آخـــر الــمــواضــيــع

  • مواضيع مميزة
  • <-> ( مـــافــــي أي عــوجــــة إلا أبـــــــــوك مـــات !.!!!!! <->
    صفحة 1 من 3 123 الأخيرةالأخيرة
    النتائج 1 إلى 10 من 25

    الموضوع: انا بكرهك ... الشاعره نضال حسن الحاج

    1. #1

      افتراضي انا بكرهك ... الشاعره نضال حسن الحاج

      انا بكرهك
      بس بكرهك..!
      انا بكره اليوم الصنع قلبا يكورك ويندهك
      انا بكره الوطن البلم شرف الغرام المنتهك
      من ياتو باب طليت علي ما كنت اصلا بشبهك
      انا بكرهك
      انا شلت ريدك في القليب وسقيتو من دم العروق
      صنقعت دليت النجم دنقرت كبيت نور وشوق
      وعصرت موية الانتظار ختيتا في وجع الحروق
      وكان النتيجة تبيع هوي هو اريتو كان سويتلو سوق
      انا بكرهك
      من وين اجيب ليك الدموع
      من وين اصنقر حيل كلام كان امنيات قلبو الرجوع
      من وين اذا هتك الضلام حيل خيلي القالك شموع
      لكني مجبور اطردك واقفل وراك باب الضلوع
      شديت رحالاتي ومشيت وكتين هتك حيلك هواي
      ارتحت في موجي ورسيت
      لا حرك الموج البحر
      لا صد فلبي ولا قسيت لكن طلعت خيال عشم
      ضمخ رؤى الوجع المميت
      انا بكرهك
      قدر اشتهاي
      انا بكرهك
      قدر الغرام الكان زمان كابت مساماتي وهواي
      انا بكرهك
      قدر اني ما لودت بيك كريات شراييني ودماي
      انا بكرهك
      قدر اني غنيتك غناي
      من وين دخلت علي مدن شاخت من الوجع الاليم
      من وين طرقت جدار قلب لقح هوى العشق العقيم
      من وين سخت شمسك علي
      كانت سماي مليانة غيم
      فتق جراحــاتي
      فتق جراحاتي وامش
      خليني في لهب الجحيم
      انا قلت ليك..
      انا بكرهك
      قدر المواسم الشادة خيل الريد عليك
      انا بكرهك
      قدر المصائب الحارسة بوابات مجيك
      انا بكرهك
      نفس المساحة وحجم قلبي الكان تملي بيشتهيك
      بقى بكرهك
      واتوكل ارحل مني فوت
      حرمان علي قلبي الكلام
      كان غيرك اجتاحو السكوت
      خليهو قلبي الاندفن
      تنسج عليه العنكبوت
      اوخلي.... من بعدك يموت
      الموت اخير......
      من اني افضل
      في رحابك وفي رجاك
      انا كنت لو غاب القمر دائما بضوي
      ضلام دناك
      وانا كنت لو غيمك رحل
      بطلع عشان اسكن سماك
      وانا كنت لو بردك نزل
      بوقد صوابعي لهب حداك
      لكن منو القدر كدا
      والله لو انا في محلك
      بنسج الشمس احترام
      واهديها ليك متمددة
      بفتح كراريس الكلام
      اختار حروفي واجردا
      بنبش قبور المستحيل
      كلمات شكر متفردا
      لكن خسارة على قلب
      حباك بلا ما يعرفك
      انعل ابو القلم العلي دفتر غناك دمو انسفك
      انعل ابو الشعر الغشاني وغنى فيك والفك
      منعول غناي
      منعول غناي كان ما امتطيت خيلي وبقيت اتاسفك
      بتاسفك وكتين عيوني بسوقن الشوق لي انتظارك
      لما ليلي يسوق محاسنو وينهزم عندك نهارك
      لما ابكي انهزامي عشان ابارك انتصارك
      لما كوكبي ساب مدارو رحل عشان يسكن مدارك
      كنت مالي زمان ومالك
      لكن وحاتك بكرهك
      ندمان
      ندمان على عمرا معاك ضيعتو
      ضيعتو في غفلة زمن
      ندمان علي
      دمعا سكبتو على رضاك بلا تمن
      انا كنت بحلم في وجودك ينكسر خاطر الشجن
      لكن رضاي عليك عشم ابليس قصاد جنة عدن
      انا بكرهك
      كلما يطول ليلي ويواتيه العذاب
      انا بكرهك
      كل ما القلم يركب مصاعب الدنيا
      يمشي على الكتاب
      انا بكرهك
      كل ما الفراق كتل مضامين العشق سدالو باب
      انا بكرهك
      قدر العيون ما تلبس التوب الزراق
      تتوضأ موية الانتحاب
      انا بكرهك
      من كل باب انا بكرهك
      واتوكل ارحل من جواي
      غلطان اذا قلبك هداك قال ليك حا تفضل غناي
      غلطان اذا عقلك رضخ لي ظن يقول انك حداي
      والله ما فارق معاي
      انا كنت ناوي اجملك
      بس كنت ناوي اجملك
      وامسك مضامين اللغات
      من فيض حروفي اكملك
      ترحل علي درب العشم
      بي زاد هواي احملك
      وكتين اخش قلبك جرا
      واقطع قليبي وادملك
      ندمان منو
      انا غايتو ما ندمان عليك
      اتوكل ارحل من جواي عيش العذاب الباقي فيك
      ولو قلبك اتجرأ رجع
      حقك تلومو علي مجيك
      شان قلبي انت مليتو دم
      ياخ فلبي انت مليتو دم
      ما عادلو باقي يسبو ليك
      على كل حال
      انا بكرهك
      عدد الحصى وعدد الرمال
      انا بكرهك
      عدد الصواب والاحتمال
      انا بكرهك
      عدد الحقائق والخيال
      انا بكرهك
      عد الشنة وعدد الجمال
      انا بكرهك
      عدد الاجابات والسؤال
      انا ابكرهك
      عدد الشعر ماسنة سيف الارتجال
      انا بكرهك
      عدد اللي ممكن والمحال
      انا بكرهك
      عد ما زمان قت ليك تعال
      انا بكرهك

