناً جابتك والله ما بتندم
أسد الكداد الفي خلاكَ رزم
ويا رعد الخريف الفوق سماك دمدم
بابك ما انقفل نارك تجيب اللم
ما بتعزم تقول غير استريح حرٌّم
***

عينيك يا الصقر في الحاره ما بتنوم
صدرك للصعاب دايماً بعرف العوم
في وسط الفريق في الفارغة ما بتحوم
لا بتتلام ولا بتعرف تجيب اللوم
ود ناساً عُزاز جمعوا المكارم كوم
تفخر بيك بنات البادية والخرطوم

شرح مفردات القصيدة
1/ الجمّاح: يكون الفرس جِمّاحاً، إذاغلبَ فارِسَهُ وركب هواه فلم يمكن رَدُّه.

2/الجحجاح: السيّد الكريم الجواد؛ كان صخْرُ أخو الخنساء جحجاحَ قومه
3: السم النقوع: الصافي الخالي من الرواسب
4/ نتّاح:شديد النبض من كثرة الالم
5/ مطمورتك: حفرة تحت الارض تخبأ فيها الحبوب
6/ اسد الكداد: شجر مشهور بقوة وحدة شوكه والاسد الذي يعيش في مثل هذا النوع من الاشجار يكون اكثر قوة من غيره من فصائل الاسود.

عكود
15-08-2012, 03:47 PM
ياااااااا الله يا روعة
بارك الله فيك
كلمات جميلة ومجهود مقدر
مزيد من التألق

روعه أحمد محمد
15-08-2012, 04:34 PM
لك شكري أخ عكود علي مشاركتك الطيبة وكل سنة وأنت موفور الصحة والعافية.

روعه أحمد محمد
15-08-2012, 04:37 PM
(13)
فرتيقة ام لبوس
غناء / عبدالكريم الكابلى

فرتيقة ام لبوس لويعة الفرسان
الليل بابلي عنزه وقرونه سنان
*****
الكوراك ضرب مرقن جرارقه أنداد
أندادة النصارى الكلهم بولاد
الكرار علي كبر عليهم زاد
وسيفك في غضاريف الرجال صياد
*******
متين ياعلي تكبر تشيل حملي
إياك علي الخلاك أبوي دخري
للجار والعشير الكان أبوك بدي
للغني والفقير الكان أبوك حامي
يتسولب من العلج الحرير وأكسي
لا تعاين الوجود ضربك بي شر سوي
وسيفك في غضاريف الرجال أروي
******
جابولنا الكرامه وصبحنا فرحانين
ضربوا دنقرن جوني العيال مارقين
بسأل عن علي الفارس البقود تسعين
هو اللدر العلي ضهرو الخبوب والطين
ما بياكل الضعيف ومابسولب المسكين
الا شيمة الأسد أب قبضة هين


معاني مفردات القصيدة
1/ فرتيقة: نقول فرتق الشئ أي قطعه وفرقه الي ذرات صغيرة.
2/ ام لبوس خيل الحرب المسرجة.
3/ بابلي : بابي تعني غني وبابلي أي غني له والبوباي هو الغناء.
4/ عنزة: العنزة تعني وحيد القرن.
5/ جرارقه أنداد: فرسان شجعان متمرسون وهم أنداد أي في سن واحده.
6/ بولاد: الحديد الصلب.
7/ العلج : نوع من القماش أو الحرير مقلم أو مخطط وأغلب ألوانه أحمر وأسود.
8/ الدنقر: نحاس أو نقارة تضرب ساعة الحرب.
9/ اللدر العلي ضهره الخبوب : اللدر كما أسلفنا هو التمساح والخبوب: الأوساخ المتراكمة.

hatim_abbas
16-08-2012, 10:08 PM
ماشاء الله روعة
تقبل الله منا ومنكم صالح الاعمال
كل عام وانت بخير

روعه أحمد محمد
17-08-2012, 02:25 PM
لك شكري أخ حاتم علي مرورك الذي يسعدني كثيراً تقبل تحياتي وصادق ودي.

