المساعد الشخصي الرقمي

مشاهدة النسخة كاملة : مسطبة الامل



scaption
27-01-2008, 09:05 PM
مسطبة ممدودة (بعرض) الحيشان (الموصدة) نهرب اليها عندما ترتفع(سخونة) المناخ السائد وعندما نحتاج الى الانزواء بكاءا او حسرةاو عند اتساع دائرة الفرح عندما تضيق بها الحيشان....احيانا عند الونسة الدقاق التى لا يقدر شهريار الصياح بها ....واحيانا واحيانا الى لا نهائيات الاحايين
الفكرة ببساطة اعزائى الكرام سوف نفتح باب الحيشان(خلسة) ونقفل الباب بررررراحة ونجلس على المسطبة...
دعونى اسس موضوع لهذه المسطبة التى سميتها مسطبة الامل
تقدمة:
فى نصت ليلا كالح
اذكرتك وشفتك لابسة
عفاف بنوتنا السترة
وشرف الريح الطامح
شفتك تطلعى من راكوبة حلوبة
تمسكى حبل غسيل قدامك
وفيك الشقى ولكنك ضاحكة
واملك كاسر يمة
شفتك وكنت وجد بالضبط
وكده صورتك
(الشاعر عثمان بشرى)
الموضوع:
الوصايا الحموية والدبلوماسية الزوجية
اتذكر جيدا حصة العربى فى المرحلة المتوسطة التى تركز على ما يسمى بالاسماء الخمسة...ابوك...اخوك...حموك...فوك...ذو الفضل
ياسلام عليكم يا اساتيذ بخت الرضا وانتم تدقون اجراس(الحماة) فى اذهاننا منذ امد بعيد حتى لا تلجمنا المفاجاة مع العلم ان هذه الاسماء الخمسة اسماء (مقدسة) فى حياة كل منا ..الاب ناظر البيت والاخ مراقب المباريات والفاه بيت قصيد اللسان واصحاب الفضل علينا كثر
المهم فى الموضوع (الحموات ) وما ادراك ما الحموات....
اتخيل معاى المشهدين التاليين:
المشهد الاول:
زوج جامعى وزوجة جامعية
ام امية وام امية
(بالتناظر)
المشهد الثانى:
زوج جامعى وزوجة جامعية
ام جامعية وام جامعية
تحقيق:
ايهما اكثر استقرارا وطمانينة؟
الاجابة متروكة لك ايها القارئ متزوجا كنت ام اعزب
يختار الزوج شريكة حياته بعد اخذ توقيع امه بمحض ارادتها وفى بعض الاحايين على مضض ومن تلك اللحظة تحدد الام ادوات التعامل مع (الضيف) المقتحم حياة فلذة كبدها التى تراه يضيع من بين ايديها ويرتمى فى احضان زوجته مع صفاء النية او فى غيرها وهو سعيد بحياته الجديدة وفى تحنان الى دف وحنان امه والزوجه(الزائرة) تحاول جاهدة ان تضع لمساتها على حياة زوجها وان تطفى عليها كل ما هو جميل من جميل اشيائها ولكنها ايضا محاطة برقابة دولية ذات حصانة من ام الزوج ولو انها استخدمت ارقى معانى الدبلوماسية لنجحت فى خلق علاقات وطيدة معتبرة فى ذات السياق النفسية والبنية الروحية التى تنطلق منها مواقف الامومة... وقد تنجح اذ سلكت هذا الطريق لكنها فى غالب الاحايين تحيد عنه مما يعمق الهاوية بين اطراف الصراع النفسى الخفى... الزوج المغلوب على امره بين المطرقة والسندان يحمل فى دواخله(هاردديسك) كبير مع ضعف(رامات) الموقف وما بين (ووندز) حياة زوجته و(دوس) اشواق سنينه الاولى مع امه....وفى دهاليز غياب امه تعسرا او تيسرا تقف شامخة امام ناظريه ام زوجته (ناظرة مدرسة حياته الجديدة) اذ انها تحاول جاهدة ان تكون فى موقف المخرج والسناريوست لهذا الفلم الحياتى الكبير... وما بين هاتيك الحموات تكبل احلام وطموح (المحاربين الجدد) من فرط الاحتكاك ب(الحراسات القديمة) .... وفى الاول والاخير هو صراع بين (القديم) المتاصل صاحب التجارب الناجحة بصفاء النية وسجية الذات وما بين حداثة الاتون من دهاليز الواقع الحديث... وفى بعض الاحيان تكون رقابة وحصانة فى امس الحوجة لها بسبب حداثة التجربة الحياتية ولكن ان تكون صورة متكررة لحياة الاخرين هذا مربط الاختلاف و الصراع
الجيل الحديث من المتعلمين وغيرهم يريدون ان يحييوا كما يحلو لهم وان يرسموا حياتهم بايديهم كما يشتهون
اقول فى الختام ان بركة وعظمة الامهات التى قدر ان تكون الجنة تحت اقدامهن ارقام لا يمكن تجاوزها
والمسطبة مليانة مواضيع
سوف نلتقى يا احبتى

scaption
28-01-2008, 08:25 PM
عباس الكيشة شخصية سودانية يعمل مهندس معمارى فى وزارة الاسكان متزوج من منار الصيدلانية التى تعمل باحدى صيدليات الحى...يسكن مع اهله فى بيت الاسرة ويحلم بقرعة الخطة الاسكانية...
فى احدى ليالى الزمن الجميل رجعت فى انصاصى الليالى منتشيا من جلسة شعرية بقاعة الشارقة ودخلت الحى فى ليل بهيم ومن على البعد رايت سيجارة تحترق فى سكون فى مسطبة عباس جارى الذى يفصل بيوتنا جدار لا يعرف معنى الاختشاء من فرط قصر قامته
عباس المقعدك بالليل براك برا شنو
والله يا حبة الشديد الاقوى منى ومنك
الحكومة اعلنت الطؤارى وللا شنو
لا والله اعلنت الاضرابات والاعتصامات
بالجد كده يا عباس المشكلة شنو؟
منار دايرة افرزوا ليها العيشة
قالها عباس وقد مص صبرص السيجارة ورماها بعيدا
طيب يا عباس شئ طبيعى ومطلب مشروع
يا حبة بالله عليك خلينا من كلام المثقفاتية ده
انت يا عباس ما زهجت من عدم الخصوصية دى ومن الدسوسية واللصوصية
يا اخى انا ذاتى زييها لكن عارف الفرق شنو؟
انا بحلم من صميم الواقع وهى بتحلم من دهاليز الخيال
ياتو واقع يا فردة
واقع الظروف المعيشية البعيشا انا والناس كلهم يعنى باختصار الواحد بتمدد قدر فرشو وبحلم قدر كرشو.. يعنى يا حبة مرتك اكتر زول عارف جيبك فيهو كم الليلة وحيكون بكرة كم وبعد شهر كمان وتجيك اسى تقول ليك افرز لى عيشتى
يا اخى يمكن انت يا عباس فهمتها غلط امكن دايرة سلطة مباشرة فى حياتك وسط اهلك
يا حبة فى البيت ده والله ما عارفين منو الحاكم ومنو المحكوم واطة ولمة ناس تقول لى سلطة يا حبة بالله خلينا
يا اخى انا قاصد اقتسام الادوار فى اعداد الطعام وترتيب الاذواق النسائية فى المظهر العام والخلية وكمان سلام من الداخل مع الجميع باتفاقية او باجاويد عابرة يا حبذا بعض العزف المنفرد فى سيمفونية الازواج يعنى يا صاحبى زى ما بقولو المثقفاتية تداعيات الموية العكرة من شبق الطنين والفكرة
والله انت فايق ورايق وانا بالى محروق
اها الحل شنو يا عباس؟
اقول ليك حاجة يا حبة خلى الموضوع لبكرة...تصبح على خير يا حبة
صباحاتك بيضاء يا عباس
فارق عباس المسطبة وفتح الباب براااااحة ودخل كراعو اليمين وقبل ان يدخل اليسار
جاءه صوت منار مالك تتدبا زى الحرامية.. ابتسم عباس ابتسامة صفراء وذهب الى فراشه
انتهى....
حاشية:
الزوجة المتحضرة هى التى تعرف امكانية الزمن المناسب فى كينونة المكاسب الذاتيةمن خلال واقع ملموس ومدروس من دفتر يوميات الحياة الزوجية معتبرة كل الهالات المصاحبة لحياة الزوج والمقربين من اسرته(المقدسين تحديدا) مع عدم اجهال الاحلام الزوجية التى عماد مسيرة الازواج..فالنملة تعتز بثقب فى باطن الارض رغم شكواها من قسوة (وطاة) اقدامنا على عشها الميمون
والتحية لكم جميعا بدون(فرز)

تاج الوقار
05-02-2008, 11:25 AM
تسجيل حضور هوي يا ناس المسطبة سلاما جاكم ..

scaption
05-02-2008, 06:58 PM
تسجيل حضور هوي يا ناس المسطبة سلاما جاكم ..


عزيزتى تاج الوقار
شرفتى المسطبة... ومرحبيك محل ما تقبلى
عباس الكيشة... لقى الناس ما فيشة...همهم همهمة ...هم فوق هم
شكرا تماما لتوقيعك الوريف
دمتى.... قمحا ووعدا وتمنى

الكــــــــــردفاني
08-02-2008, 11:49 PM
ياسلاااااااااااام لي زمن ماقعدت في مسطبة، لكن مسطبتك دي تجنن يا scaption‏ وأنا من هسي إعتبرني أساسي في المسطبة.
مع خالص الود

scaption
09-02-2008, 12:19 AM
ياسلاااااااااااام لي زمن ماقعدت في مسطبة، لكن مسطبتك دي تجنن يا scaption‏ وأنا من هسي إعتبرني أساسي في المسطبة.
مع خالص الود



استاذى الكردفانى
السلام عليكم
اسعدنى انضمامك الى مساطب بلادى التى ضاقت بها الحيشان فصارت اشبه ب(البراويز) التى بداخلها مجموعة من الصور التى تصف ذواتنا وحراكنا الاجتماعى وما نخبئه خوفا من الضوء... هيا جميعنا لتحميض نفوسنا تحت اشعة شمس مساطب بلادى
شكرا تماما على التثبيت الذى اخافنى كثيرا من ان لا تكون تلكم المساطب بقدر ما اعطيتم من مكانة...
والشاعر الشاب عاطف خيرى يردد
الغباش الفى دمى منك
لو كسر ضلعين عزرتو

ودمتم يا ابناء وطنى الجميل بمساطبكم او بدونها

scaption
09-02-2008, 03:39 AM
تقدمة:
صباح الخير مدرستى
صباح الخير والنور
اليك اشتقت فى الامس
وزاد اليوم تفكيرى
انتهى... حركة فى شكل وردة

عم عبد الرحيم مواطن سودانى بسيط يعمل موظف بادارة جامعة الخرطوم قرابة الثلاثين عاما له ابنان يوسف بالصف الخامس وعمار بالسابع وبنت واحدة فوزية فى الرابع من عمرها متزوج من الجنة بت عثمان التى تعمل بالبيت بماكينة للخياطة تساعد بها عبد الرحيم فى مصاريف المعيشة... يسكن فى بيت من الجالوص به اوضتين وبرنده له مسطبة كعادة حيشان بلادى... يجلس عليها دايما بعد اذان المغرب بلا انقطاع
مررت به ذات يوم وحييته وانا على عجل
السلام عليكم عم عبد الرحيم
لم يجبنى
واصلت مسيرتى وعدت بعد صلاة العشاء من مشوارى وفوجئت بعم عبد الرحيم ما زال يجلس على المسطبة ليس كعادته فدائما يكون بالداخل فى مثل هذه المواعيد فعرفت ان هناك امر جلل يشغل بال عم عبد الرحيم الذى نظم حياته من خلال نظام العمل فى جامعة الخرطوم بما ورثوه من ثقافة الانضباط والنظام فى دولاب العمل فى زمان بهى...
رفعت صوتى متعمدا
السلام عليكم يا عم عبد الرحيم
اهلا يا ود علوى كما كان يحب ان ينادينى
تعال ..تعال انا دايرك
خير يا عم عبد الرحيم
والله يا وليدى انا ذاتو ما عارف اقول ليك شنو
قول يا عم عبد الرحيم
ولدى عمار
مالو يا عم عبد الرحيم
بقى ضعيف ومابى الاكل ليهو يومين وما عاجبنى
اها يا عم عبد الرحيم
اها يا وليدى مسكتو حنستو وزرزرتو لمن اتكلم
اها قال شنو
اه.... اه.... اتنهد وكح مرتين... كح كح.. كانو حينطق لغم من خشمو
عمار استاذو قاعد اضايقو فى المدرسة
تقصد يا عم عبد الرحيم قاعد ادقو كتير وبحرجو قدام اصحابو؟
لا يا ولدى داير يتحرش بيهو جنسيا.. قالها وكانه كفر بالله العلى العظيم...ومن بعدها استغفر الله العظيم
ده كلام شنو يا عم عبد الرحيم
للاسف يا ولدى دى الحقيقة العرفتها من ولدى.. والولد خايف اسى وبقى بيكره حاجة اسمها مدرسة من خلال تصرفاتو
انت متاكد هو قال كده يا عم عبد الرحيم
اااى يا ولدى
وناوى على شنو يا عم عبد الرحيم؟
راجيها تصبح ودقرى على المدرسة وولدى فى يدى كمان نشوف حكاية مدرسين الزمن ده الما بختشو وما بخافو الله ديل
بس يا عمى ما داير ليك وصية امسك اعصابك وما تعمل ليك مصيبة مع الاستاذ ده فى المدرسة
لا لا يا ولدى ما تشيل هم انا ماشى للمدير اولا وبعدين الموضوع اذا ما نفع بمشى وزارة التربية عديل كده
طيب يا عم عبد الرحيم اجيك الصباح وامشى معاك
يكون كويس يا وليدى...انا والله كلمتك بالموضوع لانى محتاج ليك شديد لانو الاساتذة بقوا فى سنكم والمدراء كمان يعنى حليل التربية والتوجيه وحليل بخت الرضا... عايرة وادووها سوط..... قالها بحرقة
طيب يا عمى عبد الرحيم تصبح على خير وبجيك الصباح الساعة تمانية
تصبح على خير يا ولدى
مشيت من عم عبد الرحيم وحفرت رفوف ذاكرتى ايام الدراسة الاولية والمتوسطة وجدت فيها بلا خجل عدد لا يستهان به من المدرسين كانوا عديمى الاخلاق والذمة يمارسون على بعض الطلاب الارهاب بغرض التحرش الجنسى وكانوا يفتكرون انهم يخططون للعبتهم القذرة هذه بحنكة ودهاء من غير ان يشك باقى الطلاب فى سلوكهم التربوى ولكن للاسف كنا ندرى بالاعيبهم القذرة كاننا نحن الراشدون وهم المراهقين ما اسواها من ذكرى وما اسواها من رفوف نتنه على صفحات مربيين الاجيال وصانعى الامم الذين شبهوا من فرط دسامة اخلاقهم بالرسل تيمنا برسالتهم ودورهم فى غرس بذور مكارم الاخلاق واضواء المعرفة فى اجيال الغد..... رحم الله المدرسين الذين لم يحيدوا عن هذا الطريق
لم استطيع النوم من فرط الالم وتمنيت ان تشرق الشمس وانا مستيقظا على فراشى حتى اذهب الى المدرسة باكرا قبل عم عبد الرحيم واقوم بتاديب هذا الاستاذ على طريقتى الخاصة التى لا اعرف لها شئيا غير الضرب المبرح كما يضرب الاستاذ الطالب بغرض التاديب.. ولكننى وجدتها لا تكفى ليكون عبرة لغيره... وهمست لنفسى ماذا يكون العقاب؟ امن حقى وحدى ان اعاقبه؟ حاولت ان اجد لنفسى مبررا ولكن دون جدوى
...ففى بلادى كثيرا ما تموت من المغصة فيما ترى وتسمع ولكن انعم الله على فنمت من فرط الفجيعة فى عدم الحيلة
سمعت زغزغة العصافير وصوت الراديو
الله .... الله
يا نافخ الروح فى الجنين
يا واهب المال والبنين
اياك نعبد ونستعين
الله... الله
وبعدها بقليل
تيت...تيت...تيت.... ستة مرات
فادركت انها السادسة والنصف من راديو ام درمان
نهضت على عجل واديت الفروض الصباحية المعتادة وشربت الشاى على عجل وفتحت الباب وخرجت ووضعت قدمى على مسطبة بيتنا وابتسمت ابتسامة صفراء وهمست فى سرى
امان يا مساطب بلدى ما فيك كلام.. وجلست على حافة المسطبة ورايت كلبا ابيضا من كلاب حلتنا يغازل كلبة لا ادرى هل هى من نفس الحى ام زائرة من احياء اخرى... وتخيلت فى لحظة ان يكون هذا الكلب مرموقا فى عوالم ودهاليز عالم الكلاب الخفى ولكننى ابتسمت بعدها وانا كلى يقين فى حكمة اختيار هذه الكلاب لهذا الزمن الذى يخلو من عيون الناس كانهم يبحثون عن (السترة) من عوالم غير عالمهم فرددت فى سرى
سبحان الله
اردت فقط ان يمضى بى الزمن حتى الثامنة حيث موعدى مع عم عبد الرحيم