      مستورة حالي وراك وفوت
      يا دابو ليلك همو طال
      مستورة حالي وراك وفوت
      يا دابو ليلك همو طال
      عاى كل حال
      انا بكرهك
      ][ . مؤسف . ][
      حينما تتعلق بأفراد وتشعر انك ناقص بدونهم فهم بالنسبة
      لك كل حياتك...

      بينما أنت مجرد نكرة في أواسطهم آو أسافلهم...

    2. #2
      اذاعي ذهبي الصورة الرمزية alshatrabi
      تاريخ التسجيل
      Dec 2008
      الدولة
      السودان الخرطوم
      المشاركات
      4,817

      أوسمة العضو


      افتراضي

      انا شلت ريدك في القليب وسقيتو من دم العروق
      صنقعت دليت النجم دنقرت كبيت نور وشوق
      وعصرت موية الانتظار ختيتا في وجع الحروق
      وكان النتيجة تبيع هوي هو اريتو كان سويتلو سوق
      التحية للشاعره نضال حسن والتحية الخاصه لشخصك

    3. #3
      Moderator الصورة الرمزية halakhojali
      تاريخ التسجيل
      Oct 2008
      الدولة
      الخرطوم
      المشاركات
      1,833

      افتراضي

      شكرا عمار وبرغم الكره إلا أن الكلمات عبرت عن حب كان كبير وحقيقي
      نقره لتكبير أو تصغير الصورة ونقرتين لعرض الصورة في صفحة مستقلة بحجمها الطبيعي

    4. #4
      إذاعي الصورة الرمزية محى الدين دقروس
      تاريخ التسجيل
      Jan 2009
      الدولة
      القاهرة مصر
      المشاركات
      415

      افتراضي

      جمعة مباركة اخى عمار
      وشكرا على هذه الكلمات والتحية لكوكب جامعة الجزيرة الاخت المبدعة نضال
      والتى التقيتها بمبانى مركز شباب امدرمان وسمعت منها هذه المنظومة الجميلة
      فى امسية من اماسى المركز الحالمة ,
      فقلت لها بالجد يا نضال اجمل مافى القصيدة دى
      انك كتبتيها قبل ما اعرفك ..
      ..ولا كيف ؟

    5. #5

      افتراضي

      بس البنعرفو انو البحب ما بكره ؟؟

    6. #6
      اذاعي متميز الصورة الرمزية ميرغني النقي
      تاريخ التسجيل
      Feb 2009
      الدولة
      أمدرمان
      المشاركات
      1,188

      افتراضي

      والله بالرغم من أنها من قصائد الذم وتصرخ بالكراهية للطرف الآخر، إلا أنها في غاية الإبداع والمبدع مبدع أينما كان، تحياتي وإعجابي للشاعرة نضال وشكري وتقديري لك.
      أنا شاعرٌ ما قال بيتاً واحداً
      وقصائدي غضبٌ وجرحٌ دامي
      حطمتُ أسناني جميعاً عندما
      حاولتُ يوماً أن أفكَّ لجامي

    7. #7
      عضو
      تاريخ التسجيل
      Feb 2009
      الدولة
      الخرطوم
      المشاركات
      157

      افتراضي

      قصيدة جميلة ولكنها تدل علي كره
      وحسرة وندم بعد حب حقيقي وصادق

    8. #8
      عضو الصورة الرمزية عاطف الجندى
      تاريخ التسجيل
      Jul 2008
      الدولة
      القاهرة
      المشاركات
      65

      افتراضي

      شكرا لمنقولك أخى عمار
      منقول جميل و قصيدة
      رائعة
      أخوك
      أحبكم في الله
      أخوكم
      عاطف الجندي
      عضو مجلس إدارة اتحاد كتاب مصر


    9. #9
      اذاعي فضي
      تاريخ التسجيل
      Sep 2008
      الدولة
      الخرطوم
      المشاركات
      1,593

      افتراضي

      مية المية..كلمات ليست كالكلمات
      بالتوفيق

    10. #10
      عضو الصورة الرمزية نهي النيل
      تاريخ التسجيل
      Jan 2010
      الدولة
      ام درمان
      المشاركات
      5

      افتراضي

      شـكــ وبارك الله فيك ـــرا لك ... لك مني أجمل تحية . اخ عمار

    صفحة 1 من 3 123 الأخيرةالأخيرة

    ضوابط المشاركة

    • لا تستطيع إضافة مواضيع جديدة
    • لا تستطيع الرد على المواضيع
    • لا تستطيع إرفاق ملفات
    • لا تستطيع تعديل مشاركاتك
    •