روعه أحمد محمد
20-08-2012, 07:54 PM
(14)
بتريد اللطام
الشاعرة /رقية بت حبوبة:
فى مرثية أخيها عبد القادر ود حبوبة الذي تم إعدامه بعد قتله مفتتش ومامور مركز المسلمية
بتريد اللطام أسد الكدادة الزام
هزيت البلد من اليمن للشام
ســــــــــــــيفك للفقــــر قــــلّام

تيّم فى التقر انصارو منزربين
بالصفا واليقين حقيقة انصار دين
بالحربه ام طبائق قابلوا المرتين
فى وش المكن رقدوا التقول نايمين

تيّم فى التقر انصاروا زاربنوا
بعهدوا القبيل بعيسى تاهمنوا
اتلمـوا العمـد ليهـــم نقــــر سنو
الهوج و الشرق طار المنام منو

تيّم فى التقر قال العمير للسوم
القوى والضعيف من عينو طار النوم
الكفرة النجوس ما بختوا من اللوم
حجـرت الدرب خـليت جمـالم تحــوم

الأسد النتر وقال الدين منصور
لمولوا الاورط جابوهم بالبابور
العمد الكبار كلامهم بقى مدحور
فقشت المدير وكرمّت بالمامور

الأسد النتر بى جيهة الابقار
لمولو الاورط شايلين سلاح النار
ود حبوبة قام و رتب الانصار
فى كتفية ديك كم شَبّعِن صقار

الإعلان صدر و اتجمع المخلوق
بى عينى بشوف اب رسوة طامح فوق
كان جات بالمراد و اليمين مطلوق
ما كان بنشنق ود اب كريق فى السوق

بتكلم بقول بوريك مين حسبو
نايبو السنين منّو الرجال حسبوا
كل الخاصموك فى الاخرة ما كسبوا
التبعــــوك جــنود لله إنتســبوا

الاعلان صدر و اتلمت الحلال
نصبولو السلاح واتكرنف الخيال
قدر الله الحصل منو الزمن ميال
منسول من ابوك ماك ود حرام دجال

رضوان الإله يملأ الضريح كافور
مسك الرحمة فاح منو بيلوح النور
أغفر سيئات كل من يجيكا يزور
فى الفردوس هناك يتمنى مهما يدور

معاني مفردات القصيدة

1/ اللطام:الحرب
2/ الزام:الذي يرسل صوتا قويا من صدره
3/ الكداد : شجر بعينه مشهور بشوكه ولعلها القتاد .
4/ من اليمن للشام : تشير الشاعرة أن إعدام ود حبوبه قد هزّ العالم الإسلامي كله,
5/ التقر : نبات خلوي ترعاه الإبل وهو نبات ينمو بغزارة في منطقة بالحلاويين.
6/ منزربين: متحلقين حوله
7/ الحربه ام طبايق: الحراب الطويلة الحادة
8/ المرتين :اسم بندقية قديمة
9/المكن : تقصد به الاسلحة النارية التي كان يستعملها الإنجليز.
10/ أنصاروا زاربنو: متحلقين حوله بقصد حمايته وشد أزره.
11/ بالصفا واليقين بي عيسي تاهمنه: : بعض أعداء ود حبوبه اتهموه زورا وبهتانا بأنه ادعى انه عيسى بن مريم خاصة وانه في تلك الفترة ادعى أكثر من رجل انه عيسى بن مريم ولقد أٌعدم كل من ادعى ذلك.وتقول الشاعرة أنها متاكدة تاكداً صافياً يقيناً ان ذلك مجرد إتهام.
12/العمير للسوم : سام اى باع ووهب وعرض للبيع.
13/ كتفيه : قرية بمنطقة الحلاويين.
14/ الاورط: جمع ارطة وهي فرقة عسكرية قوامها الف جندي.
15/ أب رسوة: الاسد.
16/ طامح: مرتفع.

روعه أحمد محمد
20-08-2012, 08:06 PM
(15)
الفينا مشهودة
كلمات الشاعر / محمد على أبو قطاطي
الفــينا مشهــودة
عارفانا المكارم أنحنا بنقودا
و الحارة بنخوضا

الزول بفتخــر و يباهــي بالعندو
نحــن أسياد شــهامة والكرم جندو
مافي وسطنا واحداً ما انكرب زندو
البعجــز بقــع بينــاتنا بنســـــندو

ركابين عليهــو الناصــع أب غرة
بنتباشــر وكت نلقـى الكلام حــرّ
مابنفـز يمــين إن متنا فــد مرة
الخــواف دا مـو حــر منو نتبرا

للجار والصديق عشرتنا تتمنى
بنصــون الأمــانة الســيدا أمّنا
المغرور ندوســو ونعدموا الطنة
شافعنا بيرى الموت في الركاب سنة

مفردات القصيدة

1/ الناصع اب غرة: هو الفرس ولون الفرس ناصع جميل وبه علامة بيضاء علي جبهته وهذه الأشياء تدل علي اصلة الفرس وجودة نوعه.
2/ الطنة: الصوت المبهم الذي يدل علي عدم الرضا.