تمانية بالضبط فتح عم عبد الرحيم الباب..ما قلت ليكم انضباط انقليز
كيف اصبحت عم عبد الرحيم
الحمد لله يا ولدى
كيف اصبحتو انتو
الحمد لله عم عبد الرحيم
عيونك مورمة عم عبد الرحيم شكلك ما نمت كويس
يجى من وين النوم يا ولدى
بلعت الريق مع الصباح وسكت
مشينا لحدى ما وصلنا المدرسة ودخلنا مكتب المدير وعمار فى يد ابوه
استقبلنا المدير كويس... شاف عمار فى يد ابوه وقال انشاءالله خير
بلع عم عبد الرحيم ريقه اكتر من مرة وسرد قصة ابنه بمشاعر الاب اولا وبحديث تفوح منه رائحة الصدق فى جملة المعانى السامية التى استشهد بها فى مكارم الاخلاق والغدوة الحسنة التى من المفترض ان تلازم المعلم اينما ذهب
شكر المدير عم عبد الرحيم على هذه الروح الطيبة التى تنتابه وانه قد سلك الطريق السليم فى معالجة مشكلة ابنه ليس كاخرين قد تاخدهم الحمية او تحدثهم انفسهم بارتكاب حماقة تعود عليهم بالوبال ورفع المدير راسه وسال عمار
استاذ منو يا عمار القاعد يضايقك
تردد عمار شوية ونظر فى عيون ابوه وتشجع وقال
استاذ مصطفى
وضع المدير يديه على راسه واستغفر الله وقال
لا حول ولا قوة الا بالله
مد يده المدير على مكتبه واخرج ورقة وقلم وقال لعم عبد الرحيم
اكتب شكوى رسمية باسمك فى سلوك الاستاذ مصطفى تجاه ولدك وعلى ضوئها سوف نقوم بعمل مجلس تحقيق مع الاستاذ فى وجود استاذ من الوزارة ونتخذ الاجراءات المطلوبه حينها
ذهل عم عبد الرحيم وكان يعتقد ان المدير سوف يقوم بفصل الاستاذ فورا
تدخلت وسالت المدير بسرعة يعنى ده كلو مدى صلاحيتك
قال ايوه
انت ياحضرة المدير عارف معناهو شنو لمن يجى طالب ويقول ليك الاستاذ ده ما كويس
ايوه عارف لكن دى الاصول المتبعة
تدخل عم عبد الرحيم طيب اضمن كيف سلامة ولدى من الافة الموجودة عندكم ده لحدى ما تظهر نتيجة تحقيقكم
رد المدير حنوقف الاستاذ عن العمل لحدى التحقيق ينتهى
خرجنا وكاننا لم نحقق شئ لعلمنا التام فى بروقراطية اللجان والمهام فى دوائر كل الخدمة المدنية فى بلادى رغم حساسية الموضوع
ومرت الايام وعم عبد الرحيم متابع الموضوع... يوم ورا يوم...اسبوع ورا اسبوع... ودخل الموضوع فى شهور... ولعدم ثقته فى مدرسة عمار ومديرها وخوفا على ابنه قرر نقل عمار الى مدرسة اخرى... التى قد لا تخلو ايضا من معلمين مسرطنة
وما زالت نفس الاسطوانة
سبورة
طبشيرة
بشاورة
صوت عنج
اطلع برة انتظرنى فى المكتب
انتهى......
حاشية:
ان للمعلم دور رسالى فى حياتنا اذ انه المربى والموجه والسلطة الثالثة بعد الامومة والابوه فاذا ارتقى الى هذا الدور بمنتهى الاخلاقية والنزاهة وقدم نموذجا طيبا للقدوة الحسنة يمكننا القول انه ضمن لنا مستقبلا زاهرا لاجيال معول عليها بالسير قدما بدولاب مجتمعاتها... واذا انحط الى درجة دونية تحت صفر المسميات انقلبت عندها المسيرة واستلمت دفة المستقبل اجيال عبارة عن مسخ حالت دون السير بالركب الى ما هو منتظر منها
غير ان سلوك المعلم نفسه لابد ان يخضع لمعايير ورقابة من جهات تربوية واضعة فى الاعتبار كل ما يبدر منه تحت مجاهر الحقيقة الذى لا يعرف الضبابية بغرض ضبط السلوك الى يوثر ويتاثر به الطلاب... مسالة فى منتهى الاهمية من تقييم ثقل الاستاذ من ناحية اكاديمية فقط
كلى قناعة انكم تعرفون جيدا نماذجا لاساتيذ غير مشرفين تماما من خلال مسيرتكم الدراسية كما تحفظون فى قلوبكم اسماء قائمة الشرف والنبلاء من الاساتيذ الذين كانوا لهم دور فى تشكيل شخصياتكم التى تحيون بها
التحية موصولة الى معلمى بلادى الذين صالوا وجالوا عبر الحرف والكلمة لينيروا لنا الطريق
والخزى والعار للمعلمين ذوى النفوس المريضة التى تعيش خارج المنظومة

الكردفانى
11-02-2008, 10:11 AM
كلى قناعة انكم تعرفون جيدا نماذجا لاساتيذ غير مشرفين تماما من خلال مسيرتكم الدراسية كما تحفظون فى قلوبكم اسماء قائمة الشرف والنبلاء من الاساتيذ الذين كانوا لهم دور فى تشكيل شخصياتكم التى تحيون بها التحية موصولة الى معلمى بلادى الذين صالوا وجالوا عبر الحرف والكلمة لينيروا لنا الطريق والخزى والعار للمعلمين ذوى النفوس المريضة التى تعيش خارج المنظومة
العزيز
اها جينا المسطبه يلا خلى ناس البيت يجهزو براد الشاى الحلبه باللبن ...
ونحى كل من علمنا فى مسيرتنا معنى أو قيمة ..
وأستميحك عزرا ان أحى استاذى الفاضل استاذ مكى عبيد معلم الابتدائيه فى ذلك الزمن الجميل ..
http://www.sudanradio.info/php/vb.353/showthread.php?t=5821

scaption
11-02-2008, 12:06 PM
الاخ الكردفانى المسطبة مسطبتك... واتوهط على كيفك.... وقول الفى ضميرك بس ما تنسى باب الحوش مفتوح عشان ما يجيب (الهوا)....
دعنى من خلالك ان احى استاذى فى متوسطات(عمرى) الاستاذ الشيخ عبد الرحمن
الذى علمنى كيف افك تشابك معادلات حياتى(انيا) واذا استعصت على (بيانيا) فله التحية منى بقدر ما اعطى.... والتحية لكل معلمى بلادى الذين يحترقون كالشموع لينيروا لنا دروب الحياة..
منذ ان كنا (شفعا يفعا) كنا نردد:
مشكرين ومقدرين
يا مدرسات يا مدرسين
يا معلمات يا معلمين..
انتهى.....

scaption
16-02-2008, 07:50 PM
عثمان توصيلةشاب فى الاربعين من عمره متزوج وله ولد وبنت..يسكن فى بيت للايجار لا مساطب له هروبا من ملاقاة الناس واصحاب الديون.. يعمل فى سوق الله اكبر بما يسمى بالسمسرة لذلك اطلق عليه لقب توصيلة
للحديث بقية
بعد الفاصل
ونواصل
.................................................. ...
جين ليك والشوق دفرنا
نواصل
توصيلة

توصيلة كل ناس الحلة عارفين انو رزقو من (الحنك) السنين يعنى بياع كلام فى المليان لدرجة انو لو داير تسالو من وصف مكان تحتاج ان تتحسس جيبك
لاقانى بعد انتهاء الدافورى فى الحلة وقال لى انا دايرك تعال اشرب معاى شاى المغرب
من الصعوبة بمكان ان تلبى لتوصيلة دعوة خوفا من الانفراد بك لدرجة انه قد يقنعك ببيع بيتكم وشراء قطعة فى منطقة تانية والاستفادة من فرق السعر (تنفض حالك زى ما بقول)
غايتو الله يكضب الشينة
اديت بعض الفروض ومريت بتوصيلة
يا توصيلة
اهلا يا حبة
شنو الكراسى دى والتربيزة دى يا توصيلة
دى يا حبة عشان الونسة بمزااااااج
اها اخبار السوق شنو معاك يا توصيلة
والله ما زى ابوك لكن بربيك مرات سمينة ومرات نسل السكين على الضبان
يعنى ما خمشت ليك خمشة قوية كده الايام دى
والله يا بركة مصيفة عديل كده السما دا التقول لاحسو كلب (كناية عن عدم وجود المطر)
لكن يا حبة اخوك مزنوق فى شيك طاير وحبة ديون مطلعة عينى
ليه يا توصيلة معقول تغلبك حيلة
وين يا حبة وقعت لى فى جماعة ما برحمو ناس كاش عديل كده
طيب يا توصيلة ناوى تخلص مشكلتك دى كيف
انت عارف يا حبة انا من قبيل قاعد اقيم اغلى حاجة عندى فى البيت ده شنو ممكن ابيعها وتريحنى من المشكلة دى
اها يا توصيلة
تتخيل شنو يا حبة؟
والله ما عارف
اغلى حاجة فى البيت ده حافلة العدة بتاعت المرة ... تصدق يا حبة
انت جنيت يا توصيلة دى معناها الحرب العالمية التالتة
والله يا حبة امبارح ولدى كسر كباية شاى صغيرة لاسى الشكلة مدورة.... وما عارف اطرح ليها الفكرة دى كيف
وبعدين يا توصيلة حنكك السنين ده فى السوق بس
حنك وين يا شاب مع ام حنك
وبعدين
انا دايرك يا حبة انت تساعدنى فى الموضوع ده
اساعدك كيف
تقول ليها انا لقيت زول بحل ليهو مشكلتو لكن بقبل الحافلة بتاعت العدة... وللا انتى دايرة راجلك يخش السجن
يا توصيلة الكلام ده ما بينفع مع الحكومات خاصة قداسة العدة دى محسومة
يا خى جرب انت عشان اخوك واستعمل فلهمتك وكلامك السمح داك وللا بس فالح معانا
ok iwill try
ااااى يا عسللى try and try untill you die هكذا قالها توصيلة بريحة سمسرة وعدة شغل
فتحت الباب وصفقت... طق ... طق .... طق
سلام يا فائزة...ازيكم
اهلا يا حبة...كيفنك
الحمدلله تمام
اتفضل
اسمعى توصيلة مورط ورطة شدي..... وقبل ما اكملها
كلمك صحبك بمشكلتو
ايوه والحل عندك انتى يا توووش بخش السجن
حل شنو
انا لقيت واحد بقبل حافلة العدة الجميلة دى وبحل ليهو مشكلتو
بري يا اخوى عدتىما بفرض فيها... دى حافلة اهم من حافلة روزا
يا فائزة العدة دى لو سالناك الغرض منها شنو غير الزينة والبوبار
بوبار شنو يا حبة دى خاتنها ليوم الفرح والكره وللا نحنا ما ناس مناسبات
والله يا فائزةما شوفنا يوم باب الحافلة دى اتفتح ونزلت منها كباية وللا جك حتى
انتو جايبين خبر كل يوم تكسرو على كيفكم مرة تكشتو ومرة تسبو ساى لو ما حافلاتنا دى كان شرابكم بالقرطاس واكلكم زى جركاس
يا فائزة انتى زولة فاهمة الزول يحل المشكلة وبعدين يشترى ليك حافلة روزا خمسة وعشرين راكب ومعاها هوادة امجاد صغيرة
يا حبة الكلام اقصرو خليهو يبيع التلفزيون والريسيفر المقددات عيونو بالسهر ديل واى شئ تانى الا حافلة عدتى
يعنة يا فايزة ما فى طريقة عديل كده
ايوه يا اخوى سعيك مشكور
طيب ودعناك الله يا فايزة
الله يسلمك يا حبة
جرجرت كرعينى برااااحة وجيت لتوصيلة
اها يا حبة انشاءالله حنكتها
والله زى ما قلت انت قبيل دى ام حنك
ابت الجيهة تب يا حبة
نهائئئئئئى يا توصيلة
انت عارف يا حبة صف الكبابى الفوق ده كلو من جلاليبى
دقيقة ازيدك فى الشعر بيت يا حبة
الحلل الكبار تلاتة بناطلين جينز قاطعة قلبى لحدى الان
اها
وطقم الشاى والسرامس ديك قمصان الكاروهات
على الطلاق يا حبة ما طالبنى حليفة
مصدقك يا توصيلة
يعنى الحافلة حافلتى وشغال فيها كمسارى
اها ناوى على شنو اسى يا توصيلة
اخش السجن عديل كده اشوف حافلتها دى بتنقط ليها قروش وللا لا
اقول ليك حاجة توصيلة خليها على الله بكرة ليها فرج من ربنا
طيب يا حبة ما قصرت انشاء الله نخدمك فى (حافلة) اقصد حفلة عرسك
امين يا توصيلة
مع السلامة
الاسطوانة لسة مدورة
الحافلة مليانة ركاب اغلبهم (صينى)
واعملوا حسابكم اوع واحد يقع (يتكسر)
والبتكسر عمرو ما بتصلح
انتهى....
حاشية:
حاشية الديون والمراهنات متروكة للرجال
حاشية الحافلات متروكة للنساء
ودمتم بديون او بدونها يا ابناء وطنى الجميل
ودمتم بحافلاتكم او بدونها يا نساء وطنى الجميل