روعه أحمد محمد
20-08-2012, 08:13 PM
أريد ان أذّكر من يمر علي شرح هذه القصائد أن معظم المعاني ماخوذة من قاموس العامية السودانية للدكتور عون الشريف قاسم يرحمه الله ويجزيه خيراً علي ما قدم لهذه الأمة.

روعه أحمد محمد
20-08-2012, 08:26 PM
(16)

تمساح جزائر الكرد
تمساح جزاير الكرد
بتقضي الغرض
انت بتشيل بوقتما متلك ولد
*******
غني وشكريه يا أم وريداً حز
بحر الاتبراوي الساقي الرجال بالنز
العشاما بتجيك انت ليهن حد
غرضي إن ما انقضي خلي دار جعل تنهد
******
غني وشكريه يا أم ضميراً فوم
بحر الاتبراوي الشقق جبال الروم
من قومة الجهل علي ما قدل فوق لوم
في بربر هناك أبو البشير مفهوم
******
غني وشكريه يا شمعة القنديل
من قومة الجهل ماهو التليفه عوير
الأسد إن نتر طارد النمر والفيل
عرش يا أب كريق علي البماثلو قليل

مفردات القصيدة
/ تمساح جزاير الكرد: منطقة في شمال السودان تكثر فيها التماسيح.
2/ بتقضي الغرض: تزيل حاجة المحتاج.
3/ انت بتشيل بي وكد:من المؤكد أنك تقضي علي من بارزك في الحرب لما تشتهر به من شجاعة,
4/ ما متلك ولد: لا مثيل لك.
5/ غني وشكريه يا أم وريداً حز: أم وريداً حز هي الجيداء ذات العنق الطويل المحزوز الذي به ثنية تدل علي أن صاحبته ذات صحة جيدة.
6/ بحر الاتبراوي الساقي الرجال بالنز: بحر الاتبراوي هو نهر عطبرة والنز هو ما يتحلب علي الأرض من ماء من شدة الإرتواء وقد وصف هذا الرجل بانه من فرط كرمه وما عنده من مال يتدفق ماله كما يتدفق الماء وينز من نهر عطبرة.
7/ العشاما بتجيك انت ليهن حد: المحتاجون الذين يرجون كرمك تضع حداً لحوجتهم بما تعطيهم من مال كثير.
8/ أم ضميراً فوم: ذات الحشا المبروم وهذه علاهة من علامات الجمال.
9/ تليفة: لافائدة منه
10/ نتر: زأر بشدة
11/ اب كريق: التمساح

روعه أحمد محمد
20-08-2012, 09:01 PM
(17)

المدفع الرزام
كلمات الشاعر / عمر البنا
غناء / الفنان احمد يوسف والفنان بادي محمد الطيب

المدفع الرزام طلقاتو من صدرك
يا جبل الضرا المافى سيل حدرك
النار ولعا واتوطا فوق جمرك
**********
ألّف بجيب شكرك
يا حاتم زمانك يا السديد فكرك
يا التلب اللزوم الشلت فوق دبرك
يا أب دربا زلق كضب البشق وكرك
*******
لزّام التقيله والعاطله درّاجه
وروني العدو واقعدوا فراجه
شتت شملهم واديهم الحاجه
ما برجع تانى للزنّدو عاجه
********
الأسد المربعن حارس جبال برى
نتراتو الفى بارا مسموعه في برى
ما بعرف كلام الهشكى والهبرى
وقت الصح يبين يا أم خد بجيك خبري
********
من عصرا كبير حس النحاس قحّ
الفارس برز والخايف اتنح
وقت الشوف بشوف اخوكى يا السمحه
فرتاك الصفوف في أقلّ من لمحه
*******
يا فارس اللقا وعصار ضهور الخيل
يا الحقيت كلام أم سر وست الجيل
في يوم القتال سموك فشق الفيل
لميت في الفرسان بهدلتهم بهديل
********
غربلت الفراسه وأخدت صافيها
وان جاتنى الألوف غير شك بكفيها
تعرفني أم خدود وأنا بعرف الفيها
النار ولعت بى كفى بطفيها

مفردات القصيدة

1/ التلب اللزوم: الرجل محمود الصفات الذي يلتزم بالامور العظيمة.
2/ الهشكي والهبري: الهشكي كثرة الكلام من غير فائدة والهبري كثرة الحركة من غير فائدة.
3/ النحاس قحّ: أرسل صوتاً قوياً داوياً
4/ فشق الفيل: متين البنيان والرجل الفشق سقاه مقوستان للخارج وهي صفة محمودة اذ تدل علي الفروسية وركوب الخيل الكثير.