الكــــــــــردفاني
27-02-2008, 09:08 PM
عثمان توصيلةشاب فى الاربعين من عمره متزوج وله ولد وبنت..يسكن فى بيت للايجار لا مساطب له هروبا من ملاقاة الناس واصحاب الديون.. يعمل فى سوق الله اكبر بما يسمى بالسمسرة لذلك اطلق عليه لقب توصيلة للحديث بقية بعد الفاصل ونواصل .................................................. ... جين ليك والشوق دفرنا نواصل توصيلة توصيلة كل ناس الحلة عارفين انو رزقو من (الحنك) السنين يعنى بياع كلام فى المليان لدرجة انو لو داير تسالو من وصف مكان تحتاج ان تتحسس جيبك لاقانى بعد انتهاء الدافورى فى الحلة وقال لى انا دايرك تعال اشرب معاى شاى المغرب من الصعوبة بمكان ان تلبى لتوصيلة دعوة خوفا من الانفراد بك لدرجة انه قد يقنعك ببيع بيتكم وشراء قطعة فى منطقة تانية والاستفادة من فرق السعر (تنفض حالك زى ما بقول) غايتو الله يكضب الشينة اديت بعض الفروض ومريت بتوصيلة يا توصيلة اهلا يا حبة شنو الكراسى دى والتربيزة دى يا توصيلة دى يا حبة عشان الونسة بمزااااااج اها اخبار السوق شنو معاك يا توصيلة والله ما زى ابوك لكن بربيك مرات سمينة ومرات نسل السكين على الضبان يعنى ما خمشت ليك خمشة قوية كده الايام دى والله يا بركة مصيفة عديل كده السما دا التقول لاحسو كلب (كناية عن عدم وجود المطر) لكن يا حبة اخوك مزنوق فى شيك طاير وحبة ديون مطلعة عينى ليه يا توصيلة معقول تغلبك حيلة وين يا حبة وقعت لى فى جماعة ما برحمو ناس كاش عديل كده طيب يا توصيلة ناوى تخلص مشكلتك دى كيف انت عارف يا حبة انا من قبيل قاعد اقيم اغلى حاجة عندى فى البيت ده شنو ممكن ابيعها وتريحنى من المشكلة دى اها يا توصيلة تتخيل شنو يا حبة؟ والله ما عارف اغلى حاجة فى البيت ده حافلة العدة بتاعت المرة ... تصدق يا حبة انت جنيت يا توصيلة دى معناها الحرب العالمية التالتة والله يا حبة امبارح ولدى كسر كباية شاى صغيرة لاسى الشكلة مدورة.... وما عارف اطرح ليها الفكرة دى كيف وبعدين يا توصيلة حنكك السنين ده فى السوق بس حنك وين يا شاب مع ام حنك وبعدين انا دايرك يا حبة انت تساعدنى فى الموضوع ده اساعدك كيف تقول ليها انا لقيت زول بحل ليهو مشكلتو لكن بقبل الحافلة بتاعت العدة... وللا انتى دايرة راجلك يخش السجن يا توصيلة الكلام ده ما بينفع مع الحكومات خاصة قداسة العدة دى محسومة يا خى جرب انت عشان اخوك واستعمل فلهمتك وكلامك السمح داك وللا بس فالح معانا ok iwill try ااااى يا عسللى try and try untill you die هكذا قالها توصيلة بريحة سمسرة وعدة شغل فتحت الباب وصفقت... طق ... طق .... طق سلام يا فائزة...ازيكم اهلا يا حبة...كيفنك الحمدلله تمام اتفضل اسمعى توصيلة مورط ورطة شدي..... وقبل ما اكملها كلمك صحبك بمشكلتو ايوه والحل عندك انتى يا توووش بخش السجن حل شنو انا لقيت واحد بقبل حافلة العدة الجميلة دى وبحل ليهو مشكلتو بري يا اخوى عدتىما بفرض فيها... دى حافلة اهم من حافلة روزا يا فائزة العدة دى لو سالناك الغرض منها شنو غير الزينة والبوبار بوبار شنو يا حبة دى خاتنها ليوم الفرح والكره وللا نحنا ما ناس مناسبات والله يا فائزةما شوفنا يوم باب الحافلة دى اتفتح ونزلت منها كباية وللا جك حتى انتو جايبين خبر كل يوم تكسرو على كيفكم مرة تكشتو ومرة تسبو ساى لو ما حافلاتنا دى كان شرابكم بالقرطاس واكلكم زى جركاس يا فائزة انتى زولة فاهمة الزول يحل المشكلة وبعدين يشترى ليك حافلة روزا خمسة وعشرين راكب ومعاها هوادة امجاد صغيرة يا حبة الكلام اقصرو خليهو يبيع التلفزيون والريسيفر المقددات عيونو بالسهر ديل واى شئ تانى الا حافلة عدتى يعنة يا فايزة ما فى طريقة عديل كده ايوه يا اخوى سعيك مشكور طيب ودعناك الله يا فايزة الله يسلمك يا حبة جرجرت كرعينى برااااحة وجيت لتوصيلة اها يا حبة انشاءالله حنكتها والله زى ما قلت انت قبيل دى ام حنك ابت الجيهة تب يا حبة نهائئئئئئى يا توصيلة انت عارف يا حبة صف الكبابى الفوق ده كلو من جلاليبى دقيقة ازيدك فى الشعر بيت يا حبة الحلل الكبار تلاتة بناطلين جينز قاطعة قلبى لحدى الان اها وطقم الشاى والسرامس ديك قمصان الكاروهات على الطلاق يا حبة ما طالبنى حليفة مصدقك يا توصيلة يعنى الحافلة حافلتى وشغال فيها كمسارى اها ناوى على شنو اسى يا توصيلة اخش السجن عديل كده اشوف حافلتها دى بتنقط ليها قروش وللا لا اقول ليك حاجة توصيلة خليها على الله بكرة ليها فرج من ربنا طيب يا حبة ما قصرت انشاء الله نخدمك فى (حافلة) اقصد حفلة عرسك امين يا توصيلة مع السلامة الاسطوانة لسة مدورة الحافلة مليانة ركاب اغلبهم (صينى) واعملوا حسابكم اوع واحد يقع (يتكسر) والبتكسر عمرو ما بتصلح انتهى.... حاشية: حاشية الديون والمراهنات متروكة للرجال حاشية الحافلات متروكة للنساء ودمتم بديون او بدونها يا ابناء وطنى الجميل ودمتم بحافلاتكم او بدونها يا نساء وطنى الجميل

في إنتظار المزيد من الإبداعات يارائع.
تحياتي

scaption
04-04-2008, 02:15 AM
عزيزى الكردفانى
سلامات يا زول يا رائع... عوافى
شكرا تماما على توقيعك الوسيم.... هى فقط زحمة تفاصيل دنيانا ودفتر الحياة اليوماتى
لكن غدا تتفتح الزهور.... وعدى منى وليك...
قريبا نشوف قصة حسن حريقة... واشكالية الفيزا
وردد معى قول شاعرنا:
البخشوا الحضرة دون ما يدقوا الباب
البدسو الفكرة فى بنات نعش
البنادن القمرة تحرق جمرة فى جوف السحاب
انتهى......

qindil
06-04-2008, 12:35 AM
اسكابشن يا روعه أيه الابداع ده؟ ايه الحضور الجميل ده؟
يا اخي حرام عليك انت عامل ليك مسطبه سمحه ذي دي وداقين الونسه انت والكردفــــاني بي جاي ونحنا ولا هنا ؟
قولوا لينا عوك .. أدونا فرقه تدخل ورقه
عموما ابداع أخي اسكابشن ومن هنا ورايح أنا بضايق ليك الجماعة في المسطبه وده توقيع في دفتر الحضور فقط وان شاء الله المرة الجايه بجي بى كراساتي.

صلاح حسين
06-04-2008, 01:04 AM
عزيزى منتصر
تحياتى
وين الحى بيك
مع حوامتك دى وين تلقى زمن
كده الاخبار شنو
ماطولو الغيبه
بس عاوز اسجل حضور لانى مشغول جدا
لكن عندى معاك قعده طويله -سلم لى الى عباس الكيشه
وان شاء الله امورو سلكت وعاش فى تبات ونبات بعد الفرز

scaption
06-04-2008, 08:42 PM
اسكابشن يا روعه أيه الابداع ده؟ ايه الحضور الجميل ده؟
يا اخي حرام عليك انت عامل ليك مسطبه سمحه ذي دي وداقين الونسه انت والكردفــــاني بي جاي ونحنا ولا هنا ؟
قولوا لينا عوك .. أدونا فرقه تدخل ورقه
عموما ابداع أخي اسكابشن ومن هنا ورايح أنا بضايق ليك الجماعة في المسطبه وده توقيع في دفتر الحضور فقط وان شاء الله المرة الجايه بجي بى كراساتي.


الاصيل قنديل
مرحبتين يا بركة.... المسطبة نورت بيك ياصديقى....وما اجمله من توقيع...انت بس قول الفى ضميرك وخلى لى باقى الكلام.... مساطبنا شعبية تسالى... وقصب(سكر)..وفول(حاجات).... وانت العارف (اللوج) بودى التووووج
عباش الكيشة بعد ما شافكم قرر يحل المشكلة فى وجودكم وقال عما قريب جاييييكم فى المسطبة.... شكرا يا قنديل يا اصيل... وتعال ومعك اخرون مهما هم تاخروا فانهم ياتون.....

scaption
06-04-2008, 08:50 PM
عزيزى منتصر
تحياتى
وين الحى بيك
مع حوامتك دى وين تلقى زمن
كده الاخبار شنو
ماطولو الغيبه
بس عاوز اسجل حضور لانى مشغول جدا
لكن عندى معاك قعده طويله -سلم لى الى عباس الكيشه
وان شاء الله امورو سلكت وعاش فى تبات ونبات بعد الفرز


الفنان المرهف صلاح
الشوق كميات....خزانات مروى والحماداب
عندى اقتراح بعمل جدار صغير من خشب على جانب المسطبة لتعليق لوحات الفنان التشكيلية عشان المواضيع شكلها حتسخن قريب ودائر الفن يرتقى بنفوس (المسطبييين).. بالله عليك كتر لينا من لوحاتك وابداعك...عارفك مشغول بس حاول استلف ساعة من الزمن الفلانى السماهو بتقطر مطر وادينا من عندك فوانيس....
تخريمة:
عباس الكيشة شكلو من وزن الريشة وكمان بخاف من ريشة....
شكرا عزيزى صلاح على توقيع لونك البهى... وراجييييينك

scaption
18-04-2008, 01:04 AM
مدخل اصفر
لو رجعت ايدى فاضى.......يابا ما راح تبقى راضى

الموضوع:
حريقة فى فيزا ناشف ريقة.....
حسن سالم الشهير بحريقة ميكانيكى سيارات مركب مكنة مهندس فى الثامن والعشرين من عمره
توفى والده عم سالم الذى كان يعمل سباكا فى جميع ارجاء المعمورة رجل بقامة سندباد الرحمة الذى اشتهر ببشاشته... كيف قيلتو وكيف امسيتو وكفارة ليكم والبركة فيكم وحمدلله على السلامة اطنان من الحراك الاجتماعى النبيل بكته الحلة اطفالا ونساء وعجاوز وسمى فرن الحلة باسمه تخليدا لذكراه
حسن حريقة اخ لمريم طالبة جامعية بكلية الاداب سنة تالتة تحلم بخريف التخريج ومعاذ طالب ثانوى
ومودة فى تالتة ابتدائى واخر العنقود سوسن فى سن اصابع اليد ومن خلفهم حاجة السارة التى تعمل بائعة سندوتشات الفطور فى مدرسة بالحى....
حسن حريقة سمى بهذا الاسم لحريقة اصابته فى رجله اليمين ايام الطفولة... ميكانيكى شاطر اشطر من حسن الشاطر فى الاساطير... يستطيع ان يميز علة العربية من خلال صوتها كما عازف الجيتار...
يسكن مع اسرته فى بيت متواضع من الجالوص الذى(تحن الشمس لضله)....يعمل فى بحرى تحت اشجار النيم له زبائن خصوصيين من دكاترة الجامعات وصفوة المجتمع لبراعته الفائقة.... ولكنه رغم ذلك فكر جادا فى الهجرة الى خارج البلاد.... راسل صديق عمره عمار الذى يعمل بالسعودية طالبا فيزا...
استطاع عمار ان يرسل له فيزا بمهنة عامل تربية مواشى .... نقلة عجيبة من حديد الى مواشئ...
عم الخبر الحلة وجاء الناس مباركين
حاجة زينب الصديقة العزيزة لحاجة السارة
هى يا حريقة جيت ليك ... جيت ليك تستاهل يا ولدى كل خير
طيفور سيد الدكان ابشر بالخير يا حريقة اهلك فى عيونى ما تشيل هم من اسى عملت ليهم دفتر جرورة
المهم يومين حريقة زى العريس.... تباريك وحلاوة وبيبسى اشبه بالكرنفال
سمعنا الخبر انا وعباس الكيشة وعثمان توصيلة وقررنا زيارة حسن حريقة فى مسطبة بيتهم البقعد فيها كل مساء
يا حريقة... والله ايامك يا بركة اخيرا يا زول يا رائع تمشى بالفيزا وتزوغ
اهلا يا حبة..... ازيك يا توصيلة..... اووووووه عباس الكيشة مشتاقييين.... اتفضلوا
باقة موية ماركة (شل) قدامو على التربيزة (مكنيكى اصلى)
يا حريقة مبروكة الفيزا اللذيذة هكذا قالها عباس توصيلة
الله يبارك فيك يا توصيلة
يعنى خلاص ناوى (تفرز) عيشتك من البلد دى... همس عباس الكيشة
يا عباس صدقنى مانى (فارز)
ضحك الجميع فى ان واحد
قطع الضحك توصيلة اه ناوى تبدا الاجراءات متين
تنفس حريقة نفس طوييييييل لحدى ما قلت ليهو شفطت الهوا كلو
والله يا جماعة الناس جوا البيت ما جايبة خبر ساى انا ما عندى قرش واحد للاجراءات وما عارف اعمل شنو
توصيلة كيف الكلام ده يا مكنكة
والله جد يا توصيلة الحل شنو انا ما عارف؟
صلح توصيلة قعدتو على الكرسى وقال
انت مش خاطب بت خالك؟
حريقة ايوه يا توصيلة
حريقة بثقة ابوك الله يرحمو مش راجل كان مواصل الناس من بدرى؟
ايوه يا توصيلة
صرخ عباس الكيشة الليللللللة يا حريقة توصيلة جاك بمصايبو ودروبو
خلينى اواصل عليك الله يا كيشة
طيب اتفضل يا ابو التماسيح...
اسمع يا حريقة كلامى ده كويس وافهمو انا لقيت حل ابن كلب...توصيلة كفكف جلابيتو على ضراعو
انت تعمل عزومة مرطبات بغرض انت داير تعرس بت خالك
لا حول ولاقوة الا بالله.... دى نكتها من وين يا ود الذين.... ده كلام ده بالله عليك.... دبرس الكيشة
طنطن توصيلة وقال لعباس الكيشة انت خليك مع الرومانسية بتاعتك ديك...عاوزين نحل مشكلة الراجل ده
تدخل حريقة... يا توصيلة انت عاوز تقول شنو؟
تعمل لناس البيت انك داير تعرس بت خالك وابوك طالب الناس ونطبع كروت العزومة واديك مثال:
ال سالم محمدين يتشرفون بدعوة سيادتكم بتناول المرطبات بمنزلهم الكائن بمناسبة عقد قران ابنهم حسن على ابنة عبد الوهاب معروف
والعاقبة عندهم فى المسرات
وصرخ توصيلة والعاقبة عندكم فى المسرات دى اهم شئ لانو لزوم الكشف وكده....لانو لو كتبت شكرا يا حبيبى راحت عليك زول بخت ليك حاجة مافى....
تدخلت فورا انت يا توصيلة جنيت دى فكرة جبانة وبعدين دى اعراض ناس ومشاعر بنى ادمين
توصيلة بنفس حار خلى فلسفتك دى التسفرو يا حبوب
برم حريقة شنبو عدة مرات.... والله يا توصيلة انت مسلط لكن فكرتك دى ما عندى حل بلاها....
وبصوت منخفض همس حريقة بس الموضوع يكون سر بينى وبينكم حتى اهلى واهل العروس ما يعرفو بس (قرضوو) على كده
عباس بصوت عالى انا ما بشترك معاكم فى الجريمة المنظمة دى.... لكن غايتو سركم فى بئر
ضربو توصيلة على كتفو من يومك جبان
وانت يا حبة رايك شنو.... عاين لى توصيلة بعين واحد داير من واحد قروش
انا ذاتى برة اللعبة دى.... لكن سركم فى بئر
اها يا حريقة اسمع كلام اخوك وانساك من المثقفاتية ديل انا وانت فى سوق الله اكبر وبنحل مشاكلنا بطريقتنا
وافق حريقة.... وولع حريقة فى سيجارتو العلى خشمو
طيب يا توصيلة العزومة دى ما دايرة صيوان وكراسى وترابيز ومرطبات وبيبسى وكمان حق طباعة الكروت.. انت عارف اخوك ما عندو ولا تعريفة... حريقة بصوت مكسور.....
ما تشيل هم اخوك سداد بتصرف ليك فى مبلغ بشيك طاير من السوق وبعدين من الكشف نحلو
تدخلت بضحكة زى موضوع شيك حافلة العدة مش كده يا توصيلة
نهرنى توصيلة ساعدنا بالسكوت يا صاح...
المهم تم الاتفاق بين العريس صاحب الفيزا وتوصيلة الموصلاتى على كل التراتيب وحددوا الخميس بعد الجايئ مواعيد العزومة.....
ذهب كل منا الى بيته وبعد نصف ساعة سمعنا زغاريد حاجة السارة فادركنا انها وقعت فى الفخ
جاء الخميس المشؤوم.... وصيوان كزام... واضاءة خمسة نجوم التقول استوديوهات هوليود.... كراسى لاكثر من 500 شخص صناديق بيبسى وميرندا وكمية لا يستهان بها من الفواكةوالحلويات.... وعند مدخل الصيوان طربيزة كبيرة على ظهرها فوطة من القطيفة وعلبة فاضية كبيرة لزوم الكشف وكده وبجوارها توصيلة بجلابية انصارية وشال من الحرير وقلم ذهبى وعلى وجهه ابتسامة النصر.....
غابت الشمس وبدا الحضور هزيلا وتوصيلة كلهو ثقة بحضور المواكب
دخلت الساعة على الثامنة.... وبدات علامة القلق على العريس وتصبب العرق من حبينه
وما زال الحضور كما هو......
دخلنا فى الزمن بدل الضائع.... وبدات الهمهمة.... وتغير لون عيون العريس من فرط الدموع
وصلت بنا الساعة الى التاسعة والنصف وسمعنا صياح وتصفيق من داخل بيوت الجيران
سجل قودوين هدف الهلال الغالى فى دورى ابطال افريقيا فى الزمن بدل الضائع وعلى اثره تاهل الهلال
ولم يتاهل حريقة بالفوز بعلبة الكشف وصرخ بصوت عالى وسط دهشة الجميع
الله يلعن يومك واليوم العرفتك فيهو يا توصيلة...
عندها ضرب توصيلة يدو اليمنى على جبينو ..... اخ فاتت على الليلة يوم كورة الهلال .... انا بقول الناس وين من قبيل
وصرخ بصوت عالى معليش يا حريقة دقت فى العراضة
وفشلت الخطة.... واصبح حريقة مديون بمبلغ كبير لتحضيرات العزومة.... وحك راسو اكثر من مرة وقال لتوصيلة:
اها زى ما ورطتنى شوف لى مراقة
حك توصيلة اضانو مرتين.... اسمع يا حريقة مافى حل غير نبيع الفيزا cable
صرخ حريقة cable ده شنو؟
يعنى تتباع لواحد ويعمل الاجراءات باسمك يعنى البيع لجماعة ملوص عشان نقدر نحل الديون بتاعت العزومة
داخ العريس صاحب الفيزا....ووقع فى الواطة... وجات حاجة السارة من جوا ... اووووب على الولد مسحور
انتهى......
حاشية.....
الغاية مهما بلغت لا تبرر الوسيلة
ما بنى على باطل فهو باطل....

محمد بن اسماعيل المكى
19-04-2008, 11:20 AM
عزيزى اسكابشن
تحايا بعرض مساحة المليون متر مربع والباى الى حدود النق تربيع اليك عزيزى ارفع راسى الخالى من القبغة واحنى اخر ماتبقى من رهق التخيل وافرد شراع الزمن القادم مواصلا رحلتى الى مسطبة تسمى املا وتضج اقتباسا من حياه هذا الجسد
عزيزى دمت بخير واللقاء متعة لاتنتهى

الكــــــــــردفاني
19-04-2008, 01:18 PM
نتابعك إسكابشن بكل كياناتنا، فقط أمنحنا المزيد من الروائع.
مودتي

qindil
19-04-2008, 09:59 PM
أخي اسكابشن يوما بعد يوم تزداد القا وروعة وتتكشف فيك زوايا جديدة من الابداع ولا أظن الا انك كلك على بعضك ابداع × ابداع .. سنكون معك وبك دائما في هذه المسطبة الرائعة.

scaption
19-04-2008, 10:16 PM
همبريب العناقريب.....
وين بتطيرى ... وين بتركى....يا السموك وداعة ود المكى؟

ضل الشاتى.....
لمن يجى الزمن الفلانى....صدقنى بنتلاقى يا كردفانى

قطاع الرحط ....
قنديل يا نيل... قطاع رحط كل الجزائر والبنات البفتحو الباب للمطر

حاشية:
ود المكى... كردفة.... الاصيل قنديل
سلامات .... وعوافى
شرفتو مساطبنا.... وابقو الف..... وما تنقطعو... والمقدم ماهو موصل....
ورددوا معاى قول شاعرنا:
لحظة طار عصفور من صدرك
رتب فينا احساس بالالفة
ودوزن عصب الزمن الاشتر

تذييل:
عما قريب نشوف مسطبة الود القيافة.... الجنن بت الحلة سلافة
ودمتم قمحا.... ووعدا وتمنى

الكــــــــــردفاني
21-04-2008, 09:25 PM
تسلم ياإسكبشن يارائع، هههههه الظاهر القصة الجاية فيها جانب كوميدي دراماتيكي خطيييير.
في الإنتظار ياقلب.
مودتي

scaption
10-05-2008, 12:00 AM
الاعزاء المسطبيين....
الحملات الجائرة التى قامت بها المحليات بغرض فرض رسوم وازالة كل مساطب بلادى التى تتجاوز عرض يزيد عن مترين بحجة التعدى على ما يسمى ب(حرم الطريق) هى سبب انقطاع الشباب عن الجلوس على باحات تلكم المساطب.... فالى حين التصدى الى تلكم الحملات ..... راجعيين اذاما.....

ومازال صلاح القيافة يعانى من ملاحقة سلافة له.....

qindil
15-05-2008, 02:49 PM
في الانتظار على نار .. الشوق كتال والقلب احتار

وذي ما قال الشاعر: رجيتك وفي انتظار سلافه كملت الصبر كلو

أها نصنقر ولا نشتت .. يافرده

الكــــــــــردفاني
17-05-2008, 12:03 AM
تشتت وين ياقنديل؟ حرم قاعدين عشان نتابع حكاوي إسكابشن القيافة دي، يلا في إنتظارك يارائع.

محمد بندى
17-05-2008, 10:30 AM
الاخ المدهش اسكابشن او منتصر , تحيه طيبه يا رائع,
وين انت من زمان ياخ؟؟؟ اااااااااااااااه لينا زمن ما قعدنا فى مسطبة امل زى دى ياسلالالالالالالالالالالالالالام يا اسكابشن رجعتنا للزمن العجيب , قعدنا فى المصاطب لامن كملت بى القعاد حسدونا فيها اولاد الكلب, مره كشة خدمه ومره محليه ومره كابلات سوداتل ومره كمان ناس المويه تخيلو بقو ليك المصطبه زى جرح السكرى اصلو ما تسلم من الحفير, غايتو , المهم انك اهديتنا فرصه من ذهب على طريقة الرشيد ونحنا ما بنضيع القون اصلو, عشان كده جايييييييييييييييييييييييييينك ومعانا اخرون و نحمل من الشوق كتير لى كيشه وحريقه وتوصيله وكل المسطباتيه, وعلى قولهم الشاى بالبسكويت المنزلى والمويه بى جركانة شل لو تستلفا من حريقه لانو عندها طعم خااااااااااااااااااص مع المساطب, اتفقنا يا حبيبى, لمن نتلاقا عندى ليك قصه تجنن, شمار حاااااااااااااااااااار, خلاص يلا ياحبه جاااااااااااو على طريقة اولاد المصارين الييض,


اتوهطنا فى قد الابره
اتمددنا,
خلفنا الصبر كراع فى كراع
حلفنا نعضى المر الحنظل
لا نتلفت لا نتفتت
لا نتباع


دمتم يا مسطباتيه

محمد ناصر
17-05-2008, 11:25 AM
شنو يا جماعه ضاربين الهمبريب براكم في المسطبه دي وخليتونا واقفين في الشمس وريقنا ناشف

التحيه ليك اخي العزيز إسكبشن على الروائع دي بس ليه ما قلت لينا عوك ولا المقاعد محجوزه

عموماً انا بتقل دمي وأعلن إنضمامي ليكم

scaption
25-05-2008, 07:57 AM
المسطباتية قنديل..... كردفة
اتحداكم فى الاشواق.... بس كاتلانى المحنة والزمن والهزيل
عموما برضو مساطب.... متاعب.... مصاعب..... مكاتب.... مراتب...
وكما يردد شاعرنا عاطف خيرى
اليابسة قركة
مدخورة ليوما فيهو صاير النيل
قطاع رحط كل الجزاير
والبنات البفتحو الباب للمطر

scaption
25-05-2008, 08:15 AM
المسطباتية
ود ناصر.... سلامات يا زول.... اتفضل على بيتنا الطيب....وادخل بكراعك اليمين
وبمناسبة الدم....الله لا جاب سيرة الدم فى مساطبنا.... وزمان ضبحنا خروف تسمية المساطب وبصمنا بدمو باصابعنا العشرة على كل مساطب بلادى....
شكرا وفيرا يا بركة....

ود بندى.... كلامك ده والله زى ما بقول شاعرنا ازهرى محمد على

يكلكل جلد الكلمة الحافة
لحبيبة بتفتح مجرى الغنا
وتقلس بيبان القلب
صدقنى المساطب الما قدرت عليها السيول ما بتقدر عليها سوارى و لاخيول وهى فى الاصل ركيزة بيوت وخشم بيوت .... والكيشة وتوصيلة وحريقة قاعدين طواااالى
والعندو حاجة خائق عليها ... والخائفلو من زول ما بقعد معانا فى المساطب ولا هو مسطباتى

واقول السكاكر ابتنى ورمتنى وكفانا
واقول العساكر تبارى الكبارى و تفتش قلوب
الجهال الشلوخهم هوية
واغنى الزيود والكنانة
كضب...
لك منى فهرنهايتات التحايا... فى جميع الزوايا

محمد بندى
01-06-2008, 09:35 AM
العزيز اسكابشن, لك من القلب ارق التحايا,
والله يا اسكابشن انا قلت ابين الحال عندنا بالنسبه للمساطب والجور الحاصل عليها من قبل الجماعه اياهم
لكن افووو,لكن نحن ما قعدنا ساكت
حفرو المصاطب زرعنا اللساتك, قلعو اللساتك جبنا الحجاره, بس شغالين معاهم كده, لمن جابو لينا كشة الخدمه الوطنيه, قمنا جاريين
طبعا دى مافيها هظار, وبعدين يا اسكابشن نحن هسع دايرين نعمل لجنه منبثقه من اللجان عشان نشوف البدائل للمساطب لمن تتعرض لى هجوم بربرى ووحشى من المحليات, نعملها متر ونص ولا متر ولا نقاول شركه تركيه تجيب لينا مساطب بتتلما بعد التسطيبه , المهم لازم نقعد ونتفاكر ونتحاور ونتشاور, بعدين الكيشه وحريقه وتوصيله ديل يمشو وين لو حصلت حاجه للمصاطب؟؟ مافى حل غير نقعد ونشوف الحاصل, التسطيبه الجايه حيكون ده موضوع المسطباتيه وواحد يمسك المحضر,