روعه أحمد محمد
20-08-2012, 09:07 PM
(18)
الجنيات يا بغاره
كلمات الشاعر / عمر البنا
غناء الفنان / عبدالله محمد
الجنيات يا بغاره شدو خيلهم للمغاره
********
أخوى ما برضى الحقاره
هزّ وعرض في النقاره
في العركه الحلقن صقاره
كتل القوم يتم صغاره
*******
يا الجنيات يا الربحتو
كيف امسيتو وصبحتو
سيف أخوى في لفحتو
بشيل الرأس بى صفحتو
*******
عاجبنى وشكره جبتو
ما بخون جارتو وقريبتو
يا ناس بوريكم عجيبتو
للضيفان بضبح وجيبتو
*******
داك كوراك في الحرازه
مرقو الناس للبرازه
أخوك يا جدية العزازه
سام الروح والشكره حازه
*******
يوم العركه الفى سماحه
اشتبكو سيوفها ورماحها
برز اخوك يا أم سماحه
والخيل صداهن قماحه
*******
أب قلبا فيه الحراره
أب عينا حمرا وشراره
يدخل الحاره ويطفئ ناره
ويشبع الصقار مراره

مفردات القصيدة

1/ إسم إمرأة بدأ الشاعر قصيدته بمخاطبتها.
2/ شدو خيلهم للمغارة: وضعوا السروج علي خيولهم إستعداداً للحرب.
3/ بضبح وجيبتو: الوجيبة أو الموجبة هي الأنثي من الأغنام أو الضأن التي تترك بلبنها يوماً كاملاً حتي يتجمع اللبن ويصير كافياً للصغار.هذا الرجل من فرط كرمه يقوم بذبح هذه الوجيبة رغم أنه لايملك غيرها وهذه غاية الكرم.
4/ قماحة: خاسرات.

abjlabia watoub
20-08-2012, 09:47 PM
بارك الله فيك على هذا التوثيق والأجتهاد لأهم أغانى الحماسة .

روعه أحمد محمد
01-11-2012, 08:25 PM
كل عام وأنت بخير شعلة المنتدي المضيئة دوماً أب جلابية ومعذرة لتاخر ردي وذلك لعدم دخولي المنتدي منذ مدة لظروف قاهرة. لك كل الشكر.

روعه أحمد محمد
22-03-2013, 06:04 PM
مرحباً بكم ونعود مرةً أخري لأشعار الحماس بغرض شرح ما صعب واستعصي فهمه منها خاصة أن مفردات هذه الأشعار نادرة الإستعمال في هذا الزمن والكثير من جيل لا يفهمها ويعدها طلاسم أو (رطانه كما سمعت أحدهم يقول بعد سماعه إحدي اغنيات الحماس).
اغلب معاني المفردات ماخوذة من قاموس اللهجة العامية في السودان للبروفسور عون الشريف قاسم يرحمه الله رحمة واسعة.

روعه أحمد محمد
22-03-2013, 06:48 PM
(19) محكر الديوان

هذه القصيد كتبت في الحسن ود ضبعة شقيق عمدة الجوير عبدالله ود ضبعة والجوير تقع غرب شندي .. كان رجل وفارس وشهم وكريم

نص القصيدة

سيد محكر الديوان ثابت يا أب قلب
تقابة لي النيران وين متل الحسن

الحسن يا الحسن غنيتّا ليك بي قياس
صنديد لي الولايا ولي الدموع قشاش
يا مطر السواري الماك هبوب ورشاش
حنكو البليغ خلوهو يتحدث
سيد زيناً قبيل قبل الناس تعرف الناس
سيد أصلاً قديم من الحمزه والعباس

الحسن والحسن في عايلة ماتسمّا
اب حنكاً بليغ الما برد كلمة
ضباح الربايب سيد القدح لمّا
دالي وبرمكي وببرّد حشا العمّا
دا ولادة النجاح الما بتدرك البلما
شوف عيني التساب الفوق البلد عمّا
ود ضبعة التساب الفوق البلد عمّا

الحسن يا الحسن دوام بغني لِي
تمساح جلقني وزي الشرار عيني
ما شال بندقية وقال بتحميني
تلب يا الصقر توّر الرخم مني

شرح مفردات القصيدة:

1- محكر الديوان: الحكر هو الحجر ومحكر تعني محجور عليه أي لا يشابهه فيه أحد والديوان سابقاً هو الصالون أو مكان إستقبال الضيوف من الرجال. تقصد الشاعرة ديوان الممدوح لا مثيل له فهو رجل كريم كثير الاستقبال للضيوف ولابد أن يكون ديوانه واسعاً ماهلاً يسع كل الوافدين عليه,
2- تقابة: ما تشعل به النار من عيدان, وتقب النار أوقدها ,والتقابة في السودان خاصة بنار القران التي يتحلق حولها الحيران للتلاوة وهي تكون كبيرة شديدة الضوء. تقصد الشاعرة أن الممدوح ظاهر بين الرجال يعرفه القاصي والداني كنار التقابة التي يراها القريب والبعيد.
3- صنديد: شجاع ظاهر الشجاعة,
4- الولايا: النساء
5- مطر السواري: المطر الغزير
6- في عايلة ماتسما: لايوجد مثله في عائلة أخري.
7- ضباح الربايب: كلمة ضبّاح هي في الأصل ذبّاح أي انه يذبح من انعامه كثيراً لكثرة الضيوف عنده.الذل تقلب ضاضاً عند عدد مقدر من قبائل السودان فنقول ضبح بدلاً من ذبح, الربايب مفردها ربيبة مذكرها ربيب وهو العظيم الضخم المربي وتقصد الشاعرة انم ممدوحها لا يذبح الضعاف من الانعام وانما يختار أحسن ما عنده كرماً وشهامةً
8- القدح لمّا: القدح وعاء كبير يكفي لأكل عدد كبير من الناس وقدح الحسن هذا يلم أي يجمع ويجتمع حوله عدد مقدر من الضيوف.
9- دالي وبرمكي: الدالي : هو الفارس والبرمكى هو الرجل نبيل الطباع والكريم ومأخوذة من البرامكه.
10- البلما:البلما هي العي ونقول تبلم فلان إذا سكت ولم يعطي جواباً إذا سئل.
11- التساب: الفيضان وتقصد هنا كثرة الكرم.
12- تمساح جلقني: جلقني قرية سودانية علي الضفة الغربية للنيل الازرق وتتبع اداريا لولاية سنار. يسمي الرجل الشجاع الذي تخشاه الرجال تمساح جلقني وقد يكون ذلك عائداً لوجود تماسيح كبيرة الخطورة في تلك المنطقة.
13- توّر: قومه وابعده
14- الرخم: الرخم نوع من الطيور كبيرة الحجم ويضرب بها المثل عندنا في السودان دليلا علي البلاهة فيقال فلان رخمة أي انه ابله متبلد الحواس.

روعه أحمد محمد
03-06-2013, 12:54 PM
(20)

أخوان آمنه
كلمات / عمر البنا
نحاسهن اترزم
خيول المحاص الكرفن لي ريحة الدم
هن بتصاهلن وعقيدن اتقدم
******
قوم شوف الخيول يا خوى عدادهن كم
قودهن للحرابه وفيهن اتحكم
كم فارسا عنود من شوفتك أتبكم
اقطع دابرهم بى سيفك الأبكم
********
شدولو وركب فوق قارحه الأدهم
لحاق الصديق والجار في ساعة الهم
إن حمّر في زول غير شك يكتلو وهم
يتدردق تقول مضروب بألف سهم
**********
أسد الكرمت الفى عرينه يتنتر
اقدل يا جنا فوق عزك اتبختر
اهجم وأتذكر عيون عبله يا عنتر
ادخل العوق وخلى الصف ورا ينتر
********
وقت النحاس قح وقلب حربي
دا اليوم الفيه أم حداقه نفخر بى
تبراني الصقور وتتغدى من دربي
أكلى من القلوب ودم الرجال شربي
********
جينا منصورين أبشرى يا آمنه
جُرى النم علينا وارقدي متطامنه
مسكناك لسانا واسمعي كلامنا
في الحارة الألوف ما بقيفوا قدامنا
********
عارفاكم تمام انتو فرساني
وما فيكم جبان في الحاره بنسانى
ترفعو راسي عالي وتطولو لساني
الرجاله حارساكم والسماحه حارسانى
مفردات القصيدة
1/ كرفن: الكرف هو شم الروائح القوية.
2/ القارح: الفرس
3/ الكرمت: الشجر الكثيف.
4/ العقيد: قائد الجيش.
5/ العوق:الجيش العظيم.
6/ينتر: يبعد بعيداً.