وياااا اعشاب النيل الابيض ما تضارى ورا الدعوات
وما تتلبسى فرح الفات
المارق منك داخل جرح الورده وراسم فيها غناوى الطل
المارق منك رجع للغابات العرب العاربه وللعتمور
الزنج الهاربه وادى الكون مفتاح الحل
المارق منك مارق منك ومارق منى

scaption
01-06-2008, 01:25 PM
يا بندى ....يافردة
هم ما عارفين انو المسطبة فاتحة على القلب... والقلب مساكن شعبية؟
قالوا ممنوع الوقوف بين اليافطتين قلنا كلام كويس
قالوا ممنوع التحدث مع (السائق) قلنا كلام كويس
قالوا ممنوع(البول) يا حمار.. قلنا كويس
قالوا ممنوع الدين حتى لو بعدين....قلنا اه فى زول بجيب مية بقر برة من كلام سااااى(بلغة الدينكا)
فى النهاية قالوا على شقى ومجنون
المسطباتية جميعهم قد بنوا هياكل فى قلوبهم محبة فى هذا الوطن (المرتاح)
توصيلة اشترى تلفزيون وريسيفر جديد
عباس الكيشة عامل نائم وداقى طناش
حريقة ساكى السفر وما لاقى طريقة
صلاح القيافة رسلت ليهو سلافة رسالة على الموبايل:
انت السماء بدت لنا
فاستعصمت بالبعد عنا
واعمل حسابك المحاضر بجيب النمل ابو ريش
والشاعر بشرى يردد
ابنوسة جيتك برة صوت الاجتماع واللجنة
والعرق الرهيف
طلقانة بنوت النميمة الهشة
سماك ما بتنفضح للليل
ولا بربح نجومك صوت
مبشر فى السهر عفريت
صدقنى يا بندى جاييين المسطبة قريب
وكل الرحيق لك والبرتقالة ايضا

scaption
01-06-2008, 10:40 PM
تخريمة:
حكى لى صديق ان احد الاخوان السودانيين مقيم فى امريكا يشاهد فى الفضائية السودانية ومعه صديقه الامريكى مستر جورج وكان هنالك مسيرة بهتاف:
امريكا روسيا قد دنا عذابها...
تسال جورج ماذا يقولون؟
شرح له اخونا بانهم يبشرون بقرب موعد عذاب روسيا وامريكا
اندهش جورج وبسرعة ردد:
both of them
الاعزاء المسطباتية معزرة صدقونى تم سرد قصة سعيد لوترى لكنه انقطاع التيار الكهربائى قبل الحفظ اضاع القصة برمتها
لكن غدا نعود كما نود
ونلتقى عند الغروب
كلى اسف نبيل
..................................
عدنا
........................كيفنكم هوى
التقيت توصيلة فى حافلة المواصلات وبيده (جوز) كوتشينة لم اساله عنها
الحافلة معظمها طلاب جامعات من الجنس(الرهيف).... كمال ترباس يغنى من كاسيت الحافلة
ما تهتموا للايام ظروف وتعدى
طبيعة الدنيا زى الموج
تجيب وتودى.....
تنهد توصيلة وشفط اغلب اوكسجين الحضور وقال لى والله ترباس ده ما جايب خبر ساى
قلت الخبر شنو؟
فائزة مرتى قالت دايرة شغالة فى البيت
ضحكت سريع وقلت ليهو امان ما وقع راجل
ابتسم ابتسامة صفراء وحرك الورق الكوتشينة فى يدو وقال
نسوانا ديل عائشات فراغ عاطفى وطنى.... لكن انا حاغطى هذا الفراغ ده يا مان
كيف يا توصيلة؟
شايف الكوتشينة دى انا حاعلم فائزة (كونكان 14 وحريق واحتمال الويست) لحدى ما تبقى حريفة خالص خالص
اها يا توصيلة وبعدين؟
بعدين يا حبة هى تعلم باقى جيرانها ويعملوا نشاط اجتماعى بدل قعدة الجبنة والخبارات بتاعت الساعة 11 ديك
وده يا توصيلة علاقتو شنو بموضوع الشغالة المدبرس بيك؟
كيف يا حبة ده ما الحل ذاتو... يلعبوا الحريم ديل والفائزة(طبعا فائزة) يقومن الباقيات يغسلن ليها العدة ويقشو الحوش وهاك يا طبيخ وغسيل
ونكون قدمنا حل جماعى لطلبات الحريم دى وغطينا الفراغ العاطفى الوطنى
ضحكت شديد خالص لمن كل ركاب الحافلة التفتوا لى.... والله انت يا توصيلة ود لذينة... وضحكنا فى ان واحد
قطع الضحك احد الركاب من خلال مكلامة فى الموبايل بلغة انجليزية كاربة وبصوت واضح وجميل وما عارفين قاصد بوبار وللا ده واقع انسان حقيقى
ابتسم توصيلة وقال هلا هلا لو كان معانا سعيد لوترى كان جضم اخونا تمام التمام
قاطعته يا توصيلة بالمناسبة ويييين اخونا لوترى ده... لى مدة ما شفتو
اسمع يا حبة تعال بعد المغرب نمشى ليهو فى البيت
اوكى اتفقنا.. وبعدها بقليل صاح الكمسار التقاطع يا فى زول نازل؟
نزلنا وكل زول مشى بيتو
سعيد لوترى شاب فى ال34 من عمره ابوه حاج مرسال بتاع كارو الموية توفى وسعيد فى بطن امه.... حاجة نفيسة تبيع (الداردمة) فى مدرسة الابتدائى بالحى... سعيد وحيد امه وابيه... توحمت امه وهو فى احشائها ببطيخ من غير حب وقيل لها انو موجود فى امريكا فقط ومنذ هاتيك اللحظة وسعيد مغرم حد الجنون با مريكا.... نشا فصيحا شقيا ذكيا...تفرد فى المرحلة الابتدائية خاصة المعلومات العامة والخغرافيا وكان الوحيد الذى يعرف كثير من الكلمات الانجليزية ولقب عندها بالخواجة... وفى المتوسطة كان بارعا فى spelling والادب النجليزى ولقب عندها بمصطفى سعيد بطل موسم الهجرة للشمال... فى الثانوية كان يساعد المحبين فى كتابة جوابات ريد بالانجليزى بها بعض من اشعار شكسبير والترجمة فى ظهر الصفحة... ولكن كحال النابغين فى بلادى لم تسعفه ظروف امه الصحية من مواصلة الدراسة فانقطع عنها وعمل باحدى المطاعم ببحرى.... عندما وصل الخامس والعشرين من عمره زاد شغفه بامريكا بعد حفظ اسماء مجلس الشيوخ والكونغرس واسماء كل الولايات وكل ما يخص امريكا... انه حب من روح النطفة.... كم تمنى ان يغمض عينيه ويجد نفسه امام تمثال الحرية
كم تمنى ان يدرس بامريكا... ولكن ما نيل المطالب بالتمنى
فرح فرحا شديدا عندما ظهرت الهجرة الى امريكا عن طريق اليانصيب وتمنى ان يكون له فيها نصيب
قدم بكل اسماء ابناء الحى الاحياء منهم والاموات واصبح لديه البوم من الصور فى دوائر مكاتب الهجرة... ولكن دون جدوى
ذهب الى الفكى (تور) يطلب ما يسمى ب(الرتينزا) لتدعيم حظه فاعطاه الفكى محاية وقال ليهو غمس القلم فيها واكتب المعلومات وترسلها ...ولكن جدوى
حاول ان يصادق فتاة عبر بوابات الصداقة من داخل الشبكة العنكبوتية علها تساعده بالسفر حتى لو عن طريق الزواج وان كانت شمطاء لم يترك لها شقاءها من تسعة الا جنينا..... ولكن دون جدوى
لم يستسلم وما زال يسعى.... وانتهى به العمل فى كافتريا بالقرب من السفارة الامريكيا تقربا وزلفى
بعد المغرب كنت مع توصيلة حسب المواعيد
طق .. طق دقيت الباب
كج .. كج فتحو لى الباب... اتفضل يا حبة
وجدت توصيلة وفائزة والكوتشينة وصرخت
اكيد يا توصيلة ده ما قصدك؟
ضحكنا فى ان واحد... وذهبنا فى طريقنا الى سعيد لوترى الذى يسكن فى اخر الحى كانه (كامب) امريكى فى طرف الحلة.... بيت من الجالوص به اوضتين فقط... ومسطبة بها لمبة قلوووز لزوم قراية المجلات الاجنبية والجرائد... واخونا سعيد خالف كراعو التقول السفير الامريكى داخل منزلو بالسودان بالقرن السابع عشر قبل الميلاد
السلام عليكم الخواجة سعيد الماهو سعيد هكذا تحية من توصيلة
اهللللللللا يا موصلاتى يا لذيذ... اخبارك والله مشتاقين.... وازيك يا حبة ليك وحشة والله.... اتفضلوا
قعدنا وسمح القعاد لمن يقعدوا السودانييين
توصيلة بسرعة كده صاح اخبار حاجة امريكا شنو يا لوترى
والله يا توصيلة فكت بت الكلب زى ما قال كابتن كابو....
انت يا لوترى ما زهجت من المساسكة للسفارات والخبارات الاجنبية .... قلتها بابتسامة واضحة
والله يا حبة ده والله سر مكتوب فى جوف اصداف.... ومازلت بفتش ليهو بقليب نزاف
ضحك توصيلة وقال يا ولد انت يا سر..... اسمعنى لا سر ولا حاجة انت داير تسافر امريكا .... انا على الطلاق اسفرك فى اقل من شهر
اعمل حسابك يا لوترى توصيلة حلولو معروفة وطوالى بتدق فى العراضة
كدى يا حبة خلينا نسمع الجديد عندو شنو؟ اها يا توصيلة سمعنا الحان الربيع
انت وحبة تمشو معاى البلد الخميس الجائى عندنا عرس واحد قريبنا وعلى الطلاق سفرك لحاجة امريكا من قرية على النيل العظيم يعنى من النيل اطول انهار العالم وطوالى الى النائب الاول نهر الميسيسبى... ولو ما سافرت ما تدينى ايدك
ضحكت شديد.... انت يا توصيلة قايلنا (فارات ) وللا شنو... السفير الامريكى معزوم فى عرسكم ده وللا شنو؟
بطل الفلهمة يا حبة.... انا حلفت ليكم طلاق... انتو قايلين فائزة مرتى دى لقيتها فى يا نصيب وللا شنو
يا توصيلة عليك الله طلاقات السوق دى نحنا عارفين خبرها ... الواحد فيكم لمن يطلع الصباح من البيت يحلف على الطلاق اى طلاق اقول الليلة ضارب
ضحك الجميع فى ان واحد لمن سعيد لوترى وقع من الكرسى
يا جماعة ادونى فرصة وانتو ما خسرانين حاجة فرصة تشوفو الريف السودانى وتحضروا حفلة واليوم البعديهو نجى راجعين
سعيد لوترى قال لو يوم الخميس ما عندى مانع.... لكن يا توصيلة لو ما سافرت امريكا فائزتك طلقانة
قبل توصيلة التحدى.... وافترقنا على المواعيد... السفر خميس
جاء الخميس ... موقف شندى حافلة روزا.... جرايد مجلات.... كاسيت شغال من بحرى حتى البلد.... صحراء ذات رمال ذهبية... جمال وضان بين الحين والحين.... استراحة ربع ساعة فى محطة..... بورى تيت ... تيت.. تيت.... وانطلقت المسيرة تانى..... بعد ساعة نزلنا وواصلت الحافلة...
توصيلة مرحبا بكم فى ولاية نهر النيل يا اولاد البندر....
استقبال حافل .... وكرم الضيافة كعادة اهل سوداننا الجميل
قرية تقع بين جبلين اشبه (بملاحة) الشطة والملح فى زمان بهى.... بها اشجار شبه يابسة متفرغة.... الضان والماعز والجمال تمشى بين الناس كما الجيران.... النساء بعضن جنب البئر يردن الماء... مجموعة من اللوارى (السفنجة- بيدى فورد) تقف امام بيت المناسبة.... مجموعة من الشبان اقوياء الفريق يكسرون الحطب..... مجموعة اخرى تحمل على اكتافها (جوز الماء) وفقا لقانون نيوتن للحركة لتعبية البراميل والقرب فالماء عصب الحياة.... والنيل على يبعد اقل من 3 كيلومترات يمد هذه القرية بالحياة فلولاه لما طابت لهم حياة....
ابناء عمومة متعاضدين... متماسكين... كبيرهم له احترام وصغيرهم له اقدام ونساءهم نعم المعين لرجالهم البسيطين.... انه حال اهل بلادى فى القرى والبوادى واينما كانوا... بساطة ووداعة وكرم وشهامة ونوايا سليمة....
استمتعنا جدا بهذه الزيارة وعرفنا تاريخ هذه القرية من العارفين... وسمعنا الحكاوى والنوادر... والدوبيت والاشعار والحكم... وجاء المساء
وبدات مادبة العشاء.... وتسمع صلوا على النبى يا جماعة.... وعلى الحرام زيادة من خمسة ما تقعدو... وجيب يا ولد زيادة هنا ... ناس قاعدة تاكل وناس واقفة على راحة الضيوف.... اطفال المستقبل ممسكين بالاباريق يغسلون (كل ما هو عالق) فى قلوب الناس ليس من ايديهم ولكن من قلوب الناس اجمعين.... انه وطنى... سودان الناس الطيبين.... تكاد تبكى عندما تشاهد هذه الالفة الذهبية التى لا مثيل لها على سفح هذه الاسفيرية...وبعد اكتر من ساعتين من اكرام الضيوف..... سمعنا الو.. الو... تيست ون... ون... عرفنا انه موعد الطرب ويا له من طرب..... فنان بسديرى وعراقى وسروال يحمل فى يديه (شتم... باقة زيت مقاس 3 ارطال) ومطرقة صغيرة لضبط الايقاع.... ومن خلفه (كورس) بشتم ومطارق وطواقى حمراء اللون على رؤوسهم... عناقريب فى طرف الحوش المدادى حدادى ومن خلفها كراسى مجلسا للرجال.... وفى الطرف (البعييييييد) المناظر له جحافل (النساء) .... وفى نص الدارة (سباتات وبروش) للرقص والعرضة.... ودقت الدلوكة
عرش دود سراير الدار
وين المو فشار
سمحة و خايلة فوق مختار

سال لوترى توصيلة .. مختار ده منو.... ابو العريس وللا شنو؟
ضحك توصيلة العريس ابوه ميت وقالوا دى غنية تراثية.... وقالوا مختار ده عمدة العبيدية والله ورسوله اعلم
بدات الصقرية واللعب بالسيف... والعرضة.... والنسوان يرقصن برقابهن كما القمارى التى تتلفت عندما تقوقى.... وتقدم الناس للشبال... وزغاريد... واطفال زغب يسرقون العرضة سرقة.... وتسمع الروقة هوى يا شفع
عالم لا يمكن ات تجده فى مسارح واستوديوهات هوليود.... عالم خاص بسوداننا الحبيب وباهله الطيبين...
اصبح سعيد لوترى يتمايل مع الدلوكة.... وبدا سحرها يسرى الى عروقنا.... وفجاة وجدت نفسى ولوترى نعرض فى نص الدارة ببناطلين اولاد البندر وسمعنا همسات وفى نفس الوقت سمعنا زغاريد حسبناها اعتبارية للضيوف وتشجيعا لنا...
تنهد سعيدلوترى...اه...اه... دى دايرة ليها سويدى عديل كدة قبل العرضة.... وقطع حديثه عندما شاهد شابا فى نص الداره (ملص) عراقيهو وربطهو فى نص معصمه وارتكز على عصا اظنها يهش بها اغنامه.... ووضع سيجارة(برنجى على خشمه) ... وسكين وجفير على ايدو يكاد ينقطع الجفير من شدة سريان الدم فى عروق هذا الرجل.... زغاريد متواصلة من النساء كمن يصب الماء فى حريق عظيم لتزيد التهابا... وفى دائرة صغيرة حول الرجل يدور القاضى (الجلاد) ممسكا بصوت من العنج الاصلى .... والفنان يغنى
الصوت... الصوت يا جنى
الصوت احلى منو الموت يا جنى....
سط... سط... سط.... ساطه على ظهره ثلاث نزلت جميعها فى مكان واحد... وسالت الدماء وسالت الزغاريد .. لم يرمش ولم يتحرك ولم تنطفئ السيجارة التى على فمه كانه فى معركة..... وبعض التعليقات والله ركاز هلا هلا... والله دقاق الراجل ابو سوط ده
عرض الجالد والمجلود مع بعض فى منظر قلما يتوافر على سطح الكرة الارضية(كيف يرقص طربا القاتل والمقتول حينا) .... التفت الى توصيلة وقلت ليهو حرام عليكم ياخى ده عاده منافية لحقوق الانسان واغرب منظر للتعبير الوحشى لاظهار العاطفة من خلال بوابة الفروسية
التفت الى توصيلة سريعا وقال ايوه سالتنى؟ نحنا جينا عشان كده وبعدين انا قاصد دى البوابة الحتسفر اخونا ده امريكا
اندهش وارتعش سعيد لوترى قال شنو... انت جنيت يا توصيلة دايرنى انجلد بالسوط ... اكيد ده ما قصدك
لا يا سعيد ده قصدى عديييل كده تاخد ليك 6 سيطان 3 فى كتفك اليمين و3 فى اليسار وتمشى السفارة الامريكية وتقابل القنصل وتتطلب اللجوء السياسى بدواعى التعذيب فى معتقلات الامن... ودى الطريقة الوحيدة البتسفرك وخليك من موضوع اليانصيب داك
فى ان واحد انا ولوترى انت جنيت يا توصيلة
جنيت... جنيت.... طيب خلونا نستمتع بالحفلة
سرح لوترى فى دنيا تانية وتزكر تمثال الحرية..... ومؤسسات المجتمع المدنى..... والجامعات الامريكية.... وحاجات كتيرة
بينما سرحت انا فى حلول توصيلة الدائما ورطة وكيف يفكر هذا الرجل وهل للسوق تاثير فى افكار الناس ولغتهم وسلوكهم الاجتماعى
قطع حبل افكارى ابشروا بالخير يا ناس ... العريس فى جولة حول الناس.... ابشروا... وسحب توصيلة لوترى من ايدو حرم كان تعرض معاى.... والدلوكة حولت عند النسوان وغنن
عبولو الجديد وناس الحلة جو
مختار العريس والله يتم لى
امو فسحها عروسو ريحها
البيت جديد تلاجة ومروحة
مو شراب سجار مو لعاب قمار
البيت الجديد تلاجة وبوتجاز
وزغاريد شديدة....ايوي....ايوىيوىيوى
صحبك لوترى جاتو الهوشه... وقلع قميصو وربطو فى بنطلونو .... وربع ايدينو فى نص بطنو... وهجموا الناس من جوا وتسمع حرم وطلق لكن الراجل ضيف واصلو ما ممكن.... حسم الموضوع توصيلة على الحرام تخلوهو ... الراجل عندو(نضر)
تورط صاحبنا اهى الدلوكة ام هوشه ام انها حاجة امريكا.. زادت الزغاريد وفتحت الناس عيونها اقصى ما يكون حتى كادوا يفقدوا البصر
وصاحبنا لوترى رفع يده اليمين زى تمثال الحرية وغاب فى افق بعيد.... الجلاد اداهو الصوت الاول... غريبة لم يرمش ولم يترنح وانا الذى حسبته سوف يغمى عليه..... زادت الزغاريد واداهو التانى والتالت فى ان واحد.... عرض سعيد مع الجلاد وتوجه الى القبلة الاخرى وادوهو 3 سيطان موجعات كانها ختم تاشيرة الدخول الى (حاجة امريكا)... حرم كفاهو ما قصر ود البندر حرم ركاز
لا يدرى احد قصة لوترى هل هى رغبة اكيدة للسفر حد تحمل الالم.... ام انه تحدى مع المجهول
المهم الحفلة انتهت وسعيد الليل كلو نايم على بطنو وحمتو زادت... وبقى يكورك
اخ اخ اخ ..اى اى اىاىاىاى
صحيت من نومى على صوت امى بسم الله يا ود مالك.... هاك اشرب الموية بسم الله... اقرا سورة الاخلاص قبل ما تنوم تانى
انتهى.......
للمسافرين يقول عثمان بشرى:
فوت ومارس ارتحالك
بحثا عن الزمن المناسب
وعن مكانك فى المكاسب
حاشية:
فى بوست لى سابق كنت قد اشرت الى خطورة هذه العادة الضارة التى تسيل فيها الدماء الزكية تحت اكتر من مسمى وقد لفت الانتباه الى جانبها الاخطر فى انتقال مرض الايدز.....
هنا صوت ينادينى
تقدم انت سودانى

qindil
03-06-2008, 01:32 AM
والله حرام عليك يا منتصر يا خي ما تسفر الراجل وبعدين تصحى ده وقتو ؟ .. صدقني اسكابشن لوتري لما ركز وأخذ الستة سيطان يمين الله انا هنا أشرت وضمنته السفر خليك من لوتري .. بعدين الحاجة ذاتها الله يطول عمرها المصحيها ذي الساعة دي شنو؟

الحبيب اسكابشن انت أكثر من رائع أخي واصل بدون فواصل

محمد بن اسماعيل المكى
03-06-2008, 10:14 AM
اطفال المستقبل ممسكين بالاباريق يغسلون (كل ما هو عالق) فى قلوب الناس ليس من ايديهم ولكن من قلوب الناس اجمعين....

عزيزى اسكابشن
ايها الممزوج دهشه وروعه والق كيف جعلتنى ادمن التوسل طلبا فى المزيد وكيف جعلت الاحرف تتراص كأنها يوم عيد ايها القادم فى شرايين الوعد وقتا وحين انى الى رواد المسطبه انتمى عقيده ودين
لك تحية فى الفؤاد مابرحت ولا ناخت يوما
،،، دمت بازهى ماتكون،،،

scaption
06-06-2008, 09:43 PM
والله حرام عليك يا منتصر يا خي ما تسفر الراجل وبعدين تصحى ده وقتو ؟ .. صدقني اسكابشن لوتري لما ركز وأخذ الستة سيطان يمين الله انا هنا أشرت وضمنته السفر خليك من لوتري .. بعدين الحاجة ذاتها الله يطول عمرها المصحيها ذي الساعة دي شنو؟

الحبيب اسكابشن انت أكثر من رائع أخي واصل بدون فواصل

الاصيل قنديل.... سلامات يا زول يا رائع عوافى
يا اخى لو ما صحيت من النوم كان اخونا لوترى اتورط وبعدين فائزة طلقانة.... دائما توصيلة مورطنى معاكم ولازم احسم الزول ده المرة الجاية...... اسى شايفو داير يورط عباس الكيشة فى موضوع فرز العيشة
المهم يا صديقى شكرا نبيلا لك على حضورك الباهى...... المسطبة منورة بيكم

scaption
06-06-2008, 09:56 PM
اطفال المستقبل ممسكين بالاباريق يغسلون (كل ما هو عالق) فى قلوب الناس ليس من ايديهم ولكن من قلوب الناس اجمعين....

عزيزى اسكابشن
ايها الممزوج دهشه وروعه والق كيف جعلتنى ادمن التوسل طلبا فى المزيد وكيف جعلت الاحرف تتراص كأنها يوم عيد ايها القادم فى شرايين الوعد وقتا وحين انى الى رواد المسطبه انتمى عقيده ودين
لك تحية فى الفؤاد مابرحت ولا ناخت يوما
،،، دمت بازهى ماتكون،،،

عزيزى ود المكى... سلامات
تتساقط كلماتك حرة ندية كما تتساقط التفاحة بفعل جاذبية نيوتن.... وتندلق كاسات الالفة والمحبة بين المسطباتية على جبين صبح كل الحضور الزاهى اينما كانوا وكيفما شاءوا وكما يردد الشاعر عثمان بشرى:
ابنوسة طفر من براطيشى السؤال
عذبنى قصر الاجوبة
ساسقت بين امشى وتعال
عفرت هدومى الاتربة
وحل المقادير اختلال
فى تكنلوجيا الافئدة.....
شكرا عزيزى ود المكى ولك الفؤاد ... وكل الرحيق

الطيب يس الحسن
14-06-2008, 12:05 PM
مشكووووووووووور المسطبه مئه مئه

scaption
22-06-2008, 01:34 AM
مشكووووووووووور المسطبه مئه مئه

ود يس عوافى
شرفت المسطبة يا بركة...... لكن عليك الله من غير عجلات عطبرة المعروفة.... الزحمة وكده وما عندنا مواقف
سؤال؟
الراحل المقيم الاستاذ العطبراوى لما يقول
تعبانة ليه ما تسالى
مجبورة عليك اسال انا ؟

دى عطبرة مش كده

scaption
25-06-2008, 12:00 PM
ليلة صيفية فى درجة حرارة اكبر من درجة موت الذبابة... الشجر واقف على حيلو مشدوه يمارس الذهول لا غصنا تمايل ولا فرعا تدلى... الحشرات والعناكب المنزلية خرجت من اجحارها بحثا عن اكسير الحياة... درجة حرارة تستطيع ان تذوب الشمع الموجود فى الاذان ليزيد مدى السمع عندها... القلوب بلغت الحناجر.... والكهرباء مقطوعة كعادتها دائما لم تخلف يوما ولا ميعادا...ضاقت الحيشان بالناس وامتلات المساطب
عباس الكيشة يجلس على كرسى امام مسطبة بيتو ومولع سيجارة
السلام عليكم يا كيشة
اهلا يا حبة...ازيك..تمام
عليك الله يا عباس السيجارة دى تجيب ليها هوا من وين لزوم الشفط
والله يا حبة ما منى من العلى...
منار لسه مخرخرة وللا شنو؟
لا والله يا حبة الليلة كايسة للهوا دى ساى قبل خراج الروح عشان كده نقة مافى
وسرحنا فى ما يدور فى شارع الحلة
تستطيع ان تسمع ما يدور فى ابعد بيت من فرط الضلام ولا ندرى ما العلاقة بين الضلام والصوت
حاج الامين يكورك يا ولد يا هشام يا هشام يا ولد... يا ولد ياهشام يا ولد يا هشام
هشام يصرخ يا ابوى ما تدينا فرصة نقول ايوه
حاجة كلتوم يا اولاد اوعو تطلعوا السراير دى برا الشارع براهن مكسرات....
شباب متلميين برا على مسطبة دكان طيفور.. احى انا كاس المجاعة نحنا ناس الكاسات المحمولة جوا يا وهم...
نحنا وصلنا النهائى مرتين فى الاندية مش زى الحمام بتاعكم داك
واخرين سيدا...سيدا
واخرين الزعيم..الزعيم
وما زالت بلادى اسيرة السيادة والزعامة..الله يكون فى العون
رغم الحر والضلام وازمة النفس الممحوق زغاريد من بيت صالح حمبرة فى الشارع التانى
صرخ الكيشة اجرى يا ولد شوف الزغاريد دى شنو
طيفور باعلى صوتو دى علوية زوجة صالح حمبرة ولدت ولد
عباس بسخرية اظنها ما احتاجت لداية وولدت بفعل الاحتباس الحرارى وجاذبية نيوتن الليلة
ضحكنا مع بعض فى ان واحد
حاجة سكينة باعلى صوت امشى يا ولد قول لخالتك سيدة وارحكاكن...
التفت الى الكيشة وارحكاكن دى دايرة البروف عبد الله الطيب الله يرحمو
سلافة مجنونة صلاح تكشح موية العدة برا الشارع وهى تدندن:
صلاح...يا صلاح يا حرف ال (l )
وما عارفين المكشكشة دى قاصدة love وللا حاجة تانية....
عالم مدهش اشبه بفيلم قديم وتتم اعادة انتاجه بممثلين جدد وجميعهم يشتركون فى البطولة
وفجاة فى جلستنا العجيبة دى سمعنا زول بيغنى بصوت بيقطع زى رادى حجارو ضعيفة
مرت سنة... وفاتت سنة
وانا يا زمن زى ما انا
انه خالد مكنات سكران طينة وما شى فى الشارع
صاح الكيشة تعال يا مكنات هنا انت جائى من وين
خالد مكنات بصوت رخيم شبااااااابس ..ازيكم
الليلة الحلة دى كلها مطفية الانوار ليه محتفلين براس السنة وللا شنو؟
ضحكنا بشدة ..والله انت برا الشبكة مرة واحدة جائئ من وين يالخرابة
حاكون جائى من القاعة ما جائى من (الغابة)
قاطعته سريعا ...اها كان معاكم منو الليلة هناك؟
والله يا شباااابس كان معانا مروان الحكم وخليتو (لط) وكل ما نختلف معاهو فى النقاش يطلع لينا كرت اصفر ويصفر معاهو ويقول لينا انتو قايلين انا بعد المعاش قاعد ساكت
اها وتانى منو؟
واحد من بحرى قال ضابط قال..اها زرزرناهو طلع ضابط ايقاع فى مركز شباب بحرى
اها وتانى منو؟
واحد حلبى (بنق) التقول خلقوهو اسى لنج كل مرة شابكنا انتو قاعدين وراجييين ساى
ونحنا لحدى اسى ما عارفين ساى الراجينو ده منو
عباس بضحك شديد والله انت استاذ وريئس قسم مرتاح خالص وداقى طناش لاى حاجة
مكنات بهدوء كده يا شبااابس عن اذنكم عندى موضوع مع كديسة فى البيت ماشى اكملو معاها قبل ما تنوم
سلام يا فرد
ذهب مكنات يترنح ويغنى
حققنا احلامنا والعاقب عشقالو
ضحك الكيشة لحدة ما وقعت السيجارة وقدت الجلابية وصرخ
الله يلعنك يا مكنات قديت جلابية الصلاة
عالم فريد الحركة والاصوات فى الضلام زى كواليس الافلام
بالمناسبة يا عباس عمى مامون ابو سامى عضاهو كلب ناس حسين كلمنى عوض بنسلين الصباح فى المواصلات قال اداهو حقنة امس لازم نمشى ليهو
عباس بحرقة والله يا حبة انا ما عارف قصة الكلاب دى شنو الواقعين فيها بيوتنا زى الغابة حشرات وعناكب وضببة وفئران وباعوض وناموس وجنادب وكدايس وكلاب وغنم ....والبلاعة نص الحوش والمطبخ فاتح على الحمام... غايتو احترمت جدا جعفر نميرى فى السبعينات لمن عمل حملة على الكلاب وكان كتال الكلاب مشهور
فى طريقنا الى عم مامون مررنا كتير من المشاهد فى هذا الفلم العتيق
مساطب مليانة وعالم فى انتظار النسمة
وفجاة زغاريد شديدة وصفافير قوية... الكهرباء جات
بالله يا عباس دى بلد دى تفرح الناس بجية الكهرباء
زمان يا حبة كنا بنغنى
الكهربا جات املو الباقات فى التلاجات
اسى بتقطع
ولم يكمل عباس جملته.. الكهرباء قطعت
اها يا عباس دى يقولو عليها شنو.... ضواقة يعنى وللا خمارة عجين
بكرة يا حبة يتكلمو ليك عن القطوعات فى التلفزيون واسطوانة التربينات والطمى
يا كيشة يا اخى الطمى وقف وحم نسوانا ما يوقف ليك التربينات!
مررننا فى طريقنا اتنين من الشباب انصار سنة قاعدين جنب الجامع ويدور بيناتم الحديث التالى:
هل يجوز طلاق المراة عبر ال sms واصلنا طريقنا وكفرنا لعم مامون وعدنا
فى طريق العودة عباس الكيشة قال لى انت عارف يا حبة الناس الليلة مع الحر ده بتساهر قريب الصباح لانو اول نسمة بتجى فى المواعيد ديك....لكن لو الكهرباء جات طوالى النسيم يهب وما عارف العلاقة بين النسيم والكهرباء شنو؟
دى يا كيشة حالة نفسية بس ما اكتر
تاخرت الكهرباء والمساطب مليانة ناس ... كراسى وبنابر وسراير
قريب الصباح مع اول نسمة وخلاص القلوب حاسة والعيون بقت ما تشوف ... انطلقت كواريك من بيت ناس ماجاك الدينكاوى
هرع معظم الناس الى مصدر الصوت
ماجاك المسيحى جاهم ضيف من الاهل واتوفى عندهم... لكن ماجاك قال المرحوم كان مسلم
يا الله يا ماجاك ورطنا ورطة كبيرة... نحنا ما صدقنا بهبة النسيم دى...همس الكيشة
عثمان توصيلة بكل ثقة دى حركات سوق الراجل ده مستهبل زولهم ده مسيحى لا مسلم ولا حاجة...قالها والشهيق على خشمو
يا توصيلة عيب الكلام ده وبعدين المؤمن صديق واكرام الميت دفنو.. قالها طيفور سيد الدكان وكمشة الفول فى ايدو
صرخ توصيلة يا جماعة انتو عارفين معناهو شنو لمن ندفن مسيحى فى مقابر المسلمين؟
تدخل عم السر امام المصلين بالجامع يا ولدى الاعمال بالنيات
ضرب النسيم الابدان وفى اقل من خمس دقايق وقف دفار وعربات وشباب جابو الحفارات من جمعية المسجد وتحرك الموكب
تم دفن قريب ماجاك فى مقابر المسلمين... وذهب كل منا الى بيته ولم تمضى اقل من ساعة وصوت الرادى
يا نافخ الروح فى الجنين
يا واهب المال والبنين
الله... الله
السادسة والنصف هنا من اذاعة ام درمان بجمهورية السودان
وبدا دفتر الحياة اليوماتى....
حاشية:
يقول الدكتور منصور خالد فى كتابه قصة بلدين ان الاسلام دخل الى السودان عن طريق الطرق الصوفية ووجدت انذاك عادات وتقاليد السلالات الموجودة فاختلطت العادة بالعبادة وشكلت ما يسمى بالسودان الاسلام الشعبى... حسب ما ورد فى الكتاب
ودمتم يا ابناء وطنى الجميل فى كل المنابر.... وعلى باحات المقابر
انتهى....