روعه أحمد محمد
03-06-2013, 12:56 PM
(21)

لا تنغشوا تنطربو
كلمات الشاعر / عمر البنا
غناء / أولاد شمبات
لا تنغشوا تنطربو
ولا تستعجلو للشينه تنكربو
أقصروه الحديث قبال يجى يخربو
********
أبعدو من دربو
الحجر الوراد من شرقو لى غربو
كم تلبا غليد عركو وكسر غاربو
شيلو قلبو في ايدو وبلعو شاربو
*******
قلنا ليكم قبيل اعملو حسابكم
وسيبوه الأسد ما دام سكت سابكم
وقت الشرك شالكم والقدر جابكم
أعصرو على الكراع كدى سلمو رقابكم
*********
الخيل روقن مرقن بواديهن
الشوق للحرب والموت مناديهن
الولد البقودهن للمحاص يوديهن
يريدنو البنات واسمه بيسليهن
********
غنى وشكري يا حايزة الشرفين
أب سيفا يقسم الزول على نصفين
وقت الشوف يشوف والفرسان تقيف صفين
أخوك يا أم عجن مأمون على الالفين
********
عارفانى انا من قمت يا أم برعه
الجار والصديق الفاهو بسرعه
في ساحتى الغريب يرتع يعيش يرعى
والفارس شوفتو لي قلبه يطير مرعه
*********
وقت الخيل يجن مارقات على العرضه
انا أخوك يا ام سماحه في البنات فرضه
كان ما الم في الفرسان واقرضهم قرضه
مستورة القناع علىّ ما بترضى

مفردات القصيدة
1/ تنكربو: انكرب في الامر جد فيه ونشط.
2/ حجر الوراد: حجر تعني منع والوراد هو الذي يرد الماء لشربه أو لسقي حيواناته وقد كانت الاسود دائماً تتواجد عند برك الماء فتمنع الناس منها لذلك يشبه الرجل القوي بالاسد الذي يمنع ورود الماء.
3/ أعصرو على الكراع: أسرعوا في الجري.
4/ الخيل روقن: إصطفن صفوف متتالية.
5/ المحاص: المعمعة والحرب.
6/ أم عجن: ذات الدلال والدلع.
7/ ام برعة: دهان مكون من الصغ والطيب والزيوت كان يوضع علي شعر المرأة ليجعله ثقيلاً فيتدلي الي الخلف.
8/ مرعة: جبان.
9/ فرضة: متميزة ظاهرة.

روعه أحمد محمد
03-06-2013, 12:59 PM
(22)

كسار قلم ماكميك
هو الشيخ عبد الله ود جاد الله ناظر الكواهلة الذي اختلف فى زمن الاستعمار مع الانجليزى ماك مايكل في بعض الامور الأدارية فهدده ماك مايكل بكتابة تقرير عنه يودي لفصله عن العمودية فقام الناظر ود جاد الله و أمسك بقلم ماكمايكل وكسره ورمى به على الأرض مما أدى إلى غضب الإنجليز على الناظر و عائلته و قاموا بعزله من منصبه فى العمودية وتم تحويل النظارة أو العمودية من أسرته إلى أبناء عمومته أسرة الاعيسر.

أعجبت الشاعرة الكاهلية مستورة بنت كوكو بموقف العمدة الشجاع و نظمت فيه هذه القصيدة العصماء:

عشميق الأصم

عليك بجر النم يا دقر الحرائق
أصبحت كارف السم
عشميق الأصم.


شدو لو وركب فوق اصهبا مو ربيك
الهوى والشرق شرفا بعاينن ليك
العاقر تقول ولدى وبسمي عليك

يا عيد الضحية البفتحولو البيت
رايو مكملو كسار قلم ماكميك

الليله البلد اتباشرو ناسو
يا بحر المحيط مين عبرووقاسو
بريطان و الترك ما لينو راسو
و العضم الكبير كسرو وشرب ساسو

شدولو ركب فوق اصهبا وحشى
رايو مكملو وكلامو مو هبشي
أديتكم أمانه متقنعه وتمشى
عاجبانى الامانه ضيف الهجعه بتعشى
ما بجالس الهبوب ولدا قبيل منسي
عكليتا كبير ماكميك جنى هكسى

قومن شكرنو يا الكلكن قاعدات
دا اب صيتا طلع شال المسافر وفات
حمد الله و سلامة يا زمام الكاهليات

ليك بجر النم يا دقر الحرايق
اصبـحت كارف السـم
1/ كارف السم: نقول كرف الشي إذا قام بشمه تشبهه بالسيف المسموم الذي يشبع بالسم فيصبح قاتلاً.
2/ عاشميق: العشميق هو الحبل المصنوع من ليف النخل وهو معروف بقوته
3/ أصهباً مو ربيك: الاصهب الذي تخالط لونه حمرة ويطلق في البطانة علي البعير الحُر وتعني ان بعيره حُر لاتخالط نسبه واصله شبهة.
4/ شرفن: تطلعن أو حدّقن أونظرن اليه.
5/ الهبوب: صغار المكانة مابجالس الهبوب تعني انه لا يجالس صغار المكانة.
6/ عكليت: الص وقاطع الطريق.

روعه أحمد محمد
09-06-2013, 10:16 AM
(23)


قصيدة النعيم ود حمد عمدة للمعيلق كلمات رجل اسمه بابا ، وهو الذي مدح الشيخ الجيلى ود الشيخ العباس ود بدر بقصيدة البشيل فوق الدبر ما بكل

النعيم ودحمد

يا الأحييت سنن البرامكه
وعاجبني طول ايده سامكه
يا يابا قول النعيم درّاج المتابكة

النعيم يا فحل القبائل
كريم لمام الهمايل
شيتا براك ما أظنو خايل
ايدو أم رويق والقِبلي شايل

النعيم يا قاصدين لبا
خشمو انطبع لي مرحبا
هو عزيمتو ما بردخا
والبتسبي للضيف بضبحا

النعيم قادل وحدو
ما تكترو وتتقعدو
هو رب القدرة ساعدو
ختو لو الصحة ما تفندو

غنيت لدابي الرجيمة
ما بحوى على البهيمة
هولك الشكرات قديمة
ما بشيل المال الفي القسيمة

أنا غنيت للولد
الاسمو النعيم ود حمد
وكت العيش بقى بالقبض
ديوان النعيم ولا بنسد
انت الكبرى الركز البلد

غنت ليك أم رشوم
هو مو لها وطق خُشوم
وكت العيش بقى معدوم
فوق ضهرو الولية تنوم

النعيم الشكر ليهو قلتو
بسبل بتوب سترتو
زي القمر في بهرتو
باجور شخرت ماسورتو

يا الشرفت القضا
ويا الحاكيت من مكوار بدا
خدامتو القعدا
هيِ بتدرِش قالت قضى

انا غنيت جبت وصفو
مكتوب الشرف على كتفو
ناطو ليه ما لحقو حرفُو
ديل القبيل ماكلنو حرفو

مفردات القصيدة:
1/البرامكة: البرمكي هو الرجل نبيل الطباع.
2/ ايدو سامكة: نقول سمك الشئ إذا ارتفع وعلا وايدو سامكة أي كثير رفع اليد بالعطاء والكرم.
3/ المتابكة: المشرفة علي الهلاك.
4/ بردخها: يضعف قوتها.
5/ البتسبي: نقول سبت البهيمة إذا ظهرت عليها علامات الولادة وظهر الكيس الذي يحوي الجنين. والمعروف أن الانعام عند وضعها ياتي الخير الكثير من زيادة بما تلده ومن زيادة في لبنها وكن النعيم لا يلتفت لهذه الأشياء ويذبحها إكراماً لضيفه.
6/ تفندوا: لا تخطئوا رايه.
7/ مو لها: مو عبارة نفي ومُو لها تعني ليست لعباً
8/ ناطو ليه: تشابوا ليلحقو به
9/ ما لحقو حرفُو: لم يطولوه
10/ حرفْو: الحرِف قطعة من خبز القبيل ماكلنو حرفو أي الذين اكلو عنده الزاد ثم حاولوا اللحاق به.

روعه أحمد محمد
09-06-2013, 10:39 AM
(24)

الوافر ضراعو

شاعرة قصيدة الوافر ضراعو هي الهويدة وهى من مناطق سنار ، و إن الهويدة يطلق عليها الرحمة أيضا . ولقد قالت القصيدة في اخوها الأمين ود مسمار ولقد سمته نمر العبدلاب.

الوافر ضراعو
الوافر ضراعو أمنتو الرسول
مأمون الوداعه برد دار أبوه

غنى يا الهويده
لود البها وجري لي القصيدة
شال السوط عرض دالي اخو الفريده
إنترو يا حنيات ميس اخوي بعيده

تغنى لي الفى جرفو
لود البها والخلوق بتعرفو
شال الصوت عرض يا جنيات انصرفو
نمر العبدلاب الما بيرجف كتفو

غنى يا سلكوكه
جر النم عليه وخنقى الدلوكه
انت يا الأصم يا الما بحمسوكا
يا ضريب الدم تنزل فوق عدوكا

غني وشكريه الليلة يامسرة
حنضل القيزان الفي حلوقنا انشره
ساعة السيف برق والفرسان في زره
نادوا لي حسن من جزاير بره


تغنى الرحمه قالت
يا قشاش دموعي العلى سالت
وقت الحاره جات والفرسان ان جالت
نادولى الحسن تومى الحاره دارت

فهمك مو دراسه
يالنيل الطمح كسر التُّراسه
وقت الصح وقع والفرسان تتواسى
برد دار ابوك تضرع ضحوى ناسا

فهمك مو قليل
يالهامه اب زنود فى السموم تقيل
يا رحل الكحل بالشضاض تميل
جيت يا خيرنا قش دمعى البسيل

1/ وافر ضراعو: كثير العطاء والكرم.
2/ الهويدة:
3/ دالي: الدالي هو المكان الغريق: والدالي هو الرجل القوي الشجاع.

روعه أحمد محمد
09-06-2013, 10:47 AM
(25)

ذكر بعض المهتمين بالتراث إن شاعرة القصيده امرأة من شرق النيل مدحت بها الطيب ود العبيد ود بدر... ولقد ذُكر اسم الطيب في القصيدة كما زعم آخرون ان شاعرها هو بابا الذي مدح النعيم ود حمد.

البشيل فوق الدبر

البشيل فوق الدبر ما بكل
قدل شيخى للرباعة مهيل

يا ناير الخوده
يا سرالرمى يا مكمل الجوده
الحاره أم دمى أنا شيخي دا بخوده
الجبل المغور حكار للدوده

ساقية ابوى طنت
دراويشها الطرابه ووتورها بتقنت
بغنيلك ضحى والبشاقره تتصنت

سيدي وسيد السارحه بقيده
سيدي وسيد الساويه بوليده
سيدي وسيد الجديه بورهيده
كم جلسن دقون الطيب بفيده

غنى وشكريه الليله يا بنيه
ترمبيلو الملك بيتو الماهو عاريه
طاحونتو البتدور الماه مكريه
ايدك المطره الرعدت ودودت وصبت نهاريه

مفردات القصيدة:
1/ الدبر:
2/ مابكل:
3/ الرباعة : الرفاق
4/ الخودة: هي الخوذة او ما يلبسه المحارب علي راسه.
5/ الجبل المغور: هو الجبل ذو الكهوف الكثيرة في اشارة لان الممدوح ياوي اليه الكثير من الناس فتسعهم داره الرحبة:
6/ حكار للدودة: مكان لاقامة الاسود أي ان داره باوي اليها شجعان الرجال.
7/ ساقية ابوي طنت: ارسلت صوتاً متواصلاً.
8/ يتقنت: أصدر انيناً قوياً.
9/ ترمبيلو: سيارته ماخوذة من اوتومبيل.
10/ مكريه: ماجرة أي طاحونته تقدم خدمات مجانية ولا يدفع له أجر عند الإستفادة منها.

روعه أحمد محمد
09-06-2013, 10:52 AM
(26)

عاجبني الكريم


عاجبني الكريم البسند الضعفان
رباي اليتامى ومركز الضيفان


قبال الشهيد بعد المساهر نام
بي عيني بشوف برق الكرم قدام
سايق الخير كتير هاطل سحاب وغمام
يسند في الضعاف ويربي في الأيتام
اسمك عيسى يا قشاش دموع الهام
كم حليت كرب وفرجت أمرأً هام



غني وشكري الليلة يالنيّة
فارس حمره عينو زين أبو بنية
للأخوان مدفق خيرو ما شوية
إيدو تملي تدفع ما ها ملوية
عطاي بالألوف ما بدي بالمية
وإن حكم الزمن نار الكرم حية


من ما قام صغير ما بمشي في الفارغات
للجار والعشير هو الدخري في الحوبات
ستار العروض البرفع الواقعات
صاين عرضو راخص مالو للشكرات
دابي الكركرة أسد الخلا أبو عاجات
مقبول يالمشكر للبلية إن جات



غني وشكري يا خضرة الليمون
صنديد الرجال ما بنقدر بالهون
يالحر المأصل يا دهب شيبون
يا ضو القبيله اللي عروض مأمون
سموك اللزوم القاطع المسموم
قضاي الغروض اللي الفقر صابون


تمساح أدبرة الحدر ورود القيف
يا نمر الفروع في الغابة ماكا طريف
يالضل الظليل في هجيرة الصيف
للرايدك محنة وللمعاديك سيف
حق الشكرة صح عيسى البتم الكيف


غنت ليك بنيتاً موجت ديسا
غنت ليك سعاد والدر وبلقيسا
الخيل الكرم عندك وقف ميسا
ياضو القبيلة الحقتوا الريسا
يوم تجي للرجال في الحارة وتقيسا
تلقاهم نجوم إلا القمر عيسى

qindil
10-06-2013, 02:20 PM
مجهود طيب ومقدر في شعر الحماسه والسيره تشكري عليه
واصلي بارك الله فيك

روعه أحمد محمد
11-06-2013, 06:30 PM
مجهود طيب ومقدر في شعر الحماسه والسيره تشكري عليه
واصلي بارك الله فيك



قنديل المنتدي

باقات من الشكر والعرفان
وأنهار من الثناءوالامتنان