atif
30-06-2008, 12:55 PM
قبل ستة عشر عام لما خرجت من السودان أنا خليتوا لستك ــ إذا اللستك صار مسطبة يبقي في تطور في البلد زي ما سمعت

محمد ناصر
30-06-2008, 07:39 PM
أخي الرائع إسكبشن لك التحيه بروعه هذه المسطبه وناسا , يا أخوي وسع المسطبه دي لينا ساعتين ما لاقين محل ننسند فيه وأنا شخصياً متبرع بطن إسمنت ومتبرع بضراعي , تسلم يا الحبيب ......

qindil
01-07-2008, 01:28 PM
أخي الرائع إسكبشن لك التحيه بروعه هذه المسطبه وناسا , يا أخوي وسع المسطبه دي لينا ساعتين ما لاقين محل ننسند فيه وأنا شخصياً متبرع بطن إسمنت ومتبرع بضراعي , تسلم يا الحبيب ......


هلا هلا ناس جمال الوالي ظهروا ..
قبيل ماقلنا ناس القروش يجونا بى جاي والمفلسين لا ، لمان فتحنا القسم الاقتصادي .. قلتو نحنا تبع المفلسين !!!!!
طيب يا جمال الوالي أقصد يا محمد ناصر عندنا زاوية بي جاي دايرين نرممه .. ضراعك ما دايرنو رسل لينا الاسمنت بس .. هههههههههههه
أفرح يا اسكبشن يا بخت من كان الوالي خالو

محمد ناصر
01-07-2008, 02:57 PM
هلا هلا ناس جمال الوالي ظهروا ..
قبيل ماقلنا ناس القروش يجونا بى جاي والمفلسين لا ، لمان فتحنا القسم الاقتصادي .. قلتو نحنا تبع المفلسين !!!!!
طيب يا جمال الوالي أقصد يا محمد ناصر عندنا زاوية بي جاي دايرين نرممه .. ضراعك ما دايرنو رسل لينا الاسمنت بس .. هههههههههههه
أفرح يا اسكبشن يا بخت من كان الوالي خالو


قنديل يا قلب إنت في المسطبه ههههههههه قريت كلامي المكتوب ده هههههههههه طيب معاك الكاميرا الخفيه هههههههههههه

scaption
02-07-2008, 12:18 AM
المسطباتيه قنديل وود ناصر.... عوافى يا شبابس....
الراجل ده يا قنديل دق سدرو وشالتو الهوشة ولما انت زنقتو زاغ ب(بوشة) وبعدين يا قنديل يا اخوى قالو سمح الفقر املس..... ناس المساطب ديل جيبهم واحد.... كدى ناس (قاصدنى) بتاعين الاقتصاد ديل خليهم شوية ما تجيب لينا الهوا فى المساطب وهاك بعدين يا ضرائئئئئئب وعوائئئئئئد
وفوائئئئئئئئد......
حبابكم عشرة محل ما تقبلوووووووو

scaption
02-07-2008, 01:22 PM
قبل ستة عشر عام لما خرجت من السودان أنا خليتوا لستك ــ إذا اللستك صار مسطبة يبقي في تطور في البلد زي ما سمعت

عزيزى atif سلامات وعوافى
هلا هلا انتو ناس الوطن الاب الخواجة والله كلام يا مان.... قلت لى 16 سنة خارج الاسوار وشامى ريحة تطور ...
اسمع الله يكضب الشينة وما تصل مرحلة الوطن الجد( > 40 سنة )..هههههههههه
على العموم مرحب بيك مسطباتى مركب مكنة خواجة.... ومن المسطية بنديك اخبار البلد اول باول...
ولم تمر ابقى اسال عن مشاعرنا ..... عشان خاطرنا
شكرا يا لذيييييييييذ

ود قندتو
10-09-2008, 11:00 AM
دائما ما كنت أعتقد حد الإيمان أن هذا الscaption مسكون..
وازداد يقيني عندما مررت هاهنا أبحث عن سبيل أبل ريقي فيه فإذا بضجه وونسات وضحكات مجلجلة
قنديل.. محمد ناصر.. عاطف...وscaption

هيااااااااااااا ديل
والله المصطبة دي ما أفاوته... أفوته مكسر
سلام ياناس هوي
يا روح الزمن الجميل

دمتم بخير أحبائي

scaption
12-09-2008, 12:38 AM
دائما ما كنت أعتقد حد الإيمان أن هذا الscaption مسكون..
وازداد يقيني عندما مررت هاهنا أبحث عن سبيل أبل ريقي فيه فإذا بضجه وونسات وضحكات مجلجلة
قنديل.. محمد ناصر.. عاطف...وscaption

هيااااااااااااا ديل
والله المصطبة دي ما أفاوته... أفوته مكسر
سلام ياناس هوي
يا روح الزمن الجميل

دمتم بخير أحبائي

عزيزى ود قندتو سلامات وعوافى ورمضان كريم
تبرا انت يا اخوى من (الكسير) وانشاءالله حبيبك انت الاتكسر فيك.... مرحب بيك مسطباتى درجة اولى ممتازة واوعك تسطح
الدنيا رمضان والناس خلت قعاد المساطب لكن برضو قاعدين....
استفزتنى بالامس قصيدة حلمنتيشية بتقول:
يا حلوة يا ست الاناقة
وهايلة زى قاعة الصداقة
خصل شعرك زى موجة بحرى
تحضن خدودك فى شكل باقة
ما انت حلوة مفرفشة
ما انت كملتى الاناقة
فيها ايه لو قالو بين اتنين علاقة!
تعرف يا ود قندتو طوالى جاء بخاطرى قصى سلافة المكشكشة المكسرة فى صلاح القيافة.... والان تحت الطبع
شكرا لذيذا يا بركة ومن اجل حلايب وغادى انشاءالله نموت سعداء

ود قندتو
14-09-2008, 12:55 PM
نحن في انتظار قصة سلافة المكشكشة...
وسمية المجنترة وكجار كبسور...



وان شاء الله الباقية التبقا

ابن يوسف
15-09-2008, 12:15 PM
الرائع scaptionصاحب الحرف الذهبي المرهف...لك التحية علي هذه المسطبة التي تعبرعن جمال الالفة والتواصل في بلادي باتساع اراضيها ...
. من الغرب الجميل قد اتيت انا مسكونا بحب السمر المساءي في وطني ...
وها انت تفتح الامل لنا للخروج من الغابات الاسمنتية التي سكناها عنوة كدة واقتدار ..
لنلتقي الاعزاء ويكون اللقاء جميلا بحضور الرائعين ... قنديل -الكردفاني - ودناصر- د/احمد وكل المميزين ..
وعموما فقد اتيتكم وكلي فرح نبيل للجلوس وانتظار ما يجود به قلمك الرشيق.
وتب مانا ماشين من هنا،،،
بس انت غيب وتعال
تلقانا نحن يانا نحن...
لك مني كل الود والمني

qindil
06-11-2008, 09:53 AM
سيد المسطبة عووووووووووك انحنا ما اشمسنا ولونا اتغير يا اخوي (اشمسنا من الشمس ما من الشماشه) ...... هييببببببببببي يكا
في الانتظار على نار وشكلك عايزه هاديه ( هادية طلسم؟ ).......... هيييييييي يكا
أكتر من كده بنحرق عديييييييييل يا العشى (عشى عمل؟) .......... هيييييييييي يكا

محمد ناصر
26-11-2008, 11:48 PM
إسكبشن يا قلب سلامات وعوافي
في إنتظار شمار قصة سلافة المكشكشة... وسمية المجنترة وكجار كبسور...

qindil
13-12-2008, 09:09 PM
يا عمنا اسكابشن عوووووووووووووووووووك
نحنا ثبتنا ليك المسطبة وبعد داك جبنا ليك ودناصر عمل ليها عملية ترميم ذي اهرامات الجيزه والراجل خسر دم قلبو ونحنا مسحنا زيت الرجيع منها واديناها وش بتاع بوماستك اها بعد ده داير شنو؟
اوع تكون اجرتها من الباطن لواحد تاني وما عرف يشغله

scaption
06-01-2009, 01:21 AM
الرائع scaptionصاحب الحرف الذهبي المرهف...لك التحية علي هذه المسطبة التي تعبرعن جمال الالفة والتواصل في بلادي باتساع اراضيها ...
. من الغرب الجميل قد اتيت انا مسكونا بحب السمر المساءي في وطني ...
وها انت تفتح الامل لنا للخروج من الغابات الاسمنتية التي سكناها عنوة كدة واقتدار ..
لنلتقي الاعزاء ويكون اللقاء جميلا بحضور الرائعين ... قنديل -الكردفاني - ودناصر- د/احمد وكل المميزين ..
وعموما فقد اتيتكم وكلي فرح نبيل للجلوس وانتظار ما يجود به قلمك الرشيق.
وتب مانا ماشين من هنا،،،
بس انت غيب وتعال
تلقانا نحن يانا نحن...
لك مني كل الود والمني

عزيزى ابن يوسف...سلامات وعوافى
مرحب بيك يا غزال القويز ابو كلاما (عسل) معسول لذييييييذ....اقفاصنا الصدرية تخبئ خلفها قلوبا من هياكل الذهب اقوى من اسمنتيات وخرصانات وحواجز دنيانا....
كلى اسف عن التاخير هى (وفرة) المواصلات و كثرة (الحافلات) وزحمة الصفوف واسطوانة الرفوف.... انا مدين لك ولاخرين باعتزار لا يخلو من كسل اكبر من كسل زيدان الحيران....... على اى حال مرحب بيك مسطباتى واتوهك على كيفك

scaption
06-01-2009, 01:29 AM
يا عمنا اسكابشن عوووووووووووووووووووك
نحنا ثبتنا ليك المسطبة وبعد داك جبنا ليك ودناصر عمل ليها عملية ترميم ذي اهرامات الجيزه والراجل خسر دم قلبو ونحنا مسحنا زيت الرجيع منها واديناها وش بتاع بوماستك اها بعد ده داير شنو؟
اوع تكون اجرتها من الباطن لواحد تاني وما عرف يشغله

الاخوان قنديل....ود ناصر....ودقندتو
سلام وعوافى.... شبااااابس كسل وامر جلل وبعض خلل اصاب(نجارى) الخاص الذى يلازمنى اينما كنت.... ولكنه الان استعاد عافيته وبدا مشوار النجر
وجاااااااااااكم ابقو 1000
تخريمة:
شبااابس مسطبة فيها انتو حرم لا ايجار ولا بيع ولا تكسير ولا ترحيل...... يالدرة الماليكم تمن....ههههههههههه لقيتونى كييييييف؟

scaption
06-01-2009, 03:39 AM
فى عز الليل والنسمة الفرايحية والناس نيام وانصاف موتى انطلقت الكواريك..... الحراااااااااامى... يابومروءة...اوووووب علينا
ياسلام عليك يا بلادى عند طلب المروءة..فى آن واحد وبنفس واحد فتحت الابواب والكل يحمل عصا او ماسورة او ساطور او فرار او اى الة مميتة فانت اما قاتل او مقتول
الناس تجرى فى اتجاه الصوت واخرون سبقوا سرعة الصوت خلف الحرامى نصفهم حفايا واغلبهم عرايا وعددهم كفاية لخوض حرب ضروس.. كيف لا وقد نادى منادى الاستغاثة وااااالصااااه..اطفال زغب لم يسلموا من النداء كانهم سائقى سيارات تحت التمرين وجحافل من النساء تجر اذيال الثياب نصفها فى الارض والنصف الاخر يسترون به اجسادهن.... موكب مهيب اتجه الى مركز النداء انه منزل سلافة المجنترة التى معها امها حاجة ثريا واخيها شاكر ابن ال12 سنة... ووالدها صديق يعمل بمصنع بسكويت رانيا وردية الليل
الحاصل شنو ياناس ..فى شنو؟ سلافة الجنكيزة تتنهد زى الضربوها 220 فولت اسى... سمعت صوت كركبة وبعدين يد زول تلكلك فى مفتاح باب البرندة وطوااالى صرخت الحراااااامى وفى اقل من ثانية قام جارى وسمعتو نط الحيطة والطوبة دى وقعت من الحيطة..... وحاجة ثريا لها رواية اخرى انا كنت صاحية لحدى قبل شوية وفجاة شالتنى نومة وما سمعت اى حاجة الا صوت البت دى بتكورك يا ود الحرام.... الحررررااااامى واخوها من الخلعة ضربها بكباية الموية القدامو قايلة الحرامى
المهم بعد 5 دقايق مارثون فى كل الاتجاهات عاد موكب الكومندز بالسلامة وبدات روايات جديدة عن فنون المطاردة وبعض المغامرات
عادل ترويسة انت عارف ود الحرام ده مرق منى بشوية انا لمن فتحت الباب كان قدامى ب 20 متر لكن الزول التقول مركب مكنة موتر فى كرعيهو
بشندى وفى راسو عقاب سكرة الزول ده يتخيل لى انا شايفو قبال ده... قاطعه مرزوق المكوجى انت اصلا شفتو لمن تقول شايفو؟
ايوه شفتو لمن انا فتحت الباب كان قدامى وضربت فيهو لمبة عم نصر الدين لكن الزول ده انا شايفو وين الله اعلم
حناطة انا قربت امسك الزول ده لكن تصدقو الزول عريان وممسح بزيت عشان كده انزلق منى
المهم يستطيع الناس ان يقضوا الليل كله حكاوى عن المغامرات كانهم مشتهين ليهم استغاثة جديدة
جاءت مرحلة تفقد الاسود وجحافل الانقاذ عند اقرب ضوء...يالها من مفاجاة كانه ملتقى فى منتدى الكيشة وحريقة وتوصيلة واكاد لا اصدق عينى صلاح القيافة بحالو مع المجموعة....
اجتمع الشمل امام بيت سلافة وجرعات لا يستهان بها من (التطمين) لآل البيت ومافى عوجة وحمدلله على السلامة الماشال حاجة وماعوق ليهو زول
تفرق الجميع الا المنتدياتيه وجلسنا نستريح على مسطبة الكيشة ناخد نفس من المارثون وكل واحد سلاحو قدامو
بدا الكلام توصيلة والله يا صلاح اول مرة اشوف لي زول ساكى حرامى وشاكى بنطلون وقميص
ضحك الجميع فى آن واحد وحريقة بخفة دم انت كنت مجكس واحدة فى الشارع ده بالليل وللا شنو؟
الكيشة بروااااقة امكن الزول ده جايئ من حفلة يا جماعة
قاطعه صلاح القيافة طوالى آى والله كنت فى حفلة عرس واحد صاحبنا فى برى
ضحك توصيلة وقال انت عارفين انو الجناكيز عندهم الحاسة السادسة زى حاسة الزلازل مع الحيوانات
ضحكت وقلت ليهو تقصد شنو يا توصيلة؟
انت عارف يا حبة قصة الحرامى بتاع سلافة الجنكيزة دى انا ما مقتنع بيهو البت دى بتاعت طوابير عملت البرنامج ده كلو عشان تشوف حبيب العمر صلاح القيافة ده القاعد معانا ده وجايئ من حفلة ... ما قلت ليكم الجناكيز عندهم الحاسة السادسة... العن ابو دى صدفة....
اتشهد عباش الكيشة لا حول ولا قوة الا بالله دى والله يا توصيلة اسامة انور عكاشة ما سبقك عليها...
ما تتحسس يا قيافة ان لله فى الجناكيز شئون! هكذا قالها توصيلة
قطعت الكلام بسرعة كدى يا صلاح احكى لينا قصتك مع البت المجنكزة دى
والله يا جماعة زى مابقولو المصريين برئ برئ برئ
القصة بدت من يوم رحلة راس السنة بتاعت شباب الحلة قبل 15 سنة... وكان من ضمن البرنامج القبعة اتنين على الهوا وكانت الصدفة انا مع سلافة قبل ما تجنكز
اها وبعدين قاطعو توصيلة
وكانت الفقرة انو ندعى انو بنحب بعض... وانا اقول كلام لذيذونى لبت لذيذونة وهى تقول كلام نواعم لحبيب... يعنى حب وكده لمدة 10 دقايق وبعدين الجماعة يصوتو منو الحنكو سنين
اها من ديك وعييييك الظاهر البت دى حبتنى وبدت رحلة متاعب بتاعت فرقة الاصدقاء المسرحية
توصيلة بمزاااااااج ومكفكف ضراعو يعنى البت مكسرة فيك من زمن التمثيل.... امااااان ما وقع راجل
دقيقة يا توصيلة انت شفت حاجة.... انا لسه جايييك فى الكلام... ما تمينا اسبوع بعد الرحلة الا والقاها مرسلة لى جواب مع واحدة بتقول فيهو عليك الله ال10 دقايق ديك ما كانت حقيقية عليك الله.... انا شفت فى عينيك اجمل حب وسمعت فى ذبذبات صوتك ارق واجمل حب...القدر جمعنا بالطريقة دى وانت اصبحت صلاح يومى وحالى وشغلى وبالى....
العن ابو الحب الكلكى اللابس ملكى توصيلة بضحكة مجلجلة... حتى كوركنا كلنا فى وكت واحد براااااااحة ما تصحى الناس يا وهم
واصل ياقيافة...
ما اكضب عليكم جماعة عرفت انى مورط وبقيت اكب الزوغة لكن هيهات.... عينك ما تشوف الا النور رسائل على الموبايل 24 ساعة اسمعو البت دى ريادة كيف
1- لو حتى نبدا من الصفر الريدة لازم تستمر
2- صابرمعاك صبرا طويل كاتم العلى
واصلو العلى ما مر يوم بخيال بشر
ولو قلتو قيس والله قيس
بالنسبة لى ما شاف عذاب
لا ضاق الم لا قاسى مر
3- كل ما الريح تطارد الموج
ازيد اصرار واحلف بيك
اغير سكة التيار ...واقول يا انت.. يا اغرق؟!
4- زدنى من دلك شوية.... وكتر الاشواق على
بكرة قلبك يصفو لى .... وتملا بالانوار عينى
اييييييك يا جماعة وكلام كتير قالوه اخر الليل سوى هى والجن المعاها
طوالى خش توصيلة على الطلاق انا لو واحدة قالت سلام يا روحى سلام والله اقع بيها البحر.... انه الحب صدق اللى قال ثم ضاع الامس منا
الكيشة ولع سيجارتو وقال وبوخ الدخان مع كلامو لكن بصراحة يا صلاح البت دى انت بادلتها المشاعر ؟ ولللا احتمال دقست واديت امل ليها ؟ لانو حتكون مجرم حرب فى نظرى
ضحك توصيلة مجرم حرب دى حلوووووة
والله ابدا يا كيشة ما حصل البت دى براها مكسرة فينى... اعمل شنو
قطع الكلام توصيلة على الطلاق ليها حق تتكسر فيك ما كل بنات الحلة مكسرات فيك الله يستر انا خايف فائزة زوجتى تكون مكسرة فيك.....هههههه
ضحك الكيشة ههههههه وكح كح كح مرق دخان سيجارتو وقال العجب منار الدايرة يفرزو ليها العيشة..ههههههه
جلجلت ضحكاتنا كلنا لحدى طيفور سيد الدكان فتح باب الدكان وقفلو....
استغفر الجميع وقال الكيشة الله يجازى شيطانك يا توصيلة
قطعت الكلام اها يا قيافة نرجع لموضوعنا الاساسى زى ما بقول عمر اوم
ههههههههههه تااااانى ضحكة جماعية
اها يا جماعة بعد الطناش داك لمانا كورس طلاب جامعة الخرطوم الصيفى وكنت انا فى فصل الرياضيات التخصص وكانت هى فى الادبى... ومراقبانى طوووولاى بالعيون كانها ديدبان... وبعد يومين حولت من ادبى الى التخصص.... وبقت الحجل بالرجل... دى مصيبة شنو.... وسخنت مسائل البحتة قلت امكن البت تزوغ لكن ويييين حنهرب منو وييين
وطلقت اشاعة فى الكورس انو انا بحبها ومجكسها .... عشان حظر التجوال مع الحسس.... وفى حفلة ختام الكورس جات لابسة لبس اقرب للزفاف ومن اليوم داك انا عرفت انو الورق زاد وفات حدو
اها وبعدين
انتو عارفين رسايل الموبايل لمن بقت تضعف لى البطارية... غيرت الرقم ما نفع.... قفلتو ما نفع.... خليت الحلة ما نفع..... انشغلت فى الجامعة ما نفع.... اتخرجت واشتغلت والحال فى حالو زى ما انتو شايفنو اسى فى قعدتنا دى
توصيلة مكفكف ايدينو الاتنين وبيحفر بالماسورة فى الواطة اسمع الجنكيزة دى البتحبك اكتر من 20 سنة دى زى قطعة الارض الحيازة انا بريحك منها تب
الليلة يا قيافة الله يمرقك من ابو الافكار يا سيد... توصيلة انا اكتر زول فاهم حركاتو
والله يا حبة انت ما فاهم اى حركة وللا غنية من عبد العظيم حركة
القيافة بيتشهق.. اها يا توصيلة قول
البت دى انت تشوف ليك طريقة تلاقيها وتقول ليها انا مشيت لفكى واصل اسمو ابودبورة كان لواء فى سلاح(المهمات) وقال لى انت يا صلاح عاملين ليك عمل عشان كده ما قادر تبادل سلافة الحب
اها وبعدين
انتى تحبى اى زول فى الحلة لمدة 3 شهور وانا احب زولة فى الحلة لمدة 3 شهور وده كلو عشان الجن يقتنع انو الناس اتفارقو ومهمتو انتهت ويطلع يتخارج ونرجع لبعض
قاطعو الكيشة انت الليلة طاشم ولللا شنو يا موصلاتى انت
طشمة شنو يا كيشة انت ؟! ده حل عبقرى لزولة برة الشبكة وعندها ارتخاء فى العصب التاسع فى القلب... يا قلب انت
ههههههههههه ضحك حريقة لاول مرة وقال قلب مكنة يا فردة هههههههه
ها ياجماعة دا كان وين ؟ cable كان مدفون تحت الواطة ولللا شنو؟هههههههههههه
طيب كمل يا توصيلة نعسنا دايرين ننوم
بعدين اخوك حيكون العاشق البديل للجنكيزة دى وانا حالعب ليك معاها بخطة 4 -4-2..... واقص ليك ليها فى الجية والمشية واشغل ليك وكتها لمن تنسى حاجة اسمها صلاح القيافة وحاجة اسمها حب زاتو
كيف الكلام ده يا عبقرينو زمانو.... ورينا اسى قبل بكرة
انت يا حبة دايما عندك راى فى مهاراتى انت يا ولد عندك راى فى هيثم مصطفى ولللا شنو؟ههههههههه
اسمعو يا جماعة انا من بكرة استلمت ملف الجنكيزة سلافة ولو ما طيرت ليك القيافة من مخها ارحل من الحلة ولللا اقول ليكم فائزة تكون طلقانة
ههههههههههه ضحكت شديد لمن وقعت فى الواطة تاااااانى جاب سيرة البحر
ههههههههههه ضحك الجميع
اسمعو نشتت اسى يا شباب عشان النوم لكن يا صلاح ما تنسى الخطة بس كلمها بكلام الفكى ابو دبورة وخلى الباقى على... وما تنسى كسر ليها عويناتك السمحات ديل لانو الجناكيز جنهم جن كسير العيون
وقفنا كلنا فى آن واحد وظهرت علامات الرضا فى عيون صلاح وعلامات التحدى فى عيون توصيلة الموصلاتى...... ولكن قبل ما نتحرك وقفت عربية الدورية (الكندورة) ووقفونا كلنا انتباه
توصيلة بصوت رخييييييم انا اخوك انت امااااان ما وقعو رجال سيخ وتسليح انصاصى الليالى
الضابط ابو دبورة التقول اخو الفكى ابو دبورة انتو جاييين من وييين وده شنو الشايلنو ده شغالين رباطة ولللا شنو؟
عباس الكيشة رباطة كيف يا كمندان شكلنا كده بيشبه الهمباته؟
الضابط نزل من العربية رباطة ومفلهمين كمان.... كمان الهمباتة عندهم شكل غير شكلكم ده.... فتش الشباب ديل يا عسكرى....
فتشونا ليك فتيش العيش الفتريتة.... ما عندهم حاجة يا جنابو
حريقة يا جماعة نحنا كنا ساكين حرامى وقعدنا هنا نتونس بس
الضابط بغلاظة انتو شغالين شغلنا يعنى؟ وكمان معاكم حديد كلانكشوف ومسك ماسورة توصيلة بيدو وكانت المفاجاة
انتو ضربتو جماعة بسلاحكم ده... ده شنو الدم ده الفى الماسورة
وبدت الكبكبكة والرجفيفبة والجرسة.... وكلنا سوى والله العظيم كنا ساكين حرامى وده بيتنا ممكن تدق الباب وتسال عن الموضوع ...الكيشة بتنهد
عسكرى ارفع الجماعة ديل فى البوكسى ويللللت على القسم
الله يلعنك يا توصيلة الدم ده شنو الفى الماسورة ده؟
يا جماعة ده دم كلب خلعنى لمن كنت جارى ورا الحرامى ضربتو على راسو وطلعت روح واحدة من ارواحو السبعة
احتمال اكمل ليكم القصة فى الحراسة يا جماعة شكلنا كده بايتين بايتين
لفوا بينا الليل كلو وقريب الصباح نزلونا مسافة 5 كيلو من الحلة
وتوصيلة يصرخ الله يلعن يومك يا سلافة.... واليوم الحبيتى فيهو القيافة واليوم الحتحبينى فيهو
انتهى